Premye let pour bann Korentyen

16 Aprezan konsernan kontribisyon pour bann sen, zot kapab swiv lenstriksyon ki mon ti donn bann kongregasyon Galasi. 2 Premye zour sak semenn, sakenn i devret met en pti keksoz dekote dapre son mwayen, pour ki bann kontribisyon pa ganny anmase ler mon arive. 3 Me ler mon arive, mon pou anvoy bann zonm ki zot in swazir dan zot let pour anmenn kontribisyon Zerizalenm ki zot in fer volonterman. 4 Par kont, si i pli byen pour mwan al laba mwan osi, mon pou al avek zot.

5 Me vi ki mon pou pas par Masedwann, ler mon sorti laba mon pou vin kot zot. 6 Petet mon pou reste e menm pas liver avek zot pour ki zot kapab akonpanny mwan lanmwatye semen kot mon pe ale. 7 Parski mon pa anvi vwar zot zis an pasan, me mon ti a kontan pas en pe letan avek zot si Zeova* i permet. 8 Me mon pou reste Efez ziska Lafet Lapannkot, 9 parski en gran laport in ouver pour mwan fer plis, me i annan en kantite lennmi.

10 Si Timote i vini, fer sir ki napa nanryen pour li per parmi zot, parski i pe fer travay Zeova* parey mwan menm. 11 Alor, pa les personn mepriz li. Fer sir ki i ariv kot mwan sen e sof, parski mwan ek bann frer pe esper li.

12 Konsernan nou frer Apolos, mon’n demann li pour vin avek bann frer ki pou vizit zot. I pa ti son lentansyon pour vin la konmela, me i pou vini dek ki i annan loportinite.

13 Reste eveye, reste ferm dan lafwa, kontinyen annan kouraz,* vin for. 14 Tou sa ki zot fer, fer li avek lanmour.

15 Mon bann frer, la sa ki mon demann zot: Zot konnen ki bann dan lakour Stefanas i bann premye disip Kris Akai e ki zot in devoue pour servi bann sen. 16 Zot osi, kontinyen soumet zot avek bann dimoun koumsa e avek tou sa bann ki korpere e travay dir. 17 Me mon kontan ki Stefanas, Fortinatis ek Akaykis i la avek mwan parski zot in ed mwan vi ki zot pa la. 18 Zot in ankouraz mwan e zot osi. Alor, montre ki zot apresye bann zonm koumsa.

19 Bann kongregasyon Lazi i fer zot salanm. Akila ek Priska ansanm avek kongregasyon ki zwenn kot zot lakaz i fer zot en gro salanm dan Senyer. 20 Tou bann frer i fer zot salanm. Dir bonzour kanmarad par anbras kanmarad.

21 Mwan osi Pol, mon fer zot salanm. Sa mon’n ekri avek mon prop lanmen.

22 Si en dimoun napa lanmour* pour Senyer, ki i ganny modi. Vini nou Senyer! 23 Ki labonte ekstraordiner nou Senyer Zezi i avek zot. 24 Mon kontan zot tou ki ini avek Kris Zezi.