Premye let pour bann Korentyen

8 Aprezan konsernan manze ki ganny ofer avek bann zidol, nou tou nou konn sa size. Konnesans i fer nou vantar, me lanmour i batir. 2 Si en dimoun i krwar ki i konn en keksoz, anfet i pa konn tou keksoz lo la. 3 Me si en dimoun i kontan Bondye, Bondye i konn li.

4 Konsernan manz manze ki ganny ofer avek bann zidol, nou konnen ki en zidol pa nanryen ditou e i annan en sel Bondye. 5 Parski menm si i annan bann swadizan bondye, ki swa dan lesyel oubyen lo later, zis parey i annan en kantite “bondye” ek en kantite “senyer,” 6 anfet pour nou i annan zis en sel Bondye, nou Papa, kot tou keksoz i sorti e pour ki nou egziste e i annan en sel Senyer Zezi Kri, par ki tou keksoz i egziste e par ki nou egziste.

7 Toudmenm, pa tou dimoun ki annan sa konnesans. Me serten, akoz avan zot ti ador sa bann zidol, ler zot manz sa manze, zot konsider li konman en keksoz ki’n ganny sakrifye avek zidol e sa i fer zot konsyans ki feb sarze.* 8 Me manze pa pou fer nou vin pli pros avek Bondye, nou pa perdi nanryen si nou pa manze, ni ganny nanryen si nou manze. 9 Me zis fer atansyon ki zot drwa pour swazir, pa dan en fason ou en lot, vin en lobstak pour sa bann ki feb. 10 Parski si en dimoun i vwar ou, ou ki annan konnesans, pe pran en repa dan en tanp kot dimoun i ador zidol, eski konsyans sa enn ki feb pa pou ganny enfliyanse pour manz manze ki’n ganny sakrifye avek zidol li osi? 11 Alor, par ou konnesans, ou pe fer sa dimoun ki feb ditor, li ki Kris in mor pour li. 12 Si ou fer pese kont ou bann frer dan sa fason e ou bles zot konsyans ki feb, ou pe fer pese kont Kris. 13 Sanmenm rezon ki si manze i fer mon frer tonm dan pese, mon pa pou zanmen manz okenn lavyann ankor, pour ki mon pa fer mon frer tonm dan pese.