Lobeisans i protez ou

OU TI pou kontan si ou ti kapab fer tou sa ki ou anvi? Eski ou’n deza dir dan ou menm, ‘Plito ti napa personn pour dir mwan ki pour fer?’ Dir mwan laverite, mon ti a kontan konnen ki mannyer ou santi.—

Me kwa ki pli bon pour ou? Eski ou krwar ou pou pli byen si ou fer tou sa ki ou anvi? Oubyen eski keksoz i mars pli byen ler ou obeir ou papa ek ou manman?— Bondye i dir ou devret obeir ou paran. I bezwen annan en bon rezon pour li dir ou sa. Annou vwar akoz i dir sa.

Ki laz ou annan?— Ou konnen ki laz ou papa i annan?— Ou manman, granmanman, ek granpapa, ou konnen ki laz zot annan?— Zot in viv pli lontan ki ou. Ler en dimoun i viv pli lontan, i aprann plis keksoz. Sak lannen i tann plis keksoz, i vwar plis keksoz, e i fer plis keksoz. Alors bann zenn i kapab aprann bokou keksoz avek bann ki pli vye ki zot.

Ou konn en dimoun ki pli zenn ki ou?— Ou konn plis keksoz ki li?— Akoz ou konn plis ki li?— Akoz ou’n viv pli lontan ki li. Ou’n ganny plis letan pour aprann plis keksoz ki li.

Lekel ki’n viv pli lontan ki ou, ki mwan, ki tou dimoun?— Zeova. I konn plis ki ou, e i konn plis ki mwan. Ler i dir nou fer en keksoz, asire sa keksoz i byen pour fer kantmenm i kapab difisil. Eski ou konnen menm sa Gran Ansennyan en fwa ti vwar li difisil pour obeir?—

En fwa Bondye ti demann Zezi pour fer en keksoz ki ti tre difisil. Zezi ti priy lo sa keksoz, parey nou vwar la. I ti dir: ‘Papa, si ou anvi, pa fer mwan fer sa keksoz difisil.’ Sa ki Zezi ti dir, i montre ki i pa ti toultan fasil pour li fer sa ki Bondye ti oule. Be ou konnen ki Zezi ti dir alafen son lapriyer?—

Zezi ti fini par dir: ‘Non pa sa ki mwan mon anvi, me sa ki ou ou anvi.’ (Lik 22:41, 42) Wi, Zezi ti oule sa ki Bondye i anvi ganny fer, pa sa ki li i anvi. Alors, i ti ale e fer sa ki Bondye ti anvi olye fer sa ki li i krwar ti pli byen.

Ki nou aprann par sa?— Nou aprann ki i toultan byen pour fer sa ki Bondye i dir, kantmenm i pa toultan fasil. Me nou aprann en lot keksoz ankor. Ou konnen kwa?— Nou aprann ki Zezi pa li menm li Bondye, parey serten dimoun i dir. Bondye i pli vye ki son Garson Zezi, e i konn plis keksoz ki Zezi.

Ler nou obeir Bondye, nou montre ki nou kontan li. Labib i dir: “La lanmour Bondye: ki nou obei son konmannman.” (1 Zan 5:3) Ou vwar, nou tou nou bezwen obeir Bondye. Ou anvi obeir li ou osi, non?—

Annou pran nou Labib e nou a gete ki Bondye i demann zanfan pour fer. Nou pou lir dan Efezyen sapit 6, verse 1, 2, ek 3. I dir: “Zanfan, i zot devwar obei zot paran dan Senyer, akoz sa i byen. ‘Respekte zot papa ek zot manman’: Sa i premye konmannman avek en promes; ‘Pour ki ou a viv ere e lontan lo later.’”

Ou vwar, Zeova ki pe demann ou pour obeir ou papa ek ou manman. Ki savedir “respekte” zot? Savedir ou fer sir ou tret zot byen e fer zot kontan. Bondye i promet ki ou pou “viv ere” si ou obeir ou paran.

Mon a rakont en zistwar kot en bann dimoun ti ganny sove akoz zot ti obeir. Sa bann dimoun ti viv lontan menm, dan en gran lavil ki ti apel Zerizalenm. Bokou dimoun dan sa lavil pa ti ekout Bondye. Alors Zezi ti averti zot ki Bondye ti pe al detrir sa lavil. Zezi ti osi dir zot ki zot bezwen fer pour sove si zot kontan sa ki byen. I ti dir: ‘Kan zot a war Zerizalenm antoure par bann larme, zot a konnen ki son destriksyon i pros. La i ava ler pour sorti dan Zerizalenm e sov dan montanny.’​—Lik 21:20-22.

Zis parey Zezi ti dir, bann larme Romen ti vin atak Zerizalenm. Zot ti pozisyonn zot toultour sa lavil. Apre en sel kou, zis sa bann larme ti ale. Bokou dimoun ti krwar aprezan zot nepli an danze. Alors zot ti reste dan lavil. Me ki Zezi ti’n dir zot devret fer?— Ki ou ti pou’n fer si ou ti pe reste laba Zerizalenm?— Bann ki ti vreman krwar Zezi ti kit zot lakour e sov dan montanny lwen avek Zerizalenm.

Pour en lannen antye, nanryen pa ti arive avek Zerizalenm. Dezyenm lannen, nanryen pa ti arive. Trwazyenm lannen osi nanryen pa ti arive. Petet serten dimoun ti mazinen ki sa bann ki ti’n kit lavil ti bet. Me son katriyenm lannen, bann larme Romen ti retournen. Zot ti pozisyonn zot ankor toultour Zerizalenm. Aprezan ti’n tro tar pour sove. Sa voyaz bann larme ti detrir sa lavil. Laplipar dimoun dan lavil ti mor, e larestan ti ganny pran konman prizonnyen.

Me ki ti arive avek bann ki ti obeir Zezi?— Zot, zot pa ti ganny nanryen. Zot ti lwen avek Zerizalenm. Alors, okenn keksoz mal pa ti arive avek zot. Lobeisans ti’n protez zot.

Eski ou pou ganny proteze ou osi si ou obeir?— Petet ou paran in dir ou pa zanmen zwe dan semen. Akoz zot dir ou sa?— Akoz ou kapab ganny tape avek en loto. Si en zour ou dir: ‘Napa loto lo semen la. Pa pou ariv mwan nanryen. Toutfason lezot manrmay i zwe lo semen, pa ariv zot nanryen.’

Koumsa menm bokou dimoun Zerizalenm ti mazinen. Ler bann larme Romen ti’n ale, zot ti krwar nepli annan danze. Lezot dimoun pa ti ni fatig zot pour kit lavil. Alors zot osi zot ti reste lanmenm. Zezi ti’n averti zot, me zot pa ti ekoute. Alor zot ti perdi zot lavi.

Annou pran en lot legzanp. Ou’n deza zwe avek zalimet ou?— Petet i gou pour ou ler ou vwar sa pti dife alimen. Me i danzere pour zwe avek zalimet. Dife i kapab pran, bril lakaz antye, e ou osi tou!

Mazinen, nou bezwen obeir toultan, pa zis ler nou anvi. Ou pou ganny proteze si ou obeir toultan. E lekel ki pe dir ou, “Zanfan, i zot devwar obei zot paran”?— Bondye li menm. Pa bliye, i dir ou sa akoz i kontan ou.