Ezekyel

10 Ler mon ti pe gete, mon ti vwar en keksoz ki ti parey en safir* par lao sa platform ki ti par lao latet bann seriben e i ti parey en tronn. 2 Apre i ti dir sa zonm ki ti dan en lenz linenn: “Antre parmi bann larou, anba bann seriben e ranpli ou de lanmen avek labrez ki ant bann seriben e zet zot lo sa lavil.” Alor mon ti get li pandan ki i ti antre.

3 Bann seriben ti pe debout lo kote drwat lakaz ler sa zonm ti antre e sa nyaz ti ranpli sa lakour anndan. 4 Laglwar Zeova ti sorti kot bann seriben e monte e i ti al kot padport* sa lakaz e ptitapti sa nyaz ti ranpli sa lakaz. Lakour antye ti ganny eklere avek laglwar Zeova. 5 Ou ti kapab tann tapaz lezel bann seriben dan sa lakour an deor. I ti parey lavwa Bondye Tou Pwisan ler i koze.

6 Apre i ti donn lord sa zonm ki ti dan lenz linenn: “Pran dife ant bann larou, ant bann seriben.” Alor i ti antre e debout o bor larou. 7 Apre, enn sa bann seriben ti anvoy son lanmen kot dife ki ti ant bann seriben. I ti pran en pe labrez e met dan lanmen sa zonm ki ti dan lenz linenn. Sa zonm ti pran sa labrez e i ti sorti. 8 Anba lezel bann seriben, i ti annan sa ki ti paret lanmen bann imen.

9 Ler mon ti pe gete, mon ti vwar kat larou akote bann seriben, i ti annan en larou akote sak seriben. Sa bann larou ti klate parey krizolit.* 10 Tou le kat larou ti menm parey. Lafason ki sa bann larou ti’n ganny fer ti parey de larou dan kanmarad. 11 Ler zot ti bouze, zot ti kapab al dan tou le kat direksyon san ki zot ti bezwen vire, parski zot ti kapab al sa landrwa kot latet ti vire, san ki zot ti bezwen vire. 12 I ti annan en kantite lizye partou lo lekor sa bann seriben, lo zot ledo, lo zot lanmen ek zot lezel e lo tou le kat larou ki ti akote zot. 13 Konsernan bann larou, mon ti tann en lavwa kriy zot, “Bann larou!”

14 Sak seriben ti annan kat figir. Sa premye figir ti figir en seriben, sa dezyenm ti figir en zonm,* sa trwazyenm ti figir en lyon e sa katriyenm ti figir en leg.

15 Bann seriben ti monte. Zot menm zot sa bann lanz* ki mon ti’n vwar kot Larivyer Kebar. 16 Ler bann seriben ti bouze, sa bann larou ti bouze ansanm avek zot. Ler bann seriben ti lev zot lezel pour mont anler par lao later, sa bann larou pa ti vire e zot ti reste akote bann seriben. 17 Ler zot ti arete, sa bann larou osi ti arete e ler zot ti monte, sa bann larou osi ti fer parey, parski lespri sen ki ti pe gid sa bann lanz* ti osi dan sa bann larou.

18 Apre, laglwar Zeova ti sorti kot padport sa lakaz e i ti al debout par lao bann seriben. 19 Aprezan, pandan ki mon ti pe get zot, bann seriben ti lev zot lezel, zot ti sorti lo later e monte. Ler zot ti ale, bann larou osi ti bouz ansanm avek zot. Zot ti aret dan larantre baro les lakaz Zeova e laglwar Bondye Izrael ti par lao zot.

20 Zot menm zot sa bann lanz* ki mon ti’n vwar anba tronn Bondye Izrael kot Larivyer Kebar. Alor mon ti konnen ki zot ti bann seriben. 21 Zot tou le kat zot ti annan kat figir, kat lezel e sa ki ti paret lanmen bann imen anba zot lezel. 22 Zot figir ti parey sa bann figir ki mon ti’n vwar kot Larivyer Kebar. Sak seriben ti al drwat devan li.