Akkachocho Ngeni Än Kot Angang Ikenäi
“O atewe [Kraist] a malo fan asengesin aramas meinisin, pwe ir mi chuen manau resap manau ngeni pwisin ir.”—2 KORINT 5:15.
1. Apworausa pworausan emön misineri.
EMÖN misineri itan Aaron a apasa, “Wääm we esap sein sounfiu, ina ewe äefochun waa a ssälong lon ewe sopw mi towau seni telinimw lon Afrika, wesin chök ewe maun lefilen pwisin chon ena leeni. Atun ewe maun, äm ause tongeni silei pworausen ewe kükkün mwichefel ikena ie, nge a lamot äm aupwe awora osupwanger. Iwe, aua pwal uwei eföü cassette, itelapan Jehovah’s Witnesses—The Organization Behind the Name (Kokkotun än Chon Pwäratä Jiowa Mwicheich), möngö, üf, me nöüch kewe puken aweween Paipel.a Äm aua ffich ewe fitio fän ruu pun chommong aramas ra kiito lon ewe leenien ffich kachito. Mwirin ffichin ewe fitio, aua poputäni chommong käeöön Paipel. Iwe, a ffat pwe a wor lamoten äm achocho.”
2. (a) Pwata Chon Kraist ra filatä pwe repwe äeä manauer lon än Kot angang? (b) Ikkefa ekkewe kapas eis sipwe äfänni iei?
2 Pwata Aaron me chienan kewe ra föri ena säi mi kon weires? Pokiten ar kilisou ren än Jises we asorun möön kepich, ra fen fangolo manauer ngeni Kot, me ra mochen atipeeüfengenni manauer ngeni än Kot kokkot. Chon Kraist meinisin ra pwal ussun chök ätekkana, ra filatä pwe resap chüen “manau ngeni pwisin ir,” nge ükükün ar tufich, repwe föri mettoch meinisin “fanasengesin ewe pworausen manau.” (2 Korint 5:15; 1 Korint 9:23) Ra silei pwe lupwen epwe muchulo ei otot mi ngaü, esap chüen wor lamoten moni me ach iteföülo me ren aramas. Ina minne, ra mochen äeä manauer me ar pöchökkül pwe epwe tipeeü ngeni än Kot kokkot. (Än Salomon Afalafal 12:1) Ifa ussun sipwe föri ena? Ia sipwe tongeni angei me ie pwora me pöchökkül mi lamot fän iten ach sipwe apwönüetä kokkotun Kot? Met sokkun angang mi suuk ngenikich?
Feffeitä fän Mirit
3. Ikkefa ekkewe tettelin mettoch mi kapachelong lon ach föfföri letipen Kot?
3 Ren Chon Kraist mi enlet, ra mochen föfföri letipen Kot lon unusen manauer. Epwe poputä ren ar fiti ewe sukulen afalafal, älleäni ewe Paipel iteiten rän, fiti ewe angangen afalafal, me pwal feffeitä tori ar papatais. Lon ach feffeitä, sipwe ekieki alon Paul kewe: “Kopwe tumunuochu o achocho ngeni ekkeei mettoch, pwe om fefeita epwe pwapwalo ngeni aramas meinisin.” (1 Timoti 4:15) Ach feffeitä esap ren ach mochen pwisin ätekiakichetä nge epwe pwäralo ach wesewesen mochen apwönüetä letipan Kot. Ach föri ena a pwäratä pwe sia mut ngeni Kot an epwe emmweniöchü kinikinin manauach meinisin, pun a fokkun angöch lap senikich.—Kölfel 32:8.
4. Ifa ussun sipwe ükütiü le ekiek chommong ussun ach niuokkus?
4 Ika sia tipemwaramwar are kon ekieki pwisin kich, epwe tongeni eppeti ach feffeitä lon ach angang ngeni Kot. (Än Salomon Afalafal 11:4) Ina minne, me mwen ach sipwe küna pwapwa mi enlet lon ach angang ngeni Kot me aramas, sipwe loom pworaiti pwisin ach niuokkus. Ren chök awewe, Eric a ekkekieki an epwe älillis lon eü mwichefel mi eäni eü kapasen ekis. Nge a aüreki: “Repwe etiwaei? Upwe sani pwii kewe? Repwe saniei?” Iwe, a apworausa: “Üa mirititi pwe mi lamot ai upwe eteneki pwii kewe lap seni pwisin ngang. Üa filatä pwe usap chüen ekiek chommong, nge upwe chök achocho le angang fän iten pwii kewe ükükün ai tufich. Üa iotek ngeni Jiowa fän iten an älillis, iwe mwirin, üa chök fiti ena mwichefel. Iei üa fokkun pwapwaiti ai angang ikewe ie.” (Rom 4:20) Pwüngün, ükükün watteen ach angang ngeni Kot me aramas fän tong, pwal ina chök ükükün ewe pwapwa me menemenöch sipwe küna.
5. Pwata mi lamot sipwe akkotaöchü föfförüch le apwönüetä än Kot kokkot? Aweweei mwo.
5 Ika sipwe sopwöch le etipeeüfengenni ach angang me än Kot kokkot, a lamot sipwe akkotaöchü föfförüch. Sipwe mirit ika sisap achommonga ach kewe liwinimmang pwe ei otot ete nemenikich pwal ekisalo ach fansoun le apwönüetä än Kot angang. Ewe Paipel a ächemakich: “Ewe chon paaro i nöün ewe chon mwütätä amanau.” (Än Salomon Fos 22:7) Ach lükülük woon Jiowa me ach akkomwa mettochun ngün epwe älisikich le nefotofot ngeni ekkewe mettoch mi aüchea. Ren chök awewe, Guoming me fefinan kewe ruuemön ra nonnomfengen me iner we lon eü leeni a watte liwinin imw ie me a weires än emön epwe künökün angang ie. Ren ar nöünöüöchü nöür moni me älillisfengen woon mömöön mettoch, ra tongeni tufich inaamwo ika iir meinisin rese akkangang iteitan. Guoming a erä: “Mei wor fansoun esor äm moni tolong. Nge, äm aua chüen tongeni pioneer pwal tümünüöchü inem we. Aua kilisou pwe mama ese mochen aupwe ükütiü le föri än Jiowa angang fän iten äm aupwe awora ngeni i mettoch me lükün met a osupwang ren.”—2 Korint 12:14; Ipru 13:5.
6. Ifa eü pworaus mi pwäratä ifa ussun sipwe atipeeüfengenni manauach me än Kot kokkot?
6 Ika a kon watte om achocho lon pekin moni are pwal ekkoch angang, eli a lamot kopwe föri ekkoch siwil watte fän iten om kopwe akkomwa än Kot angang. Esap tufich, esap pwal mecheres om kopwe mwittir siwili nonnomun manauom nge kesap lichippüng. Awewe chök, Koichi a osukosuk ren an äeä watteen an fansoun le kukkunou. A fen käeö Paipel le alüwölün, nge ren chommong ier, a chök pelei fitio games. Eü rän Koichi a ekkekieki: ‘Met ei üa föfföri? A ilik som ieri, nge ussun itä manauei a chök lamotongaü!’ Koichi a poputä le käeösefälli ewe Paipel me a etiwa älillisin ewe mwichefel. Inaamwo ika a siwili napanapan ekis me ekis, nge ese fangetä. Ren watteen an iotek me älillis seni chienan kewe, a ngaselo seni an essenükü an pelei. (Luk 11:9) Iei Koichi a pwapwa le wiseni ewe wis ministerial servant.
Käeö Pwe Kopwe Itepök me Ruuepek
7. Pwata mi lamot ach sipwe itepök me ruuepek lon ach föfföri än Kot angang?
7 A lamot sipwe unusen akkachocho ngeni än Kot angang. Sisap chipwang me tömangamang ngeni ewe angang. (Ipru 6:11, 12) Nge, Jiowa ese mochen pwe sipwe essenükü ach akkangang tori ach sipwe pekkus lon pekin inis, ekiek, me memmeef. Ach mirititi pwe sise tufichin apwönüetä än Kot we angang lon pwisin ach pöchökkül a alingalo Jiowa me a pwäratä pwe sia itepök me ruuepek. (1 Piter 4:11) Jiowa a pwonei pwe epwe ngenikich pöchökkül pwe sipwe föri letipan, nge sisap aumwesikich tori an a lu seni ach tufichin föri minne ese kütta senikich. (2 Korint 4:7) Ren ach sisap pekkusulo lon ach angang ngeni Jiowa, a lamot sipwe äeäöchü pöchökkülach.
8. Met a fis ngeni emön föpwül Chon Kraist lupwen a sotun angang ngeni Jiowa me pwal angang ngeni fönüfan, me ifa ewe ekkesiwil a föri?
8 Awewe chök, ren ruu ier, Ji Hye, fin Eisia, a eäni eü angang mi weires atun a pwal pioneer. Iei alon neminewe: “Ren unusen ai tufich, üa achocho le angang ngeni Jiowa me pwal achocho lon ai angangen moni, nge üa kan chök möür ükükün nimu awa iteiten pwin. Ekis me ekis, üa pekkusulo lon pekin ekiek, me use chüen pwapwaiti mettochun ngün.” Ren an epwe tufichin angang ngeni Kot ren ‘unusen letipan, ngünün, ekiekin me tufichin,’ Ji Hye a kütta eü angang mi ekis mecheres seni ewe. (Mark 12:30) A erä: “Ikaamwo ai famili a fokkun peseei pwe upwe kütta watteen moni, nge ngang üa achocho le akkomwa än Kot kokkot. Mi chüen naf nei moni fän iten piseki mi lamot, awewe chök, üfei. Üa pwapwa pun iei a naföch ai möür! Üa pwapwaiti ai we angangen afalafal me a pöchökkülelo ai ririöch ngeni Jiowa iei. A ina ussun pun ese chüen kon watte ai fansoun ngeni än fönüfan kewe minen apwapwa me minen orukalo ai ekiek.”—Än Salomon Afalafal 4:6; Mattu 6:24, 28-30.
9. Epwe ifa ussun ach achocho epwe kküü manauen ekkewe aramas sia afalafal ngeniir?
9 Esap meinisin ra tongeni wiliti pioneer full time. Ika ka kan küna weiresin om ka chinnap, samau, me pwal ekkoch mettoch mi aükükü om angangen afalafal, kopwe chök silei pwe Jiowa a pwapwa ren om tuppwöl me om angang ngeni I ren unusen letipom. (Luk 21:2, 3) Sisap ekieki pwe ach achocho lon ach angang ngeni Kot ese kküü manauen aramas, inaamwo ika a üküngaü. Ren chök awewe, sipwe erä pwe sia tori ekkoch imw nge ese wor a etiwa ewe kapas sia uwei. Mwirin ach lo seni ekkena imw, eli chon ekkewe imw pwal mwo nge iir kewe rese etiwakich repwe kakkapasfengen fansoun langattam ussun ach chuuriir! Sisap pwal ekieki pwe meinisin repwe etiwa ewe kapas allim, nge mi wor ekkoch repwe etiwa. (Mattu 13:19-23) Eli ekkoch repwe etiwa mwirin lupwen a siwil mwökütükütün fönüfan are nonnomun manauer. Ese lifilifil met, nge ren ach fiffiti ewe angangen afalafal ükükün ach tufich, sia föri än Kot we angang. Kich ‘chon angangen Kot mi akkangangfengen.’—1 Korint 3:9.
10. Ikkefa ekkewe al a suuk ngeni meinisin chon ewe mwichefel?
10 Pwal eü, kich meinisin sipwe tongeni älisi chon ach famili me pwich kewe lon ewe mwichefel. (Kalesia 6:10) Mwiriloon ach achchüngü letipen aramas epwe tongeni alolloon me nomottam. (Än Salomon Afalafal 11:1, 6) Lupwen ekkewe elter me ministerial servant ra föri wiser fän tinikken, ra pwal alapalo pöchökkülen pwich kewe lon pekin ngün, lükücharen ewe mwichefel, me watteloon angangen Chon Kraist. Sipwe lükülük pwe lupwen sia ‘alapalo ach föri angangen ach we Samol,’ ach achocho “esap lamot-mwaal.”—1 Korint 15:58.
Eäni ewe Angang mi Tipeeü ngeni än Kot Kokkot
11. Lükün ach angang lon ekkewe mwichefel lon pwisin fönüach, pwal met sokkun angang a suuk ngenikich?
11 Kich Chon Kraist, sia pwapwaiti manauach, me sia mochen alingalo Kot lon mettoch meinisin sia föri. (1 Korint 10:31) Lupwen sia tuppwöl le apwönüetä wisach lon ewe angangen afalafal me asukula aramas pwe repwe apwönüetä minne Jises a allükü ngenikich, chommong alen angang ngeni Jiowa epwe suuk ngenikich. (Mattu 24:14; 28:19, 20) Me lükün ach angang lon ewe mwichefel, eli epwe suuk ngenikich tufichin ach sipwe afalafal ikewe ie a watte osupwangen chon afalafal ie, ese lifilifil lon menni leenien afalafal, kapas, are fönü. Eli ekkewe elter me ministerial servant resaamwo pwüpwülü repwe filitä pwe repwe fiti ewe Ministerial Training School nge mwirin, repwe älillis lon ekkewe mwichefel ra osupwangen chon emmwen mi äsimaü, lon pwisin leenier are lon pwal eü fönü. Ekkewe mi pwüpwülü mi pioneer full time repwe tongeni fiti ewe Sukulen Gilead me pwal angang lon eü fönü lükün fönüer. Mi chüen wor lamoten an epwe wor chon angang lon Bethel me pwal kaütään me tümünün ekkewe leenien mwich me ekkewe kisin ofes.
12, 13. (a) Ifa ussun kopwe tongeni filatä menni sokkun angang kopwe akkachocho ngeni? (b) Aweweei ifa ussun met emön a käeö seni an föri eü angang a tongeni lamot lon pwal ekkoch angang.
12 Met sokkun angang kopwe akkachocho ngeni? Pokiten kich mi fen fangolo manauach le angang ngeni Kot, sipwe kütta emmwen seni I me an we mwicheich iteitan. Än Jiowa ‘ngün mi mürina’ epwe älisikich pwe sipwe filiöch. (Nehemia 9:20) Fän chommong, och wis a kan emmwen ngeni pwal eü, me met sia käeö seni ewe eü angang a pwal lamot ngeni och angang mwirin.
13 Ren chök awewe, Dennis me pwülüwan we Jenny, ra kan angang woon kaütään ekkoch Kingdom Hall. Mwirin ewe taifun Katrina a atai öörün Merika, ra awora ar älillis ngeni iir mi osupwang. Dennis a repotei: “Äm äkkäeä äm sile le aüetä ekkewe Kingdom Hall pwe aupwe älisi pwiim kewe a atoto ngenikem watteen pwapwa. Ekkewe aua älisiir ra fokkun pwäratä ar kilisou, iwe, a achchüngü letipem. Lap ngeni ekkewe ekkoch kümiin chon älillis ra försefälli ekkoch chök imw, nge Chon Pwäratä Jiowa ra fen försefälli lap seni 5,300 imw me chommong Kingdom Hall. Aramas ra nennengeni ach achocho, iwe, iei a wattelo ar etiwa kapas allimen ewe mwu.”
14. Met kopwe tongeni föri ika ka mochen achocho ngeni ewe angangen afalafal full time?
14 Ka tongeni atipeeüfengenni manauom ngeni än Kot kokkot ren om filatä pwe kopwe angang ngeni full-time? Ika ina, epwe toruk chommong feiöch. Ika pwe nonnomun manauom iei ese atufichuk le föri ena, eli kopwe tongeni föri ekkoch ekkesiwil. Kopwe iotek ussun chök Nehemia a föri lupwen a mochen eäni eü angang mi aüchea: “Ai Samol, . . . kose mochen atufichiei ngang noum chon angang.” (Nehemia 1:11) Lükülük woon Jiowa, “ewe mi auseling iotek,” me mwirin, etipeeüfengenni om föfför ngeni om tingor. (Kölfel 65:2) Ika Jiowa epwe efeiöchü om mochen alapalo om angang ngeni, akkom, kopwe achocho. Lupwen ka filatä pwe kopwe fiti ewe angangen afalafal full time, kamwöchünnük woon filiom. Lo, lo, lo, epwe wattelo sileom, me epwe pwal lapolo om pwapwa.
Eü Esin Manau Mi Enletin Lamot
15. (a) Ifa ussun sia feiöch seni ach kapas ngeni me äkkälleäni pworausen chokkewe ra angang ngeni Kot fansoun langattam? (b) Apworausa pworausen manauen emön mi apöchökkülok.
15 Ikkefa ekkewe feiöch ka tongeni küna lon om akkomwa pwönütään än Kot kokkot? Kopwe fos ngeni chokkewe ra angang ngeni Jiowa fansoun langattam, äkkäeüin, iir kewe ra angang ngeni I full time. A ifa me watteen aücheaan me pwapwaan manauer! (Än Salomon Fos 10:22) Repwe erenuk pwe Jiowa a älisiir iteitan pwal mwo nge lon fansoun weires, pwe repwe angei met ra osupwang ren me fen pwal somwolo seni. (Filipai 4:11-13) Seni 1955 tori 1961, The Watchtower a peresei chommong pworausen manauen chokkewe mi tuppwöl fän ewe itelap “Pursuing My Purpose in Life” (Akkachocho Ngeni Kokkotun Manauei). Seni ena fansoun, pworausen manauen fitepükü aramas ra fen peres. Ekkena pworaus ra ächema ngenikich ussun ewe sokkun tinikken me pwapwa sia älleäni ussun lon ewe puken Föfför lon Paipel. Om älleäni ekkena pworaus mi achchüngü letipach epwe amwökütük om kopwe apasa, “Iei ewe sokkun manau üa mochen manaueni!”
16. Met epwe efisi pwe manauen emön Chon Kraist epwe lamot me apwapwa?
16 Aaron, ewe a mak pworausan me le poputään ei lesen, a apasa: “Lon Afrika, fän chommong üa sereni ekkoch sarafö ra chök fetälfeil lemenen Afrika le kükkütta lamoten manauer. Iwe, lape ngeniir rese küna ewe sokkun manau mi lamot ra kükkütta. Nge äm aua akkachocho ngeni än Kot kokkot ren äm esilefetälei kapas allimen ewe mwu, me äm aua pwapwaiti ewe sokkun manau mi wor lamotan. Aua pwisin küna pwüngün ewe pworaus pwe pwapwaan fangolo a lap seni pwapwaan angei.”—Fofor 20:35.
17. Pwata sipwe achocho le apwönüetä än Kot kokkot iei?
17 Nge en? Ifa kokkotun manauom? Ika kesap achocho le apwönüetä än Kot kokkot, eli, kopwe chök äkkäeä om fansoun me pöchökkül le föri pwal ekkoch sokkun angang. Pwata kopwe asolapa manauom mi aüchea le chechchei ekkewe mettoch än Setan otot a alamota nge mi chök lamotongaü? Ekiselo chök, lupwen epwe fis ewe “riaffou lapalap,” esap wor lamoten pisekin fönüfan me wis tekia woon fönüfan. Ach chiechiöch me Kot, ina chök epwe lamot. Epwe ifa me watteen ach kilisou pwe sia fen angang fän iten Kot me aramas me pwal unusen achocho le apwönüetä än Kot kokkot lon manauach!—Mattu 24:21; Pwäratä 7:14, 15.
[Footnote]
a Förien Chon Pwäratä Jiowa.
En Mi Tongeni Aweweei?
• Met meefien Jiowa ussun ach angang ngeni I?
• Ifa ussun ach pwäratä mirit me eäni ekiek mi itepök me ruuepek repwe älisikich le angang ngeni Kot me aramas?
• Ikkefa ekkewe sokkun angang a suuk ngenikich?
• Ifa ussun sipwe manaueni ewe manau mi wor lamotan iei?
[Picture on page 11]
A lamot ach sipwe itepök me ruuepek pwe sipwe tongeni sopwelo le angang ngeni Kot ren unusen ach tufich
[Picture on page 12]
Kich mi tongeni angang ngeni Kot lon sokkopaten napanap