Usolwelo wa Yesu Kristu Alwezele Kuli Yoano

20 Mba namwene umwe mungelo kanahulumuka mwilu, kali ni sapi ya jondo ni lenge linene ku kwoko lienyi. 2 Iye yakwata ndragau mwe kapela wa shakulu, mwenawo Ndiapu kanda Satana, yamukasa ha 1,000 ka miaka. 3 Yamunyasa mu jondo, yayika ku jondo ni kujikako ni chijikilo hanga achine kununga ni kupiangula nawa mavungu ndo muze 1,000 ka miaka makamanunuka. Kulutwe lia yino yuma, makamutusula ha shimbu likepe.

4 Namwene ngunja, waze te anatwamaho aahele chiyulo cha kupatwila. Ewa, namwene alma* ja waze ashihile* mumu lia uchela uze ahanyine hakutwala kuli Yesu ni hakuhanjika hakutwala kuli Zambi. Namwene waze kawayilile ngongo chipwe kaponya kenyi, waze katayijile mufunda wa chinyingi ha huma ni ha kwoko. O yapwa nawa ni mwono ni kuyula hamwe ni Kristu ha 1,000 ka miaka. 5 (Afu akwo kakaahindwishile ku kufwa ndo muze 1,000 ka miaka te mamanunuka.) Uno we uhindukilo utangu. 6 Kawaha kanda musandu mweswe yoze uli ni chihanda ha uhindukilo utangu; hali wano kufwa chamuchiali kuchishi ni chiyulo, alioze o makapwa asasendote a Zambi ni a Kristu, kumakayula hamwe nenyi ha 1,000 ka miaka.

7 Muze 1,000 ka miaka makamanunuka, Satana makamutusula mu zuwo lia ususu, 8 iye makatuhuka hanga akapiangule mavungu ku mambango awana a hashi, Ngoke ni Mangoke kumakaakungulula hanga akase jita. Kwalula cho muchikapwa ngwe masekeseke a ku kalunga-lwiji. 9 O alimwangine hashi heswe ni kujingilika chilombo cha asandu ni mbonge yize Zambi azanga. Alioze kwahulumukine kahia mwilu ni kwocha eswe. 10 Mba Ndiapu yoze waapiangwile amunyashine mu chitende cha kahia ni fundanga, muze te muli ngongo ni profeta wa mahuza. O aamwesene lamba* mwalwa ni ufuku ndo ku miaka ya mutolo.

11 Mba namwene ngunja yinene yitoma ni Yoze te unatwamaho. Hashi ni malilu yachinyine kumeso jenyi, mba kawanyineko nawa chihela cho. 12 Namwene afu, anene ni akepe kanamana kulutwe lia ngunja, mba avungulwile yivungo. Alioze chivungo chikwo chize avungulwile; chapwile chivungo cha mwono. Afu aapatwilile mumu lia yuma yize yasonewene mu yivungo, kulita ni yitanga yo. 13 Kalunga-lwiji watuhwishile afu waze apwilemo, kufwa ni Fuka* yatuhwishile afu waze apwilemo, wano aapatwilile mutu ni mutu kulita ni yitanga yenyi. 14 Kufwa ni Fuka* ayinyashine mu chitende cha kahia. Chitende cha kahia chinalumbunuka kufwa chamuchiali. 15 Chikwo nawa, yoze kapwile ni jina lienyi liakusoneka mu mukanda wa mwono, kamunyashine mu chitende cha kahia.