Akweze—Nungenu ni Kukola ku Ufulielo Muze Hanupapachisa

 1. Yuma yika yipema yize akweze halinga?

HITA mwaka, tununu a tununu twa akweze akwa-Kristu kakwapapachisa. Shina uli umwe wa kuli ayo? Nyi uli umwe wa kuli ayo, mandumbu je a mu ufulielo kanawahilila chinji ni Yehova yene kanawahilila! (Yishi. 27:11) Achinyonga ha yuma yipema yeswe yize hiwalinga. Wasele tachi hanga ulilongese Mbimbiliya, kota wachilingile ha miaka yinji. Yize walilongesele yakwaha shindakenyo ngwo, Mbimbiliya yili Liji lia Zambi. Chahiana ulemu, wanyingika Mwenya Mbimbiliya ni kumuzanga. Zango lie muli Yehova liakola, kashika walihanyine kuli iye ni kukupapachisa. Wakwachile chiyulo chipema!

 2. Yika mutulilongesa ha mutwe uno?

² Kwamba pundu, ufulielo we wapalika mu yeseko yeka ni yeka muze te unayi ni kukola ku ufulielo ndo ku upapachiso. Alioze amu unayi ni kukola, mupalika mu yeseko yeka nawa. Satana meseka kukupiangula hanga weche kuzanga Yehova ni kumuwayila. (Efwe. 4:14) Kanda wecha chino hanga chilingiwe. Yika muyikukwasa mba ununge ni kushishika kuli Yehova ni kumanununa chilakenyo chize walingile kuli iye? Watamba kusa tachi hanga nununge ni kukola ku ufulielo. (Hepre. 6:1) Kuchi muhasa kuchilinga?

 3. Yika akwa-Kristu eswe atamba kulinga hanyima lia kwapapachisa?

³ Hanyima lia kutupapachisa, yetu eswe twatamba kukaula chiyulo chize postolo Paulu ahanyine kuli akwa-kristu-ni-akwo mu Efwesu. Iye kaakolwezele hanga apwe akwa-Kristu ajama. (Efwe. 4:13) Chino chinalumbunuka ngwo, ‘o te katamba kununga ni kukola ku ufulielo.’ Mutuhasa kunyingika yize Paulu te anambe kwamba, muze atesele kukola cha ku ufulielo ni kukola cha mujimba wa kanuke. Mwana-kemba kakuneha chiseke kuli yisemi jenyi. Alioze, iye katambile kununga ni kupwa kanuke. Ha kupalika cha mashimbu, katamba kwecha ‘yitanga ya wanuke.’ (1 Kori. 13:11) Yino ye yakulingiwa nawa kuli akwa-Kristu. Hanyima lia kwapapachisa, o katamba kununga ni kukola ku ufulielo. Tutalenu yimwe yikuma yize muyitukwasa kumona chize mutuchilinga.

 4. Chitanga chika muchihasa kukukwasa kukola ku ufulielo? Lumbununa. (A-Fwilipu 1:9)

⁴ Nunga ni kuzanga Yehova. Yena wakuzanga Yehova. Alioze, zango lie mulihasa kwoka nawa. Kuchi chino muchihasa kulingiwa? Paulu kanasolola mutapu umwe uze tunawane ha A-Fwilipu 1:9. (Tanga.) Paulu kalembele hanga zango lia A-Fwilipu “likalumbame ni kuliwezela.” Mutuhasa kwokesa zango lietu hali Yehova. Kuchi mutuhasa kuchilinga? Mutuhasa kuchilinga, ha kwokesa “yinyingi ni mana.” Muze twakunyingika Yehova twakumuzanga chinji nawa twakulemesa utu wenyi ni mutapu uze akulingilamo yuma. Twakuzanga kumuvwisa kuwaha ha kwehuka kulinga yuma yize muyimuvwisa chinyengo. Twakusa tachi hanga tulinge yize mutuhasa ni kulinga upale wenyi.

5-6. Kuchi mutuhasa kwokesa zango lietu muli Yehova? Lumbununa.

⁵ Yesu kembulwile kanawa utu wa Yehova. Kashika muze twakunyingika kanawa Yesu, chino chakutukwasa kuzanga chinji Yehova. (Hepre. 1:3) Jila yipema yakunyingikinamo kanawa Yesu yili kulilongesa mikanda yiwana ya Evanjelu. Nyi kuushi ni chako cha kutanga Mbimbiliya hita tangwa, muhasa kuputuka haliapwila. Muze unatange sango hakutwala kuli Yesu, lihulikile ha yitanga yenyi. Atu te kakuzanga kupwa hamwe nenyi ni kuhanjika nenyi, nawa mumu lia zango, iye te kakusa twanuke akepe-akepe mu kondo. (Marku 10:13-16) Yesu te kapwa mutu mwashi kuhanjika nenyi, kashika chapwile chashi tumbaji twenyi kumulweza chize anevwu. (Mateu 16:22) Ha chikuma chino, Yesu kembulwile Tato wa mu malilu. Yehova neye kapwa mutu mwashi. Kashika, mutuhasa kukundama kuli iye kupalikila mu yilemba. Muze tunalembe, mutuhasa kumulweza yuma yeswe yize tunanyongo hanji yize tuli nayo ku mbunge. Tuli ni shindakenyo ngwetu, iye kechi kutupatwila hanji kutuhisa. Kakutuzanga nawa kakulihulumba hali yetu.—1 Petu. 5:7.

⁶ Yesu kevwilile atu keke. Postolo Mateu yasoneka ngwenyi: “Ha kumona mbunga, yaavwila keke, mumu analikatalisa nikulimbilambila, ngwe mapanga waze keshi kafunga.” (Mateu 9:36) Mba Yehova kuchi akwivwa? Yesu yamba ngwenyi: “Hi upale wa Tatenu ko yoze uli mu malilu, umwe wa wano akepe akatoke.” (Mateu 18:14) Maliji wano kakutuvwisa kuwaha, mumu kanasolola ngwo Yehova kakutuzanga chinji! Muze mutunyingika kanawa Yesu, zango lietu muli Yehova mulioka.

 7. Kuchi muhasa kuyuka ha kupalikisa mashimbu ni mandumbu je ajama ku ufulielo?

⁷ Yena nawa muhasa kusolola zango linji ni kukola ku ufulielo, muze mupalikisa mashimbu ni mandumbu je a mu chikungulwila ni kwanyingika kanawa. Wakumona chize o akuwahilila. Ayo keshi kuliseha ha chiyulo chize akwachile cha kulingila Yehova. Ahule hanga akulweze yuma yimwe yize alitakanyine nayo mu mulimo wa Yehova. Nyi unazange kukwata chimwe chiyulo chilemu, ete ukwaso. Iwuluka ngwe, “ku wunji wa akwa kuyula kwatwama kuwaha.”—Yishi. 11:14.

 8. Yika muhasa kulinga nyi unakakajana ha yize Mbimbiliya yakwamba?

⁸ Hwisa kukakajana che. Ngwe chize twamona ha paragrafu 2, Satana mazanga ku kukwika hanga uhone kukola ku ufulielo. Jila yimwe ya kuchilingila, yili kukukakajanyisa hakutwala ku malongeso amwe a Mbimbiliya. Chakutalilaho, atu amwe mahasa kukushinjila hanga utayize ngwo, yuma yalitangile yene hi Zambi ko wayitangile. Muze wapwile kanuke kota te kuushi kunyonga ha chikuma chino, alioze amu unayi ni kukola, unalilongesa chikuma chino ku shikola. Hanji yize alongeshi je akwamba, muyihasa kupwa ngwe yamwenemwene kuli yena. Alioze, o hanji kanda achifupa kunyingika nyi Sakatanga kwe atwama. Iwuluka chiyulo chize chili ha Yishima 18:17, chinambe ngwo: “Yoze malianga kulisamba mamumona ngwe mukwa ululi, alioze mukwo meza ni kumusopesa.” Shimbu utayize yuma yeswe yize wakulilongesa ku shikola, watamba kulilongesa kanawa yize Mbimbiliya yakwamba. Hengwola mu mikanda yetu. Hanjika ni mandumbu waze kunyima apwile ni kutayiza longeso lia kwamba ngwo, yuma yalitangile yene. Ahule hanga akulweze mumu liaka akutayiza ngwo, kuli Sakatanga wa zango. Kuhanjika no yuma yino muchikukwasa upwe ni shindakenyo ngwe Sakatanga kwali.

 9. Yika walilongesa ha chilweza cha Pangi Melissa?

⁹ Pangi Melissa kalilongesele hakutwala ku yitangiwa, chino yichimukwasa kukumba kukakajana chize apwile nacho.b Yamba ngwenyi: “Ku shikola, alongeshi kakulumbununa longeso lia yuma yalitangile yene, mu jila yize liakusoloka ngwe liamwenemwene. Ku uputukilo te chishi kuzanga kuhengwola mumu napwile ni kwivwa woma ngwami, hanji munguwana sango jize jinasolola ngwo, longeso lia yuma yalitangile yene lili liamwenemwene. Alioze yingunyingika ngwami, Yehova kanazange hanga tupwe ni shindakenyo ha yize twafuliela. Chocho, yinguputuka kuhengwola hanga nguhwise kukakajana chami. Yingutanga mikanda yetu yize yakuhanjika hakutwaka ku yitangiwa. Yino ye napwile ni kufupa. Kachi che naliangile kulinga.” (Existe um Criador Que Se Importa com Você?, A Vida—Teve um Criador? ni A Origem da Vida—Cinco Perguntas que Merecem Resposta).

10-11. Yika muyihasa kukukwasa mba wehuke manyonga api? (1 A-Tesalonika 4:3, 4)

¹⁰ Ehuka yitanga yipi. Muze uchili mukweze, usolo wakulisumbakenya wakwoka chinji, nawa ha mashimbu amwe akwenu mahasa kukushinjila hanga ulinge utanji. Yino ye Satana anazange hanga ulinge. Mba yika muyikukwasa kwehuka yeseko yacho? (Tanga 1 A-Tesalonika 4:3, 4.) Muze unalembe ukawe, lweza Yehova yuma yeswe yize unevu ku mbunge, nawa mwite hanga akujikijise. (Mateu 6:13) Iwuluka ngwe Yehova kanazange kukukwasa, iye kazangile kukupatwila. (Samu 103:13, 14) Mbimbiliya neyo muyihasa kukukwasa. Pangi Melissa yoze hitwatongola, kasele tachi jinji hanga ehuke manyonga a luchisa. Yamba ngwenyi: “Kutanga Mbimbiliya hita tangwa changukwashile kwehuka usolo upi. Mbimbiliya yakukwashile nawa kuzanga Yehova ni kunyingika ngwami nguli wa Iye.”—Samu 119:9.

¹¹ Kanda weseka kukumba yipikalo ye ukawe. Hanjika ni yisemi je hakutwala ku yize unapinda nayo. Hi chashi ko kulweza atu akwo yuma ya ku mwono wetu, alioze chili chipema kuchilinga. Melissa yamba ngwenyi: “Nalembele ngwite hamu, mba yinguhanjika ni tata hakutwala ku chikuma chacho. Hanyima lia chino, yingulivwa kanawa. Nanyingikine ngwami, Yehova kanawahilila chinji hali yami.”

12. Kuchi muhasa kukwata yiyulo yipema?

¹² Kaula usongwelo wa shimbi ja mu Mbimbiliya. Muze unayi ni kukola, yisemi je makwecha hanga yena mwene ulikwachile yiyulo. Alioze kuli yuma yinji yize kuwanyingikine. Kuchi muhasa kwehuka kulinga yuma yize muyipihisa usepa we ni Yehova? (Yishi. 22:3) Pangi avuluka ngwo Kari, kanalumbununa yize yamukwashile kukwata yiyulo yipema. Iye kanyingikine ngwenyi, mukwa-Kristu yoze hajama ku ufulielo, kafupiwile katalilo wa shimbi ha yuma yeswe yize malinga ku mwono wenyi. Yamba ngwenyi: “Nafupiwile kunyingika chize Yehova akumona yuma, chakuhona kulikwachilila ha katalilo wa shimbi.” Muze unatange Mbimbiliya, lihule ngwe: ‘Yika maliji wano anangulongesa ha kunyonga cha Yehova? Shina hali shimbi jize mujingukwasa kulinga yuma yalita? Nyi ngwe hijili, kuchi munguhasa kuyuka ha kujikaula?’ (Samu 19:7; Iza. 48:17, 18) Nyi watanga Mbimbiliya ni kupukuna ha yize unatange, muchipwa chashi kukwata yiyulo yize muyivwisa Yehova kuwaha. Muze unayi ni kukola ku ufulielo, munyingika ngwe kuwafupiwile katalilo wa shimbi ha hita chuma chize mulinga, mumu munyingika chize Yehova akunyonga ha yuma yacho.

13. Kuchi masepa apema mahasa kukukwasa? (Yishima 13:20)

¹³ Sakula masepa waze akuzanga Yehova. Masepa waze musakula, mahasa kukukwasa kukola ku ufulielo. (Tanga Yishima 13:20.) Umwe pangi avuluka ngwo Sara, te kanatokesa uwahililo wenyi. Chocho, yikulingiwa yimwe yize yamukwashile kupwa cheka ni uwahililo. Sara yamba ngwenyi: “Nawanyine masepa apema ha shimbu lialita. Yami ni umwe pangi mukweze, twapwile ni kuliwana hita poso hanga tululieke longeso lia Kaposhi wa Kutalila. Sepa mukwo, kangukwashile hanga nguputuke kuhana makumbululo ha kukunguluka. Mumu lia ukwaso wa masepa jami, yingupwa ni longeso lia wika ni kulemba chinji. Yingupwa ni usepa upema ni Yehova nawa yinguputuka kuwahilila cheka.”

14. Yika yakwashile Julien kupwa ni masepa apema?

¹⁴ Kuchi muhasa kulinga usepa ni atu waze makukwasa kukola ku ufulielo? Julien yoze haliapwila uli mukulwana wa mu chikungulwila, yamba ngwenyi: “Muze te nguchili mukweze, napwile ni kulinga usepa upema ni mandumbu waze napwile ni kwambujola no. Masepa jacho, kapwile ni kuzanga chinji mulimo wa kwambujola. Chocho, yangukwasa hanga ni yami nguzange mulimo wa kwambujola. Yingutesa kulinga mulimo wa shimbu lieswe ku mwono wami. Nawa nanyingikine ngwami, te ngunatokesa masepa apema ha kulikata wika ni masepa waze apwile ni miaka yimuwika ni ya yami. Kulutwe, yingulikata ni masepa akwo apema ku Mbetele. Yilweza yo yangukwashile kusakula kanawa yiheho, nawa chino yichingukwasa kukundama kuli Yehova.”

15. Utowezo uka Paulu ahanyine kuli Timoteu hakutwala ku usepa? (2 Timoteu 2:20-22)

¹⁵ Yika muhasa kulinga nyi munyingika ngwe, kulikata ni umwe mu chikungulwila muchihasa kupihisa usepa we ni Yehova? Paulu kanyingikine ngwenyi, atu amwe mu chikungulwila te keshi kunyonga hanji kulinga yuma ngwe akwa-Kristu amwenemwene. Kashika atowezele Timoteu hanga achine kulikata no. (Tanga 2 Timoteu 2:20-22.) Usepa wetu ni Yehova uli ulemu. Twakusa tachi hanga tukundame kuli Yehova, kashika kutwatambile kulikata ni atu waze mapihisa usepa wetu ni Yehova.—Samu 26:4.

16. Yika muhasa kutesa kulinga ku ufulielo?

¹⁶ Tesa kulinga yuma yize muyikukwasa. Sakula kulinga yuma yize muyikolesa ufulielo we ni kukukwasa hanga ujame ku ufulielo. (Efwe. 3:16) Chakutalilaho, muhasa kululieka katalilo wa longeso lie lia wika ni kutanga che cha Mbimbiliya. (Samu 1:2, 3) Hanji muhasa kumona ulemu wa kululieka yilemba ye ha kuyilinga ha yisuho yinji nawa yize yinakatuka ku mbunge. Hanji mufupiwa kulihumikiza ha chize musakula yiheho ni chize muzachisa mashimbu je. (Efwe. 5:15, 16) Muze Yehova makumona unase tachi hanga ukole ku ufulielo, iye mawahilila.

17. Kuchi muhasa kuyuka ha kukwasa akwenu?

¹⁷ Kukwasa akwenu muchikukwasa kukola ku ufulielo. Yesu kambile ngwenyi: “Chinawaha kutambula alioze shinaho kuhana.” (Yili. 20:35) Muyuka chinji ni wazachisa mashimbu ni tachi je ja ukweze hanga ukwase akwenu. Chakutalilaho, muhasa kutesa kukwasa mandumbu waze hapwa tushinakaji ni waze ali ni ulema mu chikungulwila chenu. Muhasa kwakwasa ha kwalanjila yuma ha yitanda ni kwakwasa kuzachisa telefone. Nyi uli ndumbu wa lunga, tesa kupwa kavumbi ni nyonga lia kukwasa mandumbu je mu chikungulwila. (Fwili. 2:4) Nawa muhasa kusolola zango kuli waze hi mandumbu ko ha kwambulwila sango lipema lia Wanangana. (Mateu 9:36, 37) Nyi muchilita, tesa kulingila Yehova mu mulimo wa shimbu lieswe.

18. Kuchi kulinga mulimo wa shimbu lieswe muchikukwasa kukola ku ufulielo?

¹⁸ Mulimo wa shimbu lieswe muuhasa kukukwasa kukola ku ufulielo. Kukalakala ngwe pionelu muchikukwasa kuya ku Shikola ya Akwa-Kwambujola Wanangana. Muhasa kuya ku Mbetele hanji kulinga mulimo wa kutunga Mazuwo a Wanangana. Umwe ndumbu wa pwo pionelu yoze avuluka ngwo Kaitlyn, wa miaka 21 yamba ngwenyi: “Kwambujola hamuwika ni mandumbu ni mapangi ajama ku ufulielo, changukwashile chinji hanyima lia upapachiso wami. Yilweza yo yangukwashile kulilongesa kanawa Mbimbiliya ni kululieka uhashi wami wa kulongesa.”

19. Yuma yika muopwa nayo nyi wanunga ni kukola ku ufulielo?

¹⁹ Muze unanungu ni kukola ku ufulielo, Yehova makwaha yuma yinji yipema. Kuuchi kuzachisa tachi je hanga ulinge yuma yize kuyishi ulemu. (1 Yoa. 2:17) Chikwo nawa, mwehuka lamba lize liakwiza ha kukwata yiyulo yipi. Nyi wachilinga, mufumbuka ni kupwa ni uwahililo wamwenemwene. (Yishi. 16:3) Chilweza che chipema muchitakamisa mandumbu eswe mu chikungulwila. (1 Timo. 4:12) Chahiana ulemu, muopwa ni sambukila ni uwahililo uze wakwiza ha kuvwisa Yehova kuwaha ni kupwa sepa lienyi.—Yishi. 23:15, 16.