LESON 53

Swazir bann divertisman ki fer plezir Zeova

Edisyon ki enprimen

Zeova i “sa Bondye ki ere.” (1 Timote 1:11) I anvi ki nou osi nou ere e ki nou lavi i gou. I kontan ler nou met en pti letan dekote pour rilaks apre ki nou’n travay. Dan sa leson, nou pou vwar ki mannyer nou kapab servi nou letan detant dan en fason ki gou me an menm tan ki fer plezir Zeova.

1. Ki nou devret mazinen ler nou pe swazir en divertisman?

Ki ou kontan fer ler ou pe rilaks? Serten dimoun i prefere reste kot zot trankilman pe lir en liv, ekout lanmizik, get en film oubyen menm get get en pti kou lo Enternet. Lezot i kontan fer aktivite avek zanmi parey marse, naze oubyen lezot aktivite sport. Nenport kwa ki nou kontan fer, nou bezwen fer sir ki lafason ki nou detann nou i “akseptab pour Senyer.” (Efezyen 5:10) I enportan pour nou konpran sa akoz konmela bokou divertisman i annan pour fer avek bann keksoz ki Zeova i deteste parey vyolans, imoralite seksyel ek bann keksoz demonyak. (Lir Psonm 11:5.) Kwa ki kapab ed nou swazir bann bon divertisman?

Si nou fer zanmi avek bann dimoun ki kontan Zeova, zot pou annan en bon lenfliyans lo nou e lo sa ki nou swazir pour detann nou. Parey nou’n vwar dan en leson avan, “sa enn ki mars avek bann ki saz pou vin saz.” De lot kote, si ou pe frekant bann dimoun ki pa fatig zot avek sa ki Zeova i kontan, ou “pou ganny problenm.”—Proverb 13:20.

2. Akoz i enportan pour annan en kontrol lo lakantite letan ki nou pase pour detann nou?

Menm si napa nanryen mal avek nou divertisman, nou bezwen veye ki nou pa pas tro bokou letan pour detann. Si non, nou pou napa ase letan pour nou fer bann keksoz pli enportan. Labib i ankouraz nou pour “servi byen [nou] letan.”—Lir Efezyen 5:15, 16.

AL PLI O PROFON

Aprann pour byen swazir ou divertisman.

3. Evit bann move divertisman

Akoz ou bezwen byen swazir ou divertisman? Zwe sa VIDEO e apre reponn sa bann kestyon.

VIDEO: Ki divertisman mon pou swazir? (4:39)

Ki mannyer serten divertisman ki ti egziste Ronm i parey serten divertisman ki nou annan ozordi?
Dan sa video, ki Danny ti aprann konsernan divertisman?

Lir Romen 12:9 e apre reponn sa kestyon:

Ki mannyer sa verse i kapab ed ou swazir byen ou bann divertisman?

Ki serten keksoz ki Zeova i deteste? Lir Proverb 6:16, 17 ek Galat 5:19-21. Apre ki ou’n lir sak verse, reponn sa kestyon:

Ki serten keksoz ki’n ganny mansyonnen dan sa bann verse ki popiler dan bann divertisman konmela?

Ki mannyer pour swazir byen ou bann divertisman?

Demann ou lekor:

Kwa sa? Eski i annan keksoz ladan ki Zeova i deteste?
Kan? Eski i pou pran letan ki mon ti abitye fer bann keksoz pli enportan?
Avek ki? Eski i pou fer mwan pas letan pli souvan avek bann dimoun ki pa kontan Zeova?

I byen pour nou reste pli lwen posib ki nou kapab avek danze. Pour sa rezon nou devret reste pli lwen posib avek okenn divertisman ki petet nou santi i kapab pa bon pour nou

En loto ki pros pour fer aksidan dan en semen lo montanny.

4. Servi byen ou letan

Zwe sa VIDEO e apre reponn sa kestyon.

VIDEO: Kwa ki kapab pran tou ou letan? (2:45)

Menm si sa frer dan sa video pa ti pe get nanryen ki pa bon, ki mannyer lafason ki i ti servi son letan lwazir ti afekte li?

Lir Filipyen 1:10 e apre reponn sa kestyon:

Ki mannyer sa verse i kapab ed nou pour desid lakantite letan ki nou detann nou?

5. Swazir byen ou bann divertisman

Zeova pa kontan serten divertisman, me i annan bokou keksoz ki gou ki nou kapab fer. Lir Eklezyas 8:15 ek Filipyen 4:8 e apre reponn sa kestyon:

Ki serten bon keksoz ki ou kontan fer?

Bann portre: Dimoun diferan laz pe detann dan en bon fason. 1. En fiy pe desinen e ekout lanmizik. 2. Trwa garson pe zwe basketball. 3. De garson pe mont bisiklet. 4. En garson pe asanble en zouzou. 5. En msye pe zwe tanbour. 6. En garson pe zwe en zwe video avek son papa. 7. En madanm pe tir portre. — Ou kapab swazir bann bon divertisman

SERTEN DIMOUN I DIR: “Napa nanryen mal pour get bann keksoz ki annan vyolans, imoralite seksyel oubyen keksoz demonyak. Pa mwan ki pe fer sa bann keksoz.”