Zezi i grandi Nazaret

Zezi pe grandi Nazaret, dan en pti lavil ki pa tro enportan. Sa lavil i dan nor, dan en rezyon ki apel Galile kot i annan bokou pti montanny, lo kote was en lak ki apel Lanmer Galile.

Ler Zezi i annan apepre de-z-an, Zozef ek Mari i kit Lezip e zot al reste Nazaret. I paret ki zot annan zis Zezi sa letan. Me pli tar, Zezi i ganny plizyer demi frer. Zot apel Zak, Zozef, Simon ek Zida. Zozef ek Mari i osi ganny bann fiy, bann demi ser Zezi. Alor Zezi i annan omwen sis pti frer ek ser.

Byensir, Zezi i annan lezot fanmir ankor. Nou’n deza koz lo Elizabet ek son garson Zan. Zot reste ase lwen dan sid, dan en rezyon ki apel Zide. I osi annan Salome ki reste pa tro lwen Galile. Li aparaman i ser Mari e alor i tantin Zezi. Salome i madanm Zebede. Zot de garson ki apel Zak ek Zan i kouzen Zezi. Nou pa konnen si Zezi in pas bokou letan avek zot ler zot pe grandi, me pli tar zot vin pros ler zot vin son zapot.

Zozef ki en sarpantye i bezwen travay dir pour siport son fanmir ki pe kontinyen agrandi. Zozef i elve Zezi konmsi i son prop garson, sanmenm sa Zezi i ganny apele “garson sa sarpantye.” (Matye 13:55) Zozef i montre Zezi ki mannyer pour fer travay sarpantye e Zezi i aprann byen. Anfet, pli tar dimoun i dir sa lo Zezi: “Li menm li sa sarpantye.”​—Mark 6:3.

Zozef i fer sir ki ladorasyon Zeova i pas avan tou keksoz dan zot lavi fanmir. Zozef ek Mari i swiv Lalwa Bondye e enstri zot zanfan lo bann keksoz spirityel ‘ler zot dan lakour, ler zot pe marse lo semen, ler zot pe al dormi e ler zot reveye.’ (Deterononm 6:6-9) I annan en sinagog Nazaret. Nou kapab asire ki Zozef i regilyerman anmenn son fanmir laba pour ador Zeova. Pli tar, i ti ganny ekrir ki “zour Saba, parey son labitid,” Zezi ti al sinagog. (Lik 4:16) Fanmir Zozef ti osi kontan vwayaz ase souvan pour al kot tanp Zeova, Zerizalenm.