Kulemba

1 Mumu Liaka?

KULEMBA. Kuli sango jikehe mu Mbimbiliya jize atu akuzanga kunyingika. Tutalenu yihula shimbiali yize kanji-kanji atu akulihula chinji hakutwala ku yilemba ni kumona makumbululo a mu Mbimbiliya. Ulemu wa mitwe yino, uli kukukwasa hanga uputuke kulemba hanji kupemesa yilemba ye.

CHIKALU kuwana atu waze akwete chako chimwe hanji akuya mu yimwe yingeleja waze keshi kulemba. O kakulemba muze ali ukawo, muze ali mu yingeleja, mu sunangonga, tembele ni yihela yikwo. Atu amwe kakwala mahina hashi hanga alembeleho, mikosa, rodas de oração, mikanda, tuponya ni mapaya waze akuzezeleka mu yihela muze akulembela.

Yilemba yakulingisa hanga atu apwe alisa ni yitangiwa yikwo ya mwono yize yatwama hano hashi. Tunanyingika ngwetu yetu tukwete yuma yize yalifwa ni ya tushitu. Chizechene ngwe tushitu, twakufupiwa kulia, fuji ni meya. Chizechene ngwe tushitu, twakusemuka, mututwama ni mwono ni kufwa. (Chilumbununyi 3:19) Alioze atu wika e akulemba. Mumu liaka?

Kumbululo lili ngwo, mumu twakufupiwa kulemba. Mumu kulemba chapwa ngwe chau hakachi atu ni yuma ya ku spiritu. Yuma yize atu akumona yili yisandu hanji ngwo ya mutolo. Alioze Mbimbiliya yakusolola ngwo, katutangile ni nyonga liacho. (Chilumbununyi 3:11) Tangwa limwe Yesu yamba ngwenyi: “Kawaha yiswale mu spiritu.”—Mateu 5:3.

‘Uswale uno wa mu spiritu’—we muuhasa kutukwasa kuwana ulumbunwiso wa mumu liaka kwatwama matembele apwahaha, yuma ni mashimbu waze atu akuzachisa hanga alembe. Alioze atu amwe kakulijikijila chinji ene hanji kujikijila hali akwo hanga akuchise zala yo ya ku spiritu. Shina atu ku tachi jo, mahasa kukuchisa zala yo ha chikuma chino? Tunanyingika ngwetu mwono wetu kuushi kushimbula chinji, chikwo nawa kutwanyingikine yuma yeswe. Kashika, ndo kupwe umwe yoze ukwete mana anji ni mwono kuhiana mwono wetu mba atwehe yize tunafupiwa. Mba yuma yika ya ku spiritu yize yakutulingisa hanga tulembe?

Nyonga ha chino: Shina hiunapalika kama mu umwe ukalu mba hiumona ngwe niumwe yoze mahasa kukwaha usongwelo, mana, yiyulo hanji makumbululo waze unafupu wakuhi? Shina hiunafwisa kama umwe mutu yoze wazanga chinji mba hiumona ngwe unafupiwa utakamiso? Shina hiunafupiwa kama usongwelo hanga uhase kukwata chimwe chiyulo hanji kwita ukonekeno ha chimwe chuma chipi chize walinga?

Mbimbiliya yinasolola ngwo, ayi yili yuma yimwe yize twatamba kwita mu yilemba. Mutuhasa kujikijila mu Mbimbiliya ha yikuma yino. Chikwo nawa, mu Mbimbiliya munazala too ni yilemba ya malunga ni mapwo ashishika. O kalembele hanga awane utakamiso, usongwelo, ukonekeno ni makumbululo a yihula yo.—Samu 23:3; 71:21; Daniele 9:4, 5,19; Habakuke 1:3.

Chipwe ngwe atu waze alembele kalembele ha yuma yalisa, nihindu o kapwile ni chuma chimwe chalifwa. Atu eswe waze apwile ni kulemba, kanyingikine ngwo kuli chimwe chuma chilemu chize atamba kulinga mba apanjike yilemba yo. Chuma chacho, atu anji musono kakuchilelesa. Atu wano kanyingikine mutu yoze te atamba kulemba.

[Chizulie]

Kulemba

2 Kuli iya Twatamba Kulemba?

ATU anji kakutayiza ngwo, mahasa kulemba kuli mutu hanji chuma cheswacho, yilemba yacho muyiheta kuli Zambi. Akwa-kukwasa yizavu ya mayingeleja ni atu waze akwamba ngwo uwayilo weswe walita, kakutayiza nyonga lino lia kulemba kuli mutu hanji chuma cheswacho. Shina nyonga lino lili liamwenemwene?

Mbimbiliya yakusolola ngwo, atu anji keshi kukunjika yilemba yo kuli mutu walita. Ha mashimbu waze asonekene Mbimbiliya, atu anji kapwile ni kulemba kuli tuponya. Alioze, Zambi katowezele atu ha yisuho yinji hakutwala ku ndako jacho. Chakutalilaho, mukanda wa Samu 115:​4-6, unahanjika hakutwala ku tuponya ngwo: “Matwi ali no alioze keshi kwivwa.” Nyonga linasoloka zwalala. Shina chili lume chilemu kulemba kuli zambi yoze keshi kuhahasa kutwivwa?

Tushindakenyenu nyonga lino ha kuhengwola umwe lusango mupema wa mu Mbimbiliya. Profeta Eliya kahamwishine aprofeta a Mbale hanga alembe kuli tuzambi two, mba iye te malemba kuli Zambi yenyi. Eliya yamba ngwenyi, Zambi yoze te makumbulula yilemba mwe Zambi wamwenemwene. Hachino, aprofeta a Mbale yaliumba kuli zambi yo, yakalumuka ni liji linene, alioze zambi yo kakumbulwile. Lusango yono kanambe ngwo: “Kukwapwile chipwe liji, chipwe kumbululo, chipwe mukwa kwivwa; nichimwe.” (1 Mianangana 18:29) Mba yika mutwamba hali Eliya?

Muze iye ahwishile kulemba, Zambi yenyi yamukumbulula kawashi-washi, kahia hikahulumuka ni kulalisa mulambu wa Eliya. Kalisa muka wapwile hakachi ka yilemba yino yaali? Kumbululo lili ha majili a yilemba ya Eliya, ha 1 Mianangana 18:36, 37. Kulemba chacho hi chinene ko, mu limi lia Hepreu kulemba chacho chikwete maliji 30 wika. Chipwe chocho, ha maliji wano akehe, Eliya yazachisa jina lia Zambi, Yehova ha yisuho yitatu.

Mbale yoze unalumbunuka “mwene” hanji “mwata,” kapwile zambi wa A-Kanana. Chikwo nawa, kwapwile tuzambi anji a mutapu wacho kulita ni chihela ni chihela. Alioze, jina yehova lialisa chinji, mumu kuliatela wika mutu umuwika mu malilu ni hashi. Zambi wacho yamba kuli atu jenyi ngwenyi: “Yami Yehova. Lie jina liami lienalio; uhenya wami chichi kauhana kuli niumwe mukwo.”—Izaia 42:8.

Shina yilemba ya Eliya ni ya aprofeta ja Mbele yeswe yayile ku chihela chimuwika? Ka. Mumu uwayilo wa Mbale wapwile ni kunjisa atu mu utanji, kulambula atu ngwe yitapo ni kupihisa manyonga ja atu. Alioze, kuwayila Yehova te kuchishi kushinjila atu hanga alinge yuma yipi. Achinyonga hachino: Nyonga ngwe watuma mukanda kuli umwe sepa lie mulemu chinji, shina muzanga hanga mukanda wacho auhane kuli mutu mweka yoze ukwete yitanga yipi yize yalisa ni ya sepa lie? Ka!

Muze wakulemba kuli Yehova, wakulemba kuli Sakatangwa wa yuma yeswe, kanda Tata wa atu eswe.a Profeta Izaia yamba mu yilemba ngwenyi: “Yena uli Tata.” (Izaia 63:16) Zambi wacho kali yozemwene Yesu ambile kuli tumbaji twenyi ngwenyi: “Munguzezuka kuli Tata kanda Tatenu, ni Zambi yami kanda Zambi yenu.” (Yoano 20:17) Yehova mwe Tato ya Yesu. Mwe Zambi yoze Yesu apwile ni kulemba yoze nawa alongesele tumbaji hanga apwe ni kulemba.—Mateu 6:9.

Shina Mbimbiliya yakutulongesa hanga tulembe kuli Yesu, Maria, asandu hanji angelo? Ka,—twatamba kulemba wika kuli Yehova. Tutalenu yikuma yaali. Chitangu, kulemba chinalumbunuka uwayilo, mba Mbimbiliya yinasolola ngwo Yehova wika mwe watela uwayilo. (Kutuhuka 20:5) Chamuchiali, Mbimbiliya yinambe ngwo iye kali mukwa “kwivwa kulemba.” (Samu 65:2) Chipwe ngwe Yehova kakuhana yiteli kuli akwo, nihindu chiteli chino chakupanjika yilemba kakachihanyine kuli mutu niumwe. Iye kali Zambi yoze walakenya kwivwa yilemba yetu.

Nyi unazange hanga Zambi apanjike yilemba ye, watamba kwiwuluka maliji wano a mu Mbimbiliya: ‘Mweswawo matambika ha jina lia Yehova kumakamulamwina.’ (Yilinga 2:21) Shina Yehova kakwivwa yilemba yeswe? Nyi kuli chuma chikwo chize twatamba kunyingika mba apanjike yilemba yetu?

[Maliji mushi lia lifwo]

[Chizulie]

Yuma yize yalingiwile hakachi ka Eliya ni aprofeta ja Mbale, yasolwele ngwo, yelemba yeswe kuyishi kuya ku chihela chimuwika

Kulemba

3 Kuchi Twatamba Kulemba?

KULISA ni mayingeleja anji, Mbimbiliya kuyishi kulemesa chinji chize mutu ali muze analembe, nyi kanamana, kanatwama hanji maliji waze mazachisa. Alioze Mbimbiliya yakulihulikila ha yikuma yilemu ngwe, “Kuchi twatamba kulemba?”

Mbimbiliya yakuhanjika hali tuvumbi ashishika a Zambi waze alembele ha yihela yalisa. Kulita ni yuma yize te yinalingiwa ha shimbu liacho, amwe yalemba mu mbunge, hanji ni liji mwilu. Eka nawa, kalembele ni kutala mwilu hanji kufukama hashi. O kakazachishile tuponya, mikosa hanji mikanda, alioze kalembele ni mbunge yo yeswe ni kuhanjika yize yapwile ku mbunge. Mba yika yalingishile mba Zambi apanjike yilemba yo?

Ngwe chize twamonanga ha mutwe wapalika, o kakunjikile yilemba yo kuli Zambi umuwika—Yehova. Kuli nawa chuma chikwo chilemu. Tutangenu mukanda wa 1 Yoano 5:14: “Lino lie hamu tuli nalio kuli iye, nyi kachi mutwita chuma chimwe cha kulita ni upale wenyi, aye matwivwa.” Yilemba yetu yatamba kulita ni upale wa Zambi. Yika chino chinalumbunuka?

Nyi tunazange kulemba kulita ni upale wa Zambi, twatamba kunyingika upale wacho. Kulilongesa Mbimbiliya chili chuma chilemu chize muchihasa kutukwasa. Shina chino chinalumbunuka ngwo, Zambi mapanjika wika yilemba yetu nyi twakulilongesa chinji Mbimbiliya? Ka, alioze Zambi kakushimbwila hanga tunyingike upale wenyi ni kusa tachi hanga tutwame kulita ni upale wacho. (Mateu 7:21-23) Twatamba kulemba kulita ni yize tunalilongesa.

Muze mutulilongesa hakutwala kuli Yehova ni upale wenyi, ufulielo wetu muukola.—Chino chili chikuma chikwo chilemu hakutwala ku kulemba. Yesu kambile ngwenyi: “Yuma yeswayo munwita ni ufulielo ha kulemba, kumunukayitambula.” (Mateu 21:22) Ufulielo hi kutayiza chimwe chuma chamutayijila, ka. Alioze chinalumbunuka kutayiza chimwe chuma chipwe ngwe kuchishi kumoneka. (A-Hepreu 11:1) Mu Mbimbiliya munazala too ni yuma yize yakutwaha shindakenyo ngwetu, chipwe ngwe Yehova keshi kumoneka, nihindu iye kali wamwenemwene. Mutuhasa kumujikijila mumu kakukumbulula yilemba ya waze akumufuliela. Chikwo nawa, mutuhasa kwita hanga Yehova atuwezele ufulielo, nyi twachilinga iye kumatwaha yize tunafupiwa.—Luka 17:5; Tiangu 1:17.

Kuli nawa chuma chikwo chilemu hakutwala ku kulemba. Yesu kambile ngwenyi: “Niumwe meza kuli Tata shina ni yami.” (Yoano 14:6) Yesu ye jila yize yakutukundamisa kuli Tata yetu, Yehova. Chocho, yalongesa tumbaji twenyi hanga apwe ni kulemba mu jina lienyi. (Yoano 14:13; 15:16) Chino kuchalumbunukine ngwo twatamba kukunjika yilemba yetu kuli Yesu. Alioze twatamba kulemba mu jina lia Yesu, ni kwiwuluka ngwetu iye ye jila yize yakutukundamisa ku Tata yetu.

Tangwa limwe tumbaji twa Yesu yeta kuli Yesu ngwo: “Mwene, tulongesenu kama kulemba.” (Luka 11:1) Yika chino chinalumbunuka? Tumbaji twa Yesu te kananyingika kulemba. Kashika chinasoloka ngwe, muze o ahanjikile ni Yesu te kanazange kunyingika yuma yize atamba kwita mu yilemba.

[Chikuma chilemu]

Yilemba yetu yatamba kulita ni upale wa Zambi mba iye ayivwe. Chikwo nawa twatamba kulemba mu jina lia Yesu

Kulemba

4 Yita Twatamba Kwita mu Yilemba?

ATU ANJI kakwamba ngwo, akwa-Kristu anji kakufunyena-funyena yilemba. Chipi-chipi yilemba yize Yesu alongesele yize akuvuluka ngwo, Tata Yetu. Ayi yili yilemba yimwe yize atu kanyingikine kanawa ulumbunwiso wayo. Tununu a tununu twa atu kakufunyena-funyena yilemba yacho ha yisuho yinji hita tangwa. Alioze, hi chocho ko Yesu kazangile hanga atu afunyene-funyene yilemba yino. Kuchi tunachinyingika?

Yesu shimbu te kanda achihanjika hakutwala ku yilemba yino, yamba ngwenyi: “Hakulemba kanda nukokojola chamokomoko.” (Mateu 6:7) Mba mumu liaka Yesu atulongesele kulemba? Mumu iye kakazangile hanga tupachikile yilemba yacho ni kuyifunyena-funyena. Yesu te kanalongesa chize twatamba kulemba ni yuma yize twatamba kusa kulutwe muze tunalembe. Tuhengwolenu mu yimako-yimako maliji a Yesu. Yilemba yacho yinasonewa mu mukanda wa Mateu 6:9-13.

“Tata nuli mu malilu, jina lienu lipwe lisandu.”

Ni maliji wano, Yesu te kanewulula tumbaji twenyi ngwenyi yilemba yeswe katamba kuyikunjika kuli Tato, Yehova. Shina unanyingika mumu liaka jina lia Zambi lili lilemu ni mumu liaka liatamba kupwa lisandu?

Chize ku shakulu, jina lisandu lia Zambi kalipihishile lufuma walio mumu lia amwe mahuza. Mukwa-kole wa Zambi, Satana kambile ngwenyi Yehova kali mukwa-mahuza, mukwa-kuyula mupi yoze katelele kuyula yitangiwa yenyi. (Uputukilo 3:1-6) Atu kakusakula kupwa sali lia Satana, ni kulongesa atu ngwo, Zambi keshi zango, kakumwesa atu lamba ni kulituna ngwo iye hi Sakatanga ko. Eka nawa kalimikine ni jina lienyi, Yehova ha kulijimuna mu Mbimbiliya ni kukanjisa atu hanga ahone kuzachisa jina liacho.

Mbimbiliya yinasolola ngwo, Zambi makalulieka yuma yeswe ayi. (Ezekiele 39:7) Muze makalinga chino, makatwaha yuma yeswe yize twakufupiwa ni kuhwisa lamba lieswe lize twakumona. Kuchi chino muchikalingiwa? Kumbululo lili ha yilemba ya Yesu ha maliji anahateho.

“Wanangana wenu wize.”

Musono mangana a mayingeleja kakwete kalumbanganyiso hakutwal ku Wanagana wa Zambi. Alioze atu waze apwile ni kupanjika Yesu te kananyingika uprofeto uze wahanjikele hali Mesaya, Chilamwina yoze Zambi atongwele hanga apwe mwanangana wa Wanangana wenyi ni kwalumuna yuma ya hashi. (Izaia 9:6, 7; Daniele 2:44) Wanangana wacho muukapwisa jina lia Zambi lisandu ni kusolola mahuza ha Satana. Wanangana wa Zambi muukakumba Satana ni kuhwisa yuma yeswe yipi. Muukahwisa nawa jita, misongo, zala ni kufwa. (Samu 46:9; 72:12-16; Izaia 25:8; 33:24) Muze mulemba hanga Wanangana wa Zambi wize, unechi hanga yilakenyo yeswe ayi yimanunuke.

“Upale wenu ulingiwe hashi chizechene ngwe unalingiwa mwilu.”

Maliji wano a Yesu kanasolola ngwo, upale wa Zambi muukalingiwa hashi chizechene ngwe unalingiwa mwilu, muze atwama Zambi. Muze Mwana wa Zambi ashile jita ni Satana ni andemoniu jenyi ni kwanyasa hashi, chino chasolwele ngwo, niumwe yoze mahasa kukwika upale wa Zambi wakuhi. (Usolwelo 12:9-12) Kwita chino chamuchitatu, chizechene ngwe kwita chamuchiali twamona, chinatwiwulula ulemu wakusa upale wa Zambi kulutwe lia yuma yeswe. Mumu upale wa Zambi we wakuyukisa yitangiwa yenyi yeswe. Kashika, chipwe Yesu mutu mungunu yamba kuli Tato ngwenyi: “Upale we ulingiwe, hi upale wa yami ko.”—Luka 22:42.

“Twehenu kama musono mbolo yetu yize twakufupafupa.”

Yesu kasolwele nawa ngwenyi, hi chipo ko kwita mu yilemba yuma yize tunafupiwa ku mwono. Chino chakutwiwulula ngwo, Yehova “kakuhana kuli eswe mwono, ni mwiku, ni yuma yeswe.” (Yilinga 17:25) Mbimbiliya yakusolola ngwo, Yehova kali Zambi wa zango yoze wakuzanga kuhana kuli ana jenyi yuma yize anafupiwa. Alioze, chizechene ngwe umwe chisemi mupema, Yehova keshi kukumbulula yelemba ya mwana yoze meta chuma chize muchimunjisa mu ponde.

“Nutukonekene kama makongo jetu.”

Shina yena uli ni kongo kuli Zambi? Shina unafupiwa ukonekeno wenyi? Atu anji musono kakulelesa tachi jize shili yikwete. Eka nawa kakunyonga ngwo shili kuyatwamineko. Alioze Mbimbiliya yakulongesa ngwo, shili yapwa chikota cha yuma yeswe yipi ngwe kufwa. Amu twasemukinyine mu shili, eswe twakulinga shili. Kashika tunafupiwa ukonekeno wa Zambi mba tupwe ni kutalatala. (A-Roma 3:23; 5:12; 6:23) Chili kuyuka chinene ha kunyingika yize Mbimbiliya yakwamba ngwo: “Mumu yena Mwene uli mupema, uli mukwa kukonekena.”—Samu 86:5.

“Tupululenu kama kuli mwe mupi.”

Atu kanafupiwa kawashi-washi ukwaso wa Zambi. Atu amwe keshi kutayiza ngwo mwe “mupi” hanji ngwetu Satana katwamako. Alioze Yesu kalongesele ngwenyi, Satana kali mutu wamwenemwene, “mwata wa hano hashi.” (Yoano 12:31; 16:11) Satana kakupiangula atu waze ali mushi lia chiyulo chenyi, chikwo nawa, kanazange kutupiangula hanga tuhone kupwa ni usepa upema ni Tata yetu Yehova. (1 Petulu 5:8) Alioze, Yehova kakwete ndundo jinji kuhiana Satana, kashika kanazange kufunga waze akumuzanga.

Kuhengwola chize twalinga ha kulemba chino cha Yesu, kuchakwachile ha yuma yeswe yize twatamba kwita mu yilemba. Iwuluka yize maliji ali ha 1 Yoano 5:14, anahanjika hali Zambi: “Nyi kachi mutwita chuma chimwe cha kulita ni upale wenyi, aye matwivwa.” Kashika, kanda unyonga ngwe milonga ye yakeha naye hanga uyilweze kuli Zambi mu yilemba.—1 Petulu 5:7.

Mba yika mutwamba ha mashimbu ni maola? Shina yihela yize mutulembela ni mashimbu waze mutulemba kali alemu?

[Chizulie]

Kulemba

6 Chamwenemwene Lume Chakukwasa?

KULEMBA shina muchihasa kutuyukisa? Ewa, Mbimbiliya yinasolola ngwo, tuvumbi twa Zambi amwe kayukile ha kulemba. (Luka 22:40; Tiangu 5:13) Kwamba umwenemwene kulemba muchihasa kutukwasa ku ufulielo, mu manyonga ni ku mujimba. Kuchi chino muchihasa kulingiwa?

Chakutalilaho: Achinyonga ngwe mwane katambula chimwe chawana, shina mumulongesa wika hanga apwe ni kusakwila mu mbunge? Nyi mumulongesa kusolola usakwililo wacho? Nyi twasolola usakwililo wetu mu maliji, zango lietu lia kupwa ni kusakwilila mulikola. Shina chino muchihasa kulingiwa muze twakuhanjika ni Zambi? Ewa. Tala yimwe yilweza.

Kulemba ni usakwililo. Muze twakusakwilila Tata yetu ha yuma yize akutwaha, chino chakutukwasa kulihulikila ha yuma yacho, kuwahilila, ni kupwa ni nyonga lialita.—A-Fwilipu 4:6.

Chilweza: Yesu kasakwililile Tato ha kupanjika ni kukumbulula yilemba yenyi.—Yoano 11:41.

Kulemba ni kwita ukonekeno. Muze twakwita ukonekeno kuli Zambi, chakutukwasa kuhona kulilamikiza chinji. Chikwo nawa, chakufumba shimbi ya mbunge yetu mumu twakunyingika ngwetu chuma chize twalinga chili chipi.

Chilweza: Ndawichi kalembele hanga alikonyeke ni kusolola chize te anevu.—Samu 51.

Kulemba ni kwita usongwelo ni mana. Kwita kuli Yehova hanga atusongwele hanji kutwaha mana hanga tukwate yiyulo, chakutukwasa kupwa akwa-kulikehesa. Chino chakutwiwulula ngwetu, tuli ni haze twasulila ni kutukwasa kupwa atu waze akujikijila kuli Tata wetu wa mu malilu.—Yishima 3:5, 6.

Chilweza: Solomone kalikehesele. Chocho yeta usongwelo ni mana hanga ahase kuyula.—1 Mianangana 3:5-12.

Kulemba muze tuli mu ukalu. Muze twakulemba kuli Yehova muze tuli mu ukalu, twakulivwa kanawa. Chikwo nawa, twakusolola ngwetu kutushi kulifuliela yetwene alioze twakufuliela muli Yehova.—Samu 62:8.

Chilweza: Mwanangana Asa kalembele muze te analimiki ni akwa-kole jenyi.—2 Sango ja Mianangana 14:11.

Kulembela akwetu. Yilemba yacho, yakutukwasa kwehuka kuzo ni kutukwasa kupwa akwa-keke.

Chilweza: Yesu kalembelele tumbaji twenyi.—Yoano 17:9-17.

Yilemba ya uhaliso. Muze twakuhalisa Yehova ha yilinga ni yitanga yenyi yipema, vumbi ni zango lietu hali iye lia kwoka. Yilemba yacho yakutukwasa kukundama kuli Zambi, kanda Tata yetu.

Chilweza: Ndawichi ni chiseke cheswe yahalisa Yehova.—Samu 8.

Chiwape chikwo chakwiza ha kulemba chili kupwa ni “sambukila ya Zambi, yize yakuhiana kunyonga cheswe.” (A-Fwilipu 4:7) Kupwa ni sambukila mu chifuchi chino cha too ni yuma yipi, chili chiwape chinene. Chakutukwasa nawa kulivwa kanawa ku mujimba. (Yishima 14:30) Shina sambukila yacho yakukatuka ku tachi jetu? Nyi kuli chuma chimwe chize chakutukwasa?

[Chikuma chilemu]

Kulemba muchihasa kutukwasa ku ufulielo, mu manyonga ni ku mujimba

[Chizulie]