Psonm

146 Loue Ya!*

Mon anvi loue Zeova avek tou mon leker.

2 Mon pou loue Zeova tou dilon mon lavi.

Mon pou sant kantik* pour loue mon Bondye osi lontan ki mon vivan.

3 Pa met konfyans dan bann prens*

Ni dan okenn dimoun parski zot pa kapab sov ou.

4 Sa dimoun i aret respire* e i retourn dan later.

Sa menm zour son bann panse i disparet.

5 Ere sa dimoun ki Bondye Zakob i son led,

Ki annan lespwar dan Zeova son Bondye,

6 Sa Enn ki’n fer lesyel ek later,

Lanmer e tou sa ki ladan,

Sa Enn ki toultan reste fidel,

7 Sa Enn ki donn lazistis bann ki’n ganny vole,

Sa Enn ki donn dipen bann ki lafen.

Zeova pe larg bann prizonnyen.*

8 Zeova pe ouver lizye bann aveg.

Zeova pe lev bann ki’n kourbe.

Zeova i kontan bann ki fer sa ki byen.

9 Zeova pe protez bann etranze.

I soutenir bann orfelen* ek bann vev,

Me i kas plan bann move dimoun.

10 Zeova pou Lerwa pour touzour,

O Siyon, ou Bondye pou Lerwa pour zenerasyon apre zenerasyon.

Loue Ya!*