Premye liv Samyel

16 Finalman, Zeova ti dir Samyel: “Konbyen letan ou pou tris akoz Sail, la ki mon’n rezet li konman lerwa Izrael? Ranpli ou korn avek delwil e ale. Al vwar Zese ki sorti Betleenm, parski mon’n swazir enn son garson konman mon lerwa.” 2 Me Samyel ti dir: “Ki mannyer mon pou ale? Ler Sail i tann sa, i pou touy mwan.” Zeova ti reponn: “Pran en pti bef avek ou e dir, ‘Mon’n vin ofer en sakrifis pour Zeova.’ 3 Envit Zese pour vin kot ou pou fer sa sakrifis. Apre, mon pou les ou konnen ki ou devret fer. Ou bezwen vid delwil lo latet sa enn ki mon’n swazir.”

4 Samyel ti fer sa ki Zeova ti dir. Ler i ti ariv Betleenm, bann ansyen dan sa lavil ti vin zwenn li. Zot ti pe tranble avek lafreyer e zot ti dir: “Eski i annan en problenm?” 5 I ti dir: “Non, napa problenm. Mon’n vini pour ofer en sakrifis pour Zeova. Pirifye* zot lekor e vin avek mwan pour ofer sa sakrifis.” Apre sa, i ti pirifye* Zese ek son bann garson e envit zot pour vin kot i ti pou ofer sa sakrifis. 6 Anmezir ki zot ti arive, Samyel ti vwar Eliab e i ti dir: “Sirman li menm li sa enn ki Zeova in swazir.” 7 Me Zeova ti dir Samyel: “Pa bezwen get son laparans ek son grander, parski mon pa’n swazir li. Zonm pa vwar keksoz dan menm fason ki Bondye i vwar, parski zonm i vwar zis laparans, me Zeova i vwar sa ki i annan dan leker.” 8 Apre, Zese ti kriy Abinadab e anmenn li devan Samyel, me Samyel ti dir: “Sa enn osi Zeova pa’n swazir li.” 9 Answit, Zese ti anmenn Sama, me Samyel ti dir: “Ni li Zeova pa’n swazir.” 10 Alor Zese ti anmenn set son garson devan Samyel, me Samyel ti dir Zese: “Zeova pa’n swazir ni enn ant zot.”

11 Finalman, Samyel ti demann Zese: “Se tou garson ki ou annan?” Zese ti dir: “Mon annan en lot garson, sa enn pli zenn. Li i pe vey mouton.” Me Samyel ti dir Zese: “Fer en dimoun al sers li, parski nou pa pou asize pour manze ziska ler i arive.” 12 Alor i ti fer en dimoun al sers li e anmenn li devan Samyel. Sa garson ti annan en ten roz ek en zoli lizye e i ti en zoli garson. Apre, Zeova ti dir: “Leve, vid delwil lo son latet, parski li menm ki mon’n swazir!” 13 Alor Samyel ti pran sa korn delwil, vid delwil lo son latet devan son bann frer. Depi sa zour, lespri sen Zeova ti konmans donn David lafors. Pli tar, Samyel ti leve e al Rama.

14 Aprezan, Zeova ti’n aret donn Sail son lespri sen e Zeova ti les lespri Sail fatig li en kantite.* 15 Bann serviter Sail ti dir li: “Ou vwar ki Bondye pe les ou lespri fatig ou. 16 Nou lerwa, nou la pour ed ou. Alor silvouple, les ou bann serviter rod en zonm ki konn zwe larp byen. Koumsa, sak fwa ki Bondye i les ou lespri fatig ou, sa zonm i ava zwe larp e ou pou santi ou pli byen.” 17 Alor Sail ti dir son bann serviter: “Silvouple, rod mwan en zonm ki konn zwe larp byen e anmenn li kot mwan.”

18 Enn bann serviter ti dir: “Gete! Mon’n vwar ki enn bann garson Zese ki sorti Betleenm i zwe byen e i en gerye kouraze e for. I koz byen, i en zoli garson e Zeova i avek li.” 19 Alor Sail ti anvoy bann mesaze pour dir Zese: “Fer ou garson David ki pe vey mouton vin kot mwan.” 20 Zese ti pran dipen, en boutey lapo ranpli avek diven ek en pti kabri e met lo en bourik. Apre, i ti donn son garson David pour anmenn kot Sail. 21 Alor David ti vin kot Sail e konmans travay pour li. Sail ti kontan li en kantite e David ti vin sa enn ki ti responsab pour anmenn son bann zarm. 22 En zour, Sail ti anvoy en mesaz pour Zese: “Silvouple, les David kontinyen servi mwan parski mon vreman apresye li.” 23 Sak fwa ki Bondye ti les lespri Sail fatig li, David ti pran son larp e zwe. Sa ti soulaz Sail, i ti santi li pli byen e i ti reganny son lape lespri ek leker.