Ehuka Kulitesa ni Akwenu—Neha Sambukila

 1. Yika muyihasa kulingiwa nyi amwe masolola spiritu ya kulitesa ni akwo?

MUSONO, atu anji hano hashi kakupwa ni yitanga ya kuzo mumu lia kulitesa ni akwo. Chakutalilaho, umwe mukwa-mingoso mahasa kulinga yuma yipi hali akwa-mingoso-ni-akwo hanga mingoso yenyi yende kanawa. Umwe mukwa-kwasa konda, mahasa kununguna mukwo kutachi hanga akumbe konda yacho. Umwe longi yoze unazange kuya ku shikola yinene, mahasa kwiya makumbululo a yeseko yize aaha hanga apalike. Yetu akwa-Kristu tunanyingika ngwetu, kulinga yuma yino chili chipi; mumu yili “yitanga ya musunya.” (Ngala. 5:19-21) Alioze chakuhona kunyingika, shina tuvumbi twa Yehova mahasa kuneha spiritu ya kulitesa mu chikungulwila? Twatamba kuhengwola kanawa chikuma chino, mumu spiritu ya kulitesa muyihasa kupihisa kulinunga cha mandumbu mu chikungulwila.

 2. Yika mutushimutwina ha mutwe uno?

² Ha mutwe uno, mutushimutwinaho yitanga yipi yize muyihasa kututwala hanga tupwe ni spiritu ya kulitesa ni mandumbu jetu. Mutushimutwinaho nawa yilweza ya mu Mbimbiliya ya malunga ni mapwo ashishika waze kakapwile ni spiritu ya kulitesa ni akwo. Alioze chitangu, tutalenu chize mutuhasa kuhengwola mbunge yetu.

 3. Yihula yika twatamba kulihula?

³ Chili chipema hita shimbu kuhengwola kanawa mbunge yetu. Mutuhasa kulihula ngwetu: ‘Mumu liaka nakuzanga kulitesa ni akwetu? Nakuchilinga hanga ngulivwise kuwaha? Yika yakungutwala mba ngulihane mu mulimo wa Zambi? Nakulihana mumu ngunahiane mandumbu eswe? Nyi mumu ngunahiane umwe ndumbu? Nyi nakuchilinga hanga nguvwise Yehova kuwaha?’ Chili chilemu kulihula yihula yino. Mumu liaka? Tutalenu yize Mbimbiliya yinambe.

 4. Kulita ni A-Ngalashia 6:3, 4, mumu liaka twatamba kwehuka kulitesa ni akwetu?

⁴ Mbimbiliya yinatutoweza hanga tuchine kulitesa ni akwetu. (Tanga A-Ngalashia 6:3, 4.) Mumu liaka? Mumu nyi twanyonga ngwetu tunahiane akwetu, chino muchihasa kutupwisa akwa-kulizata. Chikwo nawa, nyi twanyonga ngwetu, akwetu kali alemu chinji kutuhiana, chino muchihasa kutuhongesa. Manyonga wano aali, mahasa kusolola ngwo kutushi mana. (Roma 12:3) Katerina,b umwe pangi yoze watwama ku Grécia, yamba ngwenyi: “Yami napwile ni kulitesa ni mapangi akwo waze te apema chinji, akwambujola kanawa ni kulinga usepa upema. Hachino, yinguputuka kulivwa ngwe chishi ulemu.” Kashika, twatamba kwiwuluka ngwetu Yehova katukokele kuli iye hi mumu lia upeme ko, kuhanjika kanawa hanji kutunyingika kuli atu anji, alioze mumu twakumuzanga ni kupanjika Mwanenyi.—Yoa. 6:44; 1 Kori. 1:26-31.

 5. Yika walilongesa ha chilweza cha ndumbu Hyun?

⁵ Chihula chikwo chize mutuhasa kulihula chili chino: ‘Shina mandumbu kakungumona ngwe mutu yoze wakuneha sambukila, nyi hanji mutu yoze wakuneha mbwanja mashimbu eswe?’ Tutalenu chilweza cha ndumbu Hyun, yoze watwama mu Coreia ya ku Sul. Ha mashimbu amwe, iye te kakumona mandumbu akwo waze ali ni yiteli ngwe akwa-kole jenyi. Yamba ngwenyi: “Yami te nakwambila mandumbu wano yuma yipi, nawa kanji-kanji te chishi kutayiza yuma yize ayo akwamba.” Mba yika yalingiwileko? Mwene yamba ngwenyi: “Yitanga yami yapinjishile kulinunga mu chikungulwila.” Alioze, masepa ja Hyun yamukwasa kunyingika yitanga yenyi yipi. Hachino, yalumuna yitanga yenyi, musono kali mukulwana mupema mu chikungulwila. Kashika, nyi twamona ngwetu tuli ni ndako yakutesa mandumbu shimbu tunehe sambukila, twatamba kwehuka ndako yacho kawashi-washi.

 6. Kulita ni A-Ngalashia 5:26, yitanga yika yipi yize yakuneha spiritu ya kulitesa?

⁶ Tanga A-Ngalashia 5:26. Yitanga yika yipi yize muyihasa kutwala umwe kupwa ni spiritu ya kulitesa ni akwo? Chimwe chili kulizata. Mutu yoze walizata kakulisuta nawa kakunyonga wika hali mwene. Chikwo chili chipululu. Mutu yoze ukwete chipululu keshi kuzanga wika kupwa ni yuma yize mukwo ali nayo, alioze kakuzanga nawa hanga mutu wacho atokese yize ali nayo. Kwamba umwenemwene, nyi umwe mevwila mukwo chipululu, chekwamba kakumuvwila kole. Kashika, twatamba kusa tachi hanga tuchine kupwa ni yitanga yino yipi!

 7. Hana chilweza chize chinasolola upi uze muuhasa kwiza ha kulizata ni chipululu?

⁷ Kulizata ni chipululu mutuhasa kuyitesa ni yiswa waze akulia mwambu wa zuwo. Chipwe ngwe linapeme, nihindu nyi yiswa malia mwambu, zuwo liacho mulihasa kupihia. Chino muchihasa kulingiwa kuli umwe ndumbu. Iye hanji kakulingila Yehova ha miaka yinji. Alioze nyi malizata ni kupwa ni chipululu, mahasa kulimbuka. (Yishi. 16:18) Mahasa kwecha kulingila Yehova ni kuneha weji hali mwene ni hali akwo. Yika mutuhasa kulinga hanga twehuke kulizata ni chipululu?

 8. Kuchi mutuhasa kwehuka kulizata?

⁸ Mutuhasa kwehuka kulizata ha kukaula chiyulo chize postolo Paulu ahanyine kuli A-Fwilipu ngwenyi: “Kanda nulinga nichimwe mu spiritu ya kulitachika, hanji ya ulemu wamokomoko, alioze ni mbunge ya kulikehesa, mweswe anyonge ngwenyi, mukwetu wanguhiana.” (Fwili. 2:3) Nyi mutumona ngwetu akwetu katuhiana, kutuchi kulitesa ni waze ali ni utotombo unji kuhiana yetu. Alioze, mutuwahilila no hamuwika. Mutuwahilila no chinji kuhiana, nyi mazachisa utotombo wacho hanga alingile Yehova. Chikwo nawa, mandumbu a mapwo ni a malunga waze ali ni utotombo unji, no katamba kukaula chiyulo chino cha Paulu. Ayo mahasa kuchilinga ha kulihulikila ha yitanga yipema yize akumona hali yetu. Nyi mandumbu eswe malinga chihanda cho, mu chikungulwila mumupwa sambukila nawa muchilinunga.

 9. Kuchi mutuhasa kwehuka chipululu?

⁹ Mutuhasa kwehuka chipululu ha kupwa akwa-kulikehesa, chekwamba, ha kunyingika ngwetu kuli yuma yimwe yize kutuchi kuhasa kulinga kanawa. Nyi mutupwa akwa-kulikehesa, kutuchi kusolola ngwetu tukwete utotombo unji kuhiana akwetu. Shimbu tuchilinge, mutusa tachi hanga tulilongese kuli mandumbu waze ali ni utotombo unji kuhiana yetu. Chakutalilaho, shina unanyingika umwe ndumbu mu chikungulwila chenu, yoze wakulinga pande jipema? Nyi chenacho, muhule chize iye akulilulieka mba alinge kanawa pande jenyi. Kutala unanyingika umwe ndumbu wa pwo yoze wakuteleka kanawa? Mwite hanga akulweze chize mupwa ni kuteleka kanawa. Shina uli mukweze yoze chakukukalila kulinga usepa? Eta ukwaso kuli ndumbu yoze wakuhasa kulinga usepa. Nyi twachilinga, mutwehuka chipululu ni kululieka utotombo wetu.

10. Kapinda muka Ngideone apwile nenyi?

¹⁰ Achinyonga ha yize yalingiwile kuli Ngideone, wa ku munyachi wa Manase ni malunga a ku munyachi wa Eframe. Ni ukwaso wa Yehova, Ngideone ni atu jenyi 300 kakumbile jita yize te muyihasa kwatwala hanga alizate. Hachino, malunga A-Eframe yaya ni kulitakana ni Ngideone hi hanga amuchichimieke ko, alioze hanga amuzwelese. Chinasoloka ngwe ayo kota kevwile uli, mumu Ngideone kakaasanyikine hanga aye ni kwasa jita ni akwa-kole ja Zambi. Ayo kalihulikilile wika ha chize mafunga lufuma wa munyachi wo. Kashika kakahashile kumona ngwo, yize Ngideone alingile yahalishile jina lia Yehova ni kufunga atu Jenyi.—Kuyu. 8:1.

11. Yika Ngideone alwezele malunga A-Eframe?

¹¹ Ni kulikehesa cheswe Ngideone yalweza malunga A-Eframe ngwenyi: “Ami yika nalinga ha kucheseka ni chize nwalinga yenu?” Chocho, Ngideone yatongola chilweza chasolwele chize Yehova awahishile munyachi wa Eframe. Hachino, utenu wa A-Eframe “yiutepuluka.” (Kuyu. 8:2, 3) Ngideone kechele kulizata hanga anehe sambukila mukachi ka atu ja Zambi.

12. Yika twalilongesa hali malunga A-Eframe ni hali Ngideone?

¹² Yika twalilongesa ha lusango yono? Hakutwala kuli malunga A-Eframe, twalilongesa ngwetu kutwatambile kulihulumba chinji ha lufuma wetu kuhiana wa Yehova. Nyi tuli miata a mu usoko hanji makulwana a mu chikungulwila, mutuhasa kulilongesa chikuma chilemu hali Ngideone. Nyi umwe mevwa uli ha yize twalinga, mutuhasa kutala chikuma chacho kulita ni nyonga lienyi. Nawa mutuhasa kumuchichimieka ha yuma yipema yize alinga. Chino muchifupiwa kupwa akwa-kulikehesa, chipi-chipi nyi mutunyingika ngwetu mutu wacho mwe wapihisa. Kuneha sambukila chili chilemu chinji kuhiana kusolola yoze walinga upi ni yoze kaulingile.

13. Kapinda muka Hana apalikile nawa kuchi amukumbile?

¹³ Tunyongenu nawa ha chilweza cha Hana. Iye kalimbachile ni Elekana, umwe Ka-Levi yoze te wakumuzanga chinji. Alioze Elekana yambata pwo mukwo, Penina. Elekana kazangile chinji Hana kuhiana Penina, chipwe chocho, “Penina wasemene ana alioze Hana kasemene.” Hachino, Penina yaputuka kukekuna Hana “nikumuvundula.” Kuchi Hana evwile? Iye kevwile yinyengo yinji! Chocho “walilile, mba kalile.” (1 Samue. 1:2, 6, 7) Chipwe chocho, kukushi niyimwe yize yinasolola ngwo Hana kesekele kufunyishina Penina upi ha upi. Shimbu achilinge, iye yalemba kuli Yehova ni kufuliela ngwenyi mahwisa kapinda wenyi. Shina Penina kechele kusosomba Hana? Mbimbiliya kuyishi kwamba nichimwe ha chikuma chino. Alioze chuma tunanyingika chili ngwo, Hana kalivwile kanawa ni kufunga sambukila yenyi ya ku mbunge. “Mba kapwile nawa ni chinyengo ku meso.”—1 Samue. 1:10, 18.

14. Yika twalilongesa ha chilweza cha Hana?

¹⁴ Yika twalilongesa ha chilweza cha Hana? Twalilongesa ngwetu, nyi umwe meseka kusolola ngwe kakuhiana, yena kanda ufupa kusolola ngwe unahiane mutu wacho. Chikwo nawa, kanda ulitesa nenyi. Shimbu ufunyise upi ha upi, eseka kupwa ni sambukila ni mutu wacho. (Roma 12:17-21) Chipwe ngwe mutu wacho kalumwine nyonga lienyi, nihindu yena muhasa kufunga sambukila ya ku mbunge.

15. Yuma yika yalifwa yize Apolu ni Paulu apwile nayo?

¹⁵ Haliapwila, tutalenu yize mutuhasa kulilongesa ha chilweza cha kambaji Apolu ni cha postolo Paulu. Muwaali wo, te kanyingika kanawa Yisoneko. Eswe te kaanyingika kanawa nawa te kakulongesa kanawa. Ayo kakwashile atu anji kupwa tumbaji. Alioze malunga wano te keshi kulimona ngwe akwa-kole.

16. Apolu kapwile mutu wa mutapu uka?

¹⁶ Apolu te wa “ku Alexandria,” yimwe mbonge yize atu te akuya ni kulilongesela shikola ha mashimbu jacho. Chinasoloka ngwe, kapwile ni kulinga kanawa pande, nawa te ‘mukwa kulongoloka mu Yisoneko.’ (Yili. 18:24) Muze Apolu apwile mu Korindu, mandumbu amwe mu chikungulwila kasolwele zwalala ngwo kakumuzanga chinji kuhiana mandumbu akwo, kuchingako Paulu. (1 Kori. 1:12, 13) Shina Apolu te kakutayiza nyonga liacho? Ka, te keshi kulitayiza. Kashika hakupalika cha amwe mashimbu muze Apolu akatukile mu Korindu, Paulu yamwita hanga ayeko nawa. (1 Kori. 16:12) Nyi Paulu kanyingikine ngwenyi Apolu kanatwale mandumbu mu chikungulwila hanga alihandunune, kachi kakamutumineko nawa. Chinasoloka pundu ngwo, Apolu kazachishile utotombo wenyi mu jila yalita, chekwamba hanga ambujole sango lipema ni kutakamisa mandumbu jenyi. Mutuhasa kupwa ni shindakenyo ngwetu, Apolu kapwile mukwa-kulikehesa. Chakutalilaho, Mbimbiliya kuyishi kusolola nihamwe ngwo, Apolu kevwile uli muze Akwila ni Prisila “amulumbunwine pundu nawa jila ya Zambi.”—Yili. 18:24-28.

17. Yika Paulu alingile hanga anehe sambukila?

¹⁷ Postolo Paulu kanyingikine kanawa mulimo weswe upema uze Apolu alingile. Alioze Paulu te keshi kunyonga ngwenyi, Apolu mamutambula chihela. Muze twakutanga yize Paulu asonekenene A-Korindu, twakuhasa kumona ngwetu iye kapwile mukwa-kulikehesa nawa chimbovu. Iye kakapwile ni kulisuta muze mandumbu amwe apwile ni kwamba ngwo: “Ami nguli wa Paulu.” Shimbu achilinge, yahana uhenya weswe kuli Yehova Zambi ni kuli Yesu Kristu.—1 Kori. 3:3-6.

18. Kulita ni 1 A-Korindu 4:6, 7, yika twalilongesa ha chilweza cha Apolu ni cha Paulu?

¹⁸ Yika chilweza cha Apolu ni cha Paulu chinatulongesa? Mutuhasa kukalakala chinji mu mulimo wa Yehova, ni kukwasa atu anji hanga ajame ni kwapapachisa. Alioze tunanyingika ngwetu, chino chakulingiwa wika ni ukwaso wa Yehova. Apolu ni Paulu kanatulongesa nawa chikuma chikwo chilemu ngwo, nyi twapwa ni yiteli yinji, twatamba kusa tachi hanga tunehe sambukila. Twakusakwilila chinji ha kupwa ni makulwana a mu chikungulwila ni tuvumbi, waze akutukwasa tufunge kulinunga ni sambukila mukachi ketu. Ayo kakuchilinga hakuhana yiyulo yize yinakatuka mu Liji lia Zambi. Ayo keshi kufupa kusoloka, alioze kakukwasa mandumbu eswe mu chikungulwila hanga akaule chilweza cha Yesu Kristu!—Tanga 1 A-Korindu 4:6, 7.

19. Yika hita umwe wa kuli yetu atamba kulinga? (Tala nawa mushete, “Echa Spiritu ya Kutesa Mandumbu.”)

¹⁹ Hita umwe wa kuli yetu, Zambi kamwehele umwe utotombo. Mutuhasa kuuzachisa hanga tukwase akwetu. (1 Petu. 4:10) Mutuhasa kunyonga ngwetu, yuma yize tunalingi kuyishi ni ulemu. Alioze twiwulukenu ngwetu, yuma yeswe yikehe-yikehe yize twakulinga hanga tunehe sambukila, yili ngwe ndopi jize jakufupiwa hanga atunge najo zuwo. Kashika, tusenu tachi hanga twehuke ndako ya kulitesa ni akwetu. Tulingenu yeswayo mutuhasa hanga tunehe sambukila ni kulinunga mu chikungulwila.—Efwe. 4:3.