Sópweló le “Pwilitalong ewe Manau mi Fö” Mwirin Óm Papatais

1. Met napanapach a kan ákkáeúin popu seni?

INAAMWO IKA sia kerán chék papatais mwirin fitu rán are mwirin fite, fite ier, nge oukich meinisin sia mochen eáni ekkewe sókkun napanap Jiowa a sani. Ren ach sipwe féri ena, a lamot ach sipwe nemeniéchú ach ekiek. Pwata? Pokiten napanapach a kan ákkáeúin pop seni minne sia ekieki. Ika sia kan chék ekkekieki mochenin futuk, iwe sipwe kan akkapasa me féfféri minne mi ngaw. (Ef. 4:17-19) Iwe nge, ika sia kan chék ekkekieki minne mi múrinné, iwe sipwe eáni ekkewe fós me féffér epwe apwapwaai Semach we Jiowa.​—Kal. 5:16.

2. Ikkefa ekkewe kapas eis sipwe káé lón ei lesen?

² Usun met sia fen pwóróus wóón lón ewe lesen mwen ei, pwe sise tongeni eppeti meinisin ekiek mi ngaw an epwe tolong lón ekiekich. Nge sia tongeni filatá ach sisap féri met sia eáni ekiek. Me mwen ach papatais, a lamot ach sipwe úkútiw le eáni ekkewe kapas me féffér Jiowa a oput. Ewe mettóch mi lamot seni meinisin, ina ach sipwe lóóm otur senikich ewe manawen lóóm. Iwe nge, ren ach sipwe unusen apwapwaai Jiowa, a lamot ach sipwe pwal álleasochisi an ei allúk ren ach sipwe “pwilitalong ewe manau mi fö.” (Kol. 3:10) Sipwe pélúweni ekkeei kapas eis lón ei lesen: Met weween “ewe manau mi fö”? Ifa usun sia tongeni éúféúfa ngenikich ewe manaw mi fé me sisap pwilit senikich?

3. Met weween “ewe manau mi fö” me ren Kalatia 5:22, 23, me ifa usun emén epwe napanapeni?

³ Emén mi eáni “ewe manau mi fö” a áppirú Jiowa. Emén mi napanapeni ekkewe napanap mi fé, a pwári ren an eáni uwaan án Kot we ngún mi fel me mut ngeni ena manaman an epwe nemeni an ekiek, memmeef, me féffér. (Álleani Kalatia 5:22, 23.) Áwewe chék, a tongei Jiowa me néún kewe aramas. (Mat. 22:36-39) Ena sókkun aramas a chék pwappwapwa inaamwo ika a likiitú fán weires. (Jas. 1:2-4) I emén chón efisatá kinamwe. (Mat. 5:9) A mosonottam me kirekiréch ngeni aramas. (Kol. 3:13) A aúcheani minne mi múrinné me a féri. (Luk. 6:35) A pwári ren an féffér pwe a fókkun lúkú Seman we lón láng. (Jas. 2:18) A chék kinamwe me nemenifichi meefian atun aramas ra mochen fiu ngeni me asonga.​—1 Kor. 9:25, 27; Tit. 3:2.

4. Pwata a lamot ach sipwe eáni eú me eú ekkewe napanap mi mak lón Kalatia 5:22, 23, me pwal ekkewe ekkóch lón ekkewe wokisin ren ach sipwe éúféúfa ngenikich ewe manaw mi fé?

⁴ A lamot ach sipwe eáni meinisin ekkewe napanap mi mak lón Kalatia 5:22, 23 me pwal ekkewe ekkóch lón ekkewe wokisin ren ach sipwe éúféúfa ngenikich ewe manaw mi fé.b Ekkena napanap rese usun úfach kewe sia kan úféúfólóng eché me fán eú. Ren enletin, chómmóng me lein ekkena napanap ra léllé ngeni pwal ekkóch napanap. Áwewe chék, ika ka enletin tongei chón órum, iwe kopwe pwal mosonottam ngeniir me kirekiréch ngeniir. Me ika en emén mi aramaséch, iwe a lamot óm kopwe pwal mosonoson me nemenifichi pwisin en.

5. Met weween ach “eäni ekiekin Kraist,” me pwata a lamot ach sipwe káé usun pwóróusen manawen Jesus? (1 Korint 2:16)

⁵ Álleani 1 Korint 2:16. Ren ach sipwe éúféúfa ngenikich ewe manaw mi fé, a lamot ach sipwe “eäni ekiekin Kraist.” Weween, a lamot ach sipwe káé napanapen án Jesus ekiek me áppirú i. Jesus a unusen pwári uwaan án Kot we ngún mi fel. A unusen pwári napanapen Jiowa kewe usun chék eú kilasen oori mi ffataffatéch. (Ipru 1:3) Lapólóón ach eáni án Jesus ekiek, epwe pwal ina lapólóón ach áppirú me sópwéch lón ach eáni napanapan kewe.​—Fil. 2:5.

6. Met a lamot sipwe chemeni lón ach achocho le sótun éúféúfa ngenikich ewe manaw mi fé?

⁶ Mi tufich ach sipwe áppirú Jesus? Eli sipwe ekieki: ‘Jesus i emén mi unuséch. Usap fókkun tongeni unusen áppirú!’ Ika ka eáni ena esin ekiek, kopwe chemeni ekkeei mettóch. Áeúin, ka fférútá pwe kopwe eáni napanapen Jiowa kewe me Jesus. Iwe, ka tongeni filatá le áppirúúr me mwaren eáni ekkóch napanaper kewe. (Ken. 1:26) Oruuan, án Kot we ngún mi fel ina ewe manaman mi kon péchékkúl seni meinisin lón unuselapen láng me fénúfan. Ren álillisin, ka tongeni féri ekkewe mettóch kese tongeni féri wóón pwisin óm. Aúlúngátin, Jiowa ese mene ngonuk óm kopwe unusen pwári uwaan ewe ngún mi fel lón ei fansoun. Semach we a fen awora ngeni chókkewe mi eáni ápilúkúlúkún manaw wóón fénúfan ewe 1,000 ier ar repwe ukkunuséchúló lón. (Pwär. 20:1-3) Nge Jiowa a mochen ach sipwe achocho úkúkún ach tufich iei me lúkúlúk wóón an álillis.

7. Met sipwe káé iei?

⁷ Ifa usun sia tongeni áppirú Jesus? Sipwe káé rúáánú me lein uwaan án Kot we ngún mi fel. Sipwe ppii met sia tongeni káé seni án Jesus pwári eú me eú ekkena napanap. Me atun sia féri ena, sipwe ppii ekkóch kapas eis epwe álisikich le etittina ifa usun sipwe alapaaló ach eáni ewe manaw mi fé.

8. Ifa usun Jesus a pwári an tong?

⁸ Pokiten Jesus a fókkun tongei Jiowa, a pennúkú chómmóng mettóch fán iten Seman na me fán itach. (Joh. 14:31; 15:13) Jesus a pwári úkúkún an tongei aramas ren met a féri atun a nóm wóón fénúfan. Iteiten rán, a pwári an chúngú me tongei aramas, pwal mwo nge atun ekkóch ra ú ngeni. An afalafala pwóróus allimen ewe Mwúún Kot, ina ákkáeúin alen an pwári an tongei aramas. (Luk. 4:43, 44) Jesus a pwal pwári an tong mi pennúkú pwisin mochenin fán iten Kot me aramas ren an tipemecheres le riáfféú me ninniiló lepéún chón tipis. An féri ena a atufichikich meinisin ach sipwe eáni ewe manaw esemuch.

9. Ifa usun sipwe áppirú Jesus le pwári tong?

⁹ Sia fangóló manawach ngeni Jiowa me papatais pokiten sia tongei Semach na lón láng. Ina popun, a lamot ach sipwe pwári ach tongei Jiowa ren napanapen féfférúch ngeni aramas, usun chék Jesus. Iei met ewe aposel Johannes a makkeei: “Epwe ifa usun an [eman] epwe echeni Kot, ewe esap küna, nge ese fen echeni pwiin we mi küna?” (1 Joh. 4:20) Sia tongeni eisini pwisinkich: ‘Ua fen alóllóólaaló ai tongei aramas? Ua pwári ai tongei aramas inaamwo ika ra kirikiringaw ngeniei? Itá tong a amwékútúei le áeá ai fansoun me piseki le álisi aramas le káé usun Jiowa? Ua tipemecheres le féri ena pwal mwo nge atun lape ngeni rese aúcheani ai achocho are atun ra áweiresiei? Ua tongeni kútta alen ai upwe alapaaló ai fansoun le álisi aramas le wiliti néún Jesus chón káé?’​—Ef. 5:15, 16.

10. Pwata sia tongeni erá pwe Jesus i emén chón efisatá kinamwe?

¹⁰ Jesus i emén chón efisatá kinamwe. Atun aramas ra féfféringaw ngeni, ese pwal liwini ngeniir. Nge a fen pwal féri eú mettóch. A akkomw mwékút le efisatá kinamwe me pesei ekkewe ekkóch le ataweei ar osukosuk lefiler. Áwewe chék, a áiti ngeniir pwe a lamot ar repwe awora kinamwe lefiler me chiener kewe Chón Kraist ika ra mochen Jiowa epwe etiwa ar fel ngeni. (Mat. 5:9, 23, 24) Me fán fite a ákkálisi ekkewe aposel le úkútiw seni ar áninifengen ika ié leir a múrinné seni ekkewe ekkóch.​—Luk. 9:46-48; 22:24-27.

11. Ifa usun sia tongeni efisi kinamwe?

¹¹ Ren ach sipwe emén chón efisi kinamwe, ese chék naf ach sipwe túmúnú ach sisap efisi och osukosuk. Nge a lamot ach sipwe fókkun achocho le awora kinamwe lefilach me pesei chienach kewe Chón Kraist ar repwe ataweei ar osukosuk lefiler. (Fil. 4:2, 3; Jas. 3:17, 18) Sia tongeni eisini pwisinkich ekkeei kapas eis: ‘Mei wor met ua tipemecheres le féri ren ai upwe awora kinamwe lefilem me ekkewe ekkóch? Atun emén chienei Chón Kraist a ámeteki letipei, ua chék akkamwéchú ai song ren? Ua kan witi án ewe emén epwe wisen awora kinamwe are ua kan akkomw mwékút inaamwo ika ua meefi pwe tipisin ewe osukosuk? Atun mi fich, ua pesei chókkewe mi wor ar osukosuk ar repwe kinamwefengen lefiler?’

12. Ifa usun Jesus a pwári kirekiréch?

¹² Jesus i emén mi kirekiréch. (Mat. 11:28-30) A pwári kirekiréch ren an tipepwetete me tipemecheres, pwal mwo nge lón ekkewe atun mi áweires. Áwewe chék, atun ewe fin Kanaan a tingormaú ngeni an epwe echikara néún we, ese mochen féri an na tingor me mwan, nge atun neminna a pwári watteen an lúkú, iwe a echikara néún we fán kirekiréch. (Mat. 15:22-28) Ikaamwo Jesus a kirekiréch, nge ese pireir le fénéú ekkewe ekkóch. Fán ekkóch, a pwári an kirekiréch ren an áwenewenawu an fénéú chókkewe a tongeer. Áwewe chék, atun Petrus a sótun epiita Jesus an esap féri letipen Jiowa, Jesus a apwúngú i mwen mesen ekkewe pwal ekkóch chón káé. (Mark. 8:32, 33) Ese féri ena ren an epwe ásáwa Petrus, nge ren an epwe áiti ngeni eú lesen me éúréúra pwal ekkewe ekkóch chón káé ar resap lamalamtekia. Ese wor tipemwaramwar pwe Petrus a ekis sáw, nge a kúna álilliséchún án Jesus áwena.

13. Ifa usun sipwe pwári pwe sia enletin kirekiréch?

¹³ Ren ach sipwe enletin kirekiréch ngeni chókkewe sia tongeer, fán ekkóch a lamot ach sipwe áwenewena ngeniir ach fénér. Atun ka féri ena, kopwe áppirú Jesus ren óm alónga óm kapasen fén wóón ekkewe kapasen emmwen lón án Kot we Kapas. Kopwe tipepwetete. Kopwe lúkú pwe ra mochen féri minne mi pwúng, me lúkú pwe chókkana mi tongei Jiowa me tongeok repwe etiwa óm fénér fán tong. Kopwe pwisin eisinuk ekkeei kapas eis: ‘Ua pwora le fósetá atun ua kúna án emén ua tongei féri minne mi ngaw? Ika a lamot ai upwe fénéú emén, ua fós ngeni fán kirekiréch, are ua péchékkúl ngeni? Met popun ua fénéú emén? Ua fénéú pokiten ua song ren, are pokiten ua mochen álisi?’

14. Ifa usun Jesus a pwári pwe i emén mi aramaséch?

¹⁴ Jesus ese chék silei minne mi múrinné nge a pwal féri. A tongei Seman we ina popun a féfféri minne mi pwúng me a féri ren ekkewe popun mi pwúng. Emén mi aramaséch a kan kútta alen an epwe álisi aramas me féri minne mi múrinné ngeniir. Ese chék naf ach sipwe silei le féri minne mi pwúng, nge a lamot ach sipwe féri ren ewe popun mi pwúng. Eli sipwe ekieki, ‘Mi tufich án emén epwe féri minne mi pwúng, nge ese pwúng ewe popun an féri?’ Ewer, mi tufich. Áwewe chék, Jesus a fós usun chókkewe mi álisi ekkewe mi wéúngaw, nge ra nochchei án ekkóch repwe kúna met ra féri me ingeitiir. Inaamwo ika a éch minne ra féri, nge Jiowa ese pwapwa rer.​—Mat. 6:1-4.

15. Ifa usun sia tongeni enletin emén mi aramaséch?

¹⁵ Sia chék tongeni enletin emén mi aramaséch ika pwe popun ach féri minne mi pwúng esap seni ach pwisin achéchéékich. Iwe, ka tongeni pwisin eisinuk ekkeei kapas eis: ‘Ngang mi sile ai upwe féri minne mi pwúng me pwal enletin féri? Met popun ua kan féffér múrinné ngeni aramas?’

16. Met a lamot ach sipwe féri iteiten rán, me pwata?

¹⁶ Mi lamot ach sisap ekieki pwe atun sia papatais, a fen unus ach éúféúfa ngenikich ewe manaw mi fé me ese pwal chúen lamot ach sipwe ékkéúféúfa ngenikich. Ewe manaw mi fé a usun eché mineféén úf mi lamot ach sipwe túttúmúnúéchú. Eú alen ach sipwe féri ena, ina ren ach kútta alen ach sipwe eáni uwaan án Kot we ngún mi fel iteiten rán. Pwata? Pokiten Jiowa i ewe Kot mi chék akkangang, me an we ngún mi fel ina ewe manaman mi chék akkangang. (Ken. 1:2) Ina popun, ewe ngún mi fel a tongeni álisikich le uwaani uwaan kana. Áwewe chék, iei makkeien ewe chón káé James: “Ewe lükülük a mäla are ese fiti föför.” (Jas. 2:26) Sia pwal tongeni erá ena ren meinisin uwaan án Kot we ngún mi fel. Iteiten sia eáni uwaan, sia pwári pwe án Kot we ngún mi fel a akkangang lón kich.

17. Met a lamot sipwe féri atun sia túmúnúngaw le pwári uwaan ewe ngún mi fel?

¹⁷ Fán ekkóch, pwal mwo nge ekkewe Chón Kraist mi fen papatais ren fite ier, repwe túmúnúngaw le pwári uwaan ewe ngún mi fel. Nge a lamot ach sipwe chék achocho le pwáppwári ekkena napanap. Áwewe chék ren ei pwóróus: Ika a kamw eché úfom ka fókkun sani, iwe itá kopwe mwittir kápichieló? Aapw. Eli kopwe achocho le teiisefáli ika mi tufich. Me atun kopwe úféúfsefál, kopwe fókkun túmúnúéchú pwe esap kamwesefál. Pwal ina usun ika ka túmúnúngaw le kirekiréch ngeni emén, mosonottam ngeni, are tongei, iwe kosap lichippúng. Óm enletin omusomus ngeni, a tongeni eririéchúsefálikemi. Kopwe úppós le ámúrinnééló napanapom lón ekkan fansoun.

18. Met sia tongeni lúkúlúkú?

¹⁸ A ifa me kilisouch ren án Jesus leenien áppirú! Lapólóón ach áppirú napanapen an ekiek me féffér, pwal ina mecheresilóón ach eáni napanapan kewe. Lapólóón ach áppirú Jesus, epwe pwal ina lapólóón sópwéchúch lón ach éúféúfa ngenikich ewe manaw mi fé. Sia fen káé lón ei lesen rúáánú chék me lein uwaan án Kot we ngún mi fel. Pwata kese awora fansoun le káésefál eú me eú uwaan ewe ngún mi fel, me ekieki ifa usun ka tongeni alapaaló óm pwáppwári ekkena napanap? Ka tongeni kúna ekkewe lesen usun ei pwóróus lón ewe Research Guide for Jehovah’s Witnesses fán ewe itelap “Christian Life” mwirin ttiki “Fruitage of the Spirit.” Ka tongeni lúkúlúk pwe Jiowa epwe álisuk ika ka achocho le éúféúfa ngonuk ewe manaw mi fé me kosap pwilit sonuk.