En dirizan ki kapab kontrol lanmer ek divan

Ler Zezi i fer mirak pour donn manze plizyer milye dimoun, sa i fer en gran lenpak lo zot. Zot dir: “Li menm sa Profet ki devret vin dan lemonn,” sa Mesi ki pou vin en bon dirizan. (Zan 6:14; Deterononm 18:18) Alor bann dimoun i anvi fer li vin lerwa pardfors.

Me Zezi i realize ki bann dimoun pe mazin fer. Alor i fer lafoul ale, apre i dir son bann disip anbark dan kannot. Kot zot pou ale? Zot sipoze al dan direksyon Betsayda pour al Kapernaoum. Tandis ki li Zezi, i al dan montanny li tousel pour priye aswar.

Dan laklerte lalin avan lizour i fer, Zezi i vwar kannot dan lwen. I annan en gro divan pe soufle, bann laroul pe bat bat lo kannot e bann zapot ‘pe ganny difikilte pour naz zaviron vi ki divan i kont zot.’ (Mark 6:48) Zezi i desann lo montanny e konmans mars lo delo pour al ver zot. Zot in “naz zaviron pour apepre senk a sis kilomet.” (Zan 6:19) Bann disip i vwar Zezi pe pas o bor zot me zot krwar ki i en vizyon. Zot per e zot kriye: “Sa i en vizyon!”​—Mark 6:49.

Pour kalme zot, Zezi i dir: “Pran kouraz! Mwan sa, pa bezwen per.” Me Pyer i dir: “Senyer, si vreman ou sa, donn mwan lord pour mars lo delo pour vin kot ou.” Zezi i reponn li: “Vini!” Alor Pyer i sorti dan kannot e i vreman mars lo delo pour al kot Zezi. Me ler i vwar sa tanpet, Pyer i per e i konmans koule. I kriye: “Senyer, sov mwan!” Zezi i anvoy son lanmen, atrap li e dir li: “Ou ki annan en ptigin lafwa, akoz ou’n doute?”​—Matye 14:27-31.

Pyer ek Zezi i anbark dan bato e divan i kalmi. Bann disip i etonnen. Me eski zot devret sirprann? Si zot ti’n konpran “sinifikasyon mirak ki [Zezi] ti’n fer avek dipen” pli boner son lavey, ler i ti donn plizyer milye dimoun manze, zot pa ti pou’n sirprann ki i kapab mars lo delo e kalmi divan. La aprezan zot tonm azenou devan li e dir: “Ou vreman Garson Bondye.”​—Mark 6:52; Matye 14:33.

I pa pran bokou letan pour zot ariv sid Kapernaoum, dan en landrwa ki apel Zenezaret, en landrwa vreman zoli kot i annan en ta fri ki pouse. Zot met kannot lo mouyaz e zot al lo lans. Bann dimoun i rekonnet Zezi e zot dir lezot dan zalantour. Zot tou zot konmans anmenn bann dimoun malad kot li. Ler sa bann dimoun i tous zis son bout lenz anba, zot konpletman ganny geri.

Antretan, sa lafoul ki ti’n vwar Zezi fer mirak ler i ti donn manze plizyer milye dimoun i realize ki i’n ale. Alor ler bann kannot sorti Tiberyad i ariv dan sa landrwa, bann dimoun i anbarke e al Kapernaoum pour rod Zezi. Ler zot vwar li, zot demann li: “Ansenyan, ki ler ou’n ariv la?” (Zan 6:25) Zezi i reprimann zot. Nou pou vwar akoz apre.