Mukanda Utangu Kuli A-Tesalonika

3 Kashika, muze kutwahashile kulihumikiza nawa, yitunyonga ngwetu, muchipema kusala ukawetu mu Atene; 2 ni kunutumina ndumbwetu Timoteu, kavumbi* ka Zambi mu mulimo wa kwambujola sango jipema hakutwala kuli Kristu hanga akanukolese* ni kunutakamisa hakutwala ku ufulielo wenu, 3 hanga niumwe achine kukokoloka mumu lia lamba lino. Mumu ngwe chize nunanyingika, kutuchi kuhasa kwehuka lamba liacho.* 4 Muze twapwile hamwe ni yenu, twapwile ni kunutoweza ngwetu, mutukamona lamba, mba yino ye yinalingiwa, ngwe chize nunanyingika. 5 Kashika, muze te chahashile kulihumikiza nawa, yingutuma Timoteu hanga akanyingike hakutwala ku ushishiko wenu. Mumu nevwile woma ngwami, hanji Sakwonga hanweseka mu mulali umwe, mba kukilikita chetu muchipwa chamokomoko.

6 Alioze muze Timoteu akatukile kuli yenu ni kwiza kuli yetu, yatwambulwila sango jipema hakutwala ku ushishiko ni zango lienu, yatulweza nawa ngwenyi, nwakutwiwuluka ni zango matangwa eswe, ni kwivwa usona unji wa kutumona, ngwe chize ni yetu nawa twakwivwa usona wa kunumona. 7 Kashika mandumbu, mu luyinda * ni mu lamba lietu lieswe, atutakamishine mumu lia yenu ni mumu lia ushishiko wenu uze nwasolwele. 8 Mumu nyi yenu munumana nguu muli Mwene, yetu mutuwahilila.* 9 Kuchi mutuhasa kusakwilila Zambi mumu hali yenu, ni ha uwahililo unene uze twakwivwa kumeso ja Zambi yetu mumu hali yenu? 10 Ufuku ni mwalwa, twakuliumba ni mbunge yeswe hanga nyi muchilita tukanumone meso ni meso* ni kumanununa yize yinahono mu ufulielo wenu.

11 Zambi kanda Tata yetu, ni Mwene wetu Yesu, azulule kama jila hanga tuhase kwiza kuli yenu. 12 Chikwo nawa, Mwene anuwezele, ewa, zango lia kulumbama umwe kuli mukwo, ni kuli atu eswe, ngwe chize zango lietu hali yenu linalumbama, 13 hanga akatakamise mbunge jenu, ni kunupwisa kunushi chitela mu usandu kumeso ja Zambi yetu kanda Tata, ha kuheta cha Mwene wetu Yesu hamwe ni asandu jenyi eswe.