Premye let pour bann Tesalonisyen

1 Delapar Pol, Silven* ek Timote, pour kongregasyon Tesalonik ki ini avek Bondye nou Papa ek nou Senyer Zezi Kri:

Ki Bondye i donn zot lape ek labonte ekstraordiner.*

2 Ler nou priy pour zot tou, nou touzour remersye Bondye. 3 Parski nou touzour pe mazin zot travay fidel, zot dir travay avek lanmour e zot landirans akoz sa lespwar ki zot annan dan nou Senyer Zezi Kri devan Bondye nou Papa. 4 Nou bann frer ki Bondye i kontan, nou konnen ki Bondye in swazir zot, 5 parski sa bon nouvel pa ti ganny anonse avek zot zis an parol, me avek pwisans, avek lespri sen e avek konviksyon. Zot osi konnen ki mannyer nou’n konport nou parmi zot, akoz zot. 6 Zot in swiv nou legzanp ek legzanp Senyer, parski zot in aksepte sa mesaz avek lazwa ki zot ti gannyen gras a lespri sen menm si zot in pas dan bokou leprev 7 e zot in vin en legzanp pour tou bann disip ki Masedwann ek Akai.

8 Anfet, se gras a zot ki bann dimoun Masedwann ek Akai in tann koz lo parol Zeova* e osi dimoun partou kote in tann koz lo zot lafwa dan Bondye, alor nou pa bezwen dir plis ki sa. 9 Parski sa bann dimoun pe kontinyen rakonte ki mannyer nou ti zwenn zot pour premye fwa, zot ki Tesalonik e ki mannyer zot in vin ver Bondye e rezet zot bann zidol pour ki zot vin lesklav sa Bondye vivan e vre. 10 Zot pe esper son Garson sorti dan lesyel ki i’n resisite, setadir, Zezi, ki sov nou kont lakoler Bondye ki pe vini.