Apros avek Bondye

“Ou’n revel li avek bann zanfan”

Eski ou ti a kontan konn laverite lo Bondye? Ou ti a kontan konnen lekel li, kwa ki i kontan, e ki son lavolonte? Zeova i dir nou tou laverite lo li dan son Parol, Labib. Me pa nenport ki dimoun ki lir Labib ki kapab konpran laverite lo Bondye. Akoz? Parski i en privilez pour konpran laverite lo Bondye, en privilez ki pa tou dimoun ki gannyen. Annou gete ki Zezi ti dir lo sa size.​—Lir Matye 11:25.

Sa verse i konmans avek sa parol: “Pandan sa letan, Zezi ti dir.” Sa ki Zezi ti pe al dir i annan pour fer avek en keksoz ki ti’n arive avan. I ti’n fek fini repros bann dimoun sorti dan trwa lavil Galile ki pa ti oule krwar dan sa ki i ti dir menm apre tou sa bann mirak ki i ti’n fer. (Matye 11:20-24) Petet ou kapab pe demande, ‘Ki mannyer sa bann dimoun pa ti krwar dan sa ki Zezi ti ansennyen apre tou sa bann mirak ki i ti’n fer?’ Zot pa ti krwar akoz zot ti annan en move latitid.​—Matye 13:10-15.

Zezi ti konnen ki pour konpran laverite ki dan Labib, nou bezwen de keksoz: Led Bondye ek en bon latitid. Zezi ti eksplike: “Mon remersi ou Papa, Senyer lesyel ek later, akoz ou’n kasyet avek bann dimoun malen e entelizan tou sa bann keksoz, me ou’n revel li avek bann zanfan.” Eski ou vwar akoz i en privilez pour konpran laverite lo Bondye ki dan Labib? Zeova i annan sa drwa pour kasyet oubyen revel laverite avek sa ki i oule akoz i “Senyer lesyel ek later.” Zeova i donn sans tou dimoun pour konn laverite lo li. Me ki kriter i servi pour revel laverite lo li?

Zeova pa kontan bann dimoun ki orgeye, i plito kontan bann ki annan limilite oubyen ki pare pour abes zot lekor. (Zak 4:6) I kasyet laverite avek “bann malen ek bann entelizan,” setadir bann dimoun ki pli konnen dapre sa lemonn e ki zot lafyerte ek lentelizans i fer zot krwar ki zot pa bezwen okenn led sorti kot li. (1 Korentyen 1:19-21) Me i revel laverite avek “bann zanfan,” setadir bann ki vin kot li avek sa bon latitid parey en zanfan i fer. (Matye 18:1-4; 1 Korentyen 1:26-28) Zezi, Garson Bondye, ti konn sa de group dimoun. Bokou parmi bann sef relizye ki ti annan bokou ledikasyon pa ti konpran mesaz Zezi, me bann senp peser ti konpran. (Matye 4:18-22; 23:1-5; Akt 4:13) An menm tan, serten bann dimoun ris e byen edike ki ti demontre vre limilite ti vin bann disip Zezi.​—Lik 19:1, 2, 8; Akt 22:1-3.

Sa i fer nou retourn lo sa kestyon ki nou ti poze o konmansman: Eski ou ti a kontan konn laverite lo Bondye? Si wi, ou kapab vwar li rekonfortan pour konnen ki Bondye pa kontan bann dimoun ki malen dapre sa lemonn. O kontrer, i kontan bann ki lemonn i konsider bet. Si ou etidye Parol Bondye avek sa bon leta lespri, ou pou parmi sa bann ki Bondye i donn sa kado presye: En bon konprenezon lo lekel li vreman. Ler ou konpran sa laverite, ou lavi pou ganny en vre bi la konmela menm, e ou pou “ganny vre lavi,” lavi eternel dan nouvo lemonn ki Bondye in promet.a​—1 Timote 6:12, 19; 2 Pyer 3:13.

Pandan mwan zanvye ou kapab lir

Matye 1-21

[Not anba lo paz]