Zen

Bann ansenyan i devret demontre lentere personnel dan zot etidyan. Vwar zot konman en fitir frer oubyen ser. I pa fasil pour zot kit zot bann zanmi ki zot annan dan lemonn e pour fer bann sanzman ki neseser pour servi Zeova. Bann bon ansenyan i entrodwi zot bann etidyan avek lezot dan kongregasyon ki kapab annan en bon lenfliyans lo zot. Ler zot pas letan avek pep Bondye, sa bann frer ek ser i kapab ed zot pour vin pli bon zanmi avek Zeova e ankouraz zot ler zot annan problenm. Nou anvi ki tou sa bann ki pe etidye i santi ki zot form parti kongregasyon ek nou fanmir spirityel. Nou anvi ki zot ganny atire par sa lanmour ki i annan antre nou. Koumsa i pou pli fasil pour zot aret frekant bann dimoun ki pa ed zot pour kontan Zeova. (Prov. 13:20) Si zot bann zanmi avan i rezet zot, zot pou konnen ki zot kapab annan bann bon zanmi dan lorganizasyon Zeova.​—Mark 10:29, 30; 1 Pyer 4:4. w20.10 17 ¶10-11

Nou bezwen vin zanmi avek Zezi si nou anvi annan en bon relasyon avek Zeova. Akoz sa? Annou vwar zis de rezon. Premyerman, Zezi ti dir son bann disip: “Mon Papa li menm i kontan zot parski zot kontan mwan.” (Zan 16:27) I ti osi dir: “Napa personn ki ariv kot mon Papa san pas par mwan.” (Zan 14:6) Si ou esey vin zanmi Zeova san batir en bon lanmitye avek Zezi, i parey ou pe esey antre dan en batiman san pas par laport. Zezi ti servi en legzanp parey ler i ti dir ki i “laport pour bann mouton.” (Zan 10:7) En lot rezon i akoz Zezi ti imit bann kalite son Papa parfetman. I ti dir avek son bann disip: “Sa ki’n vwar mwan, i’n vwar mon Papa osi.” (Zan 14:9) Alor, en fason enportan pour aprann konn Zeova i ler nou aprann konn Zezi. Pli nou aprann konsernan Zezi, pli nou pou kontan li. Osi, anmezir nou lanmitye avek Zezi i vin pli for, pli nou pou kontan son Papa. w20.04 21 ¶5-6

Eski ou lo en lili oubyen ou dan en wiltyer? Eski ou annan problenm zenou oubyen ou pa vwar byen kler? Si wi, eski ou kapab servi Zeova ansanm avek bann ki zenn e an bonn sante? Definitivman ou kapab! Bokou frer ek ser ki pli aze e ki lasante pa tro bon, pe tay lo sa semen ki anmenn ver lavi. Zot pa kapab fer sa travay avek zot prop lafors. O kontrer, zot depan lo lafors Zeova, par swiv bann renyon Kretyen par telefonn oubyen atraver bann video ki’n ganny rikorde. Zot partisip dan sa travay pour fer disip par anons sa bon nouvel avek bann dokter, ners e zot fanmir. Si ou pa kapab fer tou keksoz ki ou anvi pour Zeova, pa bezwen dekouraze e mazinen ki ou pa pou kapab andire ziska lafen. Zeova i kontan ou pour lafwa ki ou’n demontre dan li ek tou sa bann keksoz ki ou’n fer pour li dan lepase. Ou bezwen son led la konmela plis ki zanmen oparavan e i pa pou abandonn ou. (Ps. 9:10) O kontrer i pou vin pli pros avek ou. w20.04 29 ¶16-17

Ki size ou kapab diskit lo la avek en dimoun ki relizye? Esey trouv bann keksoz ki sa dimoun i krwar ladan e ki ou osi ou krwar ladan. I kapab ki i ador zis en Bondye, i kapab rekonnet Zezi konman sa enn ki’n sov limanite oubyen i kapab krwar ki nou pe viv dan en letan kot i annan bokou keksoz mal e ki byento sa pou fini. Servi sa bann keksoz ki zot tou le de zot krwar ladan pour montre li sa ki Labib i dir. Gard antet ki petet dimoun pa krwar tou sa ki zot larelizyon i ansennyen. Menm apre ki ou’n konn son larelizyon, esey trouve ki sa dimoun i krwar ladan. En frer ki en misyonner Larzantin i fer remarke ki serten dimoun i dir ki zot krwar dan Trinite me zot pa krwar ki Papa, Garson e lespri sen i en sel Bondye. I dir: “Ler mon rapel ki sa dimoun pa krwar tou sa ki son larelizyon i ansennyen, i fer li pli fasil pour trouv en keksoz ki sa dimoun i krwar ladan e ki mwan osi mon krwar ladan.” Alor, esey rode ki dimoun i vreman krwar ladan. Parey Pol, ou kapab “vin tou, pour tou sort kalite dimoun.”​—1 Kor. 9:19-22. w20.04 10 ¶9-10

Danyel ek Zan ti dir ki Zeova ek Zezi pou sov zot bann serviter pandan gran ladetres. Alor nou kapab reste kalm malgre nenport kwa ki arive. Danyel i dir ki non bann ki pou sirviv pou “ganny ekri dan liv.” Ki nou kapab fer pour nou non ganny ekrir dan sa liv? Nou bezwen montre ki nou annan lafwa dan Zezi, sa Pti Mouton Bondye. (Zan 1:29) Nou bezwen dedye nou lavi avek Bondye e batize. (1 Pyer 3:21) Osi, nou bezwen montre ki nou siport Rwayonm Bondye par ed lezot aprann konn Zeova. La i sa letan pour ranforsi nou konfyans dan Zeova e dan nou bann frer ek ser ki form parti son lorganizasyon. La i sa moman pour nou siport Rwayonm Bondye. Si nou fer sa, nou pou ganny sove ler lerwa nor ek lerwa sid i ganny detrir par Rwayonm Bondye. w20.05 16 ¶18-19

Adan ek Ev ti konnen ki non Bondye i Zeova e zot ti osi konn bokou keksoz enportan lo li. Par egzanp, zot ti konnen ki Zeova i zot Kreater, ki i’n donn zot lavi, en zoli landrwa pour reste ek en konzwen parfe. (Zen. 1:26-28; 2:18) Me eski zot ti pou kontinyen servi zot lespri parfe pour medit lo tou sa ki Zeova in fer pour zot? Eski zot ti pou kontinyen ranforsi zot lanmour ek lapresyasyon pour Zeova? Larepons ti vin evidan ler lennmi Bondye ti teste zot. Satan ti servi en serpan pour koz avek Ev e i ti demann li: “Eski Bondye in vreman dir: Ou pa devre manz tou bann fri lo bann pye ki dan zarden?” (Zen. 2:16, 17; 3:1) Dan sa kestyon ki Satan ti demande, i ti annan en mansonz ki ti fer Ev konmans mazin dan en move fason lo Bondye. An realite, Bondye ti’n dir ki zot kapab manz fri dan tou pye dibwa eksepte enn. (Zen. 2:9) Alor, sa kestyon ki Satan ti demande ti donn Ev lenpresyon ki Bondye pa ti zenere. Ev ti’n kapab mazinen, ‘Eski Bondye pe priv mwan en bon keksoz?’ w20.06 3-4 ¶8-9

Serten serviter Zeova in ankoler akoz sa ki en frer oubyen en ser in fer. Zapot Pol ti rekonnet ki parfwa nou kapab annan “rezon pour konplent akoz” en frer oubyen ser. I kapab ki nou’n menm ganny trete dan en fason enzis. Si nou pa fer atansyon, nou kapab gard rankin. Ler nou ankoler e nou gard rankin, sa i kapab fer en dimoun elwannyen avek pep Zeova. Pablo ki reste Sid Lanmerik ti ganny akize konmkwa in fer en keksoz mal. Menm si i ti inosan, bann ansyen ti krwar ki i koupab e alor i ti perdi son privilez ki i ti annan dan kongregasyon. Ki mannyer i ti reakte? Pablo i dir: “Mon ti ankoler e gradyelman mon ti elwannyen avek kongregasyon.” En dimoun ki’n komet en pese grav dan lepase, i kapab santi li koupab pour en kantite letan. I kapab santi ki Bondye pa kapab kontan li ankor. Menm si i’n repantir e ganny pardonnen, i kapab santi ki i nepli diny pour form parti pep Bondye. Ki mannyer ou santi anver bann frer ek ser ki pe fer fas avek sa bann kalite sityasyon? w20.06 19 ¶6-7

Nou devret aprann pour idantifye bann sityasyon ki kapab fer nou ditor e evit zot. (Ebre 5:14) Par egzanp, nou bezwen swazir nou rekreasyon ek divertisman byen. Bann progranm televizyon ek film i souvan montre bann aksyon imoral. Nou evit sa bann kalite divertisman parski i kapab afeblir nou lanmour pour Zeova. Nou konnen ki Zeova pa kontan sa bann kalite konportman e bann dimoun ki fer bann keksoz imoral i fer zot lekor ek lezot dimoun ditor. (Efe. 5:5, 6) Nou osi devret idantifye bann danze ki bann lenformasyon sorti kot bann aposta i kapab anmennen ler zot esey fer nou annan dout lo nou bann frer ek ser ek lorganizasyon Zeova. (1 Tim. 4:1, 7; 2 Tim. 2:16) Sa bann fo lenformasyon i kapab afebli nou lafwa. Nou devret evite krwar dan sa bann fo zistwar. Akoz? Parski i “bann move dimoun ki’n abandonn laverite” ki fann sa bann rimer. Zot anvi “zis argimante e fer deba.” (1 Tim. 6:4, 5) Zot anvi ki nou krwar zot bann mansonz e aret annan konfyans dan nou bann frer ek ser. w20.09 29 ¶13, 15

En msye ek son madanm i devret tret kanmarad avek lanmour ek respe. (Efe. 5:33) Labib i ansenny nou pour konsantre lo donnen olye lo resevwar. (Akt 20:35) Ki kalite ki pou ed en koup marye pour demontre lanmour ek respe? Zot bezwen annan limilite. Bann koup Kretyen ki demontre limilite i pli ere dan zot lavi maryaz. Par egzanp, en msye ki apel Steven i dir: “Ou avek ou konzwen zot bezwen travay ansanm sirtou ler i annan problenm. Olye mazinen ‘kwa ki pli bon pour mwan?’ ou pou mazinen ‘kwa ki pli bon pour nou?’” Son madanm, Stephanie i santi parey. I dir: “Personn pa anvi viv avek en dimoun ki toultan pe argimant avek li. Ler nou ganny problenm, nou esey rode akoz nou’n ganny sa problenm. Apre sa, nou priye, fer resers e koz lo ki mannyer nou kapab rezourd sa problenm. Nou esey rezourd sa problenm e pa lager avek kanmarad.” Bann msye ek madanm pou pli ere si zot pa annan en tro gran lopinyon lo zot prop lekor. w20.07 3-4 ¶5-6

Ler ou pe servi Zeova, pa depan lo ou prop lafors ek abilite. Zapot Pol ti byen edike. I ti’n ganny ansennyen par Gamalyel, en sef larelizyon Zwif ki ti ganny byen respekte sa letan. (Akt 5:34; 22:3) Osi, pour en serten letan, Pol ti annan en gran lenfliyans parmi bann Zwif. (Akt 26:4) Me kantmenm sa, Pol pa ti depan lo son prop lekor. Pol ti kontan pour kit deryer bann keksoz ki ti fer li paret enportan pour lezot. (Fili. 3:8) Pol ti pas dan en kantite problenm akoz i ti vin Kretyen. Son prop pep ti ay li. (Akt 23:12-14) Osi, bann Romen, ki ti annan menm sitwayennte avek li, ti bat li e met li dan prizon. (Akt 16:19-24, 37) Pol ti osi realize ki i ti enparfe e ki i vreman difisil pour fer sa ki byen. (Rom. 7:21-25) Me dan plas les son prop lenperfeksyon oubyen bann ki ti opoz li, anpes li kontinyen swiv Kris, Pol ti dir: “Mon kontan ler mon feb.” Akoz Pol ti dir sa? Parski ler i ti feb, i lanmenm ler ki i ti vwar lafason Bondye ti ed li.​—2 Kor. 4:7; 12:10. w20.07 16 ¶7-8

Ozordi, nou vreman bezwen konsantre lo anons sa bon nouvel Rwayonm. Zezi ti dir ki apre son lanmor, son bann disip ti pou kontinyen anons sa bon nouvel e zot ti pou fer plis ki sa ki li i ti fer ler i ti ankor vivan. Apre ki Zezi ti’n resisite, i ti fer en mirak pour ed son bann disip atrap en kantite pwason. Zezi ti servi sa lokazyon pour fer son bann disip konpran ki sa travay predikasyon i pli enportan ki okenn lezot travay. (Zan 21:15-17) Zis avan Zezi ti al dan lesyel, i ti dir son bann disip ki sa travay predikasyon ki i ti’n konmans fer, ti pou ganny fer dan lezot landrwa an deor Izrael. (Akt 1:6-8) Plizyer lannen pli tar, Zezi ti fer zapot Zan vwar en vizyon. Dan sa vizyon, Zan ti vwar ki i ti pou arive “pandan zour Senyer.” Zan ti vwar en lanz ki “ti annan en bon nouvel eternel pour anonse . . . avek tou nasyon, tribi, langaz ek pep.” (Rev. 1:10; 14:6) I kler alor ki i lavolonte Zeova ozordi ki nou partisip dan sa travay predikasyon ki pe ganny fer partou dan lemonn ziska ki sa travay i fini. w20.09 9 ¶5

I ti annan problenm dan fanmir Abraam. Sara, son madanm ki i ti vreman kontan, pa ti kapab fer zanfan. Pour plizyer lannen, zot ti vreman sagren akoz sa. En zour, Sara ti donn Abraam son servant ki ti apel Agar, pour Abraam fer zanfan avek li e sa zanfan ti pou vin pour Abraam ek Sara. Me ler Agar ti ansent pour ganny Ismael, i ti konmans ay Sara. Sa sityasyon ti vin sitan difisil ki Sara ti fer problenm avek Agar e Agar ti ale. (Zen. 16:1-6) Finalman, Sara ti ansent e i ti ganny en garson ki Abraam ti apel Izaak. Abraam ti kontan son de garson. Me vi ki Ismael pa ti tret Izaak byen, Abraam ti bezwen fer Ismael ek Agar ale. (Zen. 21:9-14) Plizyer lannen pli tar, Zeova ti demann Abraam pour ofer Izaak konman en sakrifis. (Zen. 22:1, 2; Ebr. 11:17-19) Tou le de fwa, Abraam ti bezwen annan konfyans ki Zeova ti pou gard son promes konsernan son bann garson. w20.08 4 ¶9-10

Imazin sa lazwa ki bann ki’n resisite pou santi anmezir ki zot fer bann sanzman pour obei Bondye e viv dapre Son bann standar. Bann ki fer sa bann sanzman pou ganny lavi eternel. De lot kote, Bondye pa pou permet bann ki refize sanze pour fer dezord dan Paradi. (Iza. 65:20; Zan 5:28, 29) Ler Rwayonm Bondye pou diriz later, pep Bondye pou vwar ki sa parol dan Proverb 10:22 (NWT) i vre. Sa verse i dir: “Benediksyon Zeova i fer en dimoun ris e Bondye pa azout okenn douler avek sa benediksyon.” Avek led lespri sen Zeova, pep Bondye pou vin ris spirityelman, setadir zot pou vin deplizanpli parey Kris e avek letan, zot pou vin parfe. (Zan 13:15-17; Efe. 4:23) Osi, de zour an zour zot lekor pou vin pli for e zot pou vin bann pli bon dimoun. Pa lavi pou gou sa letan!​—Zob 33:25. w20.08 17 ¶11-12

Nou devret rapel ki serten frer ek ser in deside pour pa marye. Lezot Kretyen selibater ti a kontan marye me zot pa ankor zwenn sa dimoun ki zot ti a kontan marye avek. I kapab ki i annan lezot ankor ki’n perdi zot konzwen dan lanmor. Nenport rezon ki en Kretyen i annan, eski i byen pour lezot dan kongregasyon demann en Kretyen selibater akoz i pa ankor marye oubyen pour ofer pour ed li trouv en konzwen? Si en frer oubyen ser selibater pa’n demann led, ki mannyer i kapab santi si en dimoun i ofer pour ed li trouv en konzwen? (1 Tim. 5:13) Annou vwar sa ki serten frer ek ser selibater in dir lo sa size. Nou bann frer ek ser selibater pou vreman kontan si nou apresye zot pour zot bann zoli kalite e pa pran lapenn pour zot akoz zot selibater. Olye pran lapenn pour zot, nou devret apresye zot fidelite. Sa pou fer ki nou bann fer ek ser selibater pa pou zanmen santi ki nou pe dir avek zot: “Mon pa bezwen ou.” (1 Kor. 12:21) O kontrer, zot pou konnen ki nou annan respe pour zot e ki nou apresye ki zot la, dan kongregasyon. w20.08 29 ¶10, 14

Pli tar, Zezi ti aparet avek zapot Pol. (1 Kor. 15:8) Pol (Sol) ti pe al Damas ler i ti tann lavwa Zezi, i ti ganny en vizyon e i ti vwar Zezi dan lesyel. (Akt 9:3-5) Leksperyans Pol i donn plis laprev ki Zezi ti vreman resisite. (Akt 26:12-15) Sa ki Pol ti dir konsernan Zezi ti pou enteres serten dimoun parski avan ki Zezi ti aparet avek Pol, Pol ti persekit bann Kretyen. Apre ki Pol ti’n konvenki ki Zezi ti’n resisite, Pol ti travay dir pour konvenk lezot osi. Anmezir ki Pol ti anonse ki Zezi ti’n mor e resisite, i ti ganny bate, ganny met dan prizon e eksperyans nofraz. (1 Kor. 15:9-11; 2 Kor. 11:23-27) Pol ti sitan asire ki Zezi ti’n ganny resisite ki i ti pare pour mor pour defann son krwayans. Pa leksperyans bann Kretyen dan premye syek i konvenk ou ki Zezi ti vreman ganny resisite? Pa sa i osi ranforsi ou lafwa ki bann dimoun mor pou resisite? w20.12 3 ¶8-10

Petet nou kapab demann nou lekor: ‘Eski mon asiste renyon regilyerman?’ Ler nou asiste renyon, nou ganny lafors pour kontinyen servi Zeova e nou ganny lankourazman avek nou bann frer ek ser. (Mat. 11:28) Nou osi kapab demann nou lekor: ‘Eski mon etidye Labib regilyerman?’ Si ou reste avek ou fanmir, eski ou fer ladorasyon fanmir tou le semenn? Oubyen eski ou fer ladorasyon fanmir menm si ou reste ou tousel? Osi, eski ou fer ou mye pour partisip dan sa travay predikasyon otan ki posib? Akoz nou devret demann nou lekor sa bann kestyon? Labib i dir nou ki Zeova i egzamin nou panse e sa ki dan nou leker, alor nou osi nou devret fer parey. (1 Kron. 28:9, NWT) Si nou vwar ki nou bezwen fer bann sanzman dan nou lobzektif, nou fason panse oubyen latitid, nou devret demann Zeova pour ed nou fer sa bann sanzman. Nou bezwen prepar nou depi la konmela pour nou kapab fer fas avek bann problenm ki nou pou gannyen a lavenir. w20.09 19 ¶19-20

Zezi ti servi en legzanp pour eksplike ki en dimoun i bezwen fer si i anvi vin son disip. I ti koz konsernan en dimoun ki anvi konstri en lakaz ek en lerwa ki anvi al lager. Zezi ti dir ki sa dimoun ki oule konstri sa lakaz i bezwen “premyerman asize e kalkile konbyen i pou kout li” e sa lerwa i bezwen “premyerman asize e rod konsey” pour li konnen si son larme pou kapab al lager. (Lik 14:27-32) Pareyman, Zezi ti konnen ki en dimoun ki anvi vin son disip i devret reflesir byen lo ki i bezwen fer pour li kapab swiv Zezi. I pour sa rezon ki nou bezwen ankouraz nou bann etidyan Labib pour etidye Labib avek nou tou le semenn. Konman sa ansenyan, ou bezwen prepar byen avan sak letid Labib. Avek ou etidyan antet, medit lo ki mannyer ou kapab eksplik sa lenformasyon dan en fason senp e kler pour ki sa etidyan i kapab konpran e aplik li.​—Nee. 8:8; Prov. 15:28a. w20.10 7 ¶5; 8 ¶7

Bann lenstriksyon ki Zezi ti donnen i kler. Nou devret ansenny dimoun bann keksoz ki Zezi in donn lord pour ansennyen. Par kont, nou pa devret oubliy en detay enportan. Zezi pa ti dir: ‘Ansenny zot tou sa ki mon’n donn zot lord pour fer.’ O kontrer, i ti dir: Ansenny zot “pour obei tou sa ki mon’n donn zot lord pour fer.” Pour obei lenstriksyon Zezi, nou bezwen ansenny nou etidyan Labib sa ki i pou fer e nou osi bezwen montre li ki mannyer pour fer li. (Akt 8:31) Ki mannyer nou kapab ansenny en dimoun pour obei lord Zezi? Ler nou etidye Labib avek lezot, nou ansenny zot sa ki Bondye i ekspekte avek nou. Me nou devret fer plis ki sa. Nou devret ansenny nou bann etidyan Labib pour aplik sa ki zot in aprann, dan zot lavi toulezour. (Zan 14:15; 1 Zan 2:3) Atraver nou legzanp, nou kapab montre nou bann etidyan ki mannyer zot kapab aplik sa bann laverite ki zot pe aprann dan Labib ler zot kot lekol, kot travay oubyen dan bann moman detant. Ler nou avek nou etidyan, nou kapab priye e demann Zeova pour ed li avek Son lespri sen.​—Zan 16:13. w20.11 2-3 ¶3-5

Bann disip Zezi ti fer fas avek plizyer problenm. Par egzanp, i ti napa bokou kopi Lekritir. Bann disip ti napa bann piblikasyon ki eksplik Labib, parey nou annan ozordi. Zot ti bezwen anons sa bon nouvel avek dimoun ki koz diferan langaz. Malgre tou sa bann problenm, sa bann disip devoue ti fer en keksoz ki ti paret enposib pour fer. Dan apepre 30 an, zot ti’n anons sa bon nouvel “avek dimoun partou lo later.” (Kol. 1:6, 23) Dan nou letan, Zeova i ankor pe diriz son pep e i pe donn zot lafors ki zot bezwen pour fer son lavolonte. I prensipalman servi Labib ki’n ganny ekrir avek led lespri sen, pour gid son pep. Dan Labib, nou lir konsernan minister Zezi ek sa lord ki i ti donn son bann disip pour kontinyen sa travay ki i’n konmanse. (Mat. 28:19, 20) Zeova pa fer lapreferans. I ti predir ki sa bon nouvel pou ganny anonse “avek tou nasyon, tribi, langaz ek pep.” (Rev. 14:6, 7) I anvi ki tou dimoun i tann sa mesaz Rwayonm. w20.10 21 ¶6-8

Lerwa David ti kontan “lalwa [Zeova].” (Ps. 1:1-3) David ti konnen ki Zeova i sov bann ki annan limilite me i opoz bann ki arogan. Alor David ti les lalwa Bondye sanz son fason panse. I ti ekri: “Mon loue [Zeova] ki konsey mwan. Mon konsyans i gid mwan, menm dan lannwit.” (Ps. 16:7) Si nou annan limilite, nou pou les Parol Bondye sanz nou bann move panse avan ki nou fer bann move aksyon. Parol Bondye pou parey en lavwa ki dir nou: “La semen; swiv li.” I pou averti nou si nou konmans fer en keksoz mal. (Iza. 30:21) Ler nou ekout Zeova nou ganny bokou byenfe. (Iza. 48:17) Par egzanp, nou pa pou anbarase akoz en lot dimoun i bezwen koriz nou. Osi, nou pou vin pli pros avek Zeova akoz i pran swen avek nou parey en papa ki kontan nou.​—Ebr. 12:7. w20.11 20 ¶6-7

I kapab ki serten dimoun Korent ti annan menm fason panse. (1 Kor. 15:12) I kapab osi ki serten ti panse ki rezireksyon pa ti en keksoz ki vre. O kontrer, zot ti krwar ki dimoun ti ganny konsidere “mor” parski zot fer pese e ki ler en dimoun i vin en Kretyen i vin “vivan” parski son pese in ganny pardonnen. Nenport rezon akoz zot pa ti krwar dan rezireksyon, sa ti vedir ki zot lafwa ti anven. Si Bondye pa ti’n resisit Zezi, i ti pou napa okenn ranson ki ti pou’n ganny peye e i ti pou napa personn ki son pese ti pou ganny pardonnen. Alor, bann ki pa ti krwar dan rezireksyon ti napa en vre lespwar. (1 Kor. 15:13-19; Ebr. 9:12, 14) Zapot Pol ti konn tre byen ki Kris ti’n ganny resisite. Rezireksyon Zezi ti pli siperyer ki bann lezot rezireksyon ki’n arive avan parski sa bann dimoun ki ti ganny resisite ti mor pli tar. Pol ti dir ki “parmi bann ki’n mor, Kris in ganny resisite premye.” Zezi ti premye dimoun pour ganny resisite konman en lespri e i ti premye parmi bann imen pour ganny resisite pour al dan lesyel.​—1 Kor. 15:20; Akt 26:23; 1 Pyer 3:18, 22. w20.12 5 ¶11-12

Dan premye syek, konsey direkter Zerizalenm ti travay ansanm pour ki pep Bondye i reste organize e anpe. (Akt 2:42) Par egzanp, apepre lannen 49, bann Kretyen ti annan diferan lopinyon konsernan si tou dimoun ti bezwen ganny sirkonsi pour kapab servi Zeova. Anba gidans lespri sen, konsey direkter ti diskit lo sa sityasyon. Si kongregasyon ti reste divize lo sa sityasyon, zot pa ti pou kapab kontinyen fer predikasyon. Menm si bann zapot ek bann ansyen ti Zwif, zot pa ti les zot ganny enfliyanse par bann tradisyon Zwif oubyen par bann ki ti pe ansenny sa bann tradisyon. O kontrer, zot ti fer resers dan Parol Bondye e demann led lespri sen pour zot kapab fer sa bon desizyon. (Akt 15:1, 2, 5-20, 28) Ki ti rezilta? Zeova ti beni zot desizyon. I ti annan lape ek linite dan kongregasyon e sa travay predikasyon ti kontinyen. (Akt 15:30, 31; 16:5) Dan nou letan, lorganizasyon Zeova in travay dir pour fer sir ki pep Bondye i reste organize e anpe. w20.10 22-23 ¶11-12

I annan plizyer rezon akoz petet nou pa kapab ganny en serten privilez dan servis Zeova. Par egzanp, i kapab ki nou annan problenm lasante, nou tro vye oubyen i annan lezot rezon. Si nou dan en sityasyon parey, nou kapab aprann avek legzanp Lerwa David. David ti vreman anvi konstri tanp Bondye me Zeova ti swazir en lot dimoun pour konstri tanp. David ti donn tou son sipor sa enn ki Zeova ti’n swazir. I ti kontribye en kantite lor ek larzan pour sa proze. David i vreman en bon legzanp pour nou! (2 Sam. 7:12, 13; 1 Kron. 29:3-5) En frer Lafrans ki apel Hugues, ti aret servi konman en ansyen akoz problenm lasante. I pa ti ni menm kapab fer bann senp pti louvraz kot son lakour. I dir: “O konmansman, mon ti santi ki mon pa vo nanryen e mon ti vreman dekouraze. Me apre en serten letan, mon ti vwar ki i ti vreman enportan pour mwan aret sagren akoz bann keksoz ki mon ti nepli kapab fer e mon ti trouv lazwa dan sa ki mon kapab fer dan servis Zeova. Zis parey Gideonn ek son trwa san zonm ki ti byen fatige, mwan osi mon pou kontinyen lalit!”​—Ziz 8:4. w20.12 25 ¶14-15

Dan sa liv ki zapot Zan ti ekri lo lavi Zezi, i ti servi sa mo “lanmour” ek “kontan” plis fwa ki dan sa trwa lezot Levanzil ansanm. Son bann liv dan Labib i montre ki tou sa ki nou fer, nou devret fer avek lanmour. (1 Zan 4:10, 11) Me i ti pran letan pour Zan aprann sa leson. Ler Zan ti ankor zenn, pa toultan ki i ti demontre lanmour. Par egzanp, en zour Zezi ek son bann disip ti pe al Zerizalenm e zot ti pas par Samari. Bann dimoun dan en pti lavil Samari pa ti demontre lospitalite anver zot. Zan ek son frer Zak ti demann Zezi si zot kapab fer dife sorti dan lesyel pour vin detri tou dimoun dan sa vilaz! (Lik 9:52-56) En lot fwa, i kapab ki Zan ek son frer Zak ti dir zot manman demann Zezi pour donn zot bann plas enportan akote li dan Rwayonm. Ler lezot zapot ti tann sa ki Zak ek Zan ti’n fer, zot ti vreman ankoler! (Mat. 20:20, 21, 24) Me menm si Zan ti’n fer tou sa bann fot, Zezi ti kontan li.​—Zan 21:7. w21.01 8-9 ¶3-4

Zeova i fer bann desizyon ki benefisye lezot. Par egzanp, i ti deside kree lavi pa pour son prop byenfe me i ti anvi ki nou osi nou rezouir lavi. Personn pa ti pou kapab fors Zeova pour li anvoy son Garson pour mor pour nou pese. I ti fer sa parski i ti anvi ed nou. Zezi osi ti fer bann desizyon ki ti ed lezot. Par egzanp, ler i ti vreman fatige olye repoze i ti ansenny en lafoul dimoun. (Mark 6:31-34) En bon sef fanmir i konnen ki i difisil pour pran bann bon desizyon pour son fanmir e i pran sa responsabilite o serye. I evite pran bann desizyon san en bon rezon oubyen baze lo lafason ki i pe santi a sa moman. O kontrer i les Zeova montre li ki mannyer pour pran bann bon desizyon. (Prov. 2:6, 7, NWT) Dan sa fason, i met lentere lezot avan sa ki pour li. (Fili. 2:4) Si en msye i fer son mye pour swiv legzanp Zeova ek Zezi, i pou vin en bon sef fanmir. w21.02 7 ¶19-21

Lerwa Aza ti annan limilite ek kouraz ler i ti ankor zenn. Par egzanp, apre lanmor son papa, Aza ti vin lerwa e i ti konmans retir bann zidol dan pei. I ti osi “ordonn bann zabitan Zida pour servi [Zeova], Bondye zot bann zanset, e obei son bann komannman e pratik son lalwa.” (2 Kron. 14:1-7) Ler Zera ansanm avek en milyon solda Etyopyen ti atak Zida, Aza ti demontre lasazes par demann Zeova led. I ti dir: “O Zeova, pour ou i pa enportan si sa ki ou pe ede i for oubyen i fay. Ed nou O Zeova nou Bondye akoz nou pe kont lo ou.” Sa bann zoli parol i montre ki Aza ti asire ki Zeova i kapab sov zot. Aza ti annan konfyans dan Zeova e “Zeova ti ganny laviktwar lo bann Etyopyen.” (2 Kron. 14:8-12, NWT) Aza ti vreman per ler sa larme en milyon solda ti vin lager avek li. Me vi ki i ti depan lo Zeova, Aza ti reisi fer fas avek sa larme. w21.03 5 ¶12-13

Labib i koz lo bann imen enparfe ki ti demontre tandres ek lafeksyon. Annou vwar legzanp Zonatan ek David. Labib i dir: “Zonatan ek David ti vin bon zanmi e Zonatan ti konmans kontan li parey son prop lekor.” (1 Sam. 18:1, NWT) Zeova ti’n swazir David pour vin lerwa apre Sail. Apre sa, Sail ti konmans zalou David e i ti esey touy li. Me Zonatan garson Sail pa ti siport son papa ler Sail ti esey touy David. Zonatan ek David ti promet pour reste zanmi e pour toultan siport kanmarad. (1 Sam. 20:42) Sa tandres ek lafeksyon ki Zonatan ek David ti demontre anver kanmarad ti remarkab parski i ti annan plizyer keksoz ki ti’n kapab anpes zot vin zanmi. Par egzanp, Zonatan ti apepre 30 an pli vye ki David. Zonatan ti’n kapab mazinen ki i pa ti pou kapab vin zanmi avek en dimoun ki bokou pli zenn ki li e mwen eksperyanse ki li. Me Zonatan pa ti mazin koumsa. I pa ti krwar ki David ti pli enferyer ki li, o kontrer i ti annan bokou respe pour David. w21.01 21-22 ¶6-7

Zezi ti promet son bann disip ki zot pou vreman ere. I ti osi averti tou bann ki kontan li ki zot pou fer fas avek problenm. (Mat. 10:22, 23; Lik 6:20-23) Nou kontan ki nou bann disip Kris. Me ki mannyer nou ti pou santi si nou fanmir i esey anpes nou servi Zeova, si gouvernman i persekit nou oubyen si nou bann koleg travay ouswa kanmarad lekol i esey fer nou fer en keksoz mal? Ler nou mazin sa bann keksoz, sa i kapab fer nou enkyet. Normalman, dimoun pa vwar persekisyon konman en rezon pour zwaye. Me sanmenm sa ki Parol Bondye i dir nou fer. Par egzanp, disip Zak ti ekri ki nou devret zwaye olye enkyet ler nou pas dan leprev. (Zak 1:2, 12) Zezi ti dir ki nou devret ere menm ler nou ganny persekite. (Mat. 5:11) Zeova ti enspir Zak pour ekri en let pour sa bann Kretyen, pour donn zot konsey pratik ki pou ed zot reste zwaye malgre leprev. w21.02 26 ¶1-2; 27 ¶5

Serten Kretyen dan letan Timote pa ti apresye sa privilez ki zot ti annan pour travay ansanm avek Bondye. Sa ti enkli Demas, Fizel, Ermozenn, Imene, Aleksann ek Filet. (1 Tim. 1:19, 20; 2 Tim. 1:15; 2:16-18; 4:10) Tou sa bann dimoun ti kontan Zeova me apre zot ti aret krwar ki sa bann keksoz ki Zeova ti’n donn zot, i presye. Ki mannyer Satan i esey fer nou kit sa trezor ki Zeova in konfye nou? Annou vwar serten taktik ki Satan i servi. I servi bann divertisman ek medya pour fer nou mazin e azir dan en fason ki pou fer nou dousman dousman aret kontan Zeova oubyen aret obei son bann lalwa. I esey fer nou per persekisyon oubyen sa ki lezot dimoun i dir lo nou, pour nou aret anons sa bon nouvel. I osi esey fer nou ekout parol bann aposta ki “swadizan ganny apele ‘konnesans’” pour li kapab fer nou kit laverite. Si nou pa fer atansyon, nou kapab dousman dousman kit laverite.​—1 Tim. 6:21. w20.09 27 ¶6-8

Eski en zanmi ouswa en manm fanmir in bles ou? Si wi, ou pou ganny bann byenfe ler ou etidye sa resi konsernan Absalonm, garson Lerwa David. (2 Sam. 15:5-14, 31; 18:6-14) Avek sa resi antet, dir Zeova ki mannyer ou santi konsernan lafason ki sa dimoun in tret ou. (Ps. 6:6-8) Apre, imazin lafason ki Lerwa David ti’n bezwen santi ler tousala ti pe arive avek li. I ti kontan Absalonm e i ti annan konfyans dan Aitofel. Me tou le de ti’n trai li. Zot ti fer David vreman sagren e zot ti menm esey touy li. David ti’n kapab krwar ki son bann lezot zanmi ti dan kote Absalonm e sa ti’n kapab fer li aret annan konfyans dan zot. David ti’n kapab mazin zis son prop lekor e esey kit pei li tousel. Ouswa i ti’n kapab les sa sityasyon dekouraz li. O kontrer, i ti priy Zeova e demann li led. I ti osi demann led avek son bann zanmi e i pa ti tarde pour fer sa ki i ti’n deside. I ti kontinyen annan konfyans dan Zeova e dan son bann zanmi. w21.03 15 ¶7-8; 17 ¶10-11