Ziz

6 Me bann Izraelit ti rekonmans fer sa ki mal dan lizye Zeova. Alor, Zeova ti livre zot dan lanmen bann Madyanit pour set an. 2 Bann Madyanit ti domin Izrael e akoz sa, bann Izraelit ti annan bann landrwa kasyet* dan bann montanny, dan bann kavern e dan bann landrwa ki difisil pour dimoun ale. 3 Ler bann Izraelit ti senm lagrenn, bann Madyanit, Amalekit ek bann dimoun ki sorti dan Les ti atak zot. 4 Zot ti etabli zot kan pour lager avek Izrael e detri zot bann plantasyon ziska Gaza. Zot pa ti kit nanryen pour Izrael manze, zot pa ti kit ni en mouton, ni en toro, ni en bourik. 5 Zot ti vini avek zot bann zannimo ek latant e zot ti en kantite parey sotrel. Zot ansanm avek zot bann samo ti tro bokou pour konte e zot ti vini pour detri sa pei. 6 Bann Izraelit ti vin vreman pov akoz sa ki bann Madyanit ti pe fer. Alor, bann Izraelit ti demann Zeova led.

7 Ler bann Izraelit ti demann Zeova led akoz sa ki bann Madyanit ti pe fer, 8 Zeova ti anvoy en profet kot bann Izraelit ki ti dir zot: “La sa ki Zeova Bondye Izrael i dir, ‘Mon’n fer zot sorti Lezip, dan sa pei kot zot ti lesklav. 9 Mon ti sov zot dan lanmen bann Ezipsyen e dan lanmen tou sa bann ki ti fer zot soufer. Mon ti osi tir tou sa bann dimoun devan zot e mon ti donn zot pei sa bann dimoun. 10 Mon ti dir zot: “Mwan, mon Zeova zot Bondye. Zot pa devret ador* bann bondye bann Amorit ki dan sa pei kot zot pe reste.” Me zot pa ti obei mwan.’”*

11 Pli tar, lanz Zeova ti vin Ofra e asiz anba sa gro pye dibwa ki ti pour Zoas en Abi-Ezrit. Son garson Gideonn ti pe bat dible dan preswar diven pour ki bann Madyanit pa vwar li. 12 Lanz Zeova ti aparet avek li e dir: “Zeova i avek ou, ou sa gerye ki for.” 13 Me Gideonn ti dir li: “Mon senyer eskiz mwan, me si Zeova i avek nou, akoz tousala in ariv nou? Oli tou sa bann keksoz merveye ki i’n fer e ki nou bann zanset ti rakont nou. Zot ti dir, ‘Zeova ki’n fer nou sorti Lezip.’ Me la Zeova in abandonn nou e i’n livre nou dan lanmen bann Madyanit.” 14 Zeova ti get li e dir: “Ale e servi ou lafors pour sov Izrael dan lanmen bann Madyanit. Pa mon menm mwan ki pe anvoy ou?” 15 Gideonn ti dir li: “Pardonn mwan Zeova. Ki mannyer mon pou kapab sov Izrael? Gete! Mon fanmir* i sa fanmir ki mwen enportan dan tribi Manase e mwan, mon sa enn ki pli pa enportan dan lakaz mon papa.” 16 Me Zeova ti dir li: “Vi ki mon pou avek ou, ou pou ganny laviktwar lo bann Madyanit konmsi zot ti zis en zonm.”

17 Apre, Gideonn ti dir li: “Aprezan, si mon fer ou plezir, montre mwan en siny ki ou menm ou ki pe koz avek mwan. 18 Silvouple, pa bezwen ale ziska ki mon retournen avek mon kado e met li devan ou.” Alor i ti dir: “Mon pou reste la ziska ki ou retournen.” 19 Gideonn ti ale, i ti prepar en zenn kabri e i ti fer dipen san lelven avek en efa* lafarin. I ti met sa lavyann dan en pannyen e sa lasos dan en marmit. Apre i ti anmenn sa bann manze deor kot li anba sa gro pye dibwa e servi li sa manze.

20 Lanz sa vre Bondye ti dir li: “Pran sa lavyann ek sa dipen san lelven e met zot lo sa gro ros ki la e vid sa lasos.” Gideonn ti fer sanmenm. 21 Lanz Zeova ti lev sa baton ki ti dan son lanmen e avek bout sa baton, i ti tous sa lavyann ek dipen san lelven. Dife ti sorti dan sa ros e bril sa lavyann ek dipen san lelven. Apre, lanz Zeova ti disparet devan Gideonn. 22 Alor Gideonn ti realize ki sa ti lanz Zeova.

Deswit Gideonn ti dir: “Maler lo mwan, Souvren Senyer Zeova, parski mon’n vwar lanz Zeova fas a fas!” 23 Me Zeova ti dir li: “Ki lape i avek ou, pa bezwen per, ou pa pou mor.” 24 Alor Gideonn ti konstri en lotel pour Zeova laba e ziska ozordi i apel Zeova-Salonm.* I ankor laba Ofra, lavil bann Abi-Ezrit.

25 Sa zour swar, Zeova ti dir li: “Pran sa zenn toro ki pour ou papa, sa zenn toro* ki annan set an. Detri lotel Baal ki pour ou papa e koup sa poto sakre* ki o bor li. 26 Ler ou’n fini konstri en lotel pour Zeova ou Bondye avek sa ranze ros anler lo sa landrwa proteksyon, pran sa zenn toro* e ofer li konman en lofrann brile* lo sa bann bout dibwa ki ou’n pran dan sa poto sakre* ki ou’n koupe.” 27 Alor Gideonn ti pran dis zonm parmi son bann serviter e i ti fer egzakteman sa ki Zeova ti’n dir li. Me i ti tro per bann fanmir son papa ek bann zonm sa lavil pour fer sa lizour, alor, i ti fer sa aswar.

28 Ler bann zonm sa lavil ti leve lannmen granmaten, zot ti vwar ki lotel Baal ti’n ganny kraze e poto sakre* ki ti o bor li ti’n ganny koupe. Zot ti osi vwar ki sa dezyenm zenn toro ti’n ganny ofer lo sa lotel ki ti’n ganny konstrir. 29 Zot ti demann kanmarad: “Lekel ki’n fer sa?” Apre ki zot ti’n fer lanket, zot ti dir: “Gideonn garson Zoas ki’n fer sa.” 30 Alor bann zonm sa lavil ti dir Zoas: “Fer ou garson sorti deor pour nou touy li akoz i’n kraz lotel Baal e i’n koup sa poto sakre* ki ti o bor li.” 31 Zoas ti dir tou sa bann dimoun ki ti pe fer problenm avek li: “Eski zot bezwen defann Baal? Eski zot bezwen sov li? Sa ki defann li pou bezwen ganny met amor la bomaten. Si i en bondye, les li defann son lekor vi ki en dimoun in kraz son lotel.” 32 Sa zour, Zoas ti konmans apel Gideonn Zeroubaal* e dir: “Les Baal defann son lekor parski en dimoun in kraz son lotel.”

33 Tou bann Madyanit, Amalekit ek bann dimoun ki sorti dan Les ti rasanble zot larme ansanm. Zot ti travers larivyer e al kanpe dan Vale Zezreel. 34 Zeova ti donn* Gideonn son lespri sen. Gideonn ti soufle tronpet* e bann Abi-Ezrit ti ralye deryer li. 35 I ti anvoy bann mesaze partou dan tribi Manase e zot osi zot ti ralye deryer li. I ti osi anvoy bann mesaze dan tribi Aser, Zeboulonn ek Naftali e zot ti monte pour vin zwenn li.

36 Apre Gideonn ti dir sa vre Bondye: “Si ou pe servi mwan pour sov Izrael zis parey ou’n promet, 37 la mon pe met en lapo mouton ki annan son lalenn lo la dan sa landrwa kot dible i ganny bate. Si i annan laroze zis lo sa lalenn me ater otour li i sek, mon pou konnen ki ou pou servi mwan pour sov Izrael zis parey ou’n promet.” 38 Sanmenm sa ki ti arive. Ler i ti leve lannmen granmaten, i ti pers sa lalenn e i ti ganny ase delo pour ranpli en gran bol. 39 Me Gideonn ti dir sa vre Bondye: “Pa bezwen ankoler avek mwan, me les mwan demann ou ankor enn fwa. Silvouple, les mwan fer ankor zis en tes avek sa lalenn mouton. Silvouple, fer ki i annan laroze partou ater tandis ki sa lalenn i reste sek.” 40 Alor sa zour swar, Bondye ti fer sanmenm sa. Zis sa lalenn ki ti sek me i ti annan laroze partou ater.