LONGESO 13

Chize Uwayilo wa Mahuza Wakupihisa Lufuma wa Zambi

Mikanda ya ha mafwo

Nyi Zambi iye zango, mumu liaka mayingeleja waze akwamba ngwo kakumuwayila akulinga yuma yipi? Mu maliji akehe, mayingeleja jacho kali a mahuza. Mumu yuma yize akwamba ni yize akulinga, yakulingisa atu anji hanga afuliele ha mahuza hakutwala kuli Zambi. Kuchi ayo akupihisa lufuma wa Zambi? Kuchi Zambi akunyonga ha yuma yacho? Yika makalinga ha yuma yacho?

**1. Kuchi malongeso a mu uwayilo wa mahuza akupihisa lufuma wa Zambi?**

Uwayilo wa mahuza ‘wakwalumuna umwenemwene wa Zambi upwe mahuza.’ (A-Roma 1:25) Chakutalilaho, mayingeleja anji keshi kulongesa jina lia Zambi kuli atu jo. Alioze Mbimbiliya yinambe ngwo, atu katamba kuzachisa jina lia Zambi. (A-Roma 10:13, 14) Mangana amwe a mayingeleja kakwamba ngwo, yuma yeswe yipi yakulingiwa ku upale wa Zambi. Chino hi chamwenemwene ko. Hi Zambi ko wakulinga yuma yacho. (Tanga Tiangu 1:13.) Mahuza a mu mayingeleja kakusosolola atu kuli Zambi.

**2. Kuchi yitanga ya mu uwayilo wa mahuza yakupihisa lufuma wa Zambi?**

Akwa-uwayilo wa mahuza keshi kumona atu ngwe chize Yehova akwamona. Mbimbiliya yakwamba ngwo, ‘milonga ya akwa uwayilo wa mahuza hiyaheta ndo mwilu.’ (Usolwelo 18:5) Ha miaka yinji, mayingeleja a mahuza kakulinjisa mu yuma ya mafwefwe, kakuhakwila jita ni kushihisa atu anji. Mangana anji a mayingeleja kakuzanga kupwa pichi, kashika akwita mbongo kuli atu waze akuya mu mayingeleja jo. Yitanga ayi yakusolola ngwo, o kanyingikine Zambi, kashika keshi ni ulite wa kumanyinako Yehova.—Tanga 1 Yoano 4:8.

3. Kuchi Zambi akwivwa hakutwala ku uwayilo wa mahuza?

Nyi yena wakupihilila ha yuma yize akwa-uwayilo wa mahuza akulinga, mba kuchi Yehova akwivwa? Yehova kakuzanga atu, alioze kakupihilila ni mangana ja mayingeleja waze akupihisa lufuma wenyi ni kumwesa atu lamba. Iye kanalakenya ngwenyi, makanongesa uwayilo wa mahuza ‘mba kechi kawuwana nawa.’ (Usolwelo 18:21) Kwasala hakehe Zambi manongesa uwayilo weswe wa mahuza.—Usolwelo 18:8.

NYINGIKA NAWA

Nyingika chize Zambi akwivwa hakutwala ku uwayilo wa mahuza. Nyingika nawa yuma yize uwayilo wa mahuza wakulinga ni mumu liaka kuwatambile kwecha hanga yuma yacho yikukwike kunyingika Yehova.

4. Zambi keshi kutayiza uwayilo weswe

Atu anji kakutayiza ngwo mayingeleja kali ngwe majila alisa waze akutwala kuli Zambi. Shina chino chili chamwenemwene? Tanga Mateu 7:13, 14, mba nushimutwine chihula chino:

Yika Mbimbiliya yakwamba hakutwala ku jila ya mwono?

Tala CHINEMA, mba nushimutwine chihula chinahateho.

CHINEMA: Shina Zambi Kakutayiza Uwayilo Weswe?—Chinema Chikehe (3:22)

Shina Mbimbiliya yakulongesa ngwo Zambi kakutayiza uwayilo weswe?

5. Uwayilo wa mahuza kuushi kwimbulula zango lia Zambi

Uwayilo wa mahuza wakupihisa lufuma wa Zambi mu milali yinji. Mulali umwe uze wakusoloka chinji uli kukwasa jita. Tala chilweza chimuwika, tala CHINEMA, mba nushimutwine yihula yinahateho.

CHINEMA: Kulinjisa cha Mayingeleja mu Jita Yinene Yamuchiali ya Hashi Heswe (2:22)

Yika mayingeleja anji alingile ha Jita Yinene Yamuchiali ya Hashi Heswe?
Kuchi wakwivwa ha yuma yize ayo alingile?

Tanga Yoano 13:34, 35 ni 17:16, mba nushimutwine yihula yino:

Ku nyonga lie, kuchi Yehova akwivwa muze mayingeleja akukwasa jita?
Uwayilo wa mahuza wakulinga yuma yinji yipi. Hiunamono kama chize uwayilo wa mahuza wakuhona kwimbulula zango lia Zambi?

Yizulie: Yimwe yingeleja yatoo ni yizulie yize yakusolola uwayilo wa mahuza uze wakukwasa jita ha miaka yinji. 1. Kulusu. 2. Jita Yitangu ya Hashi Heswe. 3. Umwe ngana wa yingeleja kanalembela umwe swalale. 4. Umwe ngana wa yingeleja kanashinjila atu hanga ase jita ni atu a ku munyachi umuwika mu Africa. 5. Maswale a mu Japão kanawayila mwata wo — Uwayilo wa mahuza kuushi kwimbulula zango lia Zambi

6. Zambi kanazange kukwasa atu hanga akatuke mu uwayilo wa mahuza

Tanga Usolwelo 18:4,a mba nushimutwine chihula chino:

Kuchi wakwivwa ha kunyingika ngwe Zambi kanazange kukwasa atu hanga akatuke mu uwayilo wa mahuza?

7. Nunga ni kulilongesa hakutwala kuli Zambi wamwenemwene

Shina yuma yize uwayilo wa mahuza wakulinga ni kuhanjika yatamba kukwata ha chize wakumona Zambi? Achinyonga hali mwana yoze wakulituna kukaula usongwelo upema wa tato. Makatuka ku zuwo lia yisemi jenyi ni kuputuka kulinga yuma yipi. Hachino tato kechi kuzanga yitanga ya mwanenyi. Shina muchilita kulamikiza tato ha yitanga yipi ya mwanenyi?

Mumu liaka chili chipi kulamikiza Zambi ni kwecha kulilongesa hakutwala kuli iye hamukunda wa yitanga yipi ya uwayilo wa mahuza?

ATU AMWE KAKWAMBA NGWO: “Chishi kuzanga kulilongesa hakutwala kuli Zambi mumu mayingeleja kakukokela atu lamba linji.”

Shina ni yena che wakwivwa?
Mumu liaka yitanga yipi ya uwayilo wa mahuza kuyatambile kukwata ha chize twakumona Zambi?

YIZE WALILONGESA

Uwayilo wa mahuza wakupihisa lufuma wa Zambi mumu lia malongeso a mahuza ni yitanga yamo yipi. Zambi makanongesa uwayilo wa mahuza.

Kuhitulula

Kuchi wakwivwa hakutwala ku yuma yize uwayilo wa mahuza wakulongesa ni yize wakulinga?
Kuchi Yehova akwivwa hakutwala ku uwayilo wa mahuza?
Yika Yehova makalinga ni uwayilo wa mahuza?

Nahwisa longeso lino ha tangwa:

Yize mulinga

Ha kukunguluka cha chikungulwila chize muchihataho hula umwe ndumbu ngwe, “Mumu liaka unakasakula kupwa Chela cha Yehova?”

Yikuma yikwo:

Yuma yiko yize mulinga

HENGWOLA NAWA

Tala majila aali anasolola chize uwayilo wa mahuza wakuvwisa Zambi kupiha.

“Shina Mayingeleja Eswe Kalifwa? Shina Eswe Kakutwala Kuli Zambi?” (Lusango wa ha internet)

Mumu liaka Yehova anazange hanga tumuwayile hamuwika ni akwetu?

“Shina Chili Chilemu Kupwa mu Yimwe Yingeleja?” (Lusango wa ha internet)

Umwe ngana wa mu yingeleja te keshi kulivwa kanawa mu yingeleja yenyi. Alioze chino kuchakamukwikile kunyingika umwenemwene hakutwala kuli Zambi.

“Mumu Liaka Umwe Ngana Ahichikile Yingeleja Yenyi?” (Laulenu! Fevereiro 2015)

Ha miaka yinji, mayingeleja kakuhanjika mahuza hakutwala kuli Zambi. Mahuza jacho kakulingisa hanga atu anyonge ngwo Zambi keshi kulihulumba hali atu. Nyingika umwenemwene hakutwala ku mahuza wano atatu.

“Mumu Liaka Chili Chikalu Kuli Amwe Kuzanga Zambi?” (Kaposhi wa Kutalila 1 wa Novembro, 2013)

a Nyi unazange kunyingika mumu liaka mukanda wa Usolwelo wakutesa uwayilo wa mahuza ni pwo avuluka ngwo, Babilonia Yinene, tala Maliji Akusongo 1.