Premye let pour Timote

5 Pa kritik en zonm aze dan en fason dir. Plito, konsey li parey ou ti pou fer avek ou papa. Konsey bann zenn onm parey ou ti pou fer avek ou bann frer, 2 bann madanm aze parey bann manman, bann zenn madanm parey bann ser, avek bokou lapirte.

3 Pran swen* avek bann vev ki vreman vev.* 4 Me si en vev i annan zanfan oubyen pti zanfan, zot devret demontre devosyon pour Bondye premyerman dan zot prop fanmir e rann zot paran ek granparan sa ki zot dwa zot, parski sa i akseptab devan Bondye. 5 En madanm ki vreman en vev e ki mizer, in met son konfyans dan Bondye e i kontinyen sipliy e priy Bondye lizour konman aswar. 6 Me en vev ki pe viv zis pour satisfer son bann dezir* i konmsi i’n mor, menm si i ankor vivan. 7 Alor, kontinyen donn zot sa bann lenstriksyon,* pour ki zot ava san okenn repros. 8 Sirman, si en dimoun pa pran swen avek son prop fanmir e sirtou avek bann ki dan son prop lakour, i’n abandonn lafwa e i pli pir ki en dimoun ki napa lafwa.

9 En vev i kapab ganny mete lo lalis si i annan omwen 60 an, i’n fidel avek son msye,* 10 i annan en bon repitasyon pour fer sa ki byen, si i’n byen elve son zanfan, i’n demontre lospitalite, si i’n lav lipye bann sen, i’n ed bann ki dan problenm e i’n devoue pour fer bann bon keksoz.

11 De lot kote, pa met bann vev ki pli zenn lo sa lalis, parski ler zot dezir seksyel i anpes zot servi Kris, zot pou anvi marye. 12 Zot pou ganny kondannen parski zot in kas zot premye promes. 13 An menm tan, zot in devlop labitid reste nanryen fer, zot pas partou devan laport dimoun. Zot pa zis nanryen fer, me zot koz an bonnavini e mel dan zafer dimoun, zot koz lo bann keksoz ki zot pa devret. 14 Alor, mon oule ki bann vev ki pli zenn i marye, fer zanfan, okip zot lakour pour ki zot pa donn loportinite bann ki opoz nou kritik zot. 15 Anfet, serten vev in fini abandonn laverite e swiv Satan. 16 Si i annan okenn madanm Kretyen ki annan fanmir ki vev, i devret ed zot pour ki zot pa vin en fardo pour kongregasyon. Alor kongregasyon i a kapab asiste sa bann ki vreman vev.*

17 Bann ansyen ki diriz kongregasyon dan en bon fason i devret ganny konsidere diny pour ganny plis loner, sirtou sa bann ki travay dir pour ansenny e koz lo parol Bondye. 18 Parski lekritir i dir, “Ou pa devret anmar labous en toro ler i pe bat lagrenn,” osi, “En travayer i merit son saler.” 19 Pa pran kont okenn lakizasyon kont en ansyen eksepte si i annan laprev sorti kot de oubyen trwa temwen. 20 Reprimann bann ki pratik pese devan tou dimoun, sa pou en lavertisman pour lezot.* 21 Mon donn ou lord devan Bondye ek Kris Zezi ek bann lanz ki Bondye in swazir, pour obei sa bann lenstriksyon san prezize oubyen fer lapreferans.

22 Pa donn personn en responsabilite vitman,* ni partisip dan pese lezot, reste pir.

23 Aret bwar delo,* me bwar en ptigin diven akoz i bon pour ou lestoman e akoz ou souvan malad.

24 Pese ki serten dimoun i fer i evidan pour tou dimoun e zot ganny kondannen deswit, me lezot dimoun, zot pese i vin evidan pli tar. 25 Dan menm fason osi, bann bon aksyon i evidan pour tou dimoun, me menm si i pa leka, sa bann bon aksyon pa pou kapab ganny kasyet.