February

Atun King Esekaia a fókkun semmwen, a tingormaw ngeni Jiowa an epwe echikara. Iwe, Jiowa a echikara. (2 King 20:​1-6) Iwe nge, atun ewe aposel Paul a tingorei Jiowa an epwe amóeló ‘eu samau a fokun metek ren,’ Jiowa ese amóeló an na osukosuk. (2 Kor. 12:​7-9) King Erot a mochen nieló ekkewe aposel Jemes me Piter. Jemes a ninniiló, nge emén chónláng a amanawa Piter. (Föf. 12:​1-11) Eli sipwe ekieki, ‘Pwata Jiowa a seláni Piter nge esap Jemes?’ Ewe Paipel ese erá pwata. Nge sia tongeni lúkúlúk pwe ‘esap wor mwälin’ féfférún Jiowa kewe. (Tut. 32:4) Fán ekkóch, eli Jiowa esap pélúweni ach kewe iótek lón ewe napanap sia mochen. Nge pokiten sia lúkúlúk pwe Jiowa a kan chék pélúweni ach kewe iótek lón ewe napanap mi tong me pwúng, iwe sisap ngúnúngúnúngawa ifa ussun a filaatá le pélúweni ach kewe iótek.—Hiop 33:13. w23.11 21 ¶6

Ewe soumakken Paipel Jemes a erá pwe ekkewe aramas mi tipáchem iir ra “tipemecheres le álleasochis.” Ekieki met weween ena itiitin kapas. A lamot sipwe mochen me mómmólnetá chék le álleasochisi chókkewe Jiowa a ewisa ngeniir ekkóch nemenem. Pwúngún, Jiowa ese mochen ach sipwe álleasochisi emén mi erenikich ach sipwe álleasolapa An kewe allúk. (Föf. 4:​18-20) Eli sia meefi pwe a mecheres ach sipwe álleasochisi Jiowa lap seni aramas, pokiten an emmwen a fókkun múrinné. (Kölf. 19:7) Nge ekkewe aramas mi nemenikich a weires ach sipwe álleasochisiir pún rese unuséch. Iwe nge, Semach we lón láng a fen ngeni ekkewe sam me in, néúwisin mwú, me ekkewe mwán mi ásimaw och nemenem le nemenikich. (SalF. 6:20; 1 Tes. 5:12; 1 Pet. 2:​13, 14) Atun sia álleasochisiir, sia enletin álleasochisi Jiowa. w23.10 6 ¶2-3

Eú alen ach sipwe apéchékkúla ach lúkú, ina ach ekieki án Jiowa manaman. A wor an manaman le apwénúetá meinisin met a eáni pwon. A tongeni féri ena pún i ewe Kot mi Unusen Manaman. (Hiop 42:2; Mark. 10:27; Efi. 3:20) A alúkúlúkú ngeni Apraham me Sara ar repwe néúni emén át lón ar ierin chinnap. (Ken. 17:​15-17) A pwal ereni Apraham pwe mwirimwirin kewe repwe fénúeni ewe fénú Kanaan. Atun mwirimwirin Apraham kewe, ekkewe chón Israel, ra slave lón Isip ren fite fite ier, usun itá ena pwon esap tongeni fis. Nge a fis. A ereni Maria, ewe esaamwo tori mwán, an epwe néúnatiw Néún we. Ena mettóch epwe apwénúetá met Jiowa a pwonei fitengeréú ier me mwan, lón ewe tánipiin Eten! (Ken. 3:15) Atun sia ekieki usun meinisin án Jiowa kewe pwon me ifa usun a apwénúretá, sia weweiti pwe a watte an manaman. Iwe, epwe péchékkúleló ach lúkú an we pwon usun ewe ótót séfé.—Jos. 23:14; Ais. 55:​10, 11. w23.04 28 ¶10-12

Jiowa a kan pélúweni án Tafit tingorei an epwe angasaaló. (1 Sam. 19:​10, 18-20; 2 Sam. 5:​17-25) Sia pwal tongeni eáni ena esin lúkúlúk. (Kölf. 145:18) Neman Jiowa esap pélúweni ach kewe iótek lón ewe napanap sia ekieki. Paul a tingorei Kot an epwe angei seni ewe ‘fölun ira lon fitukan.’ Fán úlúngát, Paul a tichikin iótek fán iten an na osukosuk mi áweires. Jiowa mi pélúweni an kana iótek? Ewer, nge esap lón ewe esin napanap Paul a mochen. Jiowa ese angei seni an na osukosuk, nge a fen fang ngeni ewe péchékkúl mi lamot pwe epwe sópweeló le angang ngeni fán túppwél. (2 Kor. 12:​7-10, TF) Fán ekkóch, eli pélúwen ach kewe iótek a sókkóló seni met sia ekieki. Sia tongeni lúkúlúk pwe Jiowa a fókkun silei ifa ussun epwe awora ngenikich álillis mi fókkun fichiitikich. A pwal mwo nge “tongeni föri mettoch meinisin lap seni mine sia tongeni tüngor ika ekieki.” (Ef. 3:20) Ina popun, a tongeni pélúweni ach kewe iótek lón ewe atun are napanap sise ekieki ngeni. w23.05 8-9 ¶4-6

A mmen lamot ach sipwe ekieki án Paipel we pwon usun ewe manawsefál epwe fis lón mwachkkan. Pwata? Pún sise silei weiweitáán eú semmwen mi chou epwe torikich are weiweitáán málóón emén attongeach. (SalAf. 9:11; Jas. 4:​13, 14) Ach ápilúkúlúkún manawsefál a tongeni álisikich le likiitú fán ekkena esin weires. (1 Tes. 4:13) Ewe Paipel a alúkúlúkú ngenikich pwe Semach we lón láng a silefichiikich me fókkun tongekich. (Luk. 12:7) Ekieki lamoten án Jiowa Kot epwe fókkun silefichiikich ren an epwe amanawakichetá fitifengen me napanapach kewe me minne sia chemeni. Jiowa a fókkun tongekich ren an atufichi ach sipwe eáni manaw tori feilfeiló. Inaamwo ika sipwe máló, nge i epwe amanawasefálikich. Pwata sia tongeni lúkú ewe pwon usun manawsefál? Pokiten ewe emén mi eáni ena pwon, a wor an mochen me pwal an manaman, are tufich le apwénúetá. w23.04 8-9 ¶2-4

Josef me Meri ra angangfengen le akkapéchékkúla ar riri ngeni Jiowa. Ra weweiti pwe mi lamot ar repwe fel ngeni Jiowa lón ar famili. (Luk. 2:​22-24; 4:16) A ifa me fókkun múrinnéén ena leenien áppirú ngeni ekkewe mi pwúpwúlú lón ei fansoun! Iká a wor néúmi ussun chék Josef me Meri, iwe eli oupwe kúna pwe a pwal weires ngenikemi le fiti mwiich are féri kókkótun ámi famili fel. Eli epwe fen kon lapóló weiresin ámi oupwe akkóta fansoun le káéfengen are iótekfengen lón ámi pwúpwúlú. Iwe nge, chemeni pwe atun oua fel ngeni Jiowa lón ámi pwúpwúlú, oupwe ririéch ngeni i me pwal ririéch lefilemi. Ina minne, oupwe akkomwa lón manawemi ámi fel ngeni Jiowa. Iká a wor osukosuk lón ámi pwúpwúlú, eli ouse kon sani le férifengeni ámi famili fel. Iká ina, oupwe poputá le ekieki och mettóch mi chék mwoch me oupwe pwapwaiti. Ámi féri ena, epwe tongeni apéchékkúlaló ámi riri me ámi mochen féri ekkewe mettóchun ngún lón ámi pwúpwúlú. w23.05 22 ¶7-8

Ifa ussun ena esin mennin are niwokkus a álisi Opataia? A álisi an epwe emén mi wenechar me alúkúlúk, ina minne ewe king a ewisa ngeni an epwe wisen emmweni angangen lón ewe imwen king. (Apépé ngeni Nehemia 7:2.) Án Opataia niwokkusiti Kot a pwal álisi an epwe fókkun tipepwora, ina ewe napanap a fókkun lamot ngeni. I a manaw lemwúún ewe king mi ngaw, King Ahap. (1 King 16:30) Pwal och, pwúlúwen Ahap we itan Jesepel mi fel ngeni Paal, a fókkun oputa Jiowa, ina minne a sótun amóeló fel mi enlet seni lón ewe mwúún Israel mi nóm ennefen. A pwal mwo nge nieló chómmóng néún Kot kewe soufós. (1 King 18:4) Lupwen Jesepel a poputá le kútta néún Kot kewe soufós an epwe nireló, Opataia a angei 100 me leir me aoper ‘akalime lon eu föimw, a pwal amongöniir pilawa o aünüür koluk.’ (1 King 18:​13, 14) Iká epwe pwá ena, Opataia, ewe mi tipepwora epwe fókkun ninniiló. Ewer, Opataia i emén aramas, me ese mochen máló. Nge i a tongei Jiowa me chókkewe mi angang ngeni lap seni pwisin manawan. w23.06 16 ¶9-10

Jiowa a sópweeló le emmweni néún kewe aramas lón ei fansoun ussun met a féri me lóóm. A féri ena ren an we Kapas me Néún we, mékúren ewe mwichefel. Ka tongeni kúna ekkewe pisekin ánnet mi pwáári pwe Kot a sópweeló le néúnéú aramas lón ach ei fansoun? Ewer. Áwewe chék, ekieki ussun met a fis mwirin ewe ier 1870. Charles Taze Russell me chienan kewe ra poputá le weweiti pwe lón ewe ier 1914 epwe fis och mettóch a mmen aúchea ussun ewe Mwúún Kot. (Tan. 4:​25, 26) Ra silei ena ren ar káéfichi Paipel me ra lúkú pwe repwe kúna pwénútáán ekkewe oesini. Itá Jiowa a emmweniir? Fókkun ewer! Minne a fis wóón fénúfan lón 1914 a ánneta pwe án Kot we Mwú a poputá le nemenem. A fis ewe Áeúin Maunen Fénúfan me a pwal fis málapalap, chechchechin fénú, me lengita. (Luk 21:​10, 11) A fókkun ffat pwe Jiowa a néúnéú ekkena mwán mi letipwenechar le emmweni néún kewe aramas. w24.02 22 ¶11

Pokiten kich néún Jiowa aramas, sia silei pwe a tongekich me a mochen sipwe eáni eú manaw mi fókkun múrinné. (Rom 8:​35-39) Sia pwal lúkúlúk pwe fansoun meinisin án Paipel kewe kapasen emmwen ra álilliséch ngenikich atun sia apwénúretá. (Ais. 48:​17, 18) Iwe nge, ifa usun ika a torikich osukosuk mi weiweitá? Áwewe chék, eli emén chón ach famili a elichippúngúkich ren och mettóch. Eli a úrikich eú watteen semmwen mi aúkúkú met sia tongeni féri lón ach angang ngeni Jiowa. Eli sia kúna osukosuk pokiten fisin eú feiengaw watte. Are, eli sia kúna riáfféúmwáál pokiten ach lúkú. Atun sia kúna ekkena esin weires, eli sipwe ekieki: ‘Pwata a fis ngeniei ei sókkun? Ua féri met mi mwáál? A pwári pwe Jiowa ese chúen efeiéchúei?’ Ka pwal meefi ekkena esin memmeef? Ika ewer, iwe kosap lichippúng. Chómmóng néún Jiowa kewe chón angang mi tuppwél ra pwal weires ren ekkena esin memmeef.—Kölf. 22:​1, 2; Ap. 1:​2, 3. w23.04 14 ¶1-2

Atun sia kúna sóssót, sia mwittir ttiisenikich sókkun ekiek me féffér epwe tongeni atai ach riri ngeni Kot. Jiowa a menei ach sipwe álleasochisi i ‘ren unusen letipach.’ (Rom 6:17) Minne a kan erenikich ach sipwe féri, a múrinné fansoun meinisin, me sise tongeni ekkesiwili an kewe allúk. (Ais. 48:​17, 18; 1 Kor. 6:​9, 10) Ewe Tefil a áeá féfférún akkachofesá me eriáfféú lón pekin memmeef le sótun áweiresi ach sipwe tipeppós. A mochen an epwe ‘oromakichelo,’ are atai ach riri ngeni Jiowa. (1 Pet. 5:8) Aramas ra eniwokkusu ekkewe Chón Kraist lón fansoun ekkewe aposel, awater, me nireló pokiten ar úppós le amwéchú ar túppwél. (Föf. 5:​27, 28, 40; 7:​54-60) Setan a sópweeló le áeá riáfféúmwáál lón ach ei fansoun. A fókkun pwá ena angangen kirikiringaw ren met ekkewe chón ú ngenikich ra féri ngeni chienach kewe lón Russia me pwal lón ekkóch fénú. Setan a pwal áeá riáfféúmwáál, a pwal áeá “angangen atuputup.”—Ef. 6:11. w23.07 15-16 ¶6-9

Lapólóón óm kákkáé ewe Paipel, epwe pwal ina péchékkúlelóón óm tongei Jiowa. Ena tong a amwékútuk le apwénúetá met ka káé. Ka féri ekkewe kefil mi múrinné mi lóngólóng wóón án Paipel kewe kapasen emmwen. Ka émúrinnéló féfférum me napanapom pokiten ka mochen apwapwaai Kot. Ussun chék án emén semirit áppirú seman kewe me inan mi tongei, en ka pwal áppirú Semom we lón láng. (Ef. 5:​1, 2) Sipwe pwisin eisinikich ekkeei kapas eis: ‘Ái tongei Jiowa iei a péchékkúleló lap seni ewe atun úa kerán wiliiti emén Chón Kraist? Seni ewe atun úa papatais, úa alapaaló ái áppirú Jiowa ákkáeúin lón ái pwáári tong ngeni chienei kewe chón lúkú?’ Iká a patapateló ewe tong ka eáni me lepoputáán, kosap lichippúng. A pwal fis ena ngeni ekkewe popun Chón Kraist. Jises ese fangetá wóór, me i esap pwal fangetá wóóch. (Pwär. 2:​4, 7) A silei pwe sia tongeni káé ach sipwe meefisefálli ewe tong sia meefi ewe atun sia kerán káé ewe Paipel. w23.07 8 ¶2-3

Ewe aposel Piter a mwáálliló fán fite. Áeúin, Piter a pwáári pwe a fókkun lúkúlúk wóón pwisin i, me a sikesik le erá pwe epwe túppwél inaamwo iká ekkewe ekkóch aposel ra likitaaló Jises. (Mark 14:​27-29) Mwirin, fán fite Piter ese likiitú le mammasa. (Mark 14:​32, 37-41) Mwirin, atun eú mwichen aramas fán néúr ketilas ra etto pwe repwe aresini Jises, Piter a likitaaló Jises. (Mark 14:50) Fán úlúngát, Piter a amam Jises, a pwal mwo nge ékképél pwe ese sissilei. (Mark 14:​66-71) Met meefien Piter atun a mirititi choun an tipis? A meefi watteen metekin letipan me a fókkun kechiw. (Mark 14:72) Jises ese fen esiita Piter ren met a mwáálliló wóón, nge a ereni chienan na pwe epwe ewisa ngeni eú wis mi aúchea. (Jon 21:​15-17) Piter a silei pwe a fókkun watte tipisin, nge a achocho le féri minne mi pwúng. Pwata? Pokiten a lúkúlúk pwe Jises, néún we Masta a chúen tongei i. Met sia káé? Jiowa a mochen ach sipwe lúkúlúkú pwe a tongekich me tongeni omusakicheló.—Rom 8:​38, 39. w24.03 18-19 ¶13-15

Féfférún lisowumwáál a tongeni efisi óm kopwe sáw, meefi pwe ese wor aúcheaóm, pwopwomwáál, me atai óm famili. A ffat pwe a eú alen tipáchem óm kosap etiwa án ewe fefin mi tiparoch we etiwetiw. Me lúkún an péút seni chómmóng aramas mi féri féfférún lisowumwáál ar riri ngeni Jiowa, a pwal toriir ekkewe esin semmwen ra tongeni máló ren. (SalF. 7:23) Än Salomon Fos sópwun 9 wokisin 18 a erá: “Chokewe mi wasöla ren [neminnewe] ra fen nom epin ewe lenien sotup.” Iwe, pwata chómmóng ra etiwa án neminna we etiwetiw mi emmweniir ngeni feiengaw? (SalF. 9:​13-18) Sasingin me kachitoon kapasingaw, ina eú minen otuputup mi kon terú mi lamot sipwe túmúnúkich seni. Ekkóch ra ekieki pwe ese wor ngawen ar katol sasingin me kachitoon kapasingaw. Nge ren enletin, sasingin me kachitoon kapasingaw a efeiengawa aramas, efisi ar resap chúen ésúfélúr are ésúúfélú ekkewe ekkóch, me a fókkun weires ar repwe úkútiw le kakkatol. Iká emén a kúna och sasingin kapasingaw, a weires an epwe atowu seni lón ekiekin. Nge ewe a fen kon ngaw, ese ámálóói an mocheniangaw nge e fen apéchékkúlaló. (Kol. 3:5; Jas. 1:​14, 15) Ewer, chómmóng chókkewe mi kakkatol sasingin me kachitoon kapasingaw ra turulong lón tipisin lisowumwáál. w23.06 23 ¶10-11

Inaamwo iká eli ekkewe ekkóch ra ú ngeni án Britain me Merika Nemenem, nge resap tongeni wii lón an nemenem. Sia silei ena pwe ewe “fau” mi liosuetá án Kot we Mwú epwe apachchacha apachapachen pechen ewe uluulun mi liosuetá án Britain me Merika Nemenem. (Tan. 2:​34, 35, 44, 45) Ka lúkúlúk pwe án Taniel we oesini ussun ewe apachapachen peche mi ffér seni mechá me pwúl mi enlet? Iká ewer, iwe epwe kkúú napanapen óm áeá manawom. Kesap nefótófót wóón óm achocho le alapaaló noum moni me woum pwe ka silei pwe ei ótót mi ngaw epwele taló. (Luk. 12:​16-21; 1 Joh. 2:​15-17) Óm weweiti ena oesini epwe pwal álisuk le kúna lamoten ewe angangen afalafal me asukula aramas. (Mat. 6:33; 28:​18-20) Mwirin óm káé ena oesini, pwata kese eisini pwisin en ei kapas eis, ‘Ekkewe kefil úa filaatá, ra pwáári pwe úa lúkúlúk pwe án Kot we Mwú epwele amóeló meinisin mwúún aramas?’ w23.08 11 ¶13-14

Kopwe tipetekison me mirititi pwe kese tongeni féri meinisin met ka mochen féri iei pokiten ierum, péchékkúlen inisum, are nónnómun manawom. Kopwe áppirú Parsilai, iká epwe weires ngonuk óm kopwe apwénúetá eú wis pokiten péchékkúlen inisum are ierum, kopwe tipemecheres le apasa aapw. (2 Sam. 19:​35, 36) Kopwe áppirú Moses, kopwe etiwa álillis seni ekkewe ekkóch me ewisa ngeniir ekkóch angang iká mi tufich. (Eks. 18:​21, 22) Iká ka tipetekison, kese ekieki och mettóch mi luló seni met ka tufichin féri mi tongeni achchouketiw. Kosap pwal ekieki pwe wisom ekkewe kefil mi ngaw ekkewe ekkóch ra eáni. Me esap fansoun meinisin, sia tongeni túmúnúúr seni mwirilóón ekkewe kefil mi ngaw ra eáni. Áwewe chék, emén naw a filaatá an epwe úkútiw le angang ngeni Jiowa. Ena kefil a tongeni eletipechowu ekkewe sam me in. Iwe nge, ekkewe sam me in mi tipi ngeni pwisin iir án néúr we eáni eú kefil mi ngaw, a achchouretiw. Esap ina met Jiowa a ekieki ar repwe oseni. w23.08 29 ¶11-12

Samison ese unuséch ussun chék kich, ina popun fán ekkóch a kefilingaw. Mi wor eú kefil a féri a eselipa ngeni an epwe fókkun feiengaw. Mwirin án Samison wiseni ewe wis soukapwúng ren och fansoun, “a sani eman fefin itan Telila mi nom lon ewe lemolun Sorek.” Nge me mwen ena, a fen kófót me ekiekin pwúlúweni emén fin Filistia, nge ena ekiek a “feito seni ewe Samol mi Lapalap,” ewe “a kütta och popun an epwe maun ngeni ekewe chon Filistia.” Mwirin, Samison a ló me nóm lón imwen emén fin lisowu lón Kasa eú telinimw lón Filistia. Lón ena atun, Kot a ngeni Samison péchékkúl an epwe uwealó asamalapen ena telinimw, iwe ese chúen túmún ena telinimw. (Souk. 14:​1-4; 16:​1-3) Iwe nge, an riri ngeni Telila a sókkóló pún ese mwáál neminna emén fin Israel, iwe ese suuki ngeni an epwe maun ngeni ekkewe chón Filistia. Telila a angei watteen moni seni ekkewe chón Filistia ren an epwe afangemá Samison. w23.09 5 ¶12-13

Mirit a tongeni álisikich le tipepwetete. Emén mi mirit a pwáári an nemenifichi pwisin i atun a kúna sóssótun an lúkú. Fán chómmóng lupwen aramas ra kapas eis ngenikich, rese pwal erenikich ewe popun ra eáni ena kapas eis. Ina popun, me mwen ach sipwe pélúweni, mi éch sipwe weweiti pwe eli sisap silei met a amwékútú ena emén an epwe eáni ena kapas eis. (SalF. 16:23) Ekieki ussun féfférún Kition ngeni ekkewe re Efraim. Fán song ra eisini iká pwata ese kériir ar repwe fiti le maun ngeni chókkewe mi oputa chón Israel. Nge met wesewesen popun ra fókkun song? Ese lifilifil met popun ra song, nge Kition a súféliti meefier me a mirit le pélúweniir fán pwetete. Ewe Paipel a áiti ngenikich pwe lupwen a pélúweniir lón ena esin napanap, iwe “ar song a kisikisitiu.”—Souk. 8:​1-3. w23.09 16 ¶8-9

Ese wor eú riri lefilen emén sam me néún át a tongeni léllé ngeni ewe riri lefilen Jiowa me Jises. Ese mwáál a fókkun weires letipen Jiowa atun a kúna án aramas féfféringaw ngeni Néún we, oputa, me sótuni. Iká a má seni emén sam are in néún, iwe ra fókkun weweiti úkúúkún letipechoun ena memmeef. Sia fókkun lúkú ewe manawsefál nge atun emén attongeach a má senikich, a chúen metek letipach. Ena pwóróus a álisikich le weweiti meefien Jiowa atun a katol án Néún na mi áchengicheng riáfféú me máló lón ewe ier 33. (Mat. 3:17) Seni ikenái tori ewe fansoun Áchechchem, pwata kese achocho le alapaaló óm sile ussun ewe méén kepich lón pwisin óm káé are atun óm Famili Fel? Me atun ránin ewe Áchechchem, kosap ménúki le katol ewe videon lesenin rán mi kkóló aúchean. Atun sia ammólnatá letipach fán iten ewe Áchechchem, sia tufichin álisi ekkewe ekkóch le feiéch seni.—Esr. 7:10. w24.01 11 ¶10-12

Eú alen án Jiowa epwe fang ngenikich an manaman, ina ach tingorei lón iótek. Jiowa epwe pélúweni ach kewe iótek ren an fang ngenikich ewe “tufich mi somwola.” (2 Kor. 4:7) Sia pwal tongeni angei péchékkúl seni ach álleani an we Kapas me ekilonei. (Kölf. 86:11) Minne Jiowa a apasa ngenikich me lón ewe Paipel a “manaman.” (Ipru 4:12) Atun ka iótek ngeni Jiowa me álleani an we Kapas, epwe fang ngonuk ewe péchékkúl mi lamot ngonuk pwe kopwe tongeni likiitú, sópweeló óm pwapwa, are apwénúetá eú wis mi weires. Iei sipwele ppii ifa ussun Jiowa a apéchékkúla ewe soufós Sona. Sona a niwokkus le ló ngeni ewe leeni Jiowa a tiinaaló ie. Ina popun a fiti efóch siip mi sáiló ngeni pwal eú leeni. Pokiten ena, iwe chippú chék iir me chókkewe mi fiti ewe siip repwele máló ren ewe mélúmél. Atun ekkewe sááló ra oturatiw Sona lemataw, emén watteen iik a oromaaló. Iwe, i a nóm lón eú leeni mi eniweniw, lón luken ena iik. Met Sona a féri pwe epwe meefi péchékkúl atun a áláeménúló lón luken ewe iik? Eú mettóch a féri, ina a iótek.—Sona 2:​1, 2, 7. w23.10 13 ¶4-6

Inaamwo iká néún aposel Piter kana taropwe a áwenewen ngeni ekkewe Chón Kraist mi manaw lón an we fansoun, nge Jiowa a pwal apacherelong lón an we Kapas. Ina minne, kich sia tongeni kúna feiéch seni ekkena taropwe. (Rom 15:4) Kich sia nóm lein aramas rese lúkú ekkewe oesini lón Paipel. Ekkewe chón ú ngenikich neman repwe esiitakich ren ach witiwiti warotoon ewe sópwólóón ren fite fite ier. Ekkóch aramas ra apasa pwe esap fókkun war. (2 Pet. 3:​3, 4) Iká sia rong ekkena esin pwóróus seni emén sia afalafal ngeni, emén chienach chón angang, are emén chón ach famili, a tongeni apwangapwangaaló ach lúkú. Piter a áweweei met a tongeni álisikich. Ussun itá me ren ekkóch pwe Jiowa a mmang le amóeló ei ótót mi ngaw. Minne Piter a apasa a tongeni álisikich le witiwit fán mosonottam, pún a áchchema ngenikich pwe án Jiowa ekiek ussun fansoun a fókkun sókkóló seni án aramas ekiek. (2 Pet. 3:​8, 9) Me ren Jiowa, engeréú ier a wewe ngeni eú rán. I a mosonottam, ese mochen án emén epwe péútmwááliló. Nge atun epwe war ránin we, ei ótót epwe muchúló. w23.09 26-27 ¶2-5

Pwata ewe aposel Paul a mak ngeni ekkewe popun Chón Kraist chón Ipru mi nóm Jutia? Ussun ikkeei ruu populapan. Áeúin, pwe epwe awora ngeniir kapasen apéchékkúl. Me mwen ar wiliiti Chón Kraist, lape ngeniir ra fiti ewe lamalamen Jus. Néúwisin ena lamalam neman ra esiiter ren ar wiliiti Chón Kraist. Pwata? Pún ese wor án ekkewe Chón Kraist imwenfel repwe ló fel lón, ese wor ar róngen asor repwe asor ngeni Kot ie, me ese wor souasor epwe álisiir. Ena a tongeni elichippúngú néún Kraist kana chón káé me apwangapwangaaló ar lúkú. (Ipru 3:​12, 14) Eli epwe tongeni efisi án ekkóch me leir repwe pwal mwo nge ekiekin liwiniti ewe lamalamen Jus. Oruuan, Paul a ereni ekkena Chón Kraist chón Ipru pwe rese achocho ar repwe weweiti ekkewe pwóróus mi minefé are alóllóól mi lamot repwe alapaaló le káé ussun, ina ekkewe “mongö mi pöchökül” mi nóm lón án Kot we Kapas. (Ipru 5:​11-14) Ussun ekkóch me leir ra chúen fiti masouen ewe Allúkún Moses. w23.10 24-25 ¶3-4

Ekkóch fefin ra filaatá pwe resap pwúpwúlú. (Mat. 19:​10-12) Kopwe lúkúlúk pwe Jiowa me Jises ra aúcheani ekkewe Chón Kraist mi lipich. Wóón unusen fénúfan, ekkewe Chón Kraist fefin mi lipich iir eú feiéch ngeni chón ewe mwichefel. Pokiten ra tongei me chúngú chón ewe mwichefel, iwe ra wiliiti pwiin, fefinen, me inelapen chómmóng lón pekin ngún. (Mark. 10:​29, 30) Ekkóch ra angang ngeni Jiowa full-time. Ekkewe Chón Kraist fefin ra féri lape ngeni ewe angangen afalafal wóón unusen fénúfan. (Kölf. 68:11) Ka tongeni akkóta iei óm kopwe angang ngeni Jiowa full-time? Eli ka tongeni pioneer, fiti ewe angangen kaú, are angang lón Bethel. Ióteki minne ka mochen achocho ngeni. Fós ngeni chókkewe mi fen tikeri met ra achocho ngeni, me ppii met a lamot kopwe féri pwe kopwe tongeni wiliiti emén mi angang ngeni Jiowa full-time. Mwirin féri eú kókkót epwe tongeni álisuk le tikeri met ka mochen achocho ngeni. Iká ka wiliiti emén chón angang ngeni Jiowa full-time epwe suuk ngonuk pwal ekkóch angang mi amwarar. w23.12 22 ¶16-17

Atun a kakkanoto ewe riáfféú mi lapalap, sia mirititi úkúúkún lamoten ach sipwe álleasochisi ewe allúk le álillis lón ewe angangen afalafal. Iwe nge, eli a weires ach sipwe nefótófót wóón ewe angangen afalafal iká a wor ach osukosuken moni are sia kúna koput lón ach angangen afalafal. Met epwe tongeni álisikich le akkomwa án Kot we mwú? Sipwe lúkúlúk pwe Jiowa ewe meilapen soufiu a nónnóm rech. Epwe álisikich iká sia sópweeló le akkomwa mwúún we lap seni meinisin. Iwe, ese wor met sipwe niwokkusiti. (Ak. 2:4) Jiowa a mochen ach sipwe nefótófót lón ewe angangen álisi aramas le wiliiti chón káé. Akai a pesei néún Jiowa kewe aramas ar repwe poputá le angang sefál wóón ewe imwenfel. Iká ra féri ena, Jiowa a pwone ngeniir pwe epwe ‘afeiöchür.’ (Ak. 2:​18, 19) Sia pwal tongeni lúkúlúk pwe Jiowa epwe efeiéchú ach achocho iká sia akkomwa ewe angang a ewisa ngenikich. w23.11 16 ¶8; 17 ¶11

Lón néún aposel Paul we taropwe ngeni ekkewe chón Rom, a erá pwe aramas meinisin chón tipis. Iwe, epwe ifa ussun án emén epwe tongeni pwúng are unusen limeliméch me kúna chen me ren Kot? Paul a áeá pwóróusen Eperiam ren an epwe álisi meinisin Chón Kraist mi letipwenechar le silei pélúwen ena kapas eis. Jiowa a kér ngeni Eperiam emén chón pwúng atun a nóm lón ewe fénú Kanaan. Pwata Jiowa a tongeni kér ngeni Eperiam emén mi pwúng? Pokiten a tichikin álleasochisi ewe Allúkún Moses? Aapw. (Rom 4:13) Eperiam a kúna pwúng me ren Jiowa 400 ier me mwen katowuun ena Allúk ngeni chón Israel. Iwe pwata chék Kot a kér ngeni Eperiam emén mi pwúng? Pokiten án Jiowa úméúméch mi somwoló, Eperiam a kúna pwúng me ren pokiten an lúkú.—Rom 4:​2-4. w23.12 3 ¶4-5

Lón ewe chék pwinin ewe soufós Natan a ereni King Tafit ekkena kapas asan, Jiowa a ereni Natan pwe esap Tafit epwe wisen aúetá ewe imwenfel. (1 Kron. 17:​3, 4, 11, 12) Met Tafit a féri atun a silei ena pwóróus? A nefótófót wóón an ionifengeni ewe moni me ekkewe pisek mi lamot lón ewe angang néún we Salomon epwe féri. (1 Kron. 29:​1-5) Mwirin chék án Tafit silei pwe esap i ewe epwe wisen aúetá ewe imwenfel, Jiowa a féri eú pwonen etipeeú lefiler. A pwone ngeni Tafit pwe emén me lein mwirimwirin kewe epwe nemenem tori feilfeiló. (2 Sam. 7:16) Lón ewe ótót séfé, atun án Jesus Nemenem Úkúkún Engeréú Ier, Tafit epwe fókkun pwapwa le silei pwe ewe King, Jesus, i emén me lein mwirimwirin kewe! Ena pwóróus, a áiti ngenikich pwe inaamwo ika sise tongeni féri meinisin met sia mochen féri fán iten Jiowa, nge ach na Kot a tongeni fang ngenikich pwal ekkóch mettóch mi múrinné sise fen ekieki pwe epwe torikich. w23.04 16 ¶8-10

Eli kopwe kúna eú pwóróus lón Paipel mi fókkun oururuk atun ka meefi niwokkus. Áwewe chék, eli kopwe kúna ekkewe pwóróus mi apéchékkúlok seni puken Hiop, Kölfel, me Än Salomon Fos, me pwal alon Jises kewe lón Mattu 6. Atun ka iótek ngeni Jiowa me álleani an we Kapas, kopwe meefi an oururu letipom. Sia tongeni lúkúlúk pwe Jiowa epwe nóm rech atun sia nóm lón osukosuk mi áweires. Sisap fókkun meefi pwe sia chék áláeménúló. (Kölf. 23:4) Jiowa a pwonei pwe epwe túmúnúkich, anúkúcharakich, álisikich, me oururukich. Aisea 26:3 a apasa ei ussun Jiowa: “Ka ngeni chokewe mi kamwöchünük womw kinamwe, pun ra anomu ar apilükülük womw.” Ina minne, kopwe lúkúlúk wóón Jiowa me aúcheani meinisin met ekkewe a áeá le álisuk. Iká ka féri ena, kopwe péchékkúletá pwal mwo nge atun ka nóm lón weires. w24.01 25 ¶16-17

Ekkena kapas ra fen pwénúetá lón ach ei fansoun. Nge, ekkeei wokisin mi apéchékkúla letipach ra pwal weneiti ach ei fansoun, a erá: “Noum kewe mwän meinisin repwe kaiö seniei, üpwe awöüür o fang ngeniir kinamwe. Pwüng epwe anükücharok, . . . kosap chüen niueitiir, nge niuokus mi afeiengau esap arap ngonuk.” (Ais. 54:​13, 14) Pwal mwo nge Setan, “ewe koten ei ótóten fénúfan,” esap tongeni aúkatiw ewe angang néún Jiowa kewe aramas ra féfféri le áiti ngeni aramas ussun i. (2 Kor. 4:4) Fel mi liméch a liwinsefál me esap fókkun chúen limengawsefál, epwe chék nónnóm tori feilfeiló! Esap wor eú pisekin maun epwe efeiengawakich! w24.02 4 ¶10

Kich Chón Kraist, sia fókkun aúcheani ach pwonen fangoló manawach ngeni Jiowa. Ena, a kkúú ach féffér me minne sia eáni kefil mi weneiti ach famili. Sia angang weires le awora met mi lamot ngeni ach kewe famili, iwe nge sise fókkun akkomwa mochenin chón ach famili lap seni met Jiowa a tipeni senikich. (Mat. 10:​35, 36; 1 Tim. 5:8) Fán ekkóch, neman sipwe féri kefil epwe eletipengawa aramasach kewe nge a fen apwapwaai Jiowa. A féraatá ewe kókkótun famili me a mochen ach famili epwe pwapwa. (Efi. 3:​14, 15) Iká sia mochen enletin pwapwa, a lamot sipwe féri ekkewe mettóch Jiowa a mochen sipwe féri. Kopwe lúkúlúk pwe Jiowa a aúcheani minne ka achocho le pennúkúóló pwe kopwe fel ngeni atun óm túmúnú óm famili me pwáári óm tongeer me súfélitiir.—Rom 12:10. w24.02 17 ¶11; 18 ¶13