Setembro

Twakuzachisa kanawa chawana chetu cha kuhanjika twakusolola kuli akwetu ngwetu, twakuwayila Yehova. Hachino, twakukwasa atu hanga amone kalisa yoze watwama hali waze ‘akulingila Zambi ni waze keshi kumulingila.’ (Mala. 3:18) Yino ye yalingiwile kuli umwe pangi yoze avuluka ngwo Kimberly. Iye kalingile umwe mulimo wa ku shikola ni longi-ni-mukwo. Hanyima, longi wacho yamona ngwo, Kimberly kanalise ni alongi akwo. Mumu te kakuhanjika yuma yipema, keshi kuyenga akwo nawa te keshi kuhanjika maliji a sonyi. Kulutwe, longi wacho yazanga kulilongesa Mbimbiliya ni Kimberly. Yehova kakuwahilila chinji muze akumona yuma yize twakuhanjika muyikwasa atu hanga alilongese umwenemwene! Tulieswe tunazange kuhanjika mu mutapu uze muuhalisa Yehova. w22.04 5-6 ¶5-7

Yesu katusula Maria Ka-Mandalamuze te akumupinjisa kuli andemoniu shimbiali! Usakwililo wenyi wamutwalile hanga apwe kambaji ka Yesu ni kusa mashimbu, tachi ni yikumba yenyi hanga akwase Yesu mu mulimo wa kwambujola. (Luka 8:​1-3) Maria kalemesene chinji yize Yesu alingile hali iye, alioze kota kakanyingikine yize te malinga kulutwe. Iye te mahana mwono “hanga mweswawo mamufuliela, kechi katoka, alioze akapwe ni mwono wa mutolo.” (Yoa. 3:16) Chipwe chocho, Maria kasolwele usakwililo wenyi kuli Yesu ha kushishika kuli iye. Muze Yesu te anapinda ha mutondo wa lamba, Maria kapwile hamwe nenyi ni kumukwasa ni kutakamisa tumbaji akwo. (Yoa. 19:25) Muze Yesu afwile, Maria ni mapwo akwo aali yalanda yuma hanga alulieke nayo mujimba wenyi. (Marku 16:​1, 2) Maria Iye kapwile ni uhashi wa kuliwana ni Yesu muze amuhindwishile ni kuhanjika nenyi, chiwape chize kuchakapwile kuli tumbaji akwo.—Yoa. 20:​11-18. w23.01 27 ¶4

Kutwatambile kunyonga ngwetu, amu te twakumulingila kunyima, kutwafupiwile kumulingila haliapwila. Chipwe ngwe kutushi ni uhashi ngwe uze twapwile nawo kunyima, nihindu twatamba kulihana chinji mu “milimo ya Mwene” ni kununga ni kulawola ndo ku songo. (1 A-Korindu 15:58; Mateu 24:13; Marku 13:33) Twatamba kulihana chinji mu mulimo wa Yehova ni kumuwayila ni mbunge yeswe. Maliji a Yesu ku chikungulwila cha Laotisea kasolwele kapinda walisa. Ayo kapwile ‘asaluka’ mu uwayilo wo. Mumu lia uswelele wo, Yesu yaamba ngwenyi te hapwa ‘akwa kulungajala ni hunya.’ Ayo katambile kusolola zango linji kuli Yehova ni mu uwayilo wenyi. (Uso. 3:​16, 17, 19) Yika twalilongesa? Nyi twamona ngwetu zango lietu kuli Yehova linatepuluka, twatamba kusakwilila chinji ha kulia cheswe cha ku ufulielo chize iye akutwaha mu ululikiso wenyi. (Uso. 3:18) Kutwatambile kutepulula zango lietu mu mulimo wa Yehova ha kukisa mashimbu ni tachi jetu hanga tufupe mwono upema hano hashi. w22.05 3-4 ¶7-8

Yehova kanasoneka umwe mukanda ulemu chinji. Iye kaputukile kuusoneka ha miaka yinji kunyima. Mu mukanda wacho kanasonekamo majina, jina litangu lili lia kavumbi kenyi washishika, Abele. (Luka 11:​50, 51) Kukatuka haze, Yehova kakuwezelamo majina. Musono, muli tununu a tununu twa majina. Mu Mbimbiliya, mukanda wacho kanavuluka ngwo, “mukanda wa kwiwuluka,” “mukanda wa mwono,” nawa ngwo “chivungo cha mwono.” (Mala. 3:16; Uso. 3:5; 17:8) Mu mukanda wacho muli majina ja waze eswe akuwayila Yehova ni mbunge yeswe ni kulemesa jina lienyi. Ayo kali ni kutalatala cha mwono wa mutolo. Ni yetu majina jetu mahasa kwasoneka mu mukanda wa mwono. Mba chino chilingiwe, twatamba kupwa ni usepa upema ni Yehova ni kufuliela ha ukuule wa Yesu Kristu. (Yoa. 3:​16, 36) Chipwe ngwe tuli ni kutalatala cha kuya mu malilu hanji kutwama hano hashi, yetu eswe tunazange hanga jina lietu alisoneke mu mukanda uno. w22.09 14 ¶1-2

Mukanda wa Usolwelo unasolola nawa “ndragau muchila munene.” (Uso. 12:3) Ndragau wacho kakulimika ni Yesu ni angelo jenyi. (Uso. 12:​7-9) Iye nawa kakulimika ni atu ja Zambi ni kuhana ndundo kuli ngongo hanji manguvulu a mafwefwe. (Uso. 12:17; 13:4) Ndragau wacho iya? Kali “kapela wa shakulu, jina lienyi ngwo, Ndiapu kanda Satana.” (Uso. 12:9; 20:2) Iye mwe wakusongwela akwa-kole eswe a Yehova. Yika muyikalingiwa kuli Ndragau? Usolwelo 20:​1-3 unalumbununa ngwo, Satana makamusa mu jondo. Chino muchikapwa ngwe kali mu zuwo lia ususu. Muze makapwa mu jondo, iye “kechi kapiangula nawa mavungu ndo kanunu ka miaka mamanunuka.” Hi kusongo, Satana ni andemoniu jenyi maanyasa “mu chitende cha kahia,” chekwamba, kwanongesa liakulu. Muchikapema chinji kutwama hashi haze kuheshi Satana ni andemoniu jenyi. Wano makapwa mashimbu apema! w22.05 14 ¶19-20

Yesu kapwile chikilikita. Muze apwile mukweze, kalingile mulimo wa kusonga mapaya. (Marku 6:3) Kwamba pundu, yisemi jenyi te kakuwahilila chinji ha ukwaso uze te akwaha mu usoko. Amu apwile mungunu, kota kapwile ni kulinga milimo yingunu, hachino atu anji kota te kakuzanga kulanda yuma yize apwile ni kulinga! Yesu kota kazangile chinji mulimo wenyi. Alioze, chipwe ngwe kapwile ni kulihana chinji ku mulimo wenyi wa ku musunya, nihindu te kakusa mashimbu hanga alingile Yehova. (Yoa. 7:15) Kulutwe, yanjila mu mulimo wa shimbu lieswe, chocho yatoweza waze apwile ni kumupanjika ngwenyi: “Kanda nukakilikita ha kulia chize cha kutoka, alioze kilikitenu ha kulia chize chili ni mwono wa mutolo.” (Yoa. 6:27) Nawa ha Longeso lia ha Mulundu, Yesu yamba ngwenyi: “Litulikilenu upite mwilu.” (Mateu 6:20) Nyi twakaula yiyulo ya mana ya Yehova, mutupwa ni nyonga lialita hakutwala ku mulimo wetu wa ku musunya. Yetu Akwa-Kristu tunanyingika ngwetu, twatamba ‘kukilikita ni kulinga milimo yipema.’ w22.05 22 ¶9-10

Unise kapwile chilweza chipema kuli Timoteu. Iye kamwene pundu ngwenyi, yitanga ya naye te yinakatuka ha zango lize akwete hali Yehova. Chikwo nawa, te kakuhasa kumona ngwenyi, naye kapwile ni kuwahilila mumu lia kulingila Yehova. Ni musono nawa, amama anji kakulongesa ana jo kuzanga Yehova ni kumulingila kupalikila mu yilweza yo. (1 Petu. 3:​1, 2) Ni yena muhasa kuchilinga. Mu mulali uka? Sako usepa we ni Yehova ha chihela chitangu. (Shimbi 6:​5, 6) Ngwe chize akulinga yisemi anji a mapwo, ni yena wakusa tachi jinji. Wakulinga yuma yinji ngwe, kunongama, kusa mashimbu ni kufupa mbongo hanga ufunge ana je ku musunya. Alioze kanda wecha yuma yino hanga yikukwike kukolesa usepa we ni Yehova. Nunga ni kulemba kuli Yehova, kulinga longeso lie lia wika ni kukunguluka ha poso jeswe. Nyi wachilinga, mukolesa usepa we ni Yehova ni kupwa chilweza chipema mu usoko we ni kuli akwenu. w22.04 16 ¶1; 19 ¶12-13

Tunawahilila chinji ha kunyingika ngwetu hi yetu ko twatamba kutesa chize hita mutu atamba kumupatwila! Mulimo uno wambala wa Yehova, mumu iye kali Ngaji Munene mu malilu ni hashi. (Roma 14:​10-12) Mutuhasa kupwa ni shindakenyo ngwetu, nihindu Yehova makapatula yuma kulita ni chiyulo chenyi chingunu cha chipi ni chipema. (Uputu. 18:25) Yehova kechi keza kalinga nichimwe chuma cha uhenge! Tunashimbwila tangwa lize Yehova makahwisa yuma yeswe yipi yize yakwiza ku uhenge wa atu ni shili. Ha shimbu liacho, yikola yeswe yize twakwivwa kumuyikahwa liakulu. (Samu 72:​12-14; Uso. 21:​3, 4) Kutuchi kayiwuluka nawa ni limwe tangwa. Amu shimbu liacho kanda liheta, tunasakwilila chinji Yehova ha kutwaha uhashi wa kumwimbulula ha kukonekena akwetu. w22.06 13 ¶18-19

Sopi mupema katamba kunyingika kanawa shimbi. Chikwo nawa, katamba kunyingika kanawa yize yinalite ni yize kuyalitele.Chitanga chikwo chika chize Sopi mupema atamba kupwa nacho? Iye katamba kunyingika kanawa yuma yeswe hakutwala ku chimwe chikuma, shimbu kanda achikwata chiyulo. Yino ye Yehova akulinga, kashika kali lume Sopi upema. Kulisa ni ngaji ja atu, Yehova kananyingika yuma yeswe hakutwala ku hita chikuma. (Uputu. 18:​20, 21; Samu 90:8) Ngaji ja atu kakupatula milonga kulita ni yize akumona hanji kwivwa. Alioze Yehova kalisa, iye kananyingika kanawa yize yakutwala mutu kulinga yimwe, ngwe yitanga yize ahingile kuli yisemi, fumbo lize atambwile, kuze akolelele ni yuma yikwo nawa. Chikwo nawa, kakunyingika yize yili mbunge ya mutu. Iye kakunyingika kanawa yize yakututwala kulinga yuma yimwe. Kutuchi kuhasa kuswekela Yehova chuma nichimwe. (Hepre. 4:13) Kashika, muze Yehova akukonekena umwe mutu, iye kakuchilinga mumu kananyingika yuma yeswe hali mutu wacho. w22.06 4 ¶8-9

Chili chilemu kunyingika kanawa yuma yize Satana azachishile hanga eseke Yombi, mumu ye akuzachisa nawa musono. Satana yasolola ngwenyi, yetu kutushi kuzanga Yehova ni mbunge yeswe, nawa ngwenyi nyi matwita hanga tusakule kulingila Yehova ni kulamwina mwono wetu, musakula kulamwina mwono wetu. Chikwo nawa, Satana yamba ngwenyi, Yehova keshi kutuzanga nawa ngwenyi keshi kupala tachi jize twakusa hanga tumuvwise kuwaha. Alioze, amu tunanyingika yize Satana anafupu kutulinga, kutuchi kutayiza mahuza jacho. Twatamba kumona yipikalo ngwe jila yize muyitukwasa kulinyingika kanawa. Yipikalo yakwashile Yombi kunyingika ulelu wenyi ni kwalumuna yimwe ku mwono wenyi. Chakutalilaho, iye kanyingikine ngwenyi te kanafupiwa kulikehesa. (Yombi 42:3) Ni yetu mutuhasa kulinyingika kanawa muze mutupalika mu yipikalo. Kashika, nyi twanyingika ulelu wetu, mutusa tachi hanga tululieke haze tunafupiwa. w22.06 23 ¶13-14

Yehova kanalakenya kutukwasa. Chakutalilaho, shimbu Yehova ambe wika ngwenyi: “Yenu nuli Yela jami.” Iye yamba ngwenyi: “Muze mukapalika mu meya mungukapwa hamwe ni yena, ndusu mu njiji, kujichi kakukumba. Ha kwenda mu kahia kuchi kawema; mulengi wako kuuchi kakulalisa.” (Iza. 43:2) Muze twakwambujola, ha mashimbu amwe twakulitakana ni yipikalo yize yapwa ngwe meya ni kapinda yoze wapwa ngwe kahia. Chipwe chocho, ni ukwaso wa Yehova twakununga ni kwambujola. (Iza. 41:13) Atu anji musono keshi kutayiza sango jetu. Alioze tunanyingika ngwetu, chipwe ngwe o malituna, chino kuchalumbunukine ngwo, kutwalingile kanawa mulimo wetu ngwe Yela ja Zambi. Chuma chakututakamisa ni kutwaha tachi chili kunyingika ngwo, Yehova kakuwahilila muze twakununga ni kwambujola ni ushishiko. Postolo Paulu kambile ngwenyi: “Mutu ni mutu kumakatambula fweto yenyi mwene, nikulita ni kukilikita chenyi mwene.”—1 Kori. 3:8; 4:​1, 2. w22.11 4 ¶5-6

Musono, tunamono kumanunuka cha uprofeto wa mu Mbimbiliya. Atu “a ku mavungu a malimi eswe” kanalilongesa limi lisandu lize linakatuka ha umwenemwene wa mu Mbimbiliya. (Zeka. 8:23; Zefa. 3:9) musono, atu kuhiana 8.000.000 mu yifuchi 240 kali mu ululikiso wa Yehova, nawa hita mwaka kakupapachisa tununu twa atu! Chuma chilemu hi unji wa atu ko, alioze yitanga ya ku Ukristu, chekwamba ‘utu waha’ uze akupwa nawo tumbaji wano aha. (Kolo. 3:​8-10) Atu anji haneche yitanga ya luchisa, ungalwe, katonde ni kwehuka kuzanga chinji chifuchi cho. Uprofeto uze uli ha Izaia 2:4 kuunamanunuka, o ‘keshi kulilongesa nawa kwasa jita.’ Mumu muze twakusa tachi hanga tuzale utu waha, twakukwasa atu hanga eze mu ululikiso wa Yehova nawa chakusolola ngwo, tunakaula usongwelo wa kasongo ketu, Yesu Kristu. (Yoa. 13:35) Mumu liaka yino yakulingiwa? Mumu Yesu kakutwaha ukwaso uze twakufupiwa.w22.07 9 ¶7-8

Muze tunalembe kuli Yehova, twatamba kuchilinga ni vumbi. Achinyonga ha usolwelo wa kukomwesa uze Izaia, Ezekiele, Daniele ni Yoano amwene. Weswe wasolwele ngwo Yehova kali Mwanangana wa uhenya. Izaia kamwene ‘Yehova kanatwama ha ngunja mwilu.’ (Iza. 6:​1-3) Ezekiele kamwene Yehova kanatwame ha temba lienyi mu malilu, liakujingilika ni ‘pangu lize liapwile ngwe kongolo.’ (Eze. 1:​26-28) Daniele kamwene “Mukulu-wa-Matangwa” kali ni mazalo atoma, ngunja yenyi yapwile milengi ya kahia. (Danie. 7:​9, 10) Nawa Yoano kamwene Yehova kanatwama ha ngunja yakujingilika ni kongolo yize yalifwa ni esmeralda. (Uso. 4:​2-4) Usolwelo uno wakutwiwulula ngwo, Yehova kakwete ndundo jinji. Kashika twakulemesa chinji uhashi wetu wa kulemba kuli iye, nawa tunazange kuchilinga ni vumbi. w22.07 20 ¶3

Akweze Satana kanazange kunukwika hanga nuhone kukola ku ufulielo. Jila yimwe ya kuchilingila, yili kukukakajanyisa hakutwala ku malongeso amwe a Mbimbiliya. Chakutalilaho, atu amwe mahasa kukushinjila hanga utayize ngwo, yuma yalitangile yene hi Zambi ko wayitangile. Muze wapwile kanuke kota te kuushi kunyonga ha chikuma chino, alioze amu unayi ni kukola, unalilongesa chikuma chino ku shikola. Hanji yize alongeshi je akwamba, muyihasa kupwa ngwe yamwenemwene kuli yena. Alioze, o hanji kanda achifupa kunyingika nyi Sakatanga kwe atwama. Iwuluka chiyulo chize chili ha Yishima 18:​17, chinambe ngwo: “Yoze malianga kulisamba mamumona ngwe mukwa ululi, alioze mukwo meza ni kumusopesa.” Shimbu utayize yuma yeswe yize wakulilongesa ku shikola, watamba kulilongesa kanawa yize Mbimbiliya yakwamba ni yize yili mu mikanda yetu. w22.08 2 ¶2; 4 ¶8

Tunazange kunyingika kanawa ulumbunwiso wa yize tunatange mu Mbimbiliya. Nyi ka, kutuchi kuyuka chinji ha yize tunatange. Chakutalilaho, tutalenu yize Yesu ahanjikile ni lunga yoze te wanyingika “Shimbi.” (Luka 10:​25-29) Muze lunga wacho ahulile yize te atamba kulinga mba azuke mwono wa mutolo, Yesu yamuhula ngwenyi: “Chika chinasonewa mu shimbi? Ngwe kuchi unatange?” Lunga wacho kahashile kuhana kumbululo lialita ha kutongola wika yisoneko yize yakwamba ngwo, ukazange Zambi ni mwenyembo we. (Levi 19:18; Shimbi 6:5) Alioze, tutalenu yize ahulile hanyima: “Mba mwenyembo wami iya?” Chihula chino chasolwele pundu ngwo, lunga wacho te kanyingikine ulumbunwiso wa yize akutanga. Kashika, kakanyingikine chize te makaula yisoneko yacho ku mwono wenyi. Tunafupiwa ukwaso wa Yehova mba tunyingike yize tunatange mu Mbimbiliya, kashika eta spiritu yisandu hanga yikukwase kulihulikila ha yize unatange. w23.02 9 ¶4-5

“Kuchi wanyingikine umwenemwene?” Kwamba pundu, kota hiunakumbulula chihula chino ha yisuho yinji. Chino chili chihula chitangu chize twakuhula mandumbu hanji mapangi jetu nyi tunazange kwanyingika kanawa. Twakuwahilila ha kwivwa chize mandumbu jetu anyingikine Yehova ni kumuzanga, nawa twakuwahilila ha kwalweza mumu liaka twakuzanga kupwa Yela ja Yehova. (Roma 1:11) Chikwo nawa, twakupwa ni shindakenyo ngwetu, tunazange kununga ni ‘kwenda mu umwenemwene,’ hanji ngwetu kununga ni kulinga yuma yize muyitwaha yiwape ni utayizo wa Yehova. Kuli yuma yinji yize yakututwala kuzanga umwenemwene. Chuma chilemu, twakuzanga Yehova Zambi, mumu iye mwe Chishina cha umwenemwene. Kupalikila mu Mbimbiliya, twakunyingika Yehova hi wika ko ngwe Sakatanga wa Ndundo-Jeswe yoze watangile malilu ni hashi, alioze ngwe Tata wa zango yoze wakutufunga.—1 Petu. 5:7. w22.08 14 ¶1, 3

Postolo Paulu kakolwezele mandumbu ni mapangi jenyi hanga asolole zango kupalikila mu “yitanga yipema.” (Hepre. 10:24) Iye kakwashile mandumbu jenyi hi wika ko ha yize apwile ni kwamba, alioze ni ha yize apwile ni kulinga. Chakutalilaho, muze mandumbu jenyi akwa-Kristu mu Yundeya apalikile mu umwe kapunga, Paulu yatwalila yuma yize apwile ni kufupiwa. (Yili. 11:​27-30) Kwamba pundu, chipwe ngwe Paulu kapwile ni milimo yinji ya kulinga ngwe kwambujola ni kulongesa, nihindu kapwile ni kufupa majila akukwashilamo mandumbu waze apwile ni kufupa ukwaso wa ku musunya. Ha kuchilinga, iye yakwasa mandumbu jenyi kufuliela ngwo, Yehova maakwasa ha yize anafupiwa. Musono, muze twakuzachisa mashimbu, tachi ni uhashi wetu hanga tukwase kuze kwalingiwa luyinda, ni yetu twakukolesa ufulielo wa mandumbu jetu. Mutuhasa kuchilinga nawa ha kuhana milambu mashimbu eswe hanga tukwase mulimo uze unalingiwa hashi heswe. Nyi twazachisa majila wano ni akwo, mutukwasa mandumbu jetu afuliele ngwo, Yehova kechi keza kahichika nilimwe tangwa. w22.08 24 ¶14

Mu Mbimbiliya muli uprofeto unji uze hiunamanunuka, umwe mba umanunuke kwapalikile miaka yinji kukatuka haze ausonekenene. Sango jakusolola ngwo uprofeto uno wamanunukine lume. Yetu kutushi kukomoka mumu tunanyingika ngwetu, uprofeto uno weswe wakatukile kuli Yehova. Chakutalilaho, achinyonga ha uprofeto uze wahanjikile hakutwala ku kukumba mbonge ya Babilonia. Ha mwaka 778 ndo 732 K.M.J., Izaia kaprofetezele ngwenyi, mbonge ya Babilonia te mayikumba. Iye kasolwele ngwenyi lunga avuluka ngwo Siru, mwe te mayikumba ni kusolola nawa yize iye te malinga hanga akumbe mbonge yacho. (Iza. 44:27–45:2) Izaia kaprofetezele nawa ngwenyi, te mukuheta shimbu lize Babilonia mayinongesa ni kuyihichika hululu. (Iza. 13:​19, 20) Babilonia kayikumbile kuli A-Media ni A-Persia ha mwaka 539 K.M.J. Musono, mu chihela chize mwapwile mbonge ya Babilonia himunapu wika mu yikulu. w23.01 4 ¶10

Yehova hanatukoka mu ululikiso wenyi hanga tulinge chihanda cha usoko wenyi wa hashi weswe. Kulinga chihanda cha usoko wa Yehova chili chiwape chinene nawa chakutuyukisa chinji! (Mar 10:​29, 30) Tuli ni mandumbu hashi heswe akuzanga Yehova ngwe yetu, nawa akusa tachi hanga akaule shimbi jenyi. Chipwe ngwe twakolelele ku chifuchi cheka, tuli ni ndako jeka, nawa twakuhanjika limi lialisa, nihindu twakulizanga chipwe muze twakuliwana ha chisuho chitangu. Chikwo nawa, twakuzanga kuwayila no hamuwika Tata yetu wa mu malilu chikwo nawa tunafupiwa chinji kupwa hamwe ni mandumbu jetu. (Samu 133:1) Ha mashimbu amwe, ayo kakutukwasa hanga tumone chize mutumbata yiteli yetu. (Roma 15:1; Ngala. 6:2) Ayo nawa kakutukolweza hanga tununge ni kulinga mulimo wa Yehova ni kutukwasa tukole ku ufulielo. (Hepre. 10:​23-25) Uchinyonga yize te muyilingiwa kuli yetu nyi kukushi chikungulwila chize chakutukwasa hanga tulimike ni Satana ni hashi henyi hapi. w22.09 2-3 ¶3-4

Muchihasa kupwa chikalu kulihumikiza muze tunazachisa internet. Nyi kutwakanyanyine, chakuhona kunyingika mutuhasa kumwanga sango jize te kutwatambile kulweza atu akwo. Nyi twasa sango ha internet, kutuchi kuhasa nawa kunyingika chize sango jacho majizachisa ni ponde yize muyizako. Kulihumikiza necho muchihasa kutukwasa muze akwa-kole jetu matushinjila hanga twalweze sango hakutwala kuli mandumbu ni mapangi jetu. Chakutalilaho, yino muyihasa kulingiwa mu chifuchi chize mulimo wetu uli wakukanjisa, mba mapulisha mahula mandumbu sango ja mu ululikiso wetu. Ha yikuma yino mutuhasa kukaula chiyulo chili ha Samu 39:​1, chinambe ngwo: “Mungufunga kanwa liami.” Twatamba kupwa atu waze akwetu mahasa kujikijila, mu usoko, kuli mandumbu ni mapangi jetu hanji kuli mutu mweswawo. Kashika, mba akwetu atujikijile, twatamba kupwa akwa-kulihumikiza. w22.09 13 ¶16

Tunafupiwa kulia cha ku spiritu, mba tupwe ni uwahililo wamwenemwene. Yetu lume twakufupiwa kulia cha ku spiritu. Kashika Yesu ambile ngwenyi: “Hi ku mbolo wika ko, mutu mapwa ni mwono, alioze ku maliji eswe akutuhuka mu kanwa lia Zambi.” (Mateu 4:4) Hachino, kutwatambile kutwama tangwa lia muwundu chakuhona kuhengwola Liji lia Zambi, Mbimbiliya. Mu Mbimbiliya, muli shimbi jize Yehova atuhele mumu lia zango jize jakutukwasa kumona chize mutuhasa kuwahilila ku mwono. Chakutalilaho, twakulilongesa mumu liaka iye atutangile, mumu liaka twatamba kukundama kuli iye, kupwa ni ukonekeno wa shili yetu ni kutalatala cha kulutwe lia matangwa. (Jere. 29:11) Muze twakulilongesa Mbimbiliya ni kunyingika umwenemwene uno, mbunge yetu yakuzala too ni uwahililo! Nyi ngwe munenganyana mumu lia yipikalo ya ku mwono, muhasa kutanga Liji lia Yehova ni kupukuna ha yize unatange. w22.10 7 ¶4-6

Hi chamokomoko ko Mbimbiliya ya kutukolweza hanga tupwe makulwana mu kunyonga chetu.Yetu twakujama ku ufulielo muze twakukaula shimbi ja mu Mbimbiliya ku mwono wetu. Hakehe-hakehe, twakumona chize shimbi jacho jakutukwasa kwehuka milonga ni kukwata yiyulo ya mana. Kuchi tunende ha chikuma chino? Nyi twaputukile kulu kulilongesa Mbimbiliya ni kukunguluka muchipema kulihula ngwo, mumu liaka kanda tuchilihana kuli Yehova ni kutupapachisa? Nyi hanatupapachisa, shina tunalulieka utotombo wetu wa kwambujola ni kulongesa? Shina yiyulo yize twakukwata yinasolola ngwo, twakukaula shimbi ja mu Mbimbiliya? Kutala twakusolola yitanga ya Ukristu ha kutwama ni akwetu? Nyi mutumona ngwetu kuli yimwe yize twatamba kululieka, ndo tuse tachi hanga tukaule shimbi ja Yehova jize ‘jakukanyamisa yizuzuke.’—Samu 19:7. w22.10 20 ¶8

Ezekiele kamwene chize spiritu yisandu ya Zambi yikwete ndundo. Usolwele uze amwene, wamukwashile kumona ngwo, spiritu yisandu yahanyine ndundo kuli angelo ni ku maroda a temba lia mwilu. (Eze. 1:21) Yika Ezekiele alingile? Iye kasonekene yize amwene. Yamba ngwenyi: “Ha kuumona nafulamanyine hashi.” Ezekiele kakomokene chinji ha iye amwene, chocho yafulamana hashi. (Eze. 1:28) Hanyima lia chino, muze Ezekiele te akwiwuluka usolwelo uno wa kukomwesa, kota kapwile ni kutakama ha kunyingika ngwo, ni ukwaso wa spiritu yisandu ya Yehova mahasa kulinga mulimo wenyi. Yehova yalweza Ezekiele ngwenyi: “Mwana mutu, mana ha molu je mba munguhanjika ni yena.” Maliji wano kamuhele tachi hanji ngwetu “spiritu” yize te anafupiwa hanga ahase kumana. (Eze. 2:​1, 2) Kukatuka haze, mu mulimo wenyi weswe Ezekiele yamusongwela ku “kwoko” lia Zambi hanji ngwetu, ni spiritu yisandu ya Zambi.—Eze. 3:22; 8:1; 33:22; 37:1; 40:1. w22.11 4 ¶7-8

Hano Izaia kanasolola Yehova ngwe Longeshi wa kupanjika kanawa yoze unende kunyima lia alongi jenyi ni kumika kulutwe ha kwalweza jila yipema yize atamba kukaula. Musono, twakwivwa liji lia Zambi kunyima yetu. Mu mutapu uka? Maliji a Zambi kaasonekene mu Mbimbiliya ha miaka yinji kunyima. Kashika, muze twakutanga Mbimbiliya chili ngwe tunevu liji lia Zambi kunyima yetu. (Iza. 51:4) Kuchi mutuhasa kuyuka ha usongwelo uze Yehova akutwaha? Twiwulukenu ngwetu, Izaia kahanjikile ha yuma yaali. Chitangu, ngwenyi: “Ye jila yino.” Chamuchiali, ngwenyi: “Endelenumo.” Kashika hi wika ko kunyingika “jila,” alioze twatamba nawa ‘kwendelamo.’ Kupalikila mu Mbimbiliya ni mu ululikiso wenyi, Yehova kakutulongesa yize twatamba kulinga. Chikwo nawa, kakutukwasa kukaula yize twakulilongesa. Mba tunyongonone ni uwahililo mu mulimo wetu, twatamba kulinga yuma yino yaali. Nyi twachilinga, mba mutupwa ni shindakenyo ngwetu Yehova matuwahisa. w22.11 11 ¶10-11

Hanyima lia kufwa cha apostolo eswe a Yesu, Akwa-Kristu a mahuza yanjila mu chikungulwila. (Mateu 13:​24-27, 37-39) Ayo yaputuka “kuhanjika yuma ya mahuza ni kukoka tumbaji hanga aakaule.” (Yili. 20:30) Mahuza amwe waze apwile ni kulongesa kali ngwo, Yesu kakahanyine mujimba wenyi “kamuwika hanga akambate milonga ya anji,” ngwe chize Mbimbiliya yakwamba, alioze ngwo, chitapo chenyi mapwa ni kuchihana mashimbu eswe. (Hepre. 9:​27, 28) Musono, atu anji a mbunge yipema kakufuliela ha malongeso jacho a mahuza. Ayo kakuya mu mayingeleja hita poso, ha mashimbu amwe hita tangwa hanga alinge yize akuvuluka ngwo, “Missa.” Mayingeleja akwo keshi kwiwuluka kufwa cha Yesu mashimbu eswe, alioze anji a kuli ayo kanyingikine kanawa ulumbunwiso wa chitapo cha Yesu. w23.01 21 ¶5

Ha kanunu ka miaka ya kuyula cha Yesu iye makahindwisa afu ni kukwasa atu waze akwononokena Zambi akapwe angunu. Akwa ululi “makatwama hano hashi ku miaka yeswe.” (Samu 37:​10, 11, 29) Kusulaho, makakumba “mukwa kole wa kasula kufwa.” (1 Kori. 15:26) Kutalatala chetu cha kupwa ni mwono wa mutolo chinakatuka ha Mbimbiliya. Kutalatala chacho, muchihasa kutukwasa kununga ni kushishika kuli Yehova ha mashimbu wano akalu. Alioze, kutwatambile wika kumulingila mumu ngwo, mutukazuka mwono wa mutolo. Chikuma chilemu chize twakushishikila kuli Yehova ni Yesu chili ngwo, mumu twakwazanga. (2 Kori. 5:​14, 15) Zango liacho mulitukwasa kwimbulula Yehova ni Yesu ni kulihana chinji mu mulimo wa kwambujola. (Roma 10:​13-15) Nyi twehuka kunyonga hali yetu ene wika ni kupwa yihanyi, Yehova mazanga kupwa sepa lietu ku miaka yeswe. w22.12 6-7 ¶15-16

Mumu lia yihungumiona mutuhasa kutokesa yuma yinji yize yakutwaha sambukila. Mutuhasa kulipikala hanji kwivwa woma wa yize muyihasa kulingiwa. Kupwa ni manyonga a mutapu au hi chipi ko, chipwe chocho twatamba kukanyama. Yesu kambile ngwenyi yihungumiona te muyihasa kututalingisa. (Yoa. 16:​1, 2) Tunanyingika ngwetu, Yesu kambile ngwenyi te kumatuhungumiona. Alioze kambile nawa ngwenyi, te mutuhasa kununga ni kushishika kuli Yehova. (Yoa. 15:20; 16:33) Nyi mulimo wetu wa kwambujola maukanjisa, mutununga ni kutambula usongwelo ku Mbetele ni kuli makulwana a mu chikungulwila. Usongwelo wacho matwahawo hanga utufunge, tununge ni kutambula kulia cha ku ufulielo, ni chize mutwambujola kulita ni uhashi wetu. Kashika, twatamba kusa tachi hanga tukaule usongwelo wacho. (Tia. 3:17) Chikwo nawa, kutwatambile kumwanga sango ja mandumbu jetu kuli waze keshi ni ulite wa kujinyingika.—Chilu. 3:7. w22.12 20-21 ¶14-16

Musono, Yesu machinunga ni kusongwela tumbaji twenyi mu mulimo wa kwambujola Wanangana wa Zambi hashi heswe. Iye kanamanununa chilakenyo chenyi. Kupalikila ha kukunguluka ni mu mikanda yetu, Yesu kakutulongesa chize twatamba kwambujola sango lipema. Kakutwaha nawa yuma yeswe yize tunafupiwa hanga tulinge kanawa mulimo wacho. (Mateu 28:​18-20) Twakulinga yize Yesu anashimbwila hali yetu ha kusa tachi hanga twambujole kuli atu ni kwalongesa ni kununga ni kulawola ha kushimbwila muli Yehova ndo haze manehena songo lia hano hashi. Nyi mutukaula chiyulo chize chili ha A-Hepreu 6:​11, 12, mutukakaminya kutalatala chetu “ndo kusongo.” Yehova hanatese tangwa ni ola yize manongesa hano hashi ha Satana. Muze tangwa liacho muliza, Yehova makamanuna yilakenyo yenyi yeswe yize yili mu Liji lienyi. Alioze, ha mashimbu amwe muchihasa kusoloka ngwe songo lia hano hashi linashimbula chinji. Chipwe chocho, tangwa lia Yehova mulikeza ‘kulichi kahona.’ (Haba. 2:3) Hachino, twatamba kununga ni ‘kutala kuli Yehova ni kutwaminyina Zambi ya ulamwino wetu.’—Mika 7:7. w23.02 19 ¶15-16

Nyonga lia atu waze akunyina ha milundu, liapwa kuheta helu lia mulundu. Alioze muze ayo ananyina, kakumana hamwe hanga atale yuma yipema yize yinasoloka. Chizechene nawa, muchilita kusa amwe mashimbu hanga unyonge ha chize Yehova akukukwasa chipwe muze unapalika mu lamba. Kusongo lia hita tangwa, lihule ngwe: ‘Ha yika Yehova angukwasa musono? Chipwe ngwe kapinda wami kanda achihwa, mba kuchi Yehova anangukwasa kumukumba?’ Sako tachi hanga uwane jila chipwe yimuwika yize Yehova anakukwashilamo. Kwamba pundu, kota unalembe hanga kapinda we ahwe. (Fwili. 4:6) Alioze, chili nawa chilemu kumona yiwape yize tuli nayo haliapwila. Mumu Yehova kanalakenya kututakamisa ni kutukwasa hanga tunyongonone. Kashika mashimbu eswe, solola usakwililo we ha yuma yize Yehova akulinga hanga akukwase. Kulinga chino, muchikukwasa kumona chize Yehova anakukwase kukumba kapinda.—Uputu. 41:​51, 52. w23.01 19 ¶17-18

Lihule ngwe: ‘Shina yitanga yami yakusolola ngwo ngunanyingika ngwami, tuli ha matangwa a kusula? Yize nakunyonga hakutwala ku shikola yinene ni mulimo, shina yakusolola ngwo kuwayila Yehova chili chuma chilemu ku mwono wami? Shina nakufuliela ngwami, Yehova matwaha yize yami ni asoko jami tunafupiwa?’ Yehova kakuwahilila chinji muze akumona tachi jize twakusa hanga tumuvwise kuwaha ha yeswe yize twakulinga. (Mateu 6:​25-27, 33; Fwili. 4:​12, 13) Twatamba kuhengwola manyonga jetu mashimbu eswe ni kwalumuna haze muhafupiwa. Postolo Paulu kambile ngwenyi: “Liesekenu yenwene nyi mu ufulielo nuli, sololenu chinyingi hali yenwene.” (2 Kori. 13:5) Kashika, twatamba kwalumuna manyonga jetu ha kutanga Mbimbiliya, ha kunyonga ngwe chize Yehova akunyonga ni kulinga yuma yeswe yize muyimuvwisa kuwaha.—1 Kori. 2:​14-16. w23.01 9 ¶5-6