Zezi i geri dimoun zour Saba

Bann Farizyen pa ti kontan Zezi e zot ti pe rod en fason pour fer li ganny arete. Zot ti dir ki i pa devret geri dimoun malad zour Saba. En zour Saba, Zezi ti vwar en zonm aveg pe mandyan lo semen. I ti dir son bann disip: ‘Get ki mannyer pwisans Bondye pou ed sa zonm.’ Zezi ti melanz son lakras avek en pe later pour fer labou. Apre i ti met sa labou lo lizye sa zonm. Zezi ti dir li: “Al lav ou lizye dan basen Siloam.” Sa zonm ti fer sa e apre, pour premye fwa dan son lavi i ti vwar kler.

Dimoun pa ti oule krwar sa ki ti’n arive. Zot ti dir: ‘Sanmenm sa zonm ki ti abitye asize pe mandyan oubyen en lot dimoun ki parey li?’ Sa zonm ti dir: ‘Mwan menm ki ti’n ne aveg!’ Bann dimoun ti demann li: ‘Me ki mannyer ou vwar kler aprezan?’ Ler sa zonm ti dir zot sa ki ti’n arive, zot ti anmenn li kot bann Farizyen.

Sa zonm ti dir bann Farizyen: ‘Zezi ti met labou lo mon lizye e apre i ti dir mwan al lav mon lizye. Mon ti fer sanmenm e aprezan mon vwar kler.’ Bann Farizyen ti dir: ‘Si Zezi i geri dimoun zour Saba, savedir son pwisans pa sorti kot Bondye.’ Me lezot ti dir: ‘Si son pwisans pa sorti kot Bondye, i pa ti pou kapab geri personn.’

Bann Farizyen ti kriy paran sa zonm e demann zot: ‘Ki mannyer ou garson i kapab vwar kler prezan?’ Son paran ti per akoz bann Farizyen ti’n dir ki si okenn dimoun i annan lafwa dan Zezi, zot pou ganny pouse dan sinagog. Alor zot ti dir: ‘Nou pa konnen. Demann li ou menm.’ Bann Farizyen ti demann sa zonm plis kestyon ankor e finalman i ti dir zot: ‘Mon’n dir zot tou sa ki mon konnen. Akoz zot kontinyen demann mwan kestyon?’ Bann Farizyen ti ankoler e zot ti met li deor.

Zezi ti al rod sa zonm e i ti demann li: ‘Eski ou annan lafwa dan Mesi?’ Sa zonm ti reponn: ‘Mon ti pou annan lafwa dan li si mon ti konnen lekel li.’ Zezi ti dir: ‘Mwan menm Mesi.’ Pa Zezi in fer en bon keksoz? I pa’n zis geri sa zonm me i’n osi ed li pour annan lafwa.