Ekkewe chón oputakich ra achéúfetálei pwóróus mi chofona usun ekkewe mwán mi wisen emmwenikich lón án Jiowa we mwicheich. (Kölf. 31:13) Ekkóch ekkewe Chón Kraist mwán ra fen ares me aramas ra tipimwáál ngeniir pwe iir chón atai allúk. Ina met a pwal fis ngeni ekkewe Chón Kraist lón fansoun ekkewe aposel atun aramas ra tipimwáál ngeni aposel Paulus me aresini. Ekkóch ra úkútiw le álisi aposel Paulus atun a kalapus lón Rom. (2 Tim. 1:​8, 15; 2:​8, 9) Kopwe ekieki meefien Paulus. A fen likiitú fán chómmóng weires me a pwal mwo nge atolonga manawan lón feiengaw fán iter. (Föf. 20:​18-21; 2 Kor. 1:8) Amwo sisap fókkun usun chókkana rese álisi Paulus! Ina popun, sisap máirú ren án Satan mesááni ekkewe mwán mi wisen emmwenikich. A mochen án ekkena mwán repwe úkútiw le tuppwél ngeni Jiowa me a pwal mochen eniwakich. (1 Pet. 5:8) Sópweló le álisi pwiich kewe me sisap likitiireló.—2 Tim. 1:​16-18. w22.11 16-17 ¶8-11

Ewe chón féfféringaw mi áier mi eitiwetá wóón ewe iráán ninni únúkkún Jesus mwen an máló eli i emén chón Jus. Ekkewe chón Jus ra kan fel ngeni emén chék Kot, nge aramasen ekkewe pwal ekkóch mwú ra lúkú chómmóng kot. (Eks. 20:​2, 3; 1 Kor. 8:​5, 6) Ika ena chón féfféringaw i emén lein ekkewe ekkóch mwú, iwe itá epwe iei itiitin an ei kapas eis lón ach ei lesenin rán, “Ifa usun, kosap niwokkusiti ekkewe kot?” Pwal och, Jesus ese tiitiito fán iten aramasen ekkewe ekkóch mwú, nge fán iten “ekewe sip mi mwalechela, ir ekewe aramasen Israel.” (Mat. 15:24) Kot a pwár ngeni chón Israel pwe i epwe amanawasefáli ekkewe mi máló. Ese mwáál, ewe chón féfféringaw mi aier a silei ena pwe a pwá ren alon we pwe Jiowa epwe amanawasefáli Jesus me nemenem lón ewe Mwú. Eli ena mwán a ápilúkúlúk pwe Kot epwe pwal amanawasefáli. Pokiten i emén chón Jus, iwe ena chón féfféringaw mi áier eli a silei pwóróusen Atam me Efa. Iwe eli a pwal mirititi pwe ewe Paratis Jesus a fósun lón Lukas 23:43 eú tánipi mi lingéch wóón ei fénúfan.—Ken. 2:15. w22.12 8-9 ¶2-3

Sia pwal tufichin afalafal pokiten chék álillisin án Kot we ngún mi fel. Pwata? Pún Satan a kan maunekich pwe epwe aúkúkichetiw lón ach angangen afalafal. (Pwär. 12:17) Chómmóng aramas ra ekieki pwe Satan a fókkun péchékkúl ina popun sisap tongeni win lón ach maun ngeni. Nge ren ach angangen afalafal, sia tongeni okkufu! (Pwär. 12:​9-11) Ifa usun? Atun sia fiti angangen afalafal, sia pwári pwe sise niweiti án Satan kewe minen enniw. Iteiten ach afalafal, Satan a kan lus. Iwe, a ffat pwe Jiowa a apéchékkúlakich ren an we ngún mi fel me a pwapwa rech. (Mat. 5:​10-12; 1 Pet. 4:14) Án Kot we ngún mi fel a tongeni apéchékkúlakich pwe sipwe pworacho ngeni ese lifilifil osukosuk sipwe kúna lón ach angangen afalafal. (2 Kor. 4:​7-9) Iwe, met sipwe féri pwe sipwe lúkúlúk pwe Kot epwe chék faffang ngenikich an we ngún mi fel? A lamot sipwe tinikken le ióteki me lúkúlúk pwe Jiowa epwe aúseling ngenikich. w22.11 5 ¶10-11