Kuli A-Ngalashia

4 Ngunambe pundu ngwami, shimbu swana uchili kanuke, kalisele ni kavumbi niumwe, chipwe ngwe kali mwene wa yuma yeswe, 2 alioze kakupwa mushi lia tufufuchi ni tuselo ndo ku tangwa lize asele tato. 3 Chizechene nawa, muze twapwile twanuke, ni yetu twapwile ndungo ha kukaula yuma yamokomoko ya hano hashi. 4 Alioze, muze shimbu liahetele, Zambi watumine Mwanenyi, yoze wasemukine kuli umwe pwo ni kutwama kulita ni shimbi, 5 hanga akakuule waze ali mushi lia shimbi, mba tukahase kupwa ana ja Zambi.

6 Amu nuli ana, Zambi hanatumu spiritu ya Mwanenyi mu mambunge jetu, mba ye spiritu yinakololoka ngwo: “Abba,* Tata!” 7 Kashika, ushi nawa ndungo, alioze mwana; mba nyi uli mwana, che kwamba ngwo, Zambi hanakupwisa nawa swana.

8 Muze te kanda nuchinyingika Zambi, yenu nwapwile ndungo ja waze hi tuzambi ko. 9 Alioze haliapwila, amu hinwanyingika Zambi, hanji ngwetu hananunyingika kuli Zambi, kuchi kevwe nunazange kuhiluka ku yuma yamokomoko, yilelu, yikehe-yikehe, ni kuzanga cheka nawa kupwa ndungo jayo? 10 Yenu nwakufunga chikolo matangwa, tukweji, tungonde ni miaka. 11 Ngunanuvwila woma, kuchina milimo yize nahondanganyine hakachi kenu muyipwa yamokomoko.

12 Ngunaliumbu kuli yenu mandumbu ngwami, pwenu ngwe yami, mumu ni yami napwile ngwe yenu. Yenu kunwangulingile upi niumwe. 13 Alioze, nunanyingika ngwenu, chisuho chitangu chize nanwambulwilile sango jipema, chapwile mumu lia musongo wami. 14 Chipwe ngwe musongo wami wapwile ngwe chimwe cheseko kuli yenu, nihindu kunwangulelesele chipwe kunguvwila lwaji;* alioze nwangutambwile ngwe umwe mungelo wa Zambi, ngwe Kristu Yesu. 15 Mba uwahililo uze nwapwile nawo kulihi uli? Mumu nguli ni shindakenyo ngwami, nyi te nwahashile, kachi nwatombongwene meso jenu ni kungwaha-o. 16 Shina hinapwa mukwa-kole wenu mumu lia kunulweza umwenemwene nyi? 17 Malunga jacho kanalingi yeswe yize mahasa hanga eye mbunge jenu, alioze chapwile ngwe kanazange upeme wenu; kanazange wika kunuhandununa kuli yami hanga nukaakaujole. 18 Kwamba umwenemwene, mashimbu eswe chakupwa chipema nyi umwe malihulumba hali yenu ni manyonga apema, hi wika ko muze nguli hakachi kenu. 19 Ana jami, cheka nawa ngunevu yikola mumu hali yenu. Yikola yacho yili ngwe yize pwo akwivwa ha kusema. Kashika mungununga ni kwivwa yikola yacho ndo muze yenu munwimbulula utu wa Kristu. 20 Te ngunazange kupwa hamwe ni yenu haliapwila hanga nguhase kwalumuna maliji jami, mumu ngunanenganyana kuhiana hakutwala kuli yenu.

21 Ngulwezenu, yenu waze nunazange kupwa mushi lia shimbi, shina kunwanyingikine yize Shimbi yinambe nyi? 22 Chakutalilaho, chinasonewa ngwo Apalahama wapwile ni ana aali, umuwika wa kuli ndungo yenyi, mukwo wa kuli pwo yoze te hi ndungo* ko. 23 Alioze mwana wa kuli ndungo yenyi wasemukine kulita ni musunya, mba mwana wa kuli pwo yoze te hi ndungo ko, wasemukine kupalikila mu chimwe chilakenyo. 24 Yuma yino yili ni ulumbunwiso ukwo; mumu mapwo wano kanalumbunuka usendo waali, umwe wa ku Mulundu wa Sinai, uze wakusema ana ku undungo, iye Hekare. 25 Hekare kanalumbunuka Sinai, umwe mulundu wa ku Arabia, uze unalite ni Yerusaleme ya haliapwila, mumu yili mu undungo hamwe ni ana jayo. 26 Alioze Yerusaleme ya mwilu hi ndungo ko, iye kali mama wa yetu eswe.

27 Mumu chinasonewa ngwo: “Wahilila, yena mumba ushi kusema; kololoka ni uwahililo, yena pwo yoze ushi kwivwa musongo wakusema; mumu pwo yoze akwecha kakupwa ni ana anji kuhiana pwo yoze uli ku ulo.” 28 Kashika mandumbu, yenu nuli ana a chilakenyo ngwe chize Izake apwile. 29 Alioze, chizechene ngwe ha mashimbu waze, yoze wasemukine kulita ni musunya aputukile kuhungumiona yoze wasemukine kupalikila mu spiritu, ni musono nawa chimuwika. 30 Mba yika chisoneko chakwamba? “Huma ndungo ni mwanenyi, mumu mwana wa ndungo kechi kuhasa kupwa swana hamwe ni mwana wa yoze hi ndungo ko.” 31 Kashika mandumbu, yetu kutushi ana ja ndungo, alioze ja pwo yoze hi ndungo ko.