“Jikizenu mu Ufulielo”

 1. (a) Yika yalingiwile kuli Petulu mu Kalunga-Lwiji wa Ngalileya muze kwapwile fuji yinji? (Tala chizulie chitangu.) (b) Mumu liaka Petulu ashimbamine?

LIMWE tangwa ufuku, postolo Petulu ni amwe tumbaji kapinjile chinji ha kuzauka Kalunga-Lwiji wa Ngalileya ha mashimbu a fuji ya ngolo. Susumuku yamona Yesu kanende helu lia Kalunga-Lwiji. Petulu yakololoka kuli Yesu ni kumuhula ngwenyi, munguhasa kuheta haze uli yena nyi? Muze Yesu amulwezele ngwenyi, tweya, Petulu yatuhuka mu ulungu ni kuya kuli iye. Ha mashimbu akehe Petulu yaputuka kushimbama. Mumu liaka? Mumu kevwile woma wa fuji ya ngolo ni mikanya ya kalunga-Lwiji. Petulu yaputuka kuteta hanga amulamwine, mba hazene Yesu yamukwata ni kumwamba ngwenyi: “Yena mukwa ufulielo ukepe, kuchi te wayambashana?”—Mateu 14:24-32.

 2. Yikuma yika mutulilongesa haliapwila?

² Mutulilongesa yikuma yitatu hakutwala ha yize mutuhasa kulilongesa ha chilweza cha Petulu: (1) Kuchi Petulu chitangu afulielele ngwenyi Yehova te kumamukwasa (2) Mumu liaka Petulu aputukile kukeketela mu ufulielo (3) Yika yakwashile Petulu kujikiza mu ufulielo. Kulilongesa yikuma yino muyitukwasa ‘kujikiza mu ufulielo’.—1 A-Korindu 16:13.

 3. Mumu liaka Petulu asunukine mu ulungu, nawa kuchi ni yetu twakulinga chochene?

³ Petulu kapwile ni ufulielo ukolo. Mumu liaka mutuhasa kwamba chino? Muze Yesu amusanyikine, Petulu kasunukine mu ulungu, ni kwenda helu lia meya. Aye yafuliela ngwenyi, ndundo ja Zambi te mujimwaha tachi ja kwendela ha meya ngwe chize chapwile kuli Yesu. Chizechene nawa, muze Yesu atusanyikine hanga tumukaule, yetu twalihanyine kuli Yehova ni kutupapachisa. Mumu liaka? Mumu lia ufulielo wetu kuli Yehova ni Yesu nawa twakujikijila kuli ayo ngwetu matukwasa.—Yoano 14:1; tanga 1 Petulu 2:21.

4, 5. Mumu liaka ufulielo uli chuma chilemu?

⁴ Ufulielo uli chuma chilemu chinji. Ufulielo wakwashile Petulu kunyingika ngwenyi iye te mahasa kwendela helu lia meya, chuma chize kuli atu chapwile kusoloka ngwe kuchishi kuhasa kulingiwa. Nawa ni musono ufulielo muuhasa kutukwasa kulinga yuma yize muyisoloka ngwe kuyishi kuhasa kulingiwa. (Mateu 21:21, 22) Anji akuli yetu, hitunalumuna yitanga ni ndako jetu, kanji-kanji atu waze te atunyingikine kulu kakushimoka ha kutumona. Twakwalumuna ndako jetu mumu twakuzanga Yehova, nawa mumu iye kakutukwasa hanga tuchilinge. (Tanga A-Kolosu 3:5-10.) Ufulielo wakutukwasa hanga tulihane kuli Yehova, ni kupwa masepa jenyi, chuma chize te kutuchikuhasa kulinga nyi te kutwapwile ni ukwaso wenyi.—A-Efwesu 2:8.

⁵ Ufulielo wetu wakutukwasa hanga tukole. Chakutalilaho, wakutukwasa hanga tulimike ni miheto ya Ndiapu, mukwa-kole yetu wa tachi jinji. (A-Efwesu 6:16) Chikwo nawa, twakufuliela kuli Yehova, kashika kutwatambile kulipikala chinji nyi mutupwa ni umwe kapinda. Yehova kanakalakenya ngwenyi makatwaha yeswayo mutufupa nyi mutufuliela kuli iye ni kusa Wanangana wenyi kulutwe ku mwono wetu. (Mateu 6:30-34) Kuhiana yino yeswe, ha mukunda wa ufulielo wetu, Yehova makatwaha chawana cha mwono wa mutolo.—Yoano 3:16.

6, 7. (a) Yika mutuhasa kutesa fuji ni mikanya yize yahanyine woma kuli Petulu? (b) Mumu liaka twatamba kunyingika ngwetu chili chashi kutokesa ufulielo wetu?

⁶ Muze Petulu endele helu lia Kalunga-Lwiji mu Ngalileya, iye kevwile woma. Mumu liaka? Ha mukunda wa fuji ni mikanya. Yino mutuhasa kuyitesa ni yeseko yize akwa-Kristu akupinda nayo musono. Chipwe muze yeseko yacho muyipwa yikalu chinji, mutuhasa kupwa ni utakamiso ha ukwaso wa Yehova. Alioze iwuluka yize yalingiwile kuli Petulu. Iye kakashimbamine ha mukunda wa fuji ni mikanya yize yapwile ni kumulamba. Alioze, Mbimbiliya yinambe ngwo: “Ha kumona fuji ya ngolo yevwa woma.” (Mateu 14:30) Petulu yecha kutala kuli Yesu ha kuhulikila ha tachi ja fuji. Hohene ufulielo wenyi yiuputuka kukeketela. Chizechene nawa, nyi twalihulikila ha yipikalo yetu, mutuhasa kuputuka kuhamika hakutwala ku ukwaso wa Yehova.

⁷ Twatamba kunyingika ngwetu muchihasa kupwa chashi kutokesa ufulielo wetu. Mumu liaka? Mumu Mbimbiliya yinambe ngwo, kutokesa cha ufulielo chakwiza ku “shili yize ya kutulimbalimba chashi chichize.” (A-Hepreu 12:1) Chizechene ngwe Petulu, nyi twalihulikila ku yuma yipi, ufulielo wetu muuhasa kukeketela kawashi-kawashi. Mba kuchi mutuhasa kunyingika nyi ufulielo wetu unakeketela? Yihula muyisulaho muyitukwasa hanga tulihengwole kanawa yetwene.

 8. Shina yilakenyo ya Zambi yili yamwenemwene kuli yetu ngwe chize yapwile ku uputukilo nyi?

⁸ Shina yilakenyo ya Zambi yili yamwenemwene kuli yami ngwe chize yapwile ku uputukilo nyi? Chakutalilaho, Yehova hanalakenya kunongesa hano hashi ha Satana. Shina twakulalwoka ni yuma yinji ya kuheha nayo ya hano hashi? Nyi chenacho, mutuhasa kuputuka kuhamika ngwetu songo kanda lichi kundama. (Habakuke 2:3) Achinyonga hakutwala ku chilweza chikwo. Yehova hanahane ukuule nawa hanalakenya kutukonekena shili yetu. Nyi mutununga ni kunyonga ku shili yetu yize hiyapalika, mutuhasa kuputuka kuhamika ngwetu Yehova kakatukonekenene. (Yilinga 3:19) Chino muchihasa kutulingisa hanga tutokese chiseke chetu mu mulimo wa Zambi ni kwecha kwambujola sango lipema kuli akwetu.

 9. Yika muyihasa kulingiwa nyi twalihulikila wika ku yuma ya ku mwono wetu?

⁹ Shina nihindu ngunawayila Yehova ni mbunge yami yeswe? Nyi twakalakalila chinji Yehova, chino muchitukwasa kulihulikila ku kutalatala chetu cha kulutwe lia matangwa. Kuchi mutwamba nyi hitunaputuka kulihulikila ku yuma ya ku mwono wetu kuhiana ya Zambi? Chakutalilaho, hanji mutuhasa kutayiza umwe mulimo wa fweto linji alioze mututepulula mulimo wa Yehova. Chino muchihasa kukeketesa ufulielo wetu, nawa mutuhasa kupwa “yilenda,” ha kulinga ndambu mulimo wa Yehova kuhiana chize te mutuhasa kulinga.—A-Hepreu 6:10-12.

10. Kuchi twakusolola ufulielo kuli Yehova muze twakukonekena akwetu?

¹⁰ Shina chili chikalu kuli yami kukonekena akwetu? Nyi akwetu matutuka hanji matulinga upi, shina mutwevwila uli hanji kwecha kuhanjika no? Nyi twalinga chenacho, chino muchihasa kutulingisa kunyonga wika hali yetwene. Twakusolola ufulielo wetu kuli Yehova muze mutukonekena akwetu. Kuchi twakuchilinga? Nyi atu amwe matulinga upi, ayo kakupwa ni kongo kuli yetu. Muze mutuvulumuna kuli Yehova, ni yetu twakupwa ni kongo kuli iye. (Luka 11:4) Kashika nyi twakonekena akwetu, muchisolola ngwetu twakufuliela kuli Yehova. Twakufuliela kuli iye hanga awahise kupwa chetu, nawa yiwape yenyi yili ni ulemu unji kuhiana chuma cheswacho mutu mahasa kulinga hali yetu. Tumbaji twa Yesu kananyingika ngwo katamba kupwa ni ufulielo mba akonekene akwo. Muze Yesu alwezele hanga akonekene chipwe waze akwaalinga upi ha mashimbu anji, tumbaji twenyi yamwamba ngwo: “Weza kama ufulielo wetu.”—Luka 17:1-5.

11. Mumu liaka mutuhasa kwehuka kuwana longeso ha chimwe chiyulo?

¹¹ Shina nakwivwa kupiha muze mangwaha chiyulo nyi? Nyingika chize muhasa kuyuka ku chiyulo chacho, kuhiana kufupa kapalia ha chiyulo chize anakwehe hanji uhenge wa mutu yoze unakwehe cho. (Yishima 19:20) Kanda wehuka uhashi niumwe hanga unyingike yize Yehova akuzanga!

12. Yika muyihasa kupiha nyi umwe mutu malinyenyeta mashimbu eswe hakutwala kuli atu waze akusongwela?

¹² Shina nakulinyenyeta hakutwala kuli waze akusongwela mu chikungulwila nyi? Muze A-Izalele alihulikile ku yuma yipi yize ambile kuli kumi lia ngendeshi, ayo yalinyenyeta hakutwala kuli Mose ni Arone. Mba Yehova yahula Mose ngwenyi: ‘Ndo mwiji muka wano atu mapwa nikuhona ni kungufuliela?’ (Kwalula 14:2-4, 11) Chochene, Yehova kanyingikine ngwenyi A-Izalele kakafulielele muli iye mumu te kakulinyenyeta hakutwala kuli Mose ni Arone, malunga waze Zambi asakwile hanga asongwele atu jenyi. Chizechene nawa, nyi mashimbu eswe twalinyenyeta hakutwala kuli atu waze Yehova akuzachisa hanga asongwele atu jenyi musono, chino muchihasa kusolola ngwetu ufulielo wetu kuli Zambi unakeketela.

13. Mumu liaka kutwatambile kwivwa chinyengo nyi ufulielo wetu unakeketela?

¹³ Muze hiwahengula yihula yino, kanda wivwa chinyongo nyi wamona ngwe ufulielo we unakeketela. Iwuluka ngwenyi, chipwe postolo Petulu neye kevwile woma nawa yaputuka kuhamika. Ha mashimbu akwo, Yesu te kakulongesa apostolo eswe hakutwala ku “ufulielo ukepe.” (Mateu 16:8) Kashika, mutuhasa kulilongesa fumbo lilemu chinji ku chilweza cha Petulu. Tutalenu yize iye alingile muze aputukile kuhamika ni kushimbama mu kalunga-lwiji.

14, 15. (a) Yika Petulu alingile muze aputukile kushimbama? (b) Kuchi mutuhasa ‘kulihulikila’ kuli Yesu?

¹⁴ Yika Petulu alingile muze aputukile kushimbama? Petulu te kanyingika kusana kanawa, iye kachi kanyongene kusana hanga afune mu ulungu. (Yoano 21:7) Mba mumu liaka kakachilingile? Mumu iye kakafulielele kulikwasa mwene. Iye kahulikile muli Yesu nawa katayijile ukwaso wenyi. Nyi twamona ngwetu ufulielo wetu unakeketela, twatamba kwimbulula chilweza cha Petulu. Kuchi mutuhasa kuchilinga?

¹⁵ Chizechene ngwe Petulu, wahulikile nawa muli Yesu hanga amukwase, ni yetu nawa twatamba ‘kulihulikila’ kuli Yesu. (Tanga A-Hepreu 12:2, 3.) Alioze kutuchikuhasa ku mutala ni meso jetu ngwe chize Petulu alingile. Kuchi mutuhasa ‘kuhulikila’ kuli Yesu? Mutuhasa kuchilinga ha kulilongesa yuma yize iye alongesele ni kuyikaula hamwe ni kumwimbulula kanawa. Nyi twalinga chocho, mutukawana ukwaso uze twafupa hanga tukolese ufulielo wetu. Tutalenu amwe majila waze mutuhasa kwimbulwilamo Yesu.

16. Kuchi Mbimbiliya muyihasa kutukwasa hanga tukolese ufulielo wetu?

¹⁶ Kolesa ufulielo we ha kujikijila mu Mbimbiliya. Yesu kapwile ni ushindakenyo ngwenyi Mbimbiliya yili Liji lia Zambi nawa ngwo yakutwaha usongwelo upema. (Yoano 17:17) Mba twimbulule Yesu twatamba kutanga Mbimbiliya matangwa eswe, kulilongesa yo ni kupukuna ha malongeso waze tunalilongesa. Twatamba nawa kufupa kumbululo lia yihula yize mutuhasa kupwa nayo. Chakutalilaho, ena wakufuliela ni mbunge yeswe ngwenyi tuli ha matangwa akusula? Kolesa ufulielo we hakunyingika ngwenyi songo hiliakundama ha kulilongesa uprofeto wa mu Mbimbiliya uze unasolola ngwo tuli ha matangwa akusula. Shina ena unazange kukolesa ufulielo we ku yilakenyo ya Zambi hakutwala ku matangwa akulutwe? Lilongese uprofeto wa mu Mbimbiliya uze hiunamanunuka. Shina yena wakufuliela ngwenyi Mbimbiliya yikwete sango jingunu musono? Yena muhasa kutanga hakutwala kuli mandumbu ni mapangi waze aluliekele mwono wo ha mukunda wa ukwaso wa Mbimbiliya.a—1 A-Tesalonika 2:13.

17. Mumu liaka Yesu ahashile kunyongonona mu yeseko, nawa kuchi mutuhasa kumwimbulula?

¹⁷ Lihulikile ku yiwape yize Yehova alakenya. Yesu kahulikilile ku yiwape yenyi ya ku matangwa akulutwe, nawa chino chamukwashile hanga ahase kunyongonona mu yeseko. (A-Hepreu 12:2) Kakalengumukine ku yuma ya hano hashi. (Mateu 4:8-10) Kuchi mutuhasa kwimbulula chilweza cha Yesu? Ha kupukuna ha yilakenyo yipema yize Yehova hanatwehe. Achilinyonge kama yena mwene mu paraisu. Soneka hanji tesa yuma yize muukalinga mu Paraisu. Hanji kulinga katalilo wa atu waze makahindwisa waze muukazanga kuhanjika no hanji kuta no lusango. Ngwe chize Yesu alingile, nyonga ha yiwape yino ya Zambi, hi ha mbunga wika ko, alioze yena mwene.

18. Kuchi kulemba muchihasa kukolesa ufulielo we?

¹⁸ Lemba hanga ufulielo we ukole. Yesu kalongesele tumbaji twenyi hanga ete spiritu yisandu kuli Yehova. (Luka 11:9, 13) Muze muwita spiritu yisandu lemba hanga ufulielo we ukole. Mumu uli umwe muhuko wa spiritu yisandu. Ha kulemba che tongola yuma yize yinafupiwa ku mwono we. Chakutalilaho, nyi wamona ngwe chakukukaliwa kukonekena akwenu, eta kuli Yehova hanga ununge ni kukolesa ufulielo we ni kumwita hanga akukwase kukonekena akwenu.

19. Kuchi mutuhasa kusakula masepa apema?

¹⁹ Sakula masepa ali ni ufulielo ukolo. Yesu kasakwile kanawa masepa jenyi. Masepa waze te alikata no chinji kapwile apostolo, ayo ufulielo ukolo te akwete, te kashishika nawa te kakumwononokena. (Tanga Yoano 15:14, 15.) Imbulula Yesu nawa sakula masepa je ni mana. Masepa jacho, katamba kupwa atu waze akwete ufulielo ukolo nawa akwononokena Yesu. Masepa amwenemwene mahasa kushishika kuli umwe ni mukwo, chipwe muze mafupa kuhana hanji kutayiza chiyulo.—Yishima 27:9.

20. Yika muyilingiwa nyi twakwasa akwetu hanga akolese ufulielo wo?

²⁰ Kwasa akwenu hanga akolese ufulielo wo. Yesu kakwashile tumbaji twenyi hanga akolese ufulielo wo ha yuma yize iye ambile nawa alingile. (Marku 11:20-24) Twatamba kwimbulula chilweza cha Yesu. Nyi twachilinga, mutukolesa ufulielo wetu ni ufulielo wa akwetu. (Yishima 11:25) Kuchi muhasa kukwasa atu mu ngiza ye? Muze muulongesa Mbimbiliya kuli akwenu, shindakenya yuma yize yinasolola ngwo Zambi kwali, ngwo iye kakutuzanga, nawa ngwo Mbimbiliya yili Liji lia Zambi. Kuchi muuhasa kukwasa mandumbu je hanga anunge ni kukolesa ufulielo wo? Nyi mumona umwe mutu kanalinyenyeta hakutwala kuli mandumbu waze ali tusongo, kanda muuchina kawashi-washi. Hanjika nenyi ni mana hanga umukwase kululieka ufulielo wenyi. (Yundase 22, 23) Nyi muchililongesa ku shikola, nawa longeshi ye kakuhanjika hakutwala ku longeso lize liakwamba ngwo yuma yalitangile yene, pwako ni hamu nawa kalila ufulielo we hakutwala ku yitangiwa. Kumbululo lia longeshi ni akwenu akwo waze wakulilongesa no mulihasa kukukomwesa chinji.

21. Yika Yehova analakenya kuli yetu eswe?

²¹ Yehova ni Yesu kakwashile Petulu akumbe kuyambashana ni woma. Petulu ku mwono wenyi, kapwile chilweza cha ufulielo ukolo kuli akwo. Chizechene nawa, Yehova kakukwasa mutu ni mutu hanga ajikize mu ufulielo. (Tanga 1 Petulu 5:9, 10.) Chakufupiwa mutu kusa tachi jinji mba apwe ni ufulielo ukolo, alioze, nyi twalinga chocho Yehova mawahisa tachi jetu.