Ifa Pochokkulen Aitien Jises Kraist Lon Manauom?

REN unusen ewe poraus lon ewe lesen mwen ei, a wor popun sipwe tipemwaramwareiti pochokkulen aitien Jises kewe won fonufan? Iwe nge, iei ewe kapas eis mi lamot: “Ifa ukuukun pochokkulen aitien Jises kewe lon manauei?”

Aitien Jises kewe ra awewe won chommong sokkopaten poraus. Ekkewe lesen mi auchea sia angei seni aitian kewe ra weneiti kinikinin manauom meinisin. Sipwe akkom nengenifichi aitien Jises ussun met sipwe akkomwa lon manauach me ussun chiechioch ngeni Kot.

Filata Met Kopwe Akkomwa Lon Manauom

Muttirin manauen aramas ikenai a solani ach fansoun me pochokkul me chommong aramas rese chuen tawe ngeni ekkewe mettochun ngun. Ekieki mwo porausen emon mwan 20 som ierin. Sipwe apasa pwe itan Jerry. Jerry a pwapwaiti ekkewe fansoun porausfengen ussun mettochun ngun me a aucheaani minne a kaeo seniir, nge a apasa: “Use fokkun tawe ngeni porausfengen won ussun mettochun ngun. Ua angang wonu ran iteiten wiik. Raninfel chok ua asoso. Mwirin wesin ai angang me wiisei kewe lon ena ran, ua kon molu.” Ika a ina ussum, en mi tongeni kuna feioch seni minne Jises a aiti ngeni aramas lon ewe Afalafal Won Ewe Chuuk.

Jises a ereni eu pwin aramas ra mochen rongorong an poraus: “Oute aureki usun manauemi, meeta oupwe ani, meeta oupwe unumi; are pwal usun inisimi, meeta oupwe ufouf. Pwe sap manauach mi lap seni mongo, o inisich mi lap seni mangaku? Oupwe chok nennengeni ekkewe mansusu fan lang. Rese fotuki, rese pwal kini, are ionfengenni lon imwen iseis; nge Sememi lang a amongour. Sap ami mi auchea senir? . . . Iei minne, oute aureki o apasa, ‘Meeta sipwe ani?’ are ‘Meeta sipwe ufeni?’ Pun ekkewe re Jentail ra kukutta ekkeei mettoch meinisin, nge Sememi lang a sinei pwe mi wor ami osupwang ren ekkeei mettoch meinisin. Nge oupwe kuttafichi lom an mu o an pung; iwe, ekkeei mettoch meinisin repwap kapach ngenikemi.” (Mattu 6:​25-​33) Met sia kaeo seni ei poraus?

Jises ese apasa pwe sipwe unusen tunalo pwisin ach kewe osupwang lon pekin aion are osupwangen aramasach kewe. Iwe nge, Jises a pwon pwe ika sipwe akkomwa ekkewe mettochun ngun, Kot epwe tumunu le awora minne a lamot. Ewe lesen seni an poraus a weneiti kefil mi lamot lon manauach. Pwonuetaan ei fon a emmwen ngeni pwapwa, pun “ra pwapwa ekkan aramas mi silei pwe ra osupwang lon pekin ngun.”​—Mattu 5:​3, New World Translation.

Amaaraata Chiechioch Ngeni Kot

Chokkewe mi silei pwe ra osupwang lon pekin ngun ra pwal silei lamoten ar repwe chiechioch ngeni Kot. Ifa ussun sia chiechioch ngeni emon? Sia alapalo ach sile ussun ena emon ren ach kaeo ekiekin, tufichin, me angangan kewe, me minne a saani me oput. A pwal ussun chok lupwen sia mochen chiechioch ngeni Kot. A lamot sile mi enlet ussun i. Lupwen a iotek ngeni Kot ussun noun kewe chon kaeo, Jises a apasa: “Iwe, iei ewe manau esemuch, pwe repwe sinei en, ewe emon chok Kot mi enlet, pwal Jises Kraist ewe ka akunooto.” (Jon 17:3) Ren enletin, sia wiisen silefichi lapalapan kewe ika sipwe amaaraata chiechioch ngeni Kot. Paipel, an Kot we Kapas, ewe eu chok popun ena sile. (2 Timoti 3:​16) Sipwe akkotaochu ach fansoun pwe epwe wor fansoun fan iten ach kaeo ewe Paipel.

Iwe nge, ese naf ach angei sile chok. Lon ena iotek, Jises a pwal apasa: “Ra [noun kewe chon kaeo] fen alleasochisi om kapas.” (Jon 17:​6) Sisap kaeo chok. Ach kewe foffor repwe tipeeu ngeni ewe sile sia angei. A ina ussun sia tongeni chiechioch ngeni Kot. Ach chiechioch epwe pochokkulelo ika sia pukun eani foffor mi u ngeni ekiekin me allukun chienach? A lamot pwe an Kot kewe ekiek me alluk repwe emmweni mettoch meinisin lon manauach.

Kopwe Feioch Seni Aitien Jises Kewe Meinisin

Aitien Jises kewe sia fos ussun ra ling, mecheres le weweitiir, me manaman. Aramas ra tongeni feioch seni ar kaeo aitian kewe me seni ar apwonueta alor.

Chon Pwarata Jiowa lon leeniom repwe pwapwa ar repwe alisuk le silei ifa ussun kopwe feioch seni ewe kait mi murinno seni meinisin mi towu seni auen emon chon fonufan. Sia etiwok le fos ngeniir.

Lios lon pekin taropwe 5]

“Sememi lang a amongour”