Rwayonm ti divize

ESKI ou konnen akoz sa zonm pe desir son rob par morso? Se Zeova ki ti’n demann li pour fer sa. Sa zonm i en profet, i apel Aiya. Kisisa en profet? En profet i en dimoun ki Bondye i dir li bann keksoz ki pou arive dan lavenir.

Dan sa portre Aiya pe koz avek Yarobam, en zonm ki Salomon ti fer li sirvey serten son travay konstriksyon. Kan Aiya ti zwenn Yarobam la lo semen, Aiya ti fer en keksoz drol. I ti tir son nouvo rob ki ti lo li e i ti desir li an 12 morso. I ti dir avek Yarobam: ‘Pran 10 bout pour ou.’ Eski ou konnen akoz Aiya ti donn Yarobam 10 bout?

Aiya ti eksplike ki Zeova ti pe al pran rwayonm avek Salomon. I ti dir ki Zeova ti pe al donn Yarobam 10 tribi. Sa i vedir ki garson Salomon, Reabam, ti pou ganny 2 tribi pour li dirize.

Kan Salomon ti antann sa ki Aiya ti’n dir Yarobam, i ti vreman ankoler. I ti esey touy Yarobam. Me Yarobam ti sove e al Lezip. En pe letan apre Salomon ti mor. I ti dirize pour 40 an, me aprezan son garson Reabam ti vin lerwa. Laba Lezip, Yarobam ti tande ki Salomon ti’n mor, alor i ti retourn Izrael.

Reabam ti en move lerwa. I ti pli pa bon ki son papa Salomon. Yarobam ek serten lezot zonm enportan ti al kot lerwa Reabam e zot ti demann li pour pa tret bann dimoun dir. Me Reabam pa ti ekoute. Annefe, i ti vin pli pa bon ki avan. Alor bann dimoun ti fer Yarobam vin lerwa lo 10 tribi, me tribi Benzamen ek Zida ti kontinyen gard Reabam konman zot lerwa.

Yarobam pa ti oule ki son pep ti al Zerizalenm pour ador Zeova dan tanp. Alor i ti fer 2 bef annor e fer bann dimoun sa 10 tribi ador zot. Sa pei pa ti tarde pour ranpli avek vyolans ek krim.

Ti annan problenm osi dan rwayonm sa 2 tribi. Dan mwens ki 5 an apre ki Reabam ti’n vin lerwa, lerwa Lezip ti vin lager kont Zerizalenm. I ti pran en kantite trezor dan tanp Zeova. Alor tanp ti nepli dan sa leta ki i ti ete letan i ti’n fek ganny konstri.