Leson 5

Kisisa Lavolonte Bondye pour Later?

Akoz Zeova ti kree later? (1, 2)

Akoz later i pa en paradi ozordi? (3)

Ki pou arive avek bann move dimoun? (4)

Ki Zezi pou fer byento pour bann dimoun malad, bann dimoun aze e pour bann dimoun mor? (5, 6)

Ki nou bezwen fer pour profit bann benediksyon ki pou vini? (7)

1. Zeova ti kree later pour ki bann imen i viv ere eternelman lo la. I ti oule ki later i touzour abite avek bann dimoun zis e ere. (Psonm 115:16; Izai 45:18) Zanmen later pou ganny detri; i pou touzour egziste.—Psonm 104:5; Eklezyast 1:4.

2. Avan Bondye ti kree zonm, i ti swazir en pti landrwa lo later e i ti fer li vin en zoli paradi. I ti apel sa landrwa zarden Edenn. Se la ki i ti met premye zonm ek premye fanm, Adan ek Ev. Bondye ti oule ki zot ganny bann zanfan e ranpli later antye. Ptit-a-pti, zot ti pou fer later antye vin en paradi.—Zenez 1:28; 2:8, 15.

3. Adan ek Ev ti fer pese ler zot ti volonterman dezobei lalwa Bondye. Alor Zeova ti pous zot an deor zarden Edenn. Paradi ti perdi. (Zenez 3:1-6, 23) Me Zeova pa’n oubliy son premye plan. I’n promet pour ki en zour later i revin en paradi, kot bann imen pou viv pour touzour. Konman Bondye pou fer sa?—Psonm 37:29.

4. Pour ki later i vin en paradi, bann move dimoun i bezwen ganny retire. (Psonm 37:38) Sa pou arive ler Armagedon i vini. Sa i lager kot Bondye pou met en lafen avek tou mesanste. Apre sa, Satan pou ganny anprizonnen pandan 1000 an. Savedir pou napa bann move dimoun ki abim later. Zis bann serviter Bondye ki pou sirviv.—Revelasyon 16:14, 16; 20:1-3.

5. Alor Zezi Kri pou vin Lerwa e diriz later pandan 1000 an. (Revelasyon 20:6) Ptit-a-pti, i pou retir pese dan nou lespri e dan nou lekor. Nou pou vin bann imen parfe, parey Adan ek Ev ti ete avan zot ti fer pese. Alor, pou nepli annan maladi, ni lavyeyes, ni lanmor. Bann dimoun malad pou ganny geri, e bann vye dimoun pou vin zenn ankor.—Zob 33:25; Izai 33:24; Revelasyon 21:3, 4.

6. Pandan sa 1000 an ki Zezi pou dirize, bann imen fidel pou travay pour transform later antye dan en paradi. (Lik 23:43) Anplis, milyon dimoun ki’n mor pou ganny resisite pour viv lo later. (Akt 24:15) Si zot fer lavolonte Bondye, zot pou kapab viv eternelman lo later. Si non, zot pou ganny detri enn fwa pour tou.—Zan 5:28, 29; Revelasyon 20:11-15.

7. Donk, premye plan Bondye pour later pou ganny realize. Eski ou ti a kontan profit sa bann benediksyon ki pou vini? Alor, kontinyen aprann konn Zeova e kontinyen fer sa ki i demann ou. An asistan bann renyon Temwen Zeova dan Lasal Rwayonm i pou ed ou fer sa.—Izai 11:9; Ebre 10:24, 25.

[Portre lo paz 10]

Paradi ti perdi

[Portre lo paz 11]

Apre Armargedon, later pou ganny transformen dan en paradi