Kestyon lekter

Eski i apropriye pour en paran Kretyen asiz o bor son zanfan ekskli pandan renyon kongregasyon?

▪ Napa okenn rezon pour tro konsernen avek landrwa ki en dimoun ekskli i asize dan Lasal Rwayonm. Sa magazin in fer bokou zefor pour ankouraz bann paran Kretyen pour ed zot zanfan ekskli spirityelman ki ankor pe reste avek zot si i apropriye pour fer li. Parey i’n ganny endike dan Latour Veyer le 15 Novanm 1988 paz 19 ek 20 an Angle, paran i menm kapab etidye Labib avek en zanfan ekskli ki anba laz e ki pe reste avek zot. I fer sa avek lespwar ki sa zanfan pou resevwar lankourazman neseser pour li sanze.

An sa ki konsern kote pour asize dan Lasal Rwayonm, i pou paret pli rezonnab pour sa zenn ekskli asiz o bor son paran trankilman. Vi ki i pa en lareg ki en dimoun ekskli i devret asiz deryer dan Lasal, alor i pa mal pour en zanfan ekskli asiz o bor son paran, nenport landrwa. Lefet ki paran i enterese avek spirityalite zot zanfan, zot pou anvi fer sir ki i benefisye plennman avek renyon. Olye les sa zanfan asiz en lot landrwa san sipervizyon, i pou pli bon pour sa zanfan asiz o bor zot.

Me, si sa zanfan ekskli nepli reste avek son paran? Eski sa sirkonstans i fer en diferans? Dan lepase, Latour Veyer ti montre klerman sa pli bon latitid ki en Kretyen i merit fer zefor pour annan an sa ki konsern asosye avek en manm fanmir ki’n ganny ekskli e ki pa reste avek zot.a Par kont, sityasyon kot en dimoun ekskli i asiz trankilman o bor son fanmir pandan renyon i diferan avek ler son fanmir i frekant li kan i pa neseser. Si lezot manm fanmir fidel i annan sa bon latitid anver zot fanmir ki ekskli e zot fer zefor pour obeir konsey Labib konsernan asosye avek li, i pou napa okenn rezon pour tro konsernen avek sa sityasyon.​—1 Kor. 5:11, 13; 2 Zan 11.

Alor, kongregasyon pa devret vwar li en problenm si en dimoun ekskli i asiz o bor son fanmir ouswa lezot dimoun dan Lasal Rwayonm. Depandan lo sirkonstans, i riske kre problenm si en limit i ganny etablir konsernan kote en dimoun ekskli i devret asize. Si tou dimoun ki la, enkli fanmir i fer bokou zefor pour respekte prensip Labib an rapor avek en dimoun ekskli, e i pa en keksoz ki pou fer lezot tonbe, napa okenn rezon pour fer problenm konsernan kote sa bann ki asiste i asize pandan renyon.b

[Not anba lo paz]