Omwaddela mwanawo ottiyaniha yabure na yapama kayo esuwenevi bahi dhinalibihe nroromelo naye. Enofuneya wakamihedha wubuwela dhowakula dha mavuzo ninga aba: ‘Bibilia onkoddihela nni dhilobo dhinkala ninga dhokoddela? Ddinaziwe dhavi wila magano a Bibilia bamakamaka mwa miyo?’ (Iza. 48:17, 18) Akala mwanawo onfuna abatiziwe, kamukamihedhe wubuwela deretu muttoro onkana muttu agamala obatiziwa. Iyene ononamo dhavi esodha? Dhopurelamodha sivi? Makattamihoya bavi? Dhopurelamodha dhikalelini dhawinjiva opitta makattamihoya? (Mk. 10:29, 30) Japama wubuwela deretu dhilobo esi ahinatti obatiziwa. Kamukamihedhe mwanawo ononelamo ntowa ninimugwela ole ompambiha. Venevo iyene onele wona mwinya wila ofara magano a Bibilia enele okala elobo yaderetu mwigumini mwaye. w17.12 18 ddima 14-15

Motagiha, abali na arogora enjene anotabuwaga na maredda ottiyana-ttiyana. Enaya, anazuzumela abale ali akalaba. Oku eena anokosa kukuttu wila asapele murala wawa. Niziwa wila owinjivaya mwa nyuwo, munowana na makattamiho ninga abene obe oladdana. Masoso abo, anoja mudhidhi, guru vina muhaku wila nigomihe. Akala iyene onowodha otanaala neneri dhihina egumi, kavali waganyedha wila onowutanaala! Enottukulele omwebedha Yehova, kahiyo okalawo wawo, mbwenye omukwela wawo iyene. (Masal. 19:1, 3, 14) Babi wehu wodhulu, onoziwa kakamwe eli weyo. Bibilia onloga dhahi, “Nthithi nenyu vina notene nimala oziweya muthengoyá” vamentoni vaye. (Mt. 10:30) Yehova onfuna wila iyo ninonelemo yawi “Nabuya onoziwa malabo a okalawo wa athu apama.” (Masal. 37:18) Ndde, Yehova onoziwa makattamiho otene angumaniwena, nanda onowodha wuvaha guru wi ovilelena. w18.01 3 ddima 1, w18.01 4 ddima 4

Pedro munvenyihedhiye Tabita attu ahuma milomo, n’eji attuya a kwatti ejile “enjene amurumela Nabuya.” Anamafara aba aswa agahiwodha wawaddela attu eena miselu dhapama dha Yezu, obe ologa sabwa ya matikiniho vina guru dhina Yehova dha wavenyiha attu mukwani. (Mer. 9:36-42) Ahikalawo anamona enjene oonile na mento awa matikiniho a ovenyihiwa mukwani. Nsaka dhahi murumiwi Paulo wakosa matugumano numba dhahi ya vadhulu o Tróade, murudda oli omadhelo wa nzuwa elabo y’o Turkiya. Paulo ohiloga mpaka mattiyu. Muzombwe wakuweliwa Éutiko wagilatile vajanelani bagavuruwana. Venevo iyene ottiddiwa tturhu nanda ogonelavo rutu, omottela vatti. Enkala ninga waromile ottamagela vali Éutiko wali Luka. Ninga ng’anga, iyene wahoona wila muzombwe oddule ottiya oporeyavi kavuma. Iyena wahikwa-wene! Paulo vina watita. Mutitiliye omuworamela Éutiko baloga: “Kamudhugudheye, okalawo!” Ntikiniho ntti nahapatta attu otene oonile dhapadduwilevo. Awene ahiziwa wila muzombwe ole wahikwa, vavenyihiwiye “etene apangarhazeya vaddiddi.”—Mer. 20:7-12. w17.12 5-6 ddima 10-11