Psonm

83 O Bondye pa reste trankil.

O Bondye, koze* e pran aksyon.

 2 Parski gete! Ou bann lennmi i ankoler,

Bann ki ay ou i azir avek larogans.*

 3 Avek riz, zot fer konplo kont ou pep.

Zot fer konplo kont bann ki presye pour ou.*

 4 Zot dir: “Vini annou detri sa nasyon,

Pour ki non Izrael i ganny oubliye.”

 5 Ansanm zot in fer en konplo,

Zot in fer lalyans kont ou:

 6 Bann latant Edonm ek bann Ismaelit, Moab ek bann Agrit,

 7 Gebal, Amonn ek Amalek,

Filisti ansanm avek bann zabitan Tir.

 8 Asiri osi in zwenn avek zot,

Zot siport* bann garson Lot. (Sela)

 9 Fer avek zot parey ou ti fer avek Madyann,

Parey ou ti fer avek Sisera ek Zabin kot Larivyer* Kisonn.

10 Zot ti ganny detrir Enn-Dor,

Zot ti vin parey fimyen pour later.

11 Fer zot bann dimoun enportan vin parey Oreb ek Zeeb

E zot bann prens* parey Zeba ek Zalmouna,

12 Parski zot ti dir: “Annou pran sa pei kot Bondye i reste.”

13 O mon Bondye, fer zot vin parey en touf pikan ki pe roule dan divan,

Parey lapay sek ki pe anvole dan divan.

14 Parey en dife ki bril lafore,

Parey dife ki bril bann montanny,

15 Ki ou tay deryer zot avek ou tanpet

E fer zot per avek ou tanpet divan.

16 O Zeova, imilye zot*

Pour ki zot kapab loue ou non.

17 Fer zot onte e per pour touzour,

Imilye zot e detri zot.

18 Dimoun i devret konnen ki ou apel Zeova

E ki zis ou tousel ki Tre O lo later antye.