Premye liv Samyel

25 Avek letan, Samyel ti mor. Tou bann Izraelit ti zwenn ansanm pour pler son lanmor e pour anter li kot son lakaz dan lavil Rama. Apre, David ti desann dan dezer Parann.

2 I ti annan en zonm ki ti reste Maonn e ki ti travay Karmel.* Sa zonm ti byen ris. I ti annan 3,000 mouton ek 1,000 kabri. Sa letan, i ti Karmel pe koup lalenn son bann mouton. 3 Sa zonm ti apel Nabal e son madanm ti apel Abigel. Sa madanm ti pridan e byen zoli, me son msye ki ti en desandans Kaleb, ti brit e i ti konport li dan en move fason. 4 David ti dan dezer e i ti tande ki Nabal ti pe koup lalenn son bann mouton. 5 Alor David ti anvoy dis zonm* kot li e i ti dir zot: “Mont Karmel e ler zot ariv kot Nabal, demann li konman i sava. 6 Apre, dir li, ‘Ki ou viv lontan e ki tou i al byen pour ou.* Osi, ki tou i al byen pour ou fanmir ek tou sa ki ou annan. 7 Aprezan, mon’n tande ki ou pe koup lalenn ou bann mouton. Ler ou bann berze ti avek nou, nou pa ti fer zot okenn ditor e tou sa letan ki zot ti Karmel, nanryen pa ti ganny vole. 8 Demann ou bann zonm e zot pou dir ou. Mon swete ki ou pou byen resevwar mon bann zonm, parski nou’n vin dan en moman zwaye.* Silvouple, donn ou bann serviter ek ou garson David nenport keksoz ki ou kapab.’”

9 Alor bann zonm David ti al dir Nabal tou sa ki David ti’n dir zot dir. Ler zot ti fini, 10 Nabal ti reponn bann serviter David: “Lekel David e lekel li sa garson Zese? Konmela i annan bokou serviter ki pe kit zot met. 11 Eski mon bezwen pran mon dipen, mon delo ek lavyann ki mon’n koupe pour mon bann travayer* e donn bann zonm ki sorti sepa ki bor?”

12 Alor bann zonm David ti retournen e dir li tou sa ki Nabal ti’n dir. 13 Deswit, David ti dir son bann zonm: “Zot tou, pran zot lepe!” Alor zot tou zot ti met zot lepe dan zot leren e David osi ti fer parey. Apepre 400 zonm ti mont avek David e 200 zonm ti reste pour vey bagaz.

14 Antretan, enn bann serviter ti al dir Abigel, madanm Nabal: “David ti anvoy bann mesaze sorti dan dezer pour dir nou met ki i swete ki tou i al byen pour li, me i ti kriy avek zot e ensilte zot. 15 Sa bann zonm ti tret nou vreman byen. Zot pa ti zanmen fer nou okenn ditor e nanryen pa ti ganny vole pandan tou sa letan ki nou ti avek zot dan lakanpanny. 16 Pandan tou sa letan ki nou ti avek zot pe vey bann mouton, zot ti parey en miray proteksyon toultour nou, lizour konman aswar. 17 Aprezan deside ki ou pou fer, parski sirman i pou ariv en maler lo nou met, son fanmir ek son bann serviter.* I sitan en bon nanryen* ki personn pa kapab koz avek li.”

18 Alor Abigel ti depese e pran 200 dipen, de gran resipyan diven, senk mouton pare pour kwi, senk pannyen* lagrenn griye, 100 gato rezen ek 200 gato fig. I ti met tousala lo bann bourik. 19 Apre, i ti dir son bann serviter: “Al par devan mwan e mon pou swiv zot.” Me i pa ti dir son msye Nabal nanryen.

20 Abigel ti pe desann lo montanny lo son bourik. David ek son bann zonm ti pe desann dan son direksyon, me zot pa ti kapab vwar li parski montanny ti pe bar li. En sel kou, Abigel ti zwenn zot. 21 Anfet, avan sa David ti pe dir: “I pa ti vo lapenn ki mon ti protez tou sa ki sa zonm ti annan dan dezer. Napa nanryen parmi son bann keksoz ki ti ganny vole e pourtan, i rann mwan mal pour byen. 22 Ki Bondye i pini bann lennmi David* severman* si demen bomaten mon pa touy tou bann zonm* dan son lakour.”

23 Dek ki Abigel ti vwar David, i ti desann lo son bourik, tonm azenou devan David lafas anba. 24 Apre sa, i ti tonm dan son lipye e dir: “Mon senyer, met tou tor lo mwan. Permet ou servant pour koz avek ou e ekout sa ki ou servant i annan pour dir. 25 Silvouple mon senyer, pa fatig ou avek Nabal, sa bon nanryen, parski son non i al byen avek li. I apel Nabal* e i en zonm bet. Me mwan, ou servant, mon pa ti vwar bann zonm ki mon senyer ti anvoye. 26 Aprezan mon senyer, mon fer serman o non Zeova sa Bondye vivan e lo ou non, ki i Zeova ki’n anpes ou vin koupab pour touy dimoun e ki’n anpes ou revanze* lo ou menm. Ki ou bann lennmi ek bann ki oule fer ditor mon senyer i vin parey Nabal. 27 Aprezan mon senyer, donn bann zonm ki avek ou sa kado* ki ou servant in anmennen. 28 Silvouple mon senyer, pardonn fot ou servant. Sirman, Zeova pou fer ou desandans vin lerwa pour bokou letan, parski ou pe partisip dan bann lager Zeova e ou pa’n fer nanryen mal tou dilon ou lavi. 29 Ler en dimoun i tay deryer ou pour touy ou, Zeova pou protez lavi* mon senyer dan son sak lavi, me lavi* ou bann lennmi pou ganny balanse parey ros dan fles. 30 Finalman, ler Zeova in fer tou bann bon keksoz ki i’n promet mon senyer e i apwent ou konman sef pour diriz Izrael, 31 ou pou napa okenn remor oubyen regre* dan ou leker akoz ou pa’n vers disan san okenn rezon e akoz ou pa’n revanze* lo ou menm. Ler Zeova i fer sa ki byen pour mon senyer, rapel mwan, ou servant.”

32 Ler David ti tann sa, i ti dir Abigel: “Loue Zeova Bondye Izrael ki’n anvoy ou pour zwenn mwan ozordi 33 e osi ki ou ganny felisite pour ou bon zizman! Ki Bondye i beni ou, parski ozordi ou’n anpes mwan vin koupab pour touy dimoun e ou’n anpes mwan pran revanz* lo mwan menm. 34 Mon fer serman o non Zeova sa Bondye Izrael ki vivan, ki li menm li ki’n anpes mwan fer ou ditor. Parski si ou pa ti’n depese pour vin zwenn mwan, avan demen bomaten, i ti pou napa ni menm en zonm* ki reste dan fanmir Nabal e parmi son bann serviter.” 35 Alor David ti aksepte sa ki Abigel ti’n anmennen e dir li: “Al kot ou anpe. Gete, mon’n ekout ou e mon pou fer sa ki ou’n demande.”

36 Pli tar, Abigel ti retourn kot Nabal ki ti pe fete parey en lerwa dan son lakaz. Nabal* ti santi li byen e i ti konpletman sou. Abigel pa ti dir li nanryen ziska ler lizour ti fer. 37 Son bomaten, ler Nabal ti azen, son madanm ti rakont li sa ki ti’n arive. Leker Nabal ti vin parey leker en zonm mor e i ti alonze, paralize parey en ros. 38 Apepre dis zour pli tar, Zeova ti frap Nabal e i ti mor.

39 Ler David ti tande ki Nabal ti’n mor, i ti dir: “Loue Zeova ki’n defann mwan apre ki Nabal in ensilte mwan e ki’n anpes son serviter fer okenn keksoz mal. An plis, Zeova in fer Nabal peye pour sa ki i’n fer mal!” Apre, David ti anvoy en dimoun pour demann Abigel si i ti a kontan vin son madanm. 40 Alor bann serviter David ti vin Karmel kot Abigel ti reste e dir li: “David in anvoy nou kot ou pour pran ou konman son madanm.” 41 Deswit i ti leve, azenou lafas anba e dir: “Mon ou lesklav e mon pare pour vin en servant pour lav lipye bann serviter mon senyer.” 42 San tarde, Abigel ti leve e mont lo son bourik. I ti al avek bann mesaze David e senk son bann servant ti mars par deryer li. Koumsanmenm ki Abigel ti vin madanm David.

43 David ti’n osi marye avek Ainoam ki sorti Zezreel. Zot tou le de zot ti vin son madanm.

44 Me Sail ti’n donn son fiy Mikal, ki ti’n marye avek David, konman madanm Palti, ki ti garson Lais, ki ti sorti Galim.