Let pour bann Efezyen

2 Deplis, Bondye in redonn zot lavi parski i ti konmsi zot ti’n mor akoz zot fot ek pese. 2 I ti annan en letan kot zot ti viv parey sa lemonn* i viv, dapre sa enn ki diriz sa ler ki kontrol bann dimoun, se sa leta lespri* ki pe azir dan bann zanfan dezobeisans. 3 Oparavan nou tou nou ti konport nou parey sa bann dimoun dapre bann move dezir nou lekor enparfe, nou ti azir dapre sa ki nou lekor enparfe ti anvi e dapre nou prop panse. Alor depi nou nesans, nou ti bann zanfan ki merit lakoler Bondye zis parey tou dimoun. 4 Me Bondye ki annan en kantite konpasyon* e akoz son gran lanmour pour nou, 5 i’n redonn nou lavi e fer nou ini avek Kris, menm si i ti konmsi nou ti’n mor akoz nou bann fot. Anfet se gras a labonte ekstraordiner ki zot in ganny sove. 6 Deplis, i’n redonn nou lavi, nou tou ansanm e fer nou asiz ansanm dan lesyel, ini avek Kris Zezi, 7 pour ki dan sa lemonn* ki pe vini, Bondye pou kapab demontre grander son labonte ekstraordiner ek zenerozite anver nou ki ini avek Kris Zezi.

8 Se gras a son labonte ekstraordiner ki zot in ganny sove e akoz zot annan lafwa. I pa akoz sa ki zot fer me akoz sa i en kado Bondye. 9 Non, i pa rezilta sa ki zot fer, pour ki zot napa rezon pour fer vantar. 10 Bondye ki’n fer nou e vi ki nou disip Kris Zezi, nou ti ganny kree pour fer bann bon travay ki Bondye ti’n deside davans pour nou fer.

11 Alor, pa oubliye ki i ti annan en letan ki zot, bann dimoun lezot nasyon, zot ti ganny apele “dimoun ki pa sirkonsi” par “dimoun ki’n ganny sirkonsi” par zonm. 12 Sa letan, zot pa ti konn Kris, zot pa ti form parti nasyon Izrael, zot ti napa okenn par dan bann lalyans ki annan pour fer avek promes Bondye. Dan sa lemonn, zot ti napa lespwar e zot pa ti konn Bondye. 13 Me aprezan, zot bann disip Kris, zot ti lwen avek Bondye me zot in vin pros avek li gras a disan Kris. 14 Parski li menm ki’n anmenn lape pour nou, i’n fer sa de group vin en sel e i’n detri sa miray ki ti separ zot. 15 Par ofer son lekor, i’n aboli Lalwa avek son bann komannman ek lareg, ki ti fer zot lennmi. I’n fer sa pour ki sa de group ki ini avek li i vin en nouvo pep* e pour anmenn lape, 16 pour rekonsilye sa de group avek Bondye e fer zot vin en sel pep* gras a poto martir,* parski li menm in detri sa ki ti fer zot lennmi gras a son lanmor. 17 I ti vin anons sa bon nouvel lape avek zot ki ti lwen avek Bondye e anmenn lape pour bann ki ti pros avek li. 18 Parski atraver li, tou le de group dimoun i kapab fasilman apros nou Papa gras a en sel lespri sen.

19 Zot nepli bann etranze oubyen bann sitwayen lezot pei, me zot annan menm sitwayennte ki bann sen e zot form parti fanmir Bondye. 20 Zot in ganny batir lo en fondasyon setadir bann zapot ek profet, tandis ki Kris Zezi li i ros kwen sa fondasyon. 21 Sa bann diferan parti sa batiman antye i ini avek Kris e zot zwenn ansanm dan larmoni. Sa batiman i kontinyen grandi pour vin en tanp sen pour Zeova.* 22 Vi ki zot ini avek Kris, zot osi zot pe ganny batir ansanm pour vin en landrwa kot Bondye i reste par son lespri sen.