Nonm

16 Apre Kora garson Izar, garson Koat, garson Levi ti ralye ansanm avek Datann ek Abiram bann garson Eliab e avek Onn garson Pelet, desandans Ribenn. 2 Zot ti opoz Moiz ansanm avek 250 zonm Izraelit, bann sef pep Izrael, bann ki reprezant lepep ek bann zonm enportan. 3 Alor zot ti rasanble ansanm kont Moiz ek Aaron e dir zot: “Nou’n ganny ase avek zot! Lepep antye i sen, zot tou zot sen e Zeova i avek zot. Alor, akoz zot met zot lekor par lao pep Zeova?”

4 Ler Moiz ti tann sa, deswit i ti tonm azenou lafas anba. 5 Apre Moiz ti dir Kora ek tou son bann siporter: “Demen bomaten, Zeova pou fer konnen lekel ki pour li, lekel ki sen e lekel ki devret vin devan li. Sa enn ki i swazir ki pou vin devan li. 6 La sa ki zot pou fer: Kora ek tou ou bann siporter, pran bann resipyan pour labrez, 7 demen met labrez ladan e lansan lo la devan Zeova. Sa zonm ki Zeova pou swazir i sa enn ki sen. Zot bann garson Levi, zot pe tro ale aprezan!”

8 Apre Moiz ti dir Kora: “Silvouple, zot bann garson Levi, ekoute. 9 Eski i pa enportan pour zot ki Bondye Izrael in met zot apar parmi pep Izrael, ki i’n permet zot pour apros li pour fer servis kot tabernak Zeova, pour debout devan lepep e servi zot? 10 Pa i’n fer zot apros li, zot ansanm avek tou zot bann frer, bann garson Levi? Eski zot devret anvi vin pret osi? 11 Sanmenm sa, ou ek tou ou bann siporter ki pe rasanble ansanm, zot kont Zeova. Me ki Aaron i ete pour ki zot koz an mal lo li?”

12 Pli tar, Moiz ti kriy Datann ek Abiram bann garson Eliab, me zot ti dir: “Nou pa pou vini! 13 I pa ase ki ou’n fer nou sorti dan sa pei kot dile ek dimyel i koule pour touy nou dan sa dezer? Aprezan ou anvi domin lo nou osi? 14 Deplis, ou pa’n anmenn nou dan okenn pei kot dile ek dimyel i koule, ni donn nou en bout later ek plantasyon rezen konman en leritaz. Eski ou anvi tir lizye sa bann zonm? Nou pa pou vini!”

15 Alor, Moiz ti vreman ankoler e dir Zeova: “Pa bezwen aksepte zot lofrann lagrenn. Mon pa’n zanmen pran ni menm enn zot bourik, ni fer ditor enn ant zot.”

16 Apre Moiz ti dir Kora: “Demen bomaten, ou avek tou ou bann siporter vin devan Zeova, ou, zot ek Aaron. 17 Sakenn i devret pran son resipyan pour labrez e met lansan lo la, anmenn zot resipyan pour labrez devan Zeova, 250 resipyan pour labrez. Sakenn pou avek son resipyan pour labrez, enkli ou ek Aaron.” 18 Alor, sakenn ti pran son resipyan pour labrez, zot ti met labrez ek lansan ladan e zot ti debout devan larantre latant renyon ansanm avek Moiz ek Aaron. 19 Ler Kora ti’n fini rasanble son bann siporter kont zot devan larantre latant renyon, laglwar Zeova ti aparet devan lepep antye.

20 Zeova ti dir Moiz ek Aaron: 21 “Sorti o bor sa bann dimoun parski mon pe al detri zot en sel kou.” 22 Ler zot ti tann sa, zot ti tonm azenou lafas anba e dir: “O Bondye, sa Bondye ki donn lavi tou dimoun, eski ou pou ankoler avek lepep antye akoz pese en sel dimoun?”

23 Apre Zeova ti dir Moiz: 24 “Dir pep Izrael, ‘Sorti o bor latant Kora, Datann ek Abiram!’”

25 Alor Moiz ti leve e al kot Datann ek Abiram e bann ansyen pep Izrael ti al avek li. 26 I ti dir lepep: “Silvouple, sorti o bor latant sa bann move dimoun e pa bezwen tous okenn keksoz ki pour zot, pour ki zot pa ganny detri akoz tou zot pese.” 27 Deswit zot ti sorti o bor latant Kora, Datann ek Abiram. Apre Datann ek Abiram ti sorti e debout devan larantre zot latant ansanm avek zot madanm, zanfan ek pti baba.

28 Apre Moiz ti dir: “Aprezan, sa ki pou arive pou montre zot ki Zeova ki’n anvoy mwan pour fer tou sa bann keksoz, me pa mwan ki’n anvi fer sa: 29 Si sa bann dimoun i mor dan en fason natirel parey nenport ki dimoun e si zot ganny pini parey nenport ki dimoun, savedir Zeova pa’n anvoy mwan. 30 Me si Zeova i fer en keksoz ekstraordiner avek zot, si later i ouver* e anval zot avek tou sa ki pour zot e zot desann vivan dan Latonm,* sirman zot pou konnen ki sa bann zonm in mank respe pour Zeova.”

31 Dek ki Moiz ti’n fini dir sa parol, later ti ouver anba zot. 32 Later ti ouver* e anval zot ansanm avek zot fanmir ek tou dimoun ki ti siport Kora ek tou zot keksoz. 33 Alor zot ek tou sa ki ti siport zot ti desann vivan dan Latonm* e later ti kouver zot. Zot ti disparet parmi lepep. 34 Tou bann Izraelit ki ti o bor zot ti sove akoz zot ti per ler zot ti tann sa bann dimoun pe kriye. Zot ti dir: “Taler later pou anval nou osi!” 35 Apre en dife sorti kot Zeova ti desann e detri sa 250 zonm ki ti pe bril lansan.

36 Apre sa, Zeova ti dir Moiz: 37 “Demann Eleazar garson pret Aaron pour tir dan dife sa bann resipyan pour labrez, parski zot sen. Demann li pour osi fann sa bann labrez lwen. 38 Sa bann resipyan pour labrez ki ti pour sa bann zonm ki’n perdi zot lavi akoz pese in vin sen parski zot ti’n ganny ofer devan Zeova. Fer sa bann resipyan pour labrez vin bann plak mens pour kouver lotel. Zot pou vin en siny pour bann Izraelit.” 39 Alor pret Eleazar ti pran sa bann resipyan an kwiv ki sa bann zonm ki ti’n ganny brile ti’n ofer. I ti fer zot vin bann plak mens pour kouver lotel, 40 zis parey Zeova ti’n dir li atraver Moiz. Sa ti fer bann Izraelit rapel ki okenn dimoun* ki pa en desandans Aaron napa drwa vin bril lansan devan Zeova e ki zot pa devret vin parey Kora ek son bann siporter.

41 Son lannmen, pep Izrael antye ti konmans konplent kont Moiz ek Aaron e dir: “Zot de zot in touy pep Zeova.” 42 Lepep ti’n rasanble ansanm kont Moiz ek Aaron e ler zot ti vir dan direksyon latant renyon, zot ti vwar nyaz pe kouver latant renyon e laglwar Zeova ti aparet.

43 Moiz ek Aaron ti al devan latant renyon 44 e Zeova ti dir Moiz: 45 “Sorti parmi sa pep pour ki mon detri zot en sel kou.” Ler zot ti tann sa, zot ti tonm azenou lafas anba. 46 Apre Moiz ti dir Aaron: “Pran sa resipyan pour labrez, met sa labrez ki lo lotel ladan e met lansan lo la. Al vitman kot lepep e ofer sa lansan pour ki zot pese i ganny pardonnen,* parski Zeova in vreman ankoler. Sa fleo in fini konmanse!” 47 Deswit Aaron ti pran sa resipyan pour labrez, zis parey Moiz ti’n dir e i ti tay kot lepep. Me gete! dimoun ti’n fini konmans mor akoz sa fleo. Alor i ti met lansan dan sa resipyan pour labrez e i ti ofer sa lansan pour ki pese lepep i ganny pardonnen.* 48 I ti reste debout ant bann dimoun mor ek bann ki vivan ziska ki finalman sa fleo ti arete. 49 I ti annan 14,700 dimoun ki ti mor akoz sa fleo san kont bann ki ti mor akoz Kora. 50 Ler Aaron ti finalman retourn kot Moiz devan larantre latant renyon, sa fleo ti’n arete.