Dezyenm liv Kronik

30 Ezekya ti anvoy mesaz partou dan Izrael ek Zida e i ti menm ekri bann let pour bann zabitan Efraim ek Manase, pour vin Zerizalenm kot lakaz Zeova pour selebre Lapak* pour Zeova Bondye Izrael. 2 Par kont, lerwa ek son bann prens ek tou dimoun ki ti Zerizalenm ti deside pour selebre Lapak dan dezyenm mwan, 3 parski zot pa ti’n kapab selebre li sa zour ki zot ti devret fer li, parski i ti napa ase pret ki ti’n sanktifye* zot lekor e bann dimoun pa ti ankor rasanble Zerizalenm. 4 Sa laranzman ti paret bon pour lerwa e pour tou dimoun. 5 Alor zot ti deside pour anvoy en mesaz partou dan Izrael, depi Beer-Seba ziska Dann, pour dir bann dimoun ki zot devret vin Zerizalenm e selebre Lapak pour Zeova Bondye Izrael, vi ki zot pa ti’n selebre li konman en group parey i ti’n ganny ekrir dan lalwa.

6 Apre, bann mesaze* ti al partou dan Izrael ek Zida avek sa bann let sorti kot lerwa ek son bann prens, parey lerwa ti’n donn lord. Zot ti dir: “Pep Izrael, retourn kot Zeova Bondye Abraam, Izaak ek Izrael, koumsa i pou kapab retourn kot sa bann ki’n sirviv e sove dan lanmen bann lerwa Asiri. 7 Pa bezwen fer parey zot bann zanset ek zot bann frer ki pa ti fidel avek Zeova Bondye zot bann zanset. Bann dimoun ti soke ler zot ti vwar sa ki ti arive avek zot, parey zot pe vwar la. 8 Pa bezwen vin antete parey zot bann zanset. Soumet avek Zeova e vin kot son landrwa sen ki i’n sanktifye pour touzour e servi Zeova zot Bondye pour ki i aret ankoler avek zot. 9 Ler zot retourn kot Zeova, sa bann dimoun ki’n pran zot bann frer ek zot bann garson konman prizonnyen pou demontre pitye pour zot e les zot retourn dan sa pei, parski Zeova zot Bondye i annan konpasyon* e i pran pitye. I pa pou vir son ledo* avek zot si zot retourn kot li.”

10 Alor sa bann mesaze* ti al dan tou bann lavil partou dan teritwar Efraim ek Manase, menm ziska Zeboulonn, me bann dimoun ti sikann zot e boufonn zot. 11 Par kont, serten dimoun dan teritwar Aser, Manase ek Zeboulonn ti abes zot lekor e vin Zerizalenm. 12 Sa vre Bondye ti beni pep Zida, alor zot ti zwenn ansanm* pour fer sa ki lerwa ek bann prens ti’n donn zot lord pour fer dapre sa ki Zeova ti’n dir.

13 En kantite dimoun ti rasanble Zerizalenm pour selebre Lafet Dipen san Lelven dan dezyenm mwan. I ti annan en gran lafoul. 14 Zot ti tir tou bann lotel ki ti dan Zerizalenm ek tou bann lotel kot lansan ti ganny brile e zet zot dan Vale Kidronn. 15 Apre, zot ti touy bann zannimo pour sakrifis Lapak katorzyenm zour dan dezyenm mwan. Bann pret ek bann Levit ti onte, alor zot ti sanktifye zot lekor e zot ti anmenn bann lofrann brile* kot lakaz Zeova. 16 Zot ti pran zot plas labitid dapre Lalwa Moiz, serviter* sa vre Bondye. Apre bann pret ti fann sa disan ki zot ti gannyen avek bann Levit. 17 I ti annan en kantite dimoun ki pa ti’n sanktifye zot lekor e bann Levit ti responsab pour touy bann zannimo pour sakrifis Lapak pour tou bann ki ti enpir, pour sanktifye zot avek Zeova. 18 I ti annan en kantite dimoun ki pa ti’n pirifye zot lekor, sirtou sa bann dimoun ki ti sorti dan teritwar Efraim, Manase, Isakar ek Zeboulonn, me kantmenm sa, zot ti manz sa repa Lapak, kontrerman avek sa ki ti’n ganny ekrir. Me Ezekya ti priy pour zot e i ti dir: “Ki Zeova, ki bon, i pardonn 19 tou dimoun ki’n prepar zot leker pour rod sa vre Bondye, Zeova, Bondye zot bann zanset, menm si zot pa’n pirifye zot lekor pour sa lafet ki sen.” 20 Zeova ti ekout Ezekya e i ti pardonn* sa pep.

21 Alor, bann Izraelit ki ti Zerizalenm ti selebre Lafet Dipen san Lelven pour set zour dan lazwa. Bann Levit ek bann pret ti loue Zeova toulezour e zot ti zwe zot bann lenstriman byen for pour Zeova. 22 An plis ki sa, Ezekya ti koz avek tou bann Levit ki ti servi Zeova avek bon zizman e i ti ankouraz zot.* Zot ti manze pandan sa lafet pour set zour, zot ti ofer bann sakrifis lape* e remersye Zeova Bondye zot bann zanset.

23 Apre, sa pep antye ti deside pour selebre sa lafet pour ankor set zour. Alor zot ti selebre pour ankor set zour dan lazwa. 24 Ezekya lerwa Zida ti donn sa pep 1,000 toro ek 7,000 mouton e bann prens ti donn sa pep 1,000 toro ek 10,000 mouton. En kantite pret ti pe sanktifye zot lekor. 25 Tou dimoun dan Zida, bann pret, bann Levit, tou dimoun ki ti sorti Izrael, bann etranze ki ti sorti Izrael ek bann ki ti pe reste Zida ti kontinyen selebre dan lazwa. 26 Bann dimoun ki ti Zerizalenm ti dan lazwa, parski i pa ti’n zanmen ariv en keksoz koumsa dan Zerizalenm depi letan Salomon garson David lerwa Izrael. 27 Finalman, bann Levit ki pret ti debout e beni sa pep. Bondye ti tann zot lavwa e zot lapriyer ti ariv dan lesyel, dan son landrwa sen kot i reste.