Prezerv lape dan ou lakour

 1. Nonm serten keksoz ki kapab kree divizyon dan bann fanmiy.

BANN ki viv dan en fanmiy kot i annan lanmour, konprenezon, ek lape i ere. Nou swete ki ou fanmiy i koumsa. Malerezman, en gran mazorite fanmiy pa koresponn avek sa deskripsyon e zot divize pour en rezon ou en lot. Kwa ki diviz bann lakour? Dan sa sapit, nou pou diskit trwa keksoz. Dan serten fanmiy, pa tou dimoun ki partaz menm krwayans relizye. Dan lezot fanmiy, bann zanfan i kapab napa menm paran. Dan lezot ankor, difikilte pour ganny zot lavi oubyen dezir pour plis keksoz materyel i paret pe separ bann manm fanmiy. Me bann sitiasyon ki kapab diviz en lakour i kapab pa afekte en lot. Kwa ki fer sa diferans?

 2. Kote ki serten i rod gidans pour lavi fanmiy, me ki pli bon sours pour en tel gidans?

² Premyerman, lafason ki bann dimoun dan en fanmiy i vwar keksoz i enportan. Si ou senserman esey konpran pwennvi sa lot dimoun, ou pou pli byen konnen ki mannyer pour prezerv linite dan en lakour. En dezyenm keksoz ki enportan se sours ou gidans. Bokou dimoun i swiv konsey bann koleg travay, vwazen, bann editer zournal, oubyen lezot gidans imen. Parkont, serten in dekouver ki Parol Bondye i dir konsernan zot sitiasyon, e apre zot in aplik sa ki zot in aprann. Ki mannyer aplik konsey Labib, i ed en fanmiy pour gard lape dan en lakour?​—2 Timote 3:16, 17.

 3. (a) Ki konsey Labib i donnen konsernan marye avek en dimoun ki dan en lot larelizyon? (b) Nonm serten prensip debaz ki aplikab si ou en Kretyen e ou msye ouswa madanm marye i pa enn.

³ Labib i byen konsey nou pour pa marye avek en dimoun ki dan en lot larelizyon. (Deterononm 7:3, 4; 1 Korentyen 7:39) Me kekfwa ler ou ti aprann laverite dan Labib ou ti’n deza marye e ou mari pa’n enterese pour aprann laverite. Ki ou pou fer dan sa ka? Byensir, ou ve maryaz i reste valid. (1 Korentyen 7:10) Labib i fer resorti ki linyon maryaz i permanan e i ankouraz bann dimoun ki’n marye pour rezourd zot diferans olye ki sov sa sitiasyon. (Efezyen 5:28-31; Tit 2:4, 5) Me si ou mari i severman opoz sa larelizyon ki Labib i ankouraz ou pour pratike? Petet i esey anpes ou al bann renyon kongregasyon, oubyen i kapab dir ki i pa anvi son madanm al port-an-port, pour koz lo larelizyon. Ki ou pou fer?

 4. Dan ki fason en madanm i kapab montre ki i konpran santiman son mari, ki pa partaz menm lafwa avek li?

⁴ Demann ou lekor, ‘Akoz mon mari i reazir koumsa?’ (Proverb 16:20, 23) Si i pa vreman konpran ki ou pe fer, i kapab pe enkyet pour ou. Oubyen petet i anba presyon son fanmiy akoz ou nepli partisip dan serten koutim ki enportan pour zot. En mari ti dir: “Mon santi konmsi mon’n ganny abandonnen ler mon tousel dan lakaz.” Sa zonm ti santi ki en larelizyon ti pe pran son madanm avek li. Me lorgey ti pe anpes li admet ki i ti santi li tousel. Petet ou bezwen reasir ou mari ki ou lanmour pour Zeova pa vedir ki aprezan ou kontan li mwens ki avan. Fer sir ki ou pas letan avek li.

 5. Ki balans en madanm ki son mari i dan en lot larelizyon i devret garde?

⁵ Me i annan en keksoz pli enportan ki ou devret konsidere si ou anvi byen fer fas avek sa sitiasyon. Parol Bondye i enplor bann madanm: “Soumet zot avek zot mari parey i devre devan Senyer.” (Kolosyen 3:18) Savedir, i averti bann madanm pour pa devlop en leta lespri lendepandans. Deplis, par dir “parey i devre devan Senyer,” sa verse i endike ki en madanm i devret pran an konsiderasyon soumisyon anver Senyer ler i pe soumet avek son mari. Fodre i annan balans.

 6. Ki bann prensip ki en madanm Kretyen i devret gard antet?

⁶ Pour en Kretyen, asiste bann renyon kongregasyon e rann temwannyaz avek lezot konsernan son lafwa ki baze lo Labib, i bann laspe enportan vre ladorasyon ki pa devret ganny neglize. (Romen 10:9, 10, 14; Ebre 10:24, 25) Ki ou pou fer, alor, si en imen i demann ou pour pa fer serten keksoz ki Bondye i ekspekte ou fer? Bann zapot Zezi Kri ti deklare: “Nou devre obei Bondye plito ki zonm.” (Akt 5:29) Zot legzanp i fourni en model ki aplikab pour bokou sitiasyon dan lavi. Eski lanmour pour Zeova pou pous ou pour donn li sa latasman ki i merit gannyen? Anmenmtan, eski ou lanmour ek respe pour ou mari pou fer ou esey fer sa dan en fason ki ou mari pou aksepte?​—Matye 4:10; 1 Zan 5:3.

 7. Ki determinasyon en madanm Kretyen i devret annan?

⁷ Zezi ti fer resorti ki sa pa pou toultan posib. I ti averti ki akoz lopozisyon kont vre ladorasyon, bann ki Kretyen dan serten fanmiy pou santi zot separe avek lezot, konmsi en lepe in vin ant zot ek leres manm fanmiy. (Matye 10:34-36) Se sa ki ti arive avek en madanm Zaponnen. Son mari ti opoz li pour 11 an. I ti maltret li severman e tanzantan tak laport pour anpes li antre. Me i ti persevere. Bann zanmi dan kongregasyon Kretyen ti ed li. I ti priye toultan e tir bokou lankourazman dan 1 Pyer 2:20. Sa madanm Kretyen ti konvenki ki si i reste ferm, en zour son mari pou zwenn li pour servi Zeova. Finalman, se sanmenm sa ki son mari ti fer.

8, 9. Konman ki en madanm i devret azir pour evite met bann lobstak ki pa neseser devan son mari?

⁸ I annan en kantite keksoz pratik ki ou kapab fer pour fer lefe lo latitid ou mari. Par egzanp, si ou mari i obzekte ou larelizyon, fer tou sa ki ou kapab pour ki i pa ganny rezon valab pour konplent dan lezot domenn. Gard lakour prop. Pran swen avek ou laparans fizik. Eksprim libreman ou lanmour ek lapresyasyon pour li. Olye kritik li, siport li. Montre ki ou konsider li konman sef. Pa revanze si ou santi ki ou’n ganny trete dan en fason enzis. (1 Pyer 2:21, 23) Gard antet ki imen i enparfe, e si en dispit i leve, avek limilite pran sa premye pa pour demann leskiz.​—Efezyen 4:26.

⁹ Vi ki ou asiste bann renyon, pa les sa vin en rezon pour ou prepar son manze tar. Parler, ou kapab swazir pour partisip dan predikasyon ler ou mari pa kot lakour. I byen pour en madanm Kretyen evite pres avek son mari kan i pa moman apropriye pour son mari. Plito, swiv konsey zapot Pyer: “Zot bann madanm, soumet sakenn avek son msye, pour ki, par zot kondwit, si serten parmi zot msye pa obei parol Bondye, zot a kapab kanmenm aksepte lafwa san laparol. Sa bann zonm i a war ki zot kondwi zot dan en fason drwat e avek respe.” (1 Pyer 3:1, 2) Bann madanm Kretyen i fer zefor pour demontre bann fri lespri Bondye pli plennman.​—Galat 5:22, 23.

10. Ki mannyer en mari Kretyen i devret azir anver son madanm, ki napa menm krwayans avek li?

¹⁰ Me si sa mari i Kretyen e sa madanm non? Labib i donn gidans lo bann sitiasyon koumsa. I dir: “Si en frer i annan en madanm ki pa krwaryan e ki dakor kontinyen viv avek li i pa devre divors li.” (1 Korentyen 7:12) I osi konsey bann mari: “Kontan zot madanm e pa tret zot dir.”​—Kolosyen 3:19.

11. Ki mannyer en mari i kapab montre disernman e egzers son lotorite lo son madanm avek en bon zizman si i dan en lot larelizyon?

¹¹ Si ou madanm pa partaz menm krwayans relizye avek ou, fer byen atansyon pour montre respe pour ou madanm e konsiderasyon pour son santiman. Konman en adilt, i merit en serten liberte pour pratik son krwayans relizye, menm si ou pa dakor avek sa bann krwayans. Pa ekspekte li pour rezet bann krwayans ki i annan depi lontan pour swazir en nouvo keksoz, omoman ki ou koz avek li lo ou lafwa. Olye ki direkteman dir ki koutim relizye ki li ek son fanmiy in seri depi lontan i fo, avek pasyans esey rezonn avek li par servi Labib. I kapab santi li ganny neglize si ou dedye bokou letan avek bann aktivite kongregasyon. I kapab opoz ou bann zefor pour servi Zeova, zis akoz i anvi fer ou konnen ki i bezwen plis ou letan! Annan pasyans. Ou konsiderasyon ranpli avek lanmour, i kapab ed li avek letan pour aksepte vre ladorasyon.​—Kolosyen 3:12-14; 1 Pyer 3:8, 9.

12. Menm si en mari ek son madanm i annan diferan krwayans relizye, konman bann prensip Labib i devret ganny aplike dan formasyon zot zanfan?

¹² Dan en lakour kot i annan diferan larelizyon, lenstriksyon relizye pour bann zanfan i parfwa vin en problenm. Ki mannyer bann prensip Labib i devret ganny aplike? Labib i donn en papa sa rol prensipal pour enstri bann zanfan, me en manman i osi annan en rol enportan pour zwe. (Proverb 1:8; vwar Zenez 18:19; Deterononm 11:18, 19.) Menm si sa papa pa aksepte lotorite Kris, i touzour sef fanmiy.

13, 14. Ki en madanm i kapab fer si son mari i defann li anmenn bann zanfan renyon kongregasyon oubyen etidye avek zot?

¹³ Serten papa ki pa Temwen pa obzekte si sa manman i donn lenstriksyon relizye zot zanfan. I annan lezot papa ki obzekte. Ki ou pou fer si ou mari i refize permet ou anmenn bann zanfan renyon kongregasyon oubyen menm defann ou etidye Labib avek zot kot lakour? La ou bezwen balans detrwa lobligasyon ki ou annan: ou lobligasyon anver Zeova, anver lotorite ou mari, e anver ou bann zanfan ki ou kontan. Ki mannyer ou kapab rekonsilye sa trwa keksoz ansanm?

¹⁴ Definitivman ou bezwen priy konsernan sa problenm. (Filipyen 4:6, 7; 1 Zan 5:14) Me alafen, se ou ki bezwen deside ki desizyon ou pou pran. Si ou azir avek en bon zizman, par fer kler avek ou mari ki ou pa pe refize aksepte son lotorite, dousman dousman i pou kapab aret opoz ou. Menm si ou mari i defann ou anmenn bann zanfan renyon oubyen fer en letid Labib avek zot, ou touzour kapab ansenny zot. Atraver konversasyon ki ou fer avek zot toulezour ek ou bon legzanp, esey ansenny zot pour annan lanmour pour Zeova, lafwa dan son Parol, respe pour zot papa ek manman, lentere ranpli avek lanmour pour lezot dimoun, ek lapresyasyon pour bon labitid travay. Avek letan, sa papa i kapab remark bann bon rezilta e kapab apresye valer ou bann zefor.​—Proverb 23:24.

15. Ki responsabilite en papa Kretyen i annan anver ledikasyon bann zanfan?

¹⁵ Si ou en mari Kretyen e ou madanm i pa en Temwen, alor ou devret pran sa responsabilite pour elve ou zanfan “dan en ledikasyon ek lenstriksyon Senyer.” (Efezyen 6:4) Pandan ki ou pe fer sa, byensir ou devret zantiy, annan lanmour, e rezonnab dan lafason ki ou azir avek ou madanm.

16, 17. Ki prensip Labib ki bann zanfan i devret rapel si zot aksepte en diferan krwayans relizye avek sa ki pour zot paran?

¹⁶ I pa drol konmela pour menm bann zanfan miner swiv bann pwennvi relizye ki diferan avek sa ki pour zot paran. Eski ou’n fer sa? Si wi, Labib i annan konsey pour ou.

¹⁷ Parol Bondye i dir: “Obei zot paran dan Senyer, akoz sa i byen. ‘Respekte zot papa ek zot manman.’” (Efezyen 6:1, 2) Sa i enplik en profon respe pour paran. Toutfwa, menm si i enportan pour obeir paran, i pa devret ganny fer san annan konsiderasyon pour sa vre Bondye. Ler en zanfan in ase gran pour konmans fer son prop desizyon, i vin responsab pour son bann aksyon. Sa i pa aplik zis avek lalwa lotorite me sirtou avek lalwa Bondye. Labib i fer resorti: “Sakenn antre nou pou bezwen rann kont devan Bondye pour son prop lekor.”​—Romen 14:12.

18, 19. Si bann zanfan i annan en larelizyon ki diferan avek sa ki pour zot paran, konman ki zot kapab ed zot paran konpran zot lafwa pli byen?

¹⁸ Si ou krwayans relizye i fer ou fer bann sanzman dan ou lavi, esey konpran pwennvi ou paran. Zot pou pli apresye si, gras a sa bann lansennyman Labib ki ou pe aprann e aplike, ou vin pli respektab, pli obeisan, pli pare pour fer sa ki zot demann ou. Toutfwa, si ou nouvo lafwa i osi fer ou rezet bann krwayans ek koutim ki zot seri, zot kapab santi ki ou pe rezet en leritaz ki zot in donn ou. Petet zot osi annan sa lafreyer pour ou, akoz si sa ki ou pe fer pa tro tro ganny aksepte par lezot dan kominote oubyen si i detourn ou latansyon kont bann aktivite ki zot santi ti pou kapab ed ou prospere materyelman. Lorgey i osi kapab vin en baryer. Annefe, zot kapab santi ki ou pe dir zot ki ou byen e zot zot mal.

¹⁹ Pour sa rezon, esey fer laranzman ki ou paran i rankontre serten ansyen oubyen lezot Temwen matir dan ou kongregasyon osito posib. Ankouraz ou paran pour vizit en Lasal Rwayonm pour antann pour zot menm kwa ki ganny diskite e vwar ki kalite dimoun bann Temwen Zeova i ete. Avek letan, latitid ou paran i kapab sanze. I kapab arive ki paran i opoz konpletman, detrir bann piblikasyon baze lo Labib, e defann bann zanfan asiste bann renyon Kretyen. Me kantmenm sa, bann zanfan i kapab ganny loportinite pour lir dan en lot landrwa, pour koz avek bann konpanyon Kretyen, e pour rann temwannyaz e ed lezot enformelman. Ou osi ou kapab priy Zeova. Serten zenn i bezwen esper ziska ler zot in ase gran pour al viv lo zot tousel avan ki zot kapab fer plis. Me nenport ki sitiasyon ki egziste kot lakour, pa oubliye pour ‘respekte ou papa ek ou manman.’ Fer ou par pour prezerv lape kot lakour. (Romen 12:17, 18) Pli enportan ki tou, rod lape avek Bondye.

20. Ki santiman bann zanfan i kapab annan anver zot boper ouswa belmer?

²⁰ Dan bokou lakour, sitiasyon ki prezant pli gran difikilte se pa diskisyon lo larelizyon, me problenm boper ek belmer. En kantite lakour denozour i konpoze avek bann zanfan ki enn oubyen tou le de paran in annan dan en maryaz presedan. Dan en fanmiy koumsa, bann zanfan i eksperyans zalouzi ek rankin oubyen petet zot pa konnen lekel ki zot pou obeir. Dan sa ka, zot kapab rezet bann zefor senser ki sa boper ouswa sa belmer i fer pour vin en bon papa oubyen manman. Kwa ki kapab ede pour fer en fanmiy ki annan boper ouswa belmer reisi?

21. Kantmenm zot sitiasyon i spesyal, akoz bann boper ek belmer i devret konsider bann prensip Labib pour ganny led?

²¹ Kantmenm sa sitiasyon i spesyal, bann prensip Labib ki fer lezot lakour reisi i osi aplikab dan sa kalite sitiasyon. Petet inyor sa bann prensip i paret soulaz en problenm pour lemoman, me i tre probab ki i pou anmenn en pli gro problenm plitar. (Psonm 127:1; Proverb 29:15) Devlop lasazes ek bon zizman: lasazes pour aplik bann prensip Bondye ki annan bann byenfe dirab, e bon zizman pour idantifye akoz bann manm fanmiy i dir e fer serten keksoz. I osi neseser pour konpran santiman lezot.​—Proverb 16:21; 24:3; 1 Pyer 3:8.

22. Akoz zanfan i kapab vwar li difisil pour aksepte en boper ouswa en belmer?

²² Si ou en belmer ouswa en boper, ou kapab rapel ki petet sa bann zanfan ti byen resevwar ou konman en zanmi pour sa fanmiy. Me petet ler ou ti vin zot boper ouswa zot belmer, zot latitid ti sanze. Par mazin zot manman oubyen papa ki nepli pe viv avek zot, bann zanfan i kapab pe lite akoz zot pa konnen lekel ki zot pou obeir. Petet zot pe santi ki ou anvi pran lafeksyon ki zot annan pour sa papa oubyen manman ki nepli la. Parfwa zot kapab fransman dir ou ki ou pa zot papa oubyen zot manman. Bann remark koumsa i blesant. Me “pa pran lakoler vitman.” (Eklezyast 7:9) Bon zizman ek konprenezon i neseser pour kapab byen fer fas avek santiman bann zanfan.

23. Konman disiplin i kapab ganny donnen dan en fanmiy kot i annan bann zanfan pa menm paran?

²³ Sa bann kalite i tre enportan ler en dimoun pe donn disiplin. I esansyel ki zanfan i ganny disiplinen dan en fason konsistan. (Proverb 6:20; 13:1) Vi ki pa tou zanfan ki parey, disiplin i kapab diferan dan sak ka. Serten boper ouswa belmer i trouve ki i pli bon les sa papa oubyen sa manman okip sa laspe okonmansman. Me i esansyel ki tou le de paran i tonm dakor avek kalite disiplin e mentenir li, san fer lapliferans pour zot prop zanfan. (Proverb 24:23) Lobeisans i enportan, me i neseser pour pran kont lenperfeksyon. Pa egzazere. Disiplin ou zanfan avek lanmour.​—Kolosyen 3:21.

24. Kwa ki kapab ede pour evit bann problenm moralite ant bann manm lot sèks dan en fanmiy kot i annan boper ouswa belmer?

²⁴ Bann diskisyon an fanmiy i kapab ed en kantite pour evit difikilte. Zot kapab ed sa fanmiy pour konsantre lo bann keksoz pli enportan dan lavi. (Vwar Filipyen 1:9-11.) Zot osi kapab ed sak manm fanmiy pour vwar konman ki sakenn i kapab kontribye pour akonpli bann lobzektif familyal. Deplis, bann diskisyon fran an fanmiy i kapab evit bann problenm moralite. Bann fiy i bezwen konpran konman pour sanze e konport zot dan prezans zot boper ek son bann garson, e lezot garson dan sa fanmiy i bezwen konsey lo bon kondwit anver zot belmer ek son bann fiy.​—1 Tesalonisyen 4:3-8.

25. Ki bann kalite ki kapab ede gard lape dan en fanmiy ki annan boper ouswa belmer?

²⁵ Pour kapab byen fer fas avek difikilte ki ou gannyen konman en boper ouswa en belmer, fodre ou annan pasyans. I pran letan pour devlop nouvo relasyon. Pour ganny lanmour ek respe bann zanfan ki pa pour ou i kapab en gro travay. Me i posib. Si ou annan lasazes ek bon zizman, ansanm avek en gran dezir pour fer plezir Zeova, sa pou favoriz lape dan en fanmiy ki annan boper ouswa belmer. (Proverb 16:20) Sa bann kalite i kapab ed ou pour fer fas avek lezot sitiasyon.

26. Konman problenm ek latitid konsernan keksoz materyel i kapab diviz en fanmiy?

²⁶ Bann problenm ek latitid anver keksoz materyel i kapab diviz fanmiy dan plizyer fason. Malerezman, serten fanmiy i ganny divize akoz bann largiman lo larzan ek dezir pour vin ris oubyen en pti pe pli ris. I kapab annan divizyon ler tou le de dimoun ki’n marye i annan en travay e devlop en latitid “mon larzan, ou larzan.” Menm si napa largiman antre zot, ler tou le de i travay zot kapab vwar ki zot napa bokou letan pour kanmarad. En tandans ki pe ogmante dan sa lemonn se ki bann papa i kit zot fanmiy pour en gran peryod letan, swa pour plizyer mwan oubyen menm plizyer lannen pour zot ganny plis larzan dan en lot landrwa. Sa i kree bann problenm tre grav.

27. Ki serten prensip ki kapab ed en fanmiy ki anba presyon finansyel?

²⁷ Vi ki sak fanmiy i annan diferan bezwen e fer fas avek diferan presyon, napa okenn lareg ki’n ganny etablir pour fer fas avek sa bann sitiasyon. Toudmenm, konsey Labib i kapab ede. Par egzanp, Proverb 13:10 i endike ki bann largiman initil i kapab parfwa ganny evite par “konsilte kanmarad.” Sa pa vedir ki en dimoun i zis dir son lopinyon, me i osi rod konsey e konpran pwennvi sa lot dimoun. Deplis, etablir en bidze rezonnab i kapab ede pour inifye zefor sa fanmiy. Parfwa i neseser pour msye ek madanm rod en travay, petet tanporerman, pour kouver bann depans anplis, sirtou ler i annan zanfan oubyen lezot dimoun anba zot responsabilite. Ler sa i leka, sa mari i kapab reasir son madanm ki i ankor annan letan pour li. Avek lanmour, li ansanm avek bann zanfan i kapab ede fer serten travay ki sa madanm i normalman fer li tousel.​—Filipyen 2:1-4.

28. Ki bann rapel ki pou ed en fanmiy travay ver linite letan zot ganny aplike?

²⁸ Toutfwa, gard antet ki menm si larzan i en nesesite dan sa sistenm, i pa anmenn boner. Deplis, i pa donn lavi. (Eklezyast 7:12) Anfet, atas tro bokou lenportans avek bann keksoz materyel i kapab gat nou spirityalite ek moralite. (1 Timote 6:9-12) I pli bon pour rod Rwayonm Bondye premye ek son ladrwatir, avek lasirans ki i pou beni nou zefor pour ganny bann nesesite lavi. (Matye 6:25-33; Ebre 13:5) Par gard bann keksoz spirityel premye e par resers lape premyerman avek Bondye, ou pou kapab remarke ki ou lakour, menm si petet i divize par serten sitiasyon, pou vin enn ki vreman ini dan bann fason pli enportan.