Zot pa ti oule salye

ESKI ou mazin sa trwa zenn garson? Wi, zot bann zanmi Danyel ki ti refize manz bann manze ki pa ti bon pour zot. Bann Babilonnyen ti apel zot Sadrak, Mesak ek Abednego. Me get zot aprezan. Akoz zot pa pe salye sa gran stati parey lezot dimoun? Annou vwar.

Eski ou mazin sa bann lalwa ki Zeova limenm ti ekrir ki ti apel 10 Komannman? Premye dan sa bann komannman ti sa: ‘Ou pa devret ador okenn lezot bondye apard ki mwan.’ Sadrak, Mesak ek Abednego ti pe obei sa lalwa, menm si i pa ti en keksoz fasil pour fer.

Neboukadnetsar, lerwa Babilonn, ti apel en kantite dimoun enportan pour vin ador sa stati ki i ti’n fer. I ti’n fek fini dir avek bann dimoun: ‘Kan zot antann son bann tronpet, bann laarp ek lezot lenstriman, zot devret salye e ador sa stati annor. Okenn dimoun ki pa salye e ador sa stati pou osito ganny zete dan en four dife.’

Kan Neboukadnetsar ti aprann ki Sadrak, Mesak ek Abednego pa ti’n salye sa stati, i ti vreman ankoler. I ti fer anmenn zot kot li. I ti donn zot en lot sans pour salye sa stati. Me sa bann zenn garson ti met zot konfyans dan Zeova. ‘Nou Bondye ki nou servi i kapab sov nou,’ zot ti dir avek Neboukadnetsar. ‘Menm si i pa sov nou, nou pa pou salye ou stati annor.’

Neboukadnetsar ti vin pli ankoler. Ti annan en four pre lanmenm, alor i ti donn sa lord: ‘Sof sa four 7 fwa plis ki i ete!’ Apre i ti fer bann zonm ki ti pli for dan son larme anmar Sadrak, Mesak ek Abednego e zet zot dan four. Sa four ti telman so ki laflanm ti touy sa bann zonm for. Me ki ti arive avek sa trwa zenn garson?

Lerwa ti get dan four e i ti vreman per. ‘Pa nou’n anmar trwa zonm e zet zot dan four?’ i ti demande.

‘Wi, se sanmenm sa ki nou’n fer,’ son bann serviter ti reponn.

‘Me mon vwar kat zonm pe marse dan milye dife,’ i ti dir. ‘Zot nepli anmare, e dife pa pe bril zot. E sa enn katriyenm i parey en bondye.’ Lerwa ti avans pli pre avek laport four e kriye: ‘Sadrak! Mesak! ek Abednego! Sorti, zot serviter Bondye Tre O!’

Kan zot ti sorti, tou dimoun ti vwar ki zot pa ti’n ganny okenn blesir. Apre lerwa ti dir: ‘Beni Bondye Sadrak, Mesak ek Abednego! I’n anvoy son lanz e i’n sov zot parski zot pa salye e ador okenn bondye eksepte zot Bondye.’

Eski sa pa i en bon legzanp fidelite anver Zeova pour nou swiv?