Ki Lespwar i annan pour bann Dimoun mor?

“Si en dimoun i mor, eski i kapab reviv ankor?” Zob ti demann sa kestyon byen lontan pase. (Zob 14:14, King James Version) Petet ou osi ou’n demann ou lekor sa menm kestyon. Konman ou pou santi ou si ou ti konnen ki i pou posib retrouv bann dimoun ki’n mor isi lo later dan en bon kondisyon?

Labib i fer sa promes: “Ou bann mor pou reviv. . . . Zot pou leve.” Labib i osi dir: “Bann dimoun drwat pou posed later, e zot pou reste lo la pour touzour.”—Izai 26:19; Psonm 37:29.

Pour nou kapab ganny konfyans dan bann tel promes, nou bezwen ganny larepons sa bann kestyon: Akoz dimoun i mor? Kote bann dimoun mor i ete? Ki mannyer nou asire ki zot pou viv ankor?

Lanmor, e ki i arive ler nou mor

Labib i fer kler ki Bondye pa ti kree dimoun pour mor. Kan i ti kree sa de premye dimoun, Adan ek Ev, i ti met zot dan en paradi lo later ki ti apel Edenn. I ti donn zot lord pour fer zanfan e agrandi sa Paradi lo later antye. Selman si zot ti dezobei lord Bondye ki zot ti pou mor.—Zenez 1:28; 2:15-17.

Adan ek Ev ti dezobei akoz zot ti mank lapresyasyon pour labonte Bondye, e zot ti bezwen sibir konsekans. Bondye ti dir Adan: “Ou [pou] retourn dan sirfas later, parski ladan menm ki ou ti sorti. Parski ou lapousyer e ou pou retourn an lapousyer.” (Zenez 3:19) Avan Adan ti ganny kree i pa ti egziste; i ti lapousyer. Akoz son dezobeisans, oubyen pese, Adan ti ganny kondannen pour retourn lapousyer, en leta kot i nepli egziste.

Lanmor i alor en kondisyon kot napa lavi. Labib i fer resorti diferans ant sa de keksoz: “Rekonpans pour pese i lanmor, me don gratwit ki Bondye i donnen i lavi eternel.” (Romen 6:23, nou ki’n met an italik.) Pour montre ki lanmor i en leta kot en dimoun i pa konsyan nanryen, Labib i dir: “Annefe bann vivan i konnen ki zot pou mor, me bann mor, zot pa konn nanryen ditou.” (Eklezyast 9:5) Labib i eksplike ki kan en dimoun i mor: “Son lespri i sorti, i retourn dan son sirfas later, sanmenm sa zour son bann panse i disparet.”—Psonm 146:3, 4.

Me vi ki zis Adan ek Ev ki ti dezobei sa lord an Edenn, akoz nou tou nou mor? Se akoz nou tou nou’n ne apre dezobeisans Adan, e alor nou’n erit pese ek lanmor avek li. Parey Labib i eksplike: “Pese in antre dan lemonn par en sel zonm [Adan], e pese in anmenn lanmor, e lanmor in pas avek tou dimoun.”—Romen 5:12; Zob 14:4.

Me en dimoun i kapab demande: ‘Eski dimoun pa i annan en nanm imortel ki kontinyen viv apre lanmor?’ Bokou dimoun i ansenny sa e zot menm dir ki lanmor i en laport ki ouver pour al dan en lot lavi. Me sa lide pa sorti dan Labib. Okontrer, Parol Bondye i ansennyen ki ou en nanm, ki ou nanm i ou menm, avek tou ou bann kalite fizik e mantal. (Zenez 2:7; Zeremi 2:34; Proverb 2:10) Labib i osi dir: “Sa nanm ki pe fer pese, li menm li ki pou mor.” (Ezekyel 18:4) Napa okenn landrwa dan Labib ki dir ki dimoun i annan en nanm imortel ki kit lekor e kontinyen viv apre lanmor.

Konman Dimoun i kapab reviv

Apre ki pese ek lanmor in aparet lo later, Bondye ti fer dimoun konnen ki i son plan ki bann dimoun mor i reganny lavi ankor par mwayen rezireksyon. Se pour sa rezon Labib i eksplike: “Abraam . . . ti mazin dan limenm ki Bondye i annan sa pouvwar pour resisit [son garson Izaak].” (Ebre 11:17-19) Abraam ti annan rezon met konfyans dan Bondye, akoz Labib i dir konsernan Tou Pwisan: “I pa en Bondye dimoun mor, me dimoun vivan; akoz pour li tou i vivan.”—Lik 20:37, 38.

Wi, Bondye Tou Pwisan napa selman pouvwar me osi dezir pour resisit tou sa ki i swazir. Zezi Kri li menm ti dir: “Pa bezwen etonnen ler mon dir sa, akoz sa ler pe arive kan tou bann mor ki dan tonbo pou tann son lavwa, e zot pou sorti dan zot tonbo.”—Zan 5:28, 29; Akt 24:15.

Pa lontan apre ki Zezi ti dir sa, i ti rankontre en laprosesyon lanterman sorti dan lavil Nain. Sa zenn garson ki ti’n mor ti sel zanfan en vev. Ler Zezi ti vwar soufrans sa madanm i ti ranpli avek pitye. Alor i ti donn lord sa kadav an dizan: “Zenn-onm, mon dir ou, leve!” Sa zennonm ti asize, e Zezi ti rann li avek son manman.—Lik 7:11-17.

Parey avek leka sa vev, ti annan gran lazwa kan Zezi ti vizit lakaz Zairis, en prezidan sinagog Zwif. Son pti fiy douz an ti’n mor. Me ler Zezi ti ariv kot Zairis, i ti al obor sa zanfan mor e i ti dir: “Pti fiy, leve!” I ti leve!—Lik 8:40-56.

Plitar, Lazar zanmi Zezi ti mor. Ler Zezi ti ariv kot Lazar, Lazar ti deza annan kat zour depi ki i ti’n mor. Menm si son ser Mart ti tre tris, i ti eksprim son lespwar dan rezireksyon, an dizan: “Mon konnen ki i pou resisite zour larezireksyon [dernyen zour].” Me Zezi ti al kot tonbo, i ti donn lord pour retir sa ros ki ti bous tonbo, e i ti kriye: “Lazar, sorti!” I ti sorti!—Zan 11:11-44.

Annou reflesir en moman: Dan ki kondisyon Lazar ti ete pandan sa kat zour ki i ti’n mor? I pa ti dir nanryen konsernan en lavi ere dan lesyel oubyen en lavi tourmante dan lanfer, ki i ti pou’n san dout rakonte si i ti’n al laba. Non, Lazar pa ti konsyan nanryen dan lanmor, e i ti pou reste koumsa ziska “larezireksyon [dernyen zour]” si Zezi pa ti resisit li.

I vre ki sa bann mirak Zezi ti selman bann byenfe tanporer, vi ki tou sa ki i ti resisite ti bezwen mor ankor. Me i ti donn laprev 1,900 zan pase ki avek pouvwar Bondye, dimoun mor i kapab reviv! Alor par son bann mirak, Zezi ti demontre ki rezireksyon pou arive lo later anba Rwayonm Bondye.

Kan en Dimoun i mor

Kan sa lennmi, lanmor i arive, ou kapab sagren en kantite, menm si ou annan lespwar dan rezireksyon. Abraam ti annan lafwa ki son madanm pou reviv ankor, e pourtan nou lir ki Abraam ti plere pour Sara. (Zenez 23:2) Ki ti reaksyon Zezi? Kan Lazar ti mor, Zezi ti “touse e i ti emosyonnen,” apre i “ti plere.” (Zan 11:33, 35) Alor i pa en febles pour plere ler en dimoun i mor.

I vreman fer mal pour en manman ler son zanfan i mor. Labib i rekonnet sa profon sagrinasyon ki en manman i kapab resanti kan i perdi en zanfan. (2 Rwa. 4:27) Byensir, i difisil osi pour en papa ki’n perdi son zanfan. Lerwa David ti dir kan son garson Absalonm ti mor: “Ar wi, akoz mon pa ti mor dan ou plas.”—2 Samyel 18:33.

Me akoz ou annan konfyans dan rezireksyon, ou sagrinasyon pa pou kontinyen. Parey Labib i dir, ou pa pou “sagren parey bann ki napa lesperans.” (1 Tesalonisyen 4:13) Okontrer, ou pou vin pli pre avek Bondye par lapriyer, e Labib i promet ki “i pou soutenir ou.”—Psonm 55:22.