En leson enportan lo limilite

Apre ki bann zapot ti ganny en vizyon kot Zezi ti sanz laparans e apre ki Zezi ti geri en garson ki ti posede par en demon dan rezyon Sezare Filip, i al dan direksyon Kapernaoum. I vwayaz zis avek son bann disip akoz i pa anvi ki lafoul i ‘konnen kot i ete.’ (Mark 9:30) Sa i donn li plis sans pour prepar son bann disip pour son lanmor e pour sa travay ki zot pou fer apre sa. I eksplike: “Garson zonm pou ganny trair par son lennmi, zot pou touy li e trwazyenm zour i pou resisite.”​—Matye 17:22, 23.

Sa pa sipoze en nouvo nide pour son bann disip. Pli boner, Zezi ti’n koz lo lefet ki i pou ganny touye, me Pyer ti’n refize krwar ki sa pou arive. (Matye 16:21, 22) Deplis, trwa zapot ti’n vwar en vizyon kot Zezi ti sanz laparans e tann sa diskisyon konsernan “depar” Zezi. (Lik 9:31) Aprezan, son bann disip i “vreman tris” ler zot tann Zezi dir sa, menm si zot pa vreman konpran tou sa ki i pe dir. (Matye 17:23) Kantmenm sa, zot per pour demann li plis kestyon lo la.

Finalman zot ariv Kapernaoum, sa landrwa prensipal kot i reste diran son minister e kot laplipar son bann zapot i sorti. Laba, bann zonm ki kolekte taks i vin kot Pyer. Petet, zot oule akiz Zezi ki i pa pe pey taks, alor zot demande: “Ou ansenyan pa pey taks tanp li?”​—Matye 17:24.

Pyer i reponn: “Wi i peye li.” Ler i retourn kot lakaz, Zezi i deza konnen ki’n arive. Alor olye esper Pyer dir li, Zezi i demande: “Ki ou panse Simon? Lekel ki pey taks oubyen taks ladwann avek bann lerwa lo later? Zot bann garson oubyen bann etranze?” Pyer i reponn: “Bann etranze.” Alor Zezi i fer sa remark: “Vreman alor, bann garson pa pey okenn taks.”​—Matye 17:25, 26.

Papa Zezi i Lerwa liniver e sa Enn ki zot adore kot tanp. Alor, legalman, Garson Bondye pa bezwen pey taks tanp. Zezi i dir: “Me pour ki dimoun pa koz an mal lo nou, al o bor lanmer, zet ou laliny dan delo e dan labous sa premye pwason ki ou pou krose ou pou vwar en pyes larzan [en stater, lavaler kat drak]. Pran li e pey pour nou de.”​—Matye 17:27.

En pti pe letan apre, bann disip Zezi i zwenn ansanm e zot vin kot Zezi pour demann li lekel ki pou pli gran dan Rwayonm Bondye. Pourtan, pa zot menm ki pa tro bokou letan pase ti per pour demann Zezi konsernan son lanmor? Me la aprezan, zot pa per pour vin demann li kestyon konsernan zot lavenir. Zezi i konnen ki zot pe mazinen. I en keksoz ki zot in deza diskit lo la ler zot ti pe swiv li pour al Kapernaoum. Alor i demann zot: “Ki zot ti pe argimant lo la dan semen?” (Mark 9:33) Bann disip i anbarase alor zot reste trankil akoz zot ti pe diskit pour konnen lekel ki pli gran parmi zot. Finalman bann zapot i demann Zezi sa kestyon ki zot ti pe koz lo la: “Lekel ki pli gran dan Rwayonm lesyel?”​—Matye 18:1.

I enkrwayab ki bann disip pour dispit lo en keksoz koumsa apre ki zot in pas apepre trwa-z-an pe vwar e ekout Zezi. Par kont, zot enparfe e zot in grandi dan en lanvironnman kot bann dimoun relizye i met en kantite lanfaz lo pozisyon ek ran sosyal. An plis, pa tro bokou letan pase, Zezi ti promet pour donn Pyer bann “lakle” Rwayonm. Eski i posib ki i krwar ki i pli siperyer? I kapab ki Zak ek Zan osi i krwar parey, akoz zot ti vwar sa vizyon kot Zezi ti sanz laparans.

Nenport ki rezon ki’n fer zot mazin koumsa, Zezi i servi en legzanp pour koriz zot latitid. I kriy en pti garson, fer li debout parmi zot e dir son bann disip: “Si zot pa sanze e vin parey bann zanfan, zot pa pou zanmen antre dan Rwayonm lesyel. Alor, sa ki abes li parey sa zanfan, se li ki pou pli gran dan Rwayonm lesyel e en dimoun ki resevwar en zanfan parey sa enn akoz mwan se konmsi i resevwar mwan osi.”​—Matye 18:3-5.

Pa sa i en bon fason ansennyen! Zezi pa ankoler avek son bann disip e dir zot ki zot voras oubyen anbisye. O kontrer, i servi legzanp en zanfan pour ansenny zot en leson enportan. Bann zanfan napa en o pozisyon. Alor Zezi i montre bann disip ki zot bezwen devlop sa menm latitid. Finalman Zezi i dir son bann disip: “Sa enn ki konport li parey enn ki pli pti parmi zot tou i sa enn ki pli gran.”​—Lik 9:48.