Kouraz Zeoada

Zezabel ti annan en fiy ki ti apel Atalya ki ti move parey son manman. Atalya ti’n marye avek lerwa Zida. Ler msye Atalya ti mor, son garson ti vin lerwa. Me ler son garson ti mor, Atalya ti pran pouvwar pardfors e konmans diriz Zida. Apre i ti sey touy tou dimoun ki ti dan fanmir rwayal. I ti touy nenport dimoun ki ti kapab pran son plas konman dirizan, enkli son bann pti zanfan. Tou dimoun ti per li.

Granpret Zeoada ek son madanm Zeoseba ti konnen ki sa ki Atalya ti pe fer ti vreman mal. Zot ti riske zot lavi e kasyet en pti zanfan Atalya. Sa ti en pti baba ki apel Zeoas. Zot ti fer li grandi dan tanp.

Ler Zeoas ti annan set an, Zeoada ti rasanble tou bann sef ek Levit e dir zot: ‘Vey laport tanp e pa les personn antre.’ Apre, Zeoada ti fer Zeoas vin lerwa Zida e met en kouronn lo son latet. Bann dimoun Zida ti kriye: ‘Viv lerwa!’

Larenn Atalya ti tann tapaz lafoul e tay kot tanp. Ler i ti vwar sa nouvo lerwa, i ti kriye: “Konplo! Konplo!” Bann sef tanp ti tyonbo sa move larenn e anmenn li pour touy li. Me ki i ti arive avek sa move lenfliyans ki sa larenn ti’n annan lo sa nasyon?

Zeoada ti ed sa nasyon pour fer en lalyans avek Zeova kot zot ti promet pour ador zis Li tousel. Zeoada ti detrir tanp Baal e kraz sa bann zidol. I ti apwent bann pret ek Levit pour travay kot tanp pour ki lepep i kapab ador Zeova laba ankor en fwa. I ti fer bann gardyen vey kot baro tanp pour anpes bann ki ti enpir antre. Apre, Zeoada ek bann sef tanp ti anmenn Zeoas kot pale e met li lo tronn. Bann dimoun Zida ti vreman dan lazwa. Alafendefen zot ti kapab servi Zeova san lenfliyans Atalya ek ladorasyon Baal. Ou remarke ki mannyer kouraz Zeoada ti ed en kantite dimoun?