Yihula ya Waze Akutanga Mikanda Yetu

Kulita ni 2 A-Korindu 6:14, iya Paulu te anambila ha kuzachisa maliji akwamba ngwo “waze kafulielele”?

Ha 2 A-Korindu 6:14, twakutanga ngwetu, “Kanda nulilema kanga yimuwika ni waze kafulielele.” Nyi twahengwola maliji a helu, mutumona ngwetu Paulu te kanahanjika hali atu waze hi akwa-Kristu ko. Kuli versu jikwo jize jakukwasa nyonga lino ni kutwaha shindakenyo ya chize Paulu azachishile maliji “yoze kafulielele” hanji “waze kafulielele.”

Chakutalilaho, Paulu kahishile akwa-Kristu waze apwile ni kusopesa akwo “kumeso ja waze keshi kufuliela.” (1 A-Korindu 6:6) Ha versu yino, waze keshi kufuliela kapwile ngaji a mu yota ya akwa-kuyula mu mbonge ya Korindu. Ha mukanda wenyi wamuchiali, Paulu yamba ngwenyi Satana “hanapupuchisa manyonga ja waze kasolo kufuliela.” Chili ngwe atu waze kasolo kufuliela kaakasa wanda ha meso hanga achine kumona yuma yipema. Atu jacho kasele ni tachi nijimwe hanga alingile Yehova, mumu Paulu kaliangile kwamba ngwenyi: “Heswaho matewulukila kuli Mwene, machizaho we wanda.”—2 A-Korindu 3:16; 4:4.

Atu akwo waze kafulielele kakulinjisa mu yuma yipi hanji kukombelela mahamba. (2 A-Korindu 6:15, 16) Kashika, hi heswe waze kafulielele kakulimika ni tuvumbi twa Yehova. Amwe kakuzanga kunyingika umwenemwene. Anji a kuli ayo kalimbata ni mapwo hanji malunga Akwa-Kristu, kashika kakuwahilila chinji ha kununga no. (1 A-Korindu 7:12-14; 10:27; 14:22-25; 1 Petulu 3:1, 2) Kashika, ngwe chize hitwamba, heswe haze Paulu anatongola maliji “waze kafulielele” kanaazachisa hali atu waze keshi ni chihanda mu chikungulwila cha Akwa-Kristu muze mwatwama atu waze ‘akufuliela kuli Mwene’—Yilinga 2:41; 5:14; 8:12, 13.

Shimbi yize yili ha 2 A-Korindu 6:14, yakusongwela mwono wa akwa-Kristu. Shimbu yacho kakuyizachisa chinji hali atu waze anafupu mutu yoze malimbata nenyi. (Mateu 19:4-6) Mukwa-Kristu yoze hanamupapachisa, keshi kufupa mutu yoze malimbata nenyi hakachi ka waze kafulielele, mumu yitanga, manyonga, ni yuma yize mutu wacho afuliela yalisa ni ya Mukwa-Kristu wamwenemwene.

Mba yika mutwamba hali atu waze akulilongesa Mbimbiliya ni kulikungulula ni Akwa-Kristu? Yika mutwamba hali akwa-kwambujola waze kanda achapapachisa? Shina no kali waze kafulielele? Ka. Atu waze akutayiza umwenemwene wa sango lipema ni kusenya kulutwe ni kwapapachisa, kutwambile kwavuluka ngwetu waze kafulielele. (A-Roma 10:10; 2 A-Korindu 4:13) Koneliu, shimbu te kanda amupapachisa, yamuvuluka ngwo, “mukwa kulemesa, mukwa kuvwila woma Zambi.”—Yilinga 10:2.

Shina chili kusolola mana Mukwa-Kristu wa kupapachisa kulinga usendo hanji kuzanga kulimbata ni mukwa-kwambujola yoze kanda achipapachisa, mumu ngwo chiyulo cha Paulu chili ha 2 A-Korindu 6:14, kuchakwachile hali mutu wacho? Ka, kulinga chino hi kusolola mana ko. Mumu liaka? Mumu lia chiyulo cha zwalala chize Paulu ahanyine hakutwala kuli tuliwa Akwa-Kristu. Paulu yamba ngwenyi: “Matusuka akaye ku ulo kuli mweswe mamuzanga; alioze muli mwe Mwene wika.” (1 A-Korindu 7:39) Kulita ni chiyulo chino, Mbimbiliya yakutoweza Akwa-Kristu hanga alimbate wika ni waze ali “muli Mwene.”

Yika maliji “muli Mwene” ni “muli Kristu” analumbunuka? Paulu te kanahanjika hali atu waze apwile “muli Mwene” hanji “muli Kristu.” Ha mukanda wa A-Roma 16:8-10 ni A-Kolosu 4:7, Muze mutanga versu jino, mumona ngwe atu jacho kanavuluka ngwo, ‘akwa milimo-ni-akwetu,’ ‘waze hanaatayiza,’ ‘mandumbu a zango,’ ‘tuvumbi amwenemwene’ ni ‘ngamba-ni-akwetu.’

Shimbu lika mutu akupwa ‘ngamba wa Mwene’? Chino chakulingiwa muze mutu mwene malihana hanga alinge yuma yize ngamba akulinga ni kulituna iye mwene. Yesu yamba ngwenyi: ‘Nyi kachi umwe mazanga kwiza kuli yami, akalitune iye mwene, akazundule mutondo wenyi wa lamba, angukaule.’ (Mateu 16:24) Mutu kakuputuka kukaula Kristu ni kwononokena ni mbunge yeswe upale wa Zambi muze akulihana kuli iye mu yilemba. Hanyima malisolola ni kumupapachisa ngwe kavumbi ka Zambi ni kupwa ni utayizo wenyi.a Kashika ‘kulimbata muli Mwene wika’ chinalumbunuka kulimbata ni mutu yoze hasolola ngwenyi chamwenemwene kafuliela hanji ngwetu “ndungo ya Zambi kanda ya Mwene Yesu Kristu.”—Tiangu 1:1.

Atu waze akulilongesa Mbimbiliya ni Yela ja Yehova, ni kusa tachi hanga ajame ku ufulielo katela uchichimieko wetu. Chipwe chocho, mutu wacho kanda achilihana kuli Yehova ni kumulakenya kumulingila ku mwono wenyi weswe. Mutu wacho unachalumuna yimwe ku mwono wenyi. Shimbu kanda achiputuka kunyonga kumbata hanji kuya ulo, iye katamba kwalumuna yimwe ku mwono wenyi ni kulihana kuli Yehova ni kumupapachisa.

Shina muchilita mutu mukwa-Kristu kulinga usendo ni mutu yoze unasoloka ngwe kanase tachi ku longeso lienyi lia Mbimbiliya hanji kumushimbwila ndo haze mamupapachishila hanga alimbate nenyi? Ka. Nyi longi wa Mbimbiliya manyingika ngwenyi umwe Mukwa-Kristu kanazange kulimbata nenyi, mba manyingika nawa ngwenyi chitangu katamba kulipapachisa, iye machilinga ni nyonga lipi.

Kanji-kanji mutu kakupwa mukwa-kwambujola yoze kanda apapachisa ha shimbu likehe wika ni kusa tachi amupapachise. Kashika chiyulo chakwamba ngwo kulimbata muli Mwene wika hi chikalu ko. Mba yika mutwamba hali mutu yoze hapwa ni miaka ya kumbata hanji kuya ulo, kamulelele mu jiko lia Akwa-Kristu, kakusa tachi mu chikungulwila ha miaka yinji chikwo nawa kali mukwa kwambujola yoze kanda apapachisa? Nyi chenacho, yika yize yakumukwika kulihana kuli Yehova ni kumupapachisa? Mumu liaka keshi kukwata chiyulo chacho? Shina kanayambashana? Chipwe ngwe hi mutu ko yoze kafulielele, nihindu kutwatambile kwamba ngwetu iye kali “muli Mwene.”

Chiyulo cha Paulu hakutwala ku umbachiso chakutuyukisa chinji. (Izaia 48:17) Nyi atu aali mazanga kulimbata, o katamba kulihana kuli Yehova mumu chino muchakwasa kupwa ni ulo ukolo hamukunda wa usepa wo ni Yehova. O kakufuliela ni kuzanga yuma yimuwika. Chino chakukwasa chinji kupwa ni uwahililo mu ulo. Chikwo nawa, ‘kulimbata muli Mwene wika’ muchisolola ushishiko wo kuli Yehova ni muchanehena yiwape ya mutolo mumu ‘kuli akwa keke [Yehova] kakulisolola kupwa mukwa keke.’—Samu 18:25.

[Maliji ali mushi]

[Chizulie]

‘Kuli akwa keke [Yehova] kakulisolola kupwa mukwa keke.’