En nouvo kalite manze

KI SA bann dimoun pe ramase ater? I parey lanez. I blan, e i kas kase. Me sa pa lanez; i en keksoz pour manze.

Ti fer apepre en mwan depi ki bann Izraelit ti’n kit Lezip. Zot ti dan dezer. Pa pous bokou manze dan dezer, e alor bann dimoun ti konplent, an dizan: ‘Plito Zeova ti’n touy nou Lezip. Omwen laba nou ti manz tou sa ki nou ti anvi.’

Alor Zeova ti dir: ‘Mon pou fer manze tonm ater sorti dan lesyel.’ E se sa ki Zeova ti fer. Lannmen bomaten kan bann Izraelit ti vwar sa keksoz blan ki ti’n tonbe, zot ti demann avek kanmarad: ‘Kisisa sa?’

Moiz ti dir: ‘Sa i manze ki Zeova in donn zot pour manze.’ Bann dimoun ti apel li LAMANN. I ti annan en gou parey bann pti gato ki’n fer avek dimyel.

Moiz ti dir avek bann dimoun: ‘Zot devret anmas lakantite ki sakenn i kapab manze.’ Alor tou le bomaten se sa ki zot ti fer. Apre, kan soley ti so, lamann ki ti’n reste ater ti fonn.

Moiz ti osi dir: ‘Personn pa devret gard lamann pour lannmen.’ Me serten parmi bann dimoun pa ti ekoute. Eski ou konnen ki ti arive? Lannmen bomaten lamann ki zot ti’n anmase ti ranpli avek lever, e i ti konmans pi!

Me, ti annan en zour dan lasemenn ki Zeova ti demann bann dimoun pour ramas de fwa plis lamann. Sa ti sizyenm zour. E Zeova ti demann zot pour prezerv serten pour lannmen, akoz i pa ti pou fer lamann tonbe setyenm zour. Kan zot ti prezerv lamann pour son setyenm zour, i pa ti ranpli avek lever e i pa ti pi! Sa ti en lot mirak!

Tan ki bann Izraelit ti reste dan dezer Zeova ti nouri zot avek lamann.