Azir avek lasazes ler ou mazin lavenir

Sa legzanp garson perdi ki Zezi fek rakonte ti’n devret ed bann kolekter taks, profeser lalwa ek Farizyen pour konpran ki Bondye i pare pour pardonn bann ki repantir. (Lik 15:1-7, 11) Aprezan Zezi i koz avek son bann disip. I servi en lot legzanp, safwasi konsernan en zonm ris ki tande ki son administrater in mal azir.

Zezi i rakonte ki sa administrater in ganny akize konmkwa i gaspiy byen son met. Alor sa met i dir ki sa administrater pou ganny pouse. Sa administrater i dir dan li menm: “Ki mon pou fer la ki mon met pe tir mwan konman administrater? Mon pa ase for pour mwan pyose e mon tro kanmi pour mwan mandyan.” Deswit i apel bann dimoun ki dwa son met e i demann zot: “Konbyen ou dwa mon met?”​—Lik 16:3-5.

Sa enn premye i dir: “2,200 lit delwil zoliv.” I posib ki sa enn ki dwa sa delwil ti annan en gran plantasyon pye zoliv oubyen i ti en marsan ki vann delwil. Sa administrater i dir li: “Pran ou lagreman an ekri, asiz lanmenm e deswit ekri 1,100 lit.”​—Lik 16:6.

Sa administrater i demann en lot dimoun ki dwa son met: “Me ou, konbyen ou dwa?” I reponn: “San bal dible.” Sa i apepre 22,000 lit dible. Sa administrater i dir sa enn: “Pran ou lagreman an ekri e ekri 80.” I tir 20 poursan lo sa ki i dwa.​—Lik 16:7.

Sa administrater i ankor ansarz biznes son met, alor dan en sans i ankor ganny drwa diminyen sa ki lezot i dwa son met. Ler i fer sa, sa administrater pe fer zanmi avek bann ki kapab ed li apre ki i’n perdi son plas travay.

Pli tar, sa met i tande ki’n arive. Menm si i’n perdi larzan, i enpresyonnen avek sa ki sa administrater in fer e i felisit li, akoz “menm si i ti move,” i’n “azir avek lasazes.” Zezi i dir: “Bann zanfan sa lemonn i azir avek plis lasazes anver lezot ki bann zanfan lalimyer.”​—Lik 16:8.

I pa konmsi Zezi i dakor avek sa ki sa administrater in fer e i pa ni pe ankouraz bann dimoun pour fer bann keksoz malonnet dan zot biznes. Alor ki Zezi pe esey dir? I dir son bann disip: “Servi larises sa move lemonn pour fer zanmi, pour ki ler larises i fini, zot bann zanmi pou kapab resevwar zot dan zot landrwa reste eternel.” (Lik 16:9) Leson se ki nou bezwen mazin lavenir e azir avek lasazes. “Bann zanfan lalimyer,” setadir bann serviter Bondye, i bezwen azir avek lasazes dan fason ki zot servi zot byen materyel e montre ki zot pe mazin lavi eternel ki zot pou gannyen a lavenir.

Zis Zeova ek son Garson ki kapab resevwar en dimoun dan Rwayonm lesyel oubyen dan Paradi lo later ler Rwayonm pe dirize. Nou devret fer zefor pour vin zanmi avek Zeova ek son Garson par servi nou bann keksoz materyel pour siport bann lentere Rwayonm. Si nou fer sa, nou kapab asire ki nou pou ganny lavi eternel a lavenir ler lor, larzan ek lezot byen materyel pou’n disparet.

Zezi i osi dir ki bann dimoun ki fidel dan lafason ki zot pran swen oubyen servi nenport larises oubyen keksoz materyel pou osi fidel dan sa ki pli enportan. Alor Zezi i dir: “Si zot pa’n montre zot fidel dan lafason ki zot servi larises sa move lemonn, lekel ki pou konfye zot avek sa ki vre [parey bann lentere Rwayonm]?”​—Lik 16:11.

Zezi pe montre son bann disip ki bokou pou ganny ekspekte avek zot, si zot pou antre dan “landrwa reste eternel.” En dimoun pa kapab en vre serviter Bondye e an menm tan en lesklav larises sa move lemonn. Zezi i fini par dir: “Napa en serviter ki kapab lesklav de met, parski swa i pou ay enn e kontan lot, ouswa i pou atase avek enn e mepriz lot. Ou pa kapab lesklav Bondye ek Larises an menm tan.”​—Lik 16:9, 13.