Rekonfor pour bann ki pe soufer

DIRAN bann syek ki’n pase, plizyer savan ek profeser relizye pa’n kapab konpran akoz Bondye i permet soufrans. Serten in dir ki vi ki Bondye i tou pwisan, i bezwen alor responsab pour soufrans. Ekriven liv The Clementine Homilies, en liv ekrir dan dezyenm syek, ti deklare ki Bondye i diriz lemonn avek tou le de lanmen. Son “lanmen gos” i Dyab, e i servi li pour kree difikilte ek soufrans. Son “lanmen drwat” i Zezi, e i servi li pour sove e beni.

I annan lezot ki vwar li difisil pour aksepte ki Bondye i kapab permet soufrans menm si pa li ki lakoz soufrans. Alors zot in swazir pour refize aksepte ki soufrans i egziste. Mary Baker Eddy ti ekrir ki “mesanste pa vreman egziste, e i napa okenn baz reel.” I ti osi dir ki “si dimoun ti pran pese, maladi ek lanmor konmkwa zot pa nanryen ditou, zot ti pou disparet.”—Science and Health With Key to the Scriptures.

Apre tou sa bann maler ki’n arive dan listwar imen, sirtou depi premye lager mondyal ziska nou letan, bokou dimoun in konklir ki senpleman Bondye pa kapab anpes soufrans. En savan Zwif, David Wolf Silverman ti ekrir, “Dapre mon lopinyon, [sa lesey pour touy tou bann Zwif pandan dezyenm lager mondyal] in fer li difisil pour dimoun vreman krwar ki Bondye i tou pwisan.” I ti azoute, “Pour nou kapab konpran Bondye, fodre kapab konpran akoz en bon Bondye i permet mesanste. Sa i kapab posib, selman si I pa tou pwisan.”

Me sa bann deklarasyon ki dir ki Bondye i responsab pour soufrans, ki i pa kapab anpes soufrans, oubyen ki soufrans pa reel, pa ofer preski okenn rekonfor pour bann ki pe soufer. Deplis, sa bann krwayans i konpletman kontredir sa ki Labib i dir. Labib i dekrir en Bondye ki zis, ki pwisan, e ki kontan imen. (Zob 34:10, 12; Zeremi 32:17; 1 Zan 4:8) Alor, ki Labib i dir lo akoz soufrans i ganny permet?

Ki mannyer Soufrans ti konmanse?

Bondye pa ti kree imen pour soufer. Okontrer i ti donn sa premye koup imen, Adan ek Ev, en lespri ek lekor parfe. I ti prepar en zoli zarden kot zot ti pou reste, e i ti donn zot en travay satisfezan e enteresan pour fer. (Zenez 1:27, 28, 31; 2:8) Me pour zot kontinyen viv ere, zot ti bezwen rekonnet lotorite Bondye ek son drwa pour desid sa ki bon ek sa ki move. Sa drwa Bondye ti ganny reprezante par en pye dibwa ki ti apel “pye konnesans bon e move.” (Zenez 2:17) Adan ek Ev ti pou demontre zot soumisyon anver Bondye si zot ti obeir son komannman pour pa manz fri sa pye dibwa.a

Malerezman, Adan ek Ev pa ti reisi obei Bondye. En move lespri, ki plitar ti ganny idantifye konman Satan Dyab, ti konvenk Ev ki i ti pou pli bon pour li pa obeir Bondye. Annefe, Satan ti pe pretann ki Bondye ti pe anpes Ev ganny en keksoz vreman dezirab. Sa se lendepandans oubyen drwa pour swazir pour li menm sa ki bon ek sa ki move. Satan ti fer krwar ki si Ev ti manz sa fri, ‘son lizye ti pou sertennman ouver e i ti pou vin parey Bondye, pour konn sa ki bon ek sa ki move.’ (Zenez 3:1-6; Revelasyon 12:9) Vi ki Ev ti ganny atire par sa posibilite pour vin endepandan, alor i ti manz sa fri. Apre Adan ti fer parey.

Sa menm zour, Adan ek Ev ti konmans eksperyans rezilta zot rebelyon. Par rezet dominasyon Bondye, zot ti perdi proteksyon ek benediksyon ki zot ti gannyen letan zot ti soumet anver Bondye. Bondye ti pous zot dan Paradi e i ti dir Adan: “Akoz ou, later pou ganny modi. Dan douler ou pou manz son prodwi toudilon ou lavi. Ou pou rente pour ganny ou dipen ziska ou retourn dan sirfas later.” (Zenez 3:17, 19) Adan ek Ev ti bezwen sibir maladi, douler, lavyeyes, ek lanmor. Soufrans ti’n vin en par zot lavi.—Zenez 5:29.

Rezourd sa Sitiasyon

Petet en dimoun i kapab demande, ‘Eski Bondye pa ti’n kapab senpleman inyor pese Adan ek Ev?’ Non, akoz sa ti pou fer perdi ankor plis respe anver son lotorite, petet ankouraz lezot rebelyon e anmenn plis soufrans. (Eklezyast 8:11) Deplis, si Bondye ti’n toler zot dezobeisans sa ti pou fer li vin en konplis dan sa ki mal. Moiz en ekriven Labib, i rapel nou sa konsernan Bondye: “Son aktivite i parfe, akoz tou son bann fason fer i zis. En Bondye fidel, avek ki napa lenzistis. I drwat e zis.” (Deterononm 32:4) Pour azir an armoni avek sa ki i ete, Bondye ti bezwen permet Adan ek Ev sibir konsekans zot dezobeisans.

Akoz Bondye pa ti toudswit detri sa premye koup imen ansanm avek Satan, ki ti par deryer sa rebelyon? I ti annan sa pouvwar pour fer li. Koumsa Adan ek Ev pa ti pou’n fer zanfan ki ti pou bezwen soufer e mor. Me si Bondye ti’n servi son pouvwar dan sa fason, sa ti pou prouve ki i egzers son lotorite lo son bann kreatir entelizan dan en fason ki pa zis e apropriye. Anplis ki sa, si Adan ek Ev ti mor san ki zot fer zanfan, sa ti pou vedir ki plan Bondye pour ranpli later avek zot desandans parfe, pa ti pou ganny akonpli. (Zenez 1:28) Deplis, “Bondye pa parey zonm . . . Nenport keksoz ki i promet, i fer; sa ki i dir i arive.”—Nonm 23:19, Today’s English Version.

Dan son lasazes parfe, Zeova ti deside fikse en serten kantite letan pour les sa rebelyon dire. Sa ti pou donn bann rebel ase loportinite pour vwar rezilta lendepandans avek Bondye. Listwar ti pou klerman demontre ki limanite i bezwen gidans Bondye e montre siperyorite dominasyon Bondye konpare avek sa ki pour zonm oubyen Satan. Anmenmtan, Bondye ti pran aksyon pour fer sir ki son plan orizinal pour later i ganny akonpli. I ti promet ki en “semans,” oubyen “desandans,” ti pou vini e ti pou ‘kraz latet Satan.’ Sa pou met en lafen avek son rebelyon ek son bann move konsekans enn fwa pour tou.—Zenez 3:15.

Zezi Kri ti sa Semans promiz. Dan 1 Zan 3:8, nou lir ki “Garson Bondye in aparet . . . pour detri bann travay dyab.” I ti fer sa par donn son lavi imen parfe e pey sa pri liberasyon pour delivre bann desandans Adan dan pese ek lanmor ki zot in erite. (Zan 1:29; 1 Timote 2:5, 6) Pour bann ki vreman demontre lafwa dan sakrifis Zezi, Bondye in promet pour soulaz zot avek soufrans pour touzour. (Zan 3:16; Revelasyon 7:17) Kan ki sa pou arive?

En Lafen avek Soufrans

Rezet lotorite Bondye in anmenn soufrans ki napa mo pour dekrir. Alor, Bondye i bezwen egzers son lotorite dan en fason spesyal pour li met en lafen avek soufrans imen e akonpli son plan orizinal pour later. Zezi ti mansyonn laranzman Bondye, ler i ti ansenny son bann disip pour priye: “Nou Papa ki dan lesyel . . . ki ou Renny i ganny etabli; ki ou lavolonte i ganny akonpli lo later parey dan lesyel.”—Matye 6:9, 10.

Letan ki Bondye in permet pour imen esey zot prop gouvernman pe al fini. Dapre lakonplisman profesi Labib, son Rwayonm ti ganny etablir dan lesyel an 1914, avek Zezi Kri konman son Lerwa.b Tre byento, i pou kraz e met en lafen avek tou gouvernman imen.—Danyel 2:44.

Diran son kourt peryod letan lo later, Zezi ti fourni en avangou lo bann benediksyon ki imen pou gannyen alavenir. Sa pou posib ler Bondye pou diriz ankor limanite. Bann Levanzil i fourni levidans ki Zezi ti konpran santiman bann dimoun ki ti mizer dan lasosyete e ki ti ganny trete dan en fason enzis. I ti geri bann malad, donn manze bann ki lafen, e i ti resisit bann mor. I ti menm kapab kontrol bann lafors dan lanatir. (Matye 11:5; Mark 4:37-39; Lik 9:11-16) Imazin sa ki Zezi pou akonpli ler i servi son pouvwar pour benefisye tou imen obeisan! Labib i promet ki par mwayen dominasyon Kris, Bondye “pou eswiy tou larm dan zot lizye. Pou nepli annan ni dey, ni plere, ni soufrans, parski lemonn ansyen in disparet.”—Revelasyon 21:4.

Rekonfor pour bann ki pe soufer

I vreman ankourazan pour konnen ki nou Bondye tou pwisan e ranpli avek lanmour, i enterese avek nou e ki tre byento i pou anmenn soulazman pour limanite! Ordinerman, en pasyan ki byen malad i pare pour aksepte en tretman ki pou geri li, menm si sa tretman i fer li soufer. Pareyman, nou konnen ki fason ki Bondye pe rezourd sa sitiasyon pou anmenn bann benediksyon eternel. Alors sa konnesans i kapab soutenir nou dan nenport ki difikilte tanporer ki nou rankontre.

Ricardo, mansyonnen pli boner dan sa premye lartik, i en dimoun ki’n aprann pour retir rekonfor dan promes Labib. I dir: “Apre lanmor mon madanm, mon ti anvi izol mon lekor. Me apre, mon ti realize ki sa pa pou fer mon madanm retourn vivan e ti pou zis afekte mwan plis ankor emosyonnelman.” Alor Ricardo ti kontinyen asiste bann renyon Kretyen e partaz mesaz Labib avek lezot. Ricardo i dir, “Mon ti santi sipor Zeova e remarke konman i ti reponn mon lapriyer dan bann pti keksoz. Sa ti fer mwan apros pli pre avek li. Se rekonnet lanmour Bondye ki ti permet mwan andir leprev pli dir ki mon’n deza pas ladan.” I admet: “Mon ankor mank mon madanm en kantite, me aprezan mon san poursan krwar ki napa nanryen ki Zeova i permet pour arive ki kapab fer nou ditor pour touzour.”

Parey Ricardo ek plizyer milyon lezot, eski ou osi ou anvi vwar sa letan kot soufrans ki limanite pe pas ladan ozordi ‘pa pou ganny rapel, ni vin dan leker’? (Izai 65:17) Annan lasirans ki bann benediksyon Rwayonm Bondye i en keksoz ki ou kapab gannyen, si ou swiv sa konsey Labib: “Resers Zeova . . . kan i ankor kapab ganny trouve. Apel li kan i ankor pros.”—Izai 55:6.

Pour ed ou fer sa, fer li vin ou priyorite pour ou lir e etidye Parol Bondye seryezman. Konn Bondye ek sa enn ki i’n anvoye, Zezi Kri. Esey viv an armoni avek standar Bondye e montre ki ou pe volonterman soumet avek son dominasyon. Si ou viv koumsa, sa pou anmenn ou plis lazwa kantmenm ou kapab pe fer fas avek bann leprev. Finalman, ou pou rezwir lavi dan en lemonn kot soufrans pou nepli egziste.—Zan 17:3.

[Not anba lo paz]

[Bwat lo paz 6, 7]

KONMAN NOU KAPAB FER FAS AVEK SOUFRANS?

“Desarz tou zot sousi lo [Bondye].” (1 Pyer 5:7) I normal pour nou ankoler, konfize, e santi ki nou’n ganny abandonnen ler nou pe soufer oubyen vwar en dimoun ki nou kontan pe soufer. Toudmenm, annan konfyans ki Zeova i konpran nou santiman. (Egzod 3:7; Izai 63:9) Parey bann zonm fidel dan lepase, nou kapab devid nou leker avek li e eksprim nou bann dout ek lenkyetid. (Egzod 5:22; Zob 10:1-3; Zeremi 14:19; Abakouk 1:13) Petet i pa pou retir nou bann leprev par fer en mirak. Me i kapab reponn nou lapriyer senser, par donn nou lasazes ek lafors pour fer fas avek nou bann difikilte.—Zak 1:5, 6.

“Pa bezwen etonnen par bann gran soufrans ki zot pe pas ladan pour teste zot, konmsi sa ki pe ariv zot ti bann keksoz ekstraordiner.” (1 Pyer 4:12) Dan sa verse, Pyer ti pe koz konsernan persekisyon. Me son parol i osi aplik byen dan nenport soufrans ki en Kretyen pe pas ladan. Imen i soufer akoz maladi, mank nesesite debaz dan lavi, e lanmor en dimoun pros. Labib i dir ki “letan ek levennman san ekspekte” i ariv lo tou dimoun. (Eklezyast 9:11) Sa bann keksoz i form par sa lavi ki imen pe viv ozordi. Si nou gard sa antet, sa pou ed nou fer fas avek soufrans ek maler ler i arive. (1 Pyer 5:9) Me premye keksoz ki nou bezwen pa oubliye i ki “lizye Zeova i lo bann dimoun drwat, e son zorey i ekout zot lapel pour led.” Sa i vreman en sours rekonfor.—Psonm 34:15; Proverb 15:3; 1 Pyer 3:12.

“Ki ou lesperans i gard ou dan lazwa.” (Romen 12:12) Olye kontinyen konsantre lo lazwa ki nou ti eksperyanse dan lepase, nou kapab medit lo promes Bondye pour met en lafen avek soufrans. (Eklezyast 7:10) Sa lesperans solid pou protez nou parey en kas i protez latet. Lesperans i apez lefe ki bann maler i anmennen dan lavi. I osi ede pour anpes sa bann maler detri nou lasante mantal, emosyonnel, oubyen spirityel.—1 Tesalonisyen 5:8.

[Portre lo paz 5]

Adan ek Ev ti rezet dominasyon Bondye

[Portre lo paz 7]

Bondye i promet en lemonn kot pou napa soufrans