Mbimbiliya Yakwalumuna Mwono wa Atu

“O kangusolwelele vumbi.”—GUADALUPE VILLARREAL

MWAKA ASEMUKINE: 1964

CHIFUCHI ASEMUKINYINE: MÉXICO

SANGO JENYI: MWONO WA LUCHISA

MASHIMBU JAMI AKUNYIMA: Nakolelele mukachi ka usoko muze twapwile ana shimbiali mu mbonge ya Hermosillo, Sonora, México, mu mbonge yacho mwapwile uswale unji. Tata kafwile muze te nguchili kanuke, kashika mama kapwile ni kukalakala chinji hanga atulele. Napwile ni kwenda ku molu kwamokomoko mumu twakapwile ni mbongo ja kulanda sapato. Muze naputukile kukalakala hanga ngukwase ku zuwo, te nguchili kanuke. Zuwo lietu liapwile likehe chinji, chizechene ngwe lia asoko akwo.

Ha mashimbu anji a mwalwa, mama te keshi kutwama mashimbu anji ni yetu hanga atufunge. Muze napwile ni miaka 6 umwe mwana lunga wa miaka 15 yaputuka kungusumbakenya ku tachi. Chino chalingiwile ha mashimbu anji. Kapinda umwe yoze napwile nenyi mumu lia yuma yacho kapwile kunyingika mujimba wami, nyi nguli lume lunga nyi pwo. Napwile ni kunyonga ngwami hi chipi ko kuvwila usolo malunga-ni-akwetu. Muze nafupile ukwaso wa ndotolo ni wa mangana a mayingeleja, o yangulweza ngwo, chishi niumwe mulonga chikwo nawa manyonga jami hi api ko.

Muze napwile ni miaka 14, yingukwata chiyulo cha kulisolola ku mbunga ngwe mutu yoze wakulinga yuma ya utumwa. Kukatuka hoho, yingununga ni mwono wacho ha miaka 11 ni kutwama ni malunga alisa. Yingulilongesa kuyinda kambu chocho yingutunga chihela chakuyinjila kambu. Alioze te chishi kuwahilila. Mwono wami wapwile wa too ni lamba. Mu mbunge yami napwile ni kumona ngwami, yuma yize te nakulinga hi yipema ko. Yinguputuka kulihula ngwami: ‘Shina hano hashi hatwama atu apema waze natamba kufuliela?’

Yingunyonga hali ndumbwami wa pwo. Iye kaputukile kulilongesa Mbimbiliya ni Yela ja Yehova, hakupalika cha mashimbu yamupapachisa. Iye kapwile ni kungulweza yuma yize te analilongesa, alioze te chishi kumupanjika. Chipwe chocho, napwile ni kukomoka utu ni ulo wenyi. Chapwile ni kusoloka lume ngwo iye ni mukwo lunga te kakulizanga ni kulivumbika umwe ni mukwo. Ha kupalika cha mashimbu, umwe Chela cha Yehova yaputuka kungulongesa Mbimbiliya. Ku uputukilo te chishi kuzanga chinji kulilongesa, alioze kulutwe yuma yalumukine.

CHIZE MBIMBILIYA YALUMWINE MWONO WAMI: Yela ja Yehova yangusanyika nguye ha chimwe kukunguluka cho, chocho yingutayiza. Chapwile chuma chaha kuli yami. Atu kapwile ni kunguhepwisa, alioze Yela ja Yehova ka. O kangusolwelele vumbi ni kungutambwisa. Chino changukwachile ku mbunge.

Nyonga liami lipema hakutwala kuli Yela ja Yehova, liokele muze nayile ha kukunguluka cha mbonge. Yingumona ngwami, chipwe muze akulikungulula mu yizavu yinene-yinene, o kalifwa ni ndumbwami wa pwo, kapwa atu amwenemwene. Yingumona ngwami, a e atu apema waze natamba kufuliela, chikwo nawa waze napwile ni kufupa. Nakomokene ha zango ni kulinunga cho, hamwe nawa chize azachishile Mbimbiliya hanga akumbulule yihula yami yeswe. Yingumona ngwami, chuma chize chakwakwasa kupwa atu apema chili kukaula yiyulo ya mu Mbimbiliya. Kashika, ni yami te natamba kwalumuna yuma yinji ku mwono wami mba ngupwe ngwe ayo.

Kwamba pundu, nafupiwile kwalumuna mwono wami weswe, mumu napwile ngwe nguli pwo. Mutapu wami wakuhanjika, kusunga-sunga moko, mazalo jami, kambu, masepa, yuma yeswe ayi te natamba kuyalumuna. Masepa jami yaputuka kunguhepwisa ni kungwamba ngwo: “Mumu liaka unalingi yuma yino? Te uli kwe kanawa. Echa kulilongesa Mbimbiliya. Uli ni yuma yeswe yize unafupiwa.” Chuma chikalu chapwile kwecha mwono wami wa luchisa.

Chipwe chocho, nanyingikine ngwami munguhasa kwalumuna. Maliji ali ha 1 A-Korindu 6:9-11, akwamba ngwo: “Nyi hanji kunwanyingikine ngwenu, yihenge kechi kahinga wanangana wa Zambi? Kanda nulionga: chipwe mapangala, chipwe akwa kukombelela mahamba, chipwe yitanji, chipwe akwa luchisa, chipwe akwa utumwa . . . kechi kahinga wanangana wa Zambi. Nyi yenu chocho nwapwile: alioze hananusanyisa, alioze hananusela ku usandu.” Maliji wano kangukolwezele chinji. Yehova kakwashile atu ku mashimbu a kunyima kwalumuna mwono wo, kashika ni yami yangukwasa. Kwapalikile miaka yinji ni kusa tachi jinji, alioze usongwelo ni zango lia Yela ja Yehova liangukwashile chinji.

KUYUKA CHIZE NAWANA: Musono mwono wami uli ngwe wa mutu mweswawo. Hingunambata, yami ni mukwetu pwo twakulongesa mwanetu hanga atwame kulita ni shimbi ja Mbimbiliya. Yitanga yami ya luchisa hiyinasala kunyima, haliapwila ngunawahilila chinji ha kupwa ni usepa upema ni Yehova. Musono nguli mukulwana wa mu chikungulwila, chikwo nawa nakukwasa akwetu kunyingika umwenemwene wa mu Mbimbiliya. Mama kawahililile chinji ha kumona chize mwono wami walumukine, chocho yatayiza kulilongesa Mbimbiliya, kashika musono neye kali Chela cha Yehova. Ndumbwami neye yoze ukwete mwono wa luchisa, musono kali Chela cha Yehova.

Chipwe atu waze apwile ni kutayiza yitanga yami yikulu, haliapwila kakwamba ngwo mwono wami wapema chinji. Alioze ami ngunanyingika yize yangukwashile kwalumuka. Kunyima, nafupile ukwaso wa mandotolo, alioze te kakungwaha wika yiyulo yipi. Kwamba umwenemwene, Yehova kangukwashile chinji. Chipwe ngwe te nakulimona ngwe chishi ulemu, alioze iye yalihulumba hali yami ni kungufunga ni zango hamwe ni uhomboloji. Nakuwahilila chinji ha kunyingika ngwami Zambi wakukomwesa, mukwa mana ni zango kakulihulumba chinji hali yami ni kuzanga hanga ngupwe ni mwono upema.