Premye liv Samyel

24 Konman Sail ti retournen sorti lager kont bann Filisten, zot ti dir li: “Gete! David i dan dezer Enn-Gedi.”

2 Alor Sail ti swazir 3,000 zonm parmi tou bann Izraelit e i ti al rod David ek son bann zonm lo montanny apik kot kabri maron i reste. 3 Sail ti ariv kot en berkay o bor semen ki ti’n ganny fer avek ros, kot i ti annan en kavern. I ti antre dan sa kavern pour fer son bezwen* anmezir ki David ek son bann zonm ti pe asize dan fon sa kavern. 4 Bann zonm David ti dir li: “Ozordi i sa zour ki Zeova pe dir ou, ‘Gete! Mon pe livre ou lennmi dan ou lanmen e ou kapab fer sa ki ou oule avek li.’” Alor David ti leve e san fer tapaz, i ti koup en bout manto* Sail. 5 Me apre ki David ti’n koup en bout manto* Sail, son konsyans* ti fatig li. 6 I ti dir son bann zonm: “Dapre pwennvi Zeova, zanmen mon pou kapab fer en keksoz koumsa avek mon senyer, sa enn ki Zeova in swazir. Mon pa pou fer li ditor, parski i sa enn ki Zeova in swazir.” 7 Ler David ti dir sa, sa ti anpes son bann zonm atak Sail.* Sail li, i ti sorti dan sa kavern e kontiny son larout.

8 Apre, David ti leve, sorti dan kavern e kriy Sail: “Mon senyer lerwa!” Ler Sail ti vir deryer, David ti azenou ater lafas anba. 9 David ti dir Sail: “Akoz ou ekout parol bann zonm ki dir, ‘Gete! David i oule fer ou ditor’? 10 Ozordi menm, ou’n vwar avek ou de lizye ki Zeova in livre ou dan mon lanmen ler ou ti dan kavern. Me ler en dimoun ti dir mwan touy ou, mon ti pran pitye pour ou e dir, ‘Mon pa pou fer mon senyer ditor, parski i sa enn ki Zeova in swazir.’ 11 An plis, mon papa, gete, wi, gete. Dan mon lanmen mon annan en bout ou manto,* parski olye touy ou, mon ti koup en bout ou manto.* Aprezan ou kapab vwar e konpran ki mon napa lentansyon pour fer ou ditor oubyen pour rebel kont ou. Mon pa’n fer pese kont ou, me ou ou pe rod touy mwan. 12 Ki Zeova i ziz ant ou ek mwan e ki Zeova i pini ou pour sa ki ou’n fer mwan. Me mwan, mon pa pou fer ou ditor. 13 I zis parey sa vye proverb i dir, ‘Bann ki move ki fer sa ki move,’ me mwan, mon pa pou fer ou ditor. 14 Eski lerwa Izrael pe tay deryer mwan? Me mwan ki mon ete? Mon zis parey en lisyen mor, en senp pis. 15 Ki Zeova i vin nou ziz e ziz ant ou ek mwan. I pou gete ki’n arive e defann mwan. I pou ziz mwan e sov mwan dan ou lanmen.”

16 Konman David ti fini dir li tou sa bann keksoz, Sail ti dir: “Eski ou lavwa sa mon garson David?” Apre, Sail ti konmans plere asodlarm. 17 I ti dir David: “Ou pli zis ki mwan, parski ou’n tret mwan byen, me an retour, mwan mon’n fer ou ditor. 18 Wi, ozordi ou’n dir mwan ki ou’n fer sa ki byen anver mwan, parski ou pa’n touy mwan ler Zeova in livre mwan dan ou lanmen. 19 Parski lekel sa zonm ki rankontre son lennmi e les li kontiny son semen san fer li nanryen? Zeova pou rekonpans ou avek sa ki bon pour sa ki ou’n fer pour mwan ozordi. 20 Aprezan gete! Mon konnen ki ou pou definitivman vin lerwa e ki anba ou lotorite, rwayonm Izrael pou kontinyen egziste. 21 Aprezan, fer en serman o non Zeova ki ou pa pou konpletman detri mon desandans ler mon mor e ki ou pa pou fer mon non ganny oubliye dan fanmir* mon papa.” 22 Alor David ti fer en serman avek Sail e apre sa, Sail ti al kot li. Me David ek son bann zonm ti mont lo montanny.