Pochokkulen Aitien Jises Won Fonufan
EWE sou affouni Paipel itan Edgar Goodspeed a makkei: “An Jises kewe kapas meinisin lon ekkewe puken kapas allim, ekkewe a apasa ngeni emon chok are ngeni epwi aramas, atewe a tongeni apasawu lon ruu awa chok, nge ena poraus mi kisikis a fokkun achungu letipen aramas me sia tongeni apasa pwe esor pochokkulen aitien emon won chon fonufan a ussun chok an Jises.”
Lupwen a muchulo an Jises Kraist angangen afalafal won fonufan lon 33 C.E., mei wor noun chon kaeo 120 som mwan me fefin. (Fofor 1:15) Ikenai, lap seni ruu bilion aramas ra apasa pwe ir chon Kraist. Mei pwal wor fite puku milion ra luku pwe Jises emon soufos. Pwungun pwe a mmen pochokkul aitian kewe won chon fonufan.
Pwal mwo nge nouwis esap ir chon Kraist ra apasa pwe a mmen pochokkul aitien Jesus won unusen fonufan. Ren chok awewe, Hyman Enelow, emon nouwis lon ewe lamalamen Jus a makkei: “Jises ewe emon mi itefoulo seni meinisin, ewe emon aramas ra kaeo ussun lap seni meinisin, me ewe emon mi pochokkul manamanen aitian mi lap seni meinisin lon uruwoon ekkewe lamalamen fonufan.” Enelow a pwal apasa: “Io a tongeni alleaani ukuukun ewe alillis Jises a awora ngeni aramas? Ewe tong aramas ra pwaralo pokiten i, ewe auruur a awora, ekkewe foffor mi murinno ra fisita, ewe apilukuluk me chengel a efisata—esor a ekis mwo nge lollo ngeni lon unusen uruwoon fonufan. Lein ekkewe chon fonufan mi foummong me murinno, esor a tori ukuukun ekkewe aramas mi mochen auselinga an Jises poraus, are mi lollo ngeni pochokkulen aitian. Jises a wiliiti ewe emon aramas ra mochen kaeo ussun lap seni meinisin lon uruwoon fonufan.” Iwe, emon nouwis lon ewe lamalamen Hindu, Mohandas K. Gandhi a apasa: “Use mwo silei emon a alisi chon fonufan lap seni Jises. Pwungun pwe esor mwaallin ewe lamalamen Kraist.” Nge a pwal apasa: “Ewe osukosuk a pop seni ami chon Kraist. Ouse kan manaueni manauemi me ren ami kewe afalafal.”
Uruwo a pwaralo ukuukun an Kirisentom ese apwonueta alon aitien Jises kewe. Emon sou kaeo ewe lamalamen Kraist, Cecil John Cadoux, a apasa pwe ‘seni 140 C.E., ekkewe nouwis ra lolileniesini ifa ussun a ekis me ekis lapalapelo an ewe lamalam pae ngeni mumuutaan foffor mi limengau.’ A pwal apasa: “An chon Kraist ekisalo ar alleasochisi ekkewe allukun pwung me mwaal epwe alisata an ewe lamalam lapalapeni lapalapen fonufan.”
An ewe lamalam lapalapeni lapalapen fonufan a pochokkulelo lon ewe aruaanuun ipuku ier, lupwen Constantine, meilapen muun Rom, a etiwa ewe lamalamen Kraist. Cadoux a makkei: “Sou kaeo uruwo ra kuna, me fan ekkoch ra letipechou ren watteen minne ewe lamalam a fangeta fan iten an epwe chiechi ngeni Constantinus.” Atun ekkewe fite puku ier seni ena fansoun, aramas mi era pwe ir chon Kraist ra aitengaua iten Kraist ren ar fori chommong mettoch mi asau.
Ikkeei ekkewe kapas eis mi lamot ngenikich: Ikkefa aitien Jises kewe? Me ifa pochokkuleer wooch?
[Lios lon pekin taropwe 3]
“Use mwo silei emon a alisi chon fonufan lap seni Jises.”
—Mohandas K. Gandhi
[Lios lon pekin taropwe 3]
“Esor pochokkulen aitien emon ngeni chon fonufan epwe ussun chok an Jises.”
—Edgar Goodspeed
[Lios lon pekin taropwe 3]
Culver Pictures